Xixón al día

Etiqueta: Axenda

  • Travel Pop Up: Los meyores ‘Youtubers’ de viaxes en Xixón

    Travel Pop Up: Los meyores ‘Youtubers’ de viaxes en Xixón

    • Va ser esti sábadu y domingu, 12 y 13 d’avientu, y nél van afayase los meyores youtubers ya influencers d’España y Llatinoamérica.
    • L’eventu va empobináu al públicu xeneral y creadores de conteníu que quieran inspirase nes histories de viaxeros de sonadía n’Instagram, Youtube y hasta TikTok.
    • Entraes: www.travelpopup.es

    Esti fin de selmana, aterriza en Xixón la edición segunda de Travel Pop Up by IATI, un evento qu’axunta a los meyores youtubers de viaxes d’España y Llatinoamérica. L’eventu, qu’anguaño va desendolcase de forma online, ta entamáu por Fun Travel Ven y patrocináu por Xixón Turismu.

    Va ser el sábadu 12 y domingu 13 d’avientu, con tresmisión en direuto dende Xixón y presentáu por la viaxera xixonesa Ana Rellán, del proyeutu Zapatillas por el Mundo. L’eventu ta empobináu al públicu xeneral y creadores de conteníu que quieran inspirase nes histories de viaxeros de sonadía n’Instagram, Youtube y TikTok. Esta nueva edición axunta a más de 10 youtubers ya influencers de viaxes que son referentes nel turismu español y llatinoamericanu, ente ellos: Enrique Alex, el canal de Youtube númberu 1 n’España; Mariel de Viaje, la bloguera de viaxes de mayor sonadía en Méxicu y, anguaño, una de les ocho grandes muyeres viaxeras del mundu, según el periódicu El País; Álex Tienda, ún de los youtubers de viaxes más famosos de fala hispana con más de 2 millones de suscriptores.

    Una montonera d’actividades viaxeres

    El sábadu 12 y domingu 13 d’avientu, los asistentes van esfrutar de delles actividaes con creadores de conteníu de sonadía nes redes sociales: charres, entrevistes, cara a cara, talleres y hasta un alderique sobro teunoloxía y movilidá pa un desendolcu sostenible cola participación de Jaime de Jaraiz Lozano, presidente y CEO en LG Electronics Iberia; Fátima González, direutora rexonal Europa del Sur en Ecosia; y Busan Moon, viaxeru que percorrió 21.000km en coche llétricu dende Les Canaries hasta Corea’l Sur.

    Otres viaxeres y viaxeros que tamién formen parte del cartelu de 2020:

    –  Alicia Aradilla, trotamundos española y famosa illustradora de viaxes. Recién asoleyó una guía illustrada xunto a Condé Nast Traveler.

    –  Dustin Luke, el youtuber norteamericanu más porteñu y famosu na Arxentina.

    –  Cristina Verdú y Gustavo Karlsson, una pareya viaxera GoPro Family Member.

    –  Christian Byfield, ún de los viaxeros más perconocíos en Colombia.

    –  Dos locos de Viaje, la pareya de viaxes con mayor audiencia en Venezuela.

    –  Gemelos Viajeros, tiktokers de viaxes españoles virales en TikTok.

    –  Azul Místico, viaxera española que vive en Londres y ex azafata de vuelu con más de mediu millón de siguidores.

    –  Patoneando, bloguera de viaxes colombiana que, dende va 6 años, viaxa sola.

     

  • Xixón caltién (de momentu) la Selmana Grande

    Xixón caltién (de momentu) la Selmana Grande

    La crisis sanitaria xenerada pola pandemia de la Covid-19 paralizó’l mes pasáu la vida nel país. El confinamientu decretáu pol Estáu d’Alarma caltién a los ciudadanos zarraos en casa dende’l pasáu 15 de marzu. Una situación que se va prorrogar hasta polo menos el 26 d’abril. La intención del Gobiernu central ye entamar la desescalada de les restricciones a la movilidá de los ciudadanos a partir d’esa fecha. Sicasí, la prohibición de les aglomeraciones va caltenese.

