Xixón al día

Categoría: Tema del día

  • La costa occidental asturiana, premiu al meyor destín nacional

    La costa occidental asturiana, premiu al meyor destín nacional

    La costa occidental asturiana foi distinguida como meyor destín nacional na XI edición de los Premios Condé Nast Traveler n’España. Consideraos los galardones más importantes del mundu de los viaxes, reconocen la excelencia nes diverses categoríes de la Gold list 2019.

    El director xeneral de Comerciu y Turismu, Julio González Zapico, recoyó anueche en Madrid esti premiu, concedíu por votación de los llectores. El galardón distingue cada añu los destinos, establecimientos turísticos y marques d’estilu de vida preferíos pol públicu. Zapico aseguró que la costa occidental asturiana ye «un paraísu dientro del paraísu», y animó al públicu a «descubrir les sos sableres tranquiles, con unos cantiles d’infartu dende’l cabu Vidíu o’l cabu Bustu, a pasiar poles villes de Castropol, Ḷḷuarca o Cuideiru, y a comer el meyor pescáu en Viavélez o A Veiga«. «Too ello puede facese dende una perspectiva sostenible, respetuosa colos valores de la marca Asturies Paraísu Natural que resulten tamién reconocíos nesti galardón», esplicó.

    L’occidente asturianu algamó’l 10,6% de les pernoctaciones rexistraes nel sistema d’información turística d’Asturies (Sita), según el so últimu informe añal, de 2017. El Gobiernu d’Asturies entamó nos dos últimos años 25 viaxes a esta zona con periodistes y axentes, que se traducieron en reportaxes de televisión, prensa y radio, mesmo que nuna medra de la presencia del occidente asturianu nos programes de turoperadores nacionales ya internacionales. Traveler ye la revista de viaxes del grupu editorial Condé Nast. Cunta col portal d’información especializada en viaxes más lleíu n’España, con 863.000 usuarios únicos, según datos de Comscore.

  • 4.125 estudiantes examínense de la EBAU n’Asturies

    4.125 estudiantes examínense de la EBAU n’Asturies

    Un total de 4.125 estudiantes, 2.295 muyeres y 1.830 homes, van examinase de la Prueba d’Evaluación de Bachilleratu para l’Accesu a la Universidá (EBAU) correspondiente a 2019, que s’empecipia esti martes. Esto supon una medría del 3,02% al respective de 2018, cuando les y los estudiantes convocaos al exame fueron 4.004.

    Los exames van desenvolvese hasta’l xueves, día 6. La publicación de les notes va llevase a cabu’l 14 de xunu al traviés de la páxina web de la Universidá d’Uviéu. El tribunal va tar compuestu por 390 persones. El númberu de sedes para l’exame de xunu va ser de trece: cuatro n’Uviéu, tres en Xixón, dos n’Avilés, y una en Mieres, Ribeseya, Cangas y Tapia. Pela so parte, la convocatoria estraordinaria va tener llugar del 2 al 4 de xunetu.

    Los estudiantes titulaos de Bachilleratu tendrán d’esaminase de les 4 asignatures, que constitúin la fase d’accesu, cursaes en segundu cursu de bachilleratu según la modalidá ya itinerariu realizáu. Cada exerciciu de la fase d’accesu va calificase de 0 a 10 puntos. La calificación de la fase d’accesu va ser la media aritmética de les calificaciones numbériques llograes en caúna de les materies, espresada nuna escala de 0 a 10 puntos con trés cifres decimales y arrondada a la milésima. Esta calificación tendrá de ser igual o superior a 4 puntos para faer media cola calificación final del bachilleratu.

    La nota de la EBAU va calculase sopesando un 60 por 100 de la calificación final del Bachilleratu (NMB) y un 40 por 100 de la calificación de la fase d’accesu de la prueba (CFA). Entenderase qu’un estudiante o una estudiante axunta los requisitos d’accesu cuando la resultancia d’esta ponderación sía igual o superior a 5 puntos.

  • Activáu’l plan llagos de Cuadonga hasta’l 16 d’ochobre

    Activáu’l plan llagos de Cuadonga hasta’l 16 d’ochobre

    El plan especial de tresporte públicu a los llagos de Cuadonga ya ta activu. Entamó esti sábadu y va tar en funcionamientu hasta’l 16 d’ochobre. Col fin de protexer el Parque Nacional Picos d’Europa (Reserva de la Biosfera), nos díes nos que’l sistema tea operativu la carretera ente Cuadonga y los llagos va permanecer cerrada al tráficu de vehículos particulares ente les 8.30 y les 21.00 hores. Los díes 8 de xunu (cola cicloturista), 25 de xunetu (Fiesta del Pastor) y 8 de setiembre (Día d’Asturies), va haber una regulación especial.

    Nesti periodu branizu la primer xubida n’autobús hasta los llagos va ser a les nueve de la mañana y la postrera a les siete y media de la tarde. La postrera de baxada de los llagos va ser a les ocho y media de la tarde. Esti tresporte públicu colectivu garantiza’l desplazamientu de tolos visitantes ente Cangues d’Onís, Cuadonga y los llagos, efectuando paraes nos principales puntos d’interés de la ruta. Cuenta, amás, como novedá con un sistema d’información a bordu.

    Les tarifes vixentes establecen un preciu de 9 euros p’adultos y de 3,50 pa neños menores de doce años. Los menores de trés años viaxen de baldre. Amás, va haber un autobús que xune Cangues d’Onís y Cuadonga, con un costu por billete de 1,55 euros. El preciu de los aparcamientos habilitaos na redolada de Cuadonga ye de 2 euros por vehículu y día.

    El plan especial yá funcionó esti añu del 13 d’abril al 5 de mayu y va volver facelo del 1 al 3 de payares y del 6 al 9 d’avientu.

  • La regata de globos alza’l vuelu

    La regata de globos alza’l vuelu

    La tercer regata de globos aerostáticos ‘Xixón dende l’aire’ despegó esta mañana del parque d’El Rinconín y enllenó de color el cielu de la ciudá. Los equipos participantes llegaron a les diez y media y poco más tarde entamaron los vuelos. Nesta edición participen 23 pilotos llegaos dende toa España y, inclusive, dende l’estranxeru. Javier Tarno, Juanma Copete, Jorge Iglesias y María Luisa Cabañeru son dalgunos de los inscritos.

    El bon tiempu va permitir esfrutar del espectáculu d’esta tercer edición de la regata de globos en Xixón, que se va celebrar hasta esti domingu, 2 de xunu. Peles mañanes, los despegues van realizase dende’l ‘solarón’, mientres que, peles tardes, van facer dende El Rinconín. Sicasí, esta previsión va tar condicionada pola orientación y fuercia del aire. Tamién se va celebrar una ‘Night glow’, el sábadu 1 de xunu nel ‘solarón’.

     

     

  • Prohibío fumar en cuatro playes d’Asturies

    Prohibío fumar en cuatro playes d’Asturies

    Acabóse fumar en cuatro playes d’Asturies. La Conseyería de Sanidá va prohibir esti branu’l consumu de tabacu nes sableres de Misiego, Miami y El Puntal, en Villaviciosa, y Los Quebrantos, en Sotu’l Barcu. El programa Sableres ensin fumu tien por oxetivu promover una vida llibre d’esti productu, prevenir el consumu y fomentar el respetu a les persones y al mediu ambiente. La iniciativa va desenvolvese anguaño como esperiencia piloto. La intención ye estendelo darréu a otros conceyos y constituyir una rede autonómica de sableres ensin fumu. Esta propuesta educativa y de concienciación social pa promocionar estilos de vida saludables va desenvolvese en collaboración colos dos conceyos.

    Nos cuatro arenales calificaos como Sableres ensin fumu va promovese que nun se fume en tola zona o n’árees señalizaes, sacante los espacios abiertos de los locales d’hostelería. Preténdese, amás, protexer del fumu del tabacu a neños y adolescentes. La esposición al fumu del tabacu ye nociva en toles etapes de la vida y especialmente nes edaes más tempranes.

    Nun se va poder fumar en tola zona o n’árees señalizaes, sacante los espacios abiertos de los locales d’hostelería

    El Gobiernu asturianu destaca que la prohibición de fumar n’estes cuatro playes fomenta tamién el respetu al mediu ambiente. Los filtros de los pitos nun son biodegradables y pueden tardar hasta 10 años en descomponese. Tán diseñaos p’atropar los componentes del tabacu, incluyíes les sustances químiques más peligroses, que son lliberaes en contactu cola agua y lleguen a ríos y mares. Una colilla contamina ocho llitros d’agua. Amás, al refundiales nes sableres, pueden ser inxeríes por especies marines o acabar en manos de neños.

    Dalgunes de les sustances nocives que se toparon nes colilles son pesticides, que provoquen un potencial efectu tóxicu sobro’l mediu y pueden atropase na cadena alimentaria. Tamién se detectaron otres como’l etilfenol, la nicotina, el mentol, metales o alquitrán y carcinóxenos, ente otres.