    Esti fechu ta alterando la actividá económica, pero tamién la cultural. La Cometcon foi una de les primeres víctimes d’esta crisis. L’eventu, que per primer vegada diba celebrase en Xixón, aplazóse a fines d’agostu ente la imposibilidá de celebrase nes feches previstes, del 3 al 5 d’abril. El Conceyu de Xixón nun quier anticipase y facer planes pa la programación braniega. «Tamos n’abril y nin siquiera entamemos a discutir esti tema», dixo l’alcaldesa. nun mensaxe espublizáu en Twitter. Ana González refugó d’esta manera los rumores qu’apuntaben a la cancelación de la Selmana Grande de la ciudá. L’alcaldesa foi rotunda nesi sentíu: «Nun ye verdá, ye un bulo«. Al tiempu, animó a la ciudadanía a «tener cuidáu y fianos namás de les informaciones oficiales».

  • El Xixón Sound 2020 yá tien fecha

    El Xixón Sound 2020 yá tien fecha

    La edición nueva del Xixón Sound Festival yá tien fecha de celebración. El festival va ser los díes 17, 18 y 19 d’abril. Esti alcuentru cultural, entamáu por Divertia y producíu por Mestizo Producciones, cumple asina la so edición octava y caltién el so xeitu de faer ciudá y de promocionar Xixón acullá les nueses llendes. Una curiada y selecta apuesta musical llocal, nacional ya internacional sedrá’l puntu de xunión d’esti alcuentru. A falta de más artistes por confirmar, destaca’l regresu de James Rhodes. La so primer actuación n’España foi precisamente nel Xixón Sound Festival en 2016. Nesta ocasión, el músicu británicu llegará pa celebrar el 250 aniversariu de la ñacencia de Beethoven.

    Redd Kross, Diego Vasallo y Lorena Álvarez pisarán los escenarios del Gijón Sound Festival 2020 pa presentar oficialmente los sos trabayos nuevos. Xúnense Alain Johannes, Bobkat’65, Los Saxos del Averno, Tito Ramírez, Primas Hermanas y Erlend Øye & La Comitiva, grupu fundáu pol alma mater de Kings of Convenience.D’otramiente, esti festival sigue apostando por averar la música en direuto a neños, cola actuación de Festinfante, que, n’esta ocasión, presenten el show Queenmanía.

    Xixón Sound Festival 2020 anueva les sos actividaes complementaries alternatives. El surf va tener una presencia destacada nel festival al traviés de charres temátiques, cursos y bautismos empobinaos a toles persones que quieran averase a esti deporte tan enraigonáu en Xixón.

    La edición d’anguaño tamién apostará pola sostenibilidá, un retu al que la mayoría de los eventos culturales s’enfrenten y una seña de identidá que siempres carauterizó al Gijón Sound Festival. Habrá delles colaboraciones con decenes d’entidaes, como otros festivales, asociaciones, escueles, hoteles, restoranes y organizaciones non gubernamentales, qu’añaden conteníu y ufierta a la esperiencia de Gijón Sound Festival.

  • Los Secretos xuben esti vienres al escenariu del Teatru de la Llaboral

    Los Secretos xuben esti vienres al escenariu del Teatru de la Llaboral

    El Teatru de la Llaboral acueye’l conciertu de Los Secretos esti vienres de febreru a les 21:00 hores. El grupu llideráu por Álvaro Urquijo presenta’l so últimu trabayu, Mi Paraíso, con nuevos cantares que caltienen el so estilu y soníu únicu como Lejos, Si pudiera parar el tiempo o Escrito en el corazón.

    Con más de cuatro décades de trayectoria, la banda madrilana forma parte de la hestoria del pop nacional y de la memoria musical de delles xeneraciones. Cunten con un ampliu repertoriu nel que figuren temes cómo Déjame, Quiero beber hasta perder el control y Pero a tu lado. Protagonistes del míticu conciertu de Caminos, principiu de la Movida, el grupu superó’l tiempu, les altes y baxes de la industria ya inclusive la murnia desapaición de trés de los sos miembros, ente ellos l’inolvidable Enrique Urquijo.