    Esta situación supon una seria amenaza pal mediu ambiente, yá que n’España fumen unos 89 millones de pitos al día, lo que supon 32.455 millones de filtros añalmente, según un informe del Comité Nacional pa la Prevención del Tabaquismu. Tán fechos d’acetato de celulosa, una sustanza non biodegradable que se disgrega en pequenes pieces, pero que’l so material fonte nunca desapaez. Nes sableres, el 14% de borrafes retiraes son filtros de pitos. La campaña quier sensibilizar a la población infantil y xuvenil énte’l tabaquismu ya informar sobro los efectos nocivos del fumu.

  • Alejandro Portes, Premiu Princesa de Ciencies Sociales

    Alejandro Portes, Premiu Princesa de Ciencies Sociales

    El sociólogu estadounidense d’orixe cubanu Alejandro Portes foi galardonáu col Premiu Princesa d’Asturies de Ciencies Sociales 2019, según fixo públicu güei n’Uviéu’l xuráu encargáu de la so concesión. Esta candidatura foi propuesta pol Grupu d’Estudios sobro Inmigración y Minoríes Étniques y el Centru d’Estudios ya Investigación en Migraciones de la Universidá Autónoma de Barcelona.

    Alejandro Portes (Cuba, 13 d’ochobre de 1944) empezó los sos estudios na Universidá de L’Habana (1959-60) y treslladóse a Buenos Aires, onde se matriculó en Socioloxía na Universidá Católica d’Arxentina. Nacionalizáu estadounidense en 1968, siguió la so formación na de Creighton (EE. UU.) y, en 1970, doctoróse na Universidá de Wisconsin-Madison (EE. UU.). Dende entós foi profesor de les universidaes de Texas (1971-1975), Duke (1975-1980), Johns Hopkins (1980-1996) y Princeton, a la que llegó en 1997 y onde foi, ente 2003 y 2014, catedráticu Howard Harrison y Gabrielle Snyder Beck del Departamentu de Socioloxía. Tamién foi cofundador en 1988 del Centru de Migraciones y Desenvolvimientu de Princeton, que dirixió dende 1999 a 2012. Dende 2011 ye profesor de la Universidá de Miami y dende 2014, eméritu de Princeton. Ye investigador del Centru pa la Investigación y l’Analís de la Migración del University College de Londres. Foi miembru del conseyu asesor del Institutu Max Planck pal Estudiu de la Diversidá Relixoso y Étnico y profesor visitante en delles universidaes europees ya iberoamericanes.

    La so actividá investigadora céntrase nos ámbitos de les migraciones internacionales y la socioloxía económica

    Consideráu unu de los sociólogos de mayor prestíu internacional, Portes destacó pola so actividá investigadora nos ámbitos de les migraciones internacionales, la socioloxía económica, el desenvolvimientu comparativu, la urbanización de los países en víes de desenvolvimientu y la marginalidad social. Integrante de la nueva socioloxía económica, los sos estudios convirtiéronse nuna referencia pa emponer y entamar la investigación empírica de científicos sociales de too el mundu. El so trabayu de les postreres cuatro décades ayudó a conocer y entender l’adaptación de los inmigrantes nos sos países de destín.

    En 1992 empecipió un proyectu al llargu plazu, l’Estudiu llonxitudinal de fíos d’inmigrantes’. Entrevistó a más de 5.000 neños, repitiendo la entrevista na adolescencia. El so diagnósticu foi que la llamada segunda xeneración integrábase bien na sociedá estadounidense, pero tamién detectó un riesgu d’inadaptación nos fíos d’inmigrantes illegales d’escasu nivel educativu. Publicó, con Ruben Rumbaut, esti estudiu en ‘Legacies: The Story of the Inmigrant Second Generation’ (2001), ganador de dellos premios de l’Asociación Americana de Socioloxía. En 2013, col Institutu Universitariu Ortega y Gasset, realizó un analís similar n’España con casi 7.000 entrevistes. Ente otres conclusiones, apuntó que’l 50 % de los fíos d’inmigrantes siéntese español. En 2016 publicó ‘Spanish Legacies: The Coming of Age of the Second Generation’, la segunda parte del estudiu.

    En 2008 recibió’l premiu añal que concede l’Academia Americana de les Ciencies

    Pertenez a los conseyos editoriales de Revista Española de Socioloxía, Actes de la Recherche en Sciences Sociales, International Migration Review, Revista Mexicana de Socioloxía y Ethnic and Racial Studies. Ye autor d’unos 250 artículos y más de 30 llibros.

    Ye miembru de l’Academia Americana de les Artes y les Ciencies y de l’Academia Nacional de Ciencies d’Estaos Xuníos. Amás, Portes presidió les asociaciones Sociolóxica Internacional y la Sociolóxica Americana y ye presidente electu de Sociedá Sociolóxica Oriental. Ye doctor honoris causa pola neoyorquina New School for Social Research y poles universidaes de Wisconsin-Madison (EE. UU.) y Xénova (Italia) y profesor honoríficu de les universidaes d’Alicante y de Nueva York Abu Dhabi. En 2008 recibió’l premiu añal que concede l’Academia Americana de les Ciencies.

  • L’asturianu Fernando González corona Nepal

    L’asturianu Fernando González corona Nepal

    El montañeru asturianu Fernando González Rodríguez ta acabante de cumplir un suañu. La selmana pasada coronó los 6.189 metros del picu Imja Tse, más conocíu como Island Peak. Trátase d’una montaña asitiada na cordillera del Himalaya nepalí, nel valle del Solokhumbu, xusto tres la paré sur del Lhotse. Anque esti picu nun ye «nada comparao colos 8000 que tien al lláu», nun foi un retu nada cenciellu. «Tien pasos complicaos nel glaciar y tramos de másima pendiente nuna parede de xelu», esplica.

    «Salimos a la una la madrugada con una xelada tremenda pa, depués de dir ganando metros per un pedreru infernal, metemos pel glaciar y dir pasando grietes coles escaleres y pa rematar, los 200 metros caberos enantes de llegar a l’arista», rellata. Una aventura de nueve hores de xubida «mui dura» dende’l campamentu base que, pa González Rodríguez, paga la pena. «Foi xugar a ser himalayista, pero nun quiero nin camentar lo que tien que ser escalar un ocho mil».

    Fernando González, mientres la xubida al picu Imja Tse.
    Fernando González, mientres la xubida al picu Imja Tse.
  • Más pelegrinos nel Camín de Santiago per Asturies

    Más pelegrinos nel Camín de Santiago per Asturies

    Un total de 2.821 pelegrinos percorrió los itinerarios asturianos del Camín de Santiago nel primer cuatrimestre del añu. Esta cifra supón un aumentu del 12 % al respective del mesmu periodu del 2018, según los datos espublizaos pola Oficina del Pelegrín de Santiago de Compostela.

    La declaración d’estes rutes como Patrimoniu de la Humanidá pola Unesco favoreció dende’l 2015 una medría del 24,8 % de los usuarios que, nel casu del Camín Primitivu, algama’l 31,1 %. L’añu pasáu, 34.078 pelegrinos pasaron pelos itinerarios asturianos, que son ún de los productos de cabecera del Programa de Turismu Sostenible del Principáu.

    La Conseyería d’Empléu, Industria y Turismu entamó esta selmana’l viaxe al Principáu d’un representante de l’axencia norteamericana Your way adventures. L’oxetivu ye que la empresa incorpore al so catálogu los itinerarios asturianos, amás de la conexón ente’l Camín Francés y el Primitivu. Anguaño, l’axencia ufierta yá viaxes de 7 o 16 díes pel camín francés y el portugués. Esta iniciativa enmárcase nos alcuerdos algamaos con dellos operadores internacionales na feria Fair way, celebrada en Santiago de Compostela en febreru.

  • Adrián Barbón arrasa: «Ye un resultáu estraordinariu»

    Adrián Barbón arrasa: «Ye un resultáu estraordinariu»

    «Quiero dicir a los asturianos de corazón gracies, gracies de corazón. Ye un enorme honor y una enorme responsabilidá», asina valoró esti domingu Adrián Barbón el trunfu electoral del 26M. Ente galyíos de «presidente, presidente», destacó públicamente’l trabayu de la FSA-PSOE na xornada electoral de los interventores y apoderaos «porque somos un equipu y un proyectu colectivu, y la fortaleza d’esti partíu ta nos nuesos militantes y na xente que confía en nós».

    El candidatu socialista a la presidencia del Principáu amosó la so sorpresa por un resultáu que meyoró les previsiones. La formación suma seis nuevos diputaos y queda a tres escaños de la mayoría absoluta. El PP resiste na Xunta Xeneral con diez diputados, unu menos que va cuatro años. Ciudadanos pasa a ser la cuarta fuercia de la cámara asturiana, con cinco asientos. Podemos fúndese con Lorena Gil, que dexa pel camín cinco de los nueve representantes colos que cuntaba la formación hasta agora. Tamién baxen Izquierda Xunida, que pasa de cinco a dos diputaos, y Foru, que pierde ún. Per primer vegada, Vox algama representación nel parllamentu asturianu, anque queda a les puertes de tener grupu propiu.

    «Valió de fatalismu»

    N’estimando «a la mio familia y amigos más íntimos porque en tou momentu amosáronme’l so ciñu y nunca me faltaron», quixo faer «un brinde bien especial por persones que yá nun tán, polos expresidentes Rafael Fernández y Tini Areces, por Joaquí, militante de Llangréu, y por Marce, un vecín de Llaviana de puerta con puerta. Brindo por ellos porque ellos yá nun pueden brindar».

    «Cuando fui escoyíu secretariu xeneral», remarcó n’otru momentu de la so intervención, «dixi o camudamos o nos camuden. Ende empieza la razón de ser de nuevamente recuperar l’enfotu de tanto de xente, la necesidá de tender pontes y saber escuchar de la sociedá y esti enfotu de recuperar l’enfotu tase encauzando». Nesti sentíu, reclamó la necesidá de «recuperar l’enfotu pa ganar el futuru d’Asturies, pa construyir esa meyor Asturies d’ilusión, enfotu y optimismu, porque valió yá de tantu fatalismu y pesimismu, Asturies precisa optimismu».

    Cola resultancia electoral del 26M, Adrián Barbón sorrayó que «güei empecipiamos una nueva páxina de la hestoria del socialismu n’Asturies, y facer más fortalecíos, recuperando la conexón». Asina, enfatizó que «los 20 diputaos socialistes son una resultancia estraordinaria y los cientos de miles de votantes qu’escoyeron la papeleta del PSOE representen xuna manera de faer política, que ye la que quieren los homes y muyeres d’Asturies».

    Adrián Barbón repitió que la victoria electoral va «dar estabilidá a Asturies, con influencia nel Conseyu de Ministros y nel partíu y dicir que l’axenda política d’Asturies ta de nuevu enriba del Conseyu de Ministros». N’estimando les llamaes de felicitación de los presidentes Pedro Sánchez y de Javier Fernández, el candidatu a la presidencia del Principáu destacó que «tenemos un proyectu y los problemes poner enriba de la mesa porque hai que dar una inyección d’ilusión, porque hai problemes pero tamién podemos dar nueves soluciones».

  • Xixón viéndese n’Andalucía como destín turísticu

    Xixón viéndese n’Andalucía como destín turísticu

    Xixón Turismu promociónase n’Andalucía. Un autobús promocional va percorrer Málaga y Sevilla, dos localidaes que tienen conexón direuta per avión con Asturies, dende esti martes y hasta’l dos de xunetu. Amás, va instalase una carpa, onde’l públicu va poder recoyer información turística, visitar un llagar de sidra per realidá virtual, deprender a escanciar sidra y participar en dellos sorteos de botelles de sidra, lotes gastronómicos y viaxes a Xixón.

    L’aición promocional complétase con una presentación de la campaña de Xixón Turismu en Sevilla’l xueves 30 de mayu, a la una de la tarde, nel Hotel Inglaterra empobinada a profesionales, prensa y blogues de viaxes. Con estos últimos, desendolcóse una promoción previa pa crear espectación na que recibieron un ‘kit pa ser el meyor escanciador o escanciadora de sidra n’Andalucía’ y pa que compartieran los sos avances nos sos blogues y redes.

    Nel actu va participar el conceyal de Turismu de Xixón, Jesús Martínez Salvador; el direutor de Xixón Turismu, Jorge González-Palacios; y representantes de Turismo de Sevilla y Volotea. L’aición vencéyase a la estratexa de promoción de Xixón como destín turísticu y tien la collaboración de DOP Sidra d’Asturies, Volotea, Turismo de Sevilla y Ayuntamiento de Málaga.

    Horarios

    Martes y miércoles, 28 y 29 de mayu na Plaza de La Marina, Málaga

    Xueves y domingu, 30 de mayu y 2 de xunu na Puerta de Jerez, Sevilla

    Vienres y sábadu 31 de mayu y 1 de xunu nel CC. Nervión Plaza, Sevilla

    N’horariu de 11 a 20.30h., sacante’l domingu que termina a les 15h