    Les entraes pal conciertu tán disponibles a un preciu de 50 euros para foso, 40 euros pa patiu de butaques (files 1 a 10), 35 euros pa patiu de butaques (files 11 a 20) y palcos y 30 euros p’anfiteatru. Les localidaes pueden adquirise na Recepción de la Llaboral, el Centru Niemeyer n’Avilés, la Oficina d’Información Turística d’Asturies n’Uviéu y Entradas Liberbank.

  • El Conceyu va recuperar la esposición urbana Xixón 36-37

    El Conceyu va recuperar la esposición urbana Xixón 36-37

    El Conceyu va recuperar la esposición Xixón 36-37, un percorríu pol Xixón de la Guerra Civil. L’amuesa espera ver la lluz a principios del añu 2020. Ye un percorríu esplicativu, una ruta interpretativa per distintos espacios venceyaos al conflictu como abellugos, suétanos, portales, cuarteles, parques…

    Foi una iniciativa que, tres una gran llabor d’investigación, sacó adelantre la Conceyalía de Memoria Social en 2011 y que FORU dexó almacenada mientres los sos dos mandatos. Agora, el Conceyu quier recuperala y espera que tea instalada a principios de 2020. Amás, va modernizase yá que nun se van asitiar paneles al usu, sinón códigos QR. ‘’D’esta forma, danos la posibilidá d’ampliar el percorríu y los puntos históricos con facilidá, da mayores
    posibilidaes d’información y enllaz con otres actividaes, amenorga la inversión y el caltenimientu, y ye un soporte visual y cercano a la mocedá’’, señala’l conceyal d’Educación y Cultura, Alberto Ferrao. ‘’Ye xuna amuesa clara del compromisu del PSOE cola memoria histórica’’, añede.

    L’oxetivu de la esposición ye dar a conocer lo asocedío mientres esi momentu de la nuesa
    hestoria a vecinos y vecines según a visitantes y amosar elementos, entá visibles na so
    mayoría, que yá esistíen en 1937, poniendo en valor el so aportar. Tamién que se convierta nuna guía didáctica y nun referente para estudiosos ya historiadores.

  • La esposición ‘Voces’ aporta al Vieyu Institutu

    La esposición ‘Voces’ aporta al Vieyu Institutu

    La esposición ‘Voces. La llingua n’Asturies al traviés de los sieglos‘ llega a Xixón. La muestra fai un percorríu interesantísimu al traviés de los más de mil años de la historia de la llingua asturiana. Puede visitase hasta’l prósimu 29 d’agostu nel Vieyu Institutu. La esposición asoleya y descubre les distintes etapes y socedíos históricos que conformaron el pasáu de la llingua, arriquecen el presente y proyeuten el so futuru nel sieglu XXI.

    Les persones que s’averen a visitar la esposición van atopar nella la evolución y capacidá humana d’adautación del llinguaxe, suxetu de contino a cambios y diversificaciones, nun viaxe procurosu y fonderu dende los ástures hasta anguaño. D’otra manera, la esposición preséntase nun formatu atrayente, que s’afaya perbién pa esparder la histora de la llingua, de la cultura y del pueblu asturianu.

    La esposición surde nel contestu del programa d’eventos pa conmemorar el XIII Centenariu del Reinu d’Asturies

    La esposición surde nel contestu del programa d’eventos pa conmemorar el XIII Centenariu de los oríxenes del Reinu d’Asturies. Un equipu de profesores de la Universidá d’Uviéu formáu por Xulio Viejo Fernández, Ramón d’Andrés Díaz y Roberto González-Quevedo González, ye’l responsable de los conteníos espositivos. El diseñu y maquetación de la esposición son obra del diseñador gráficu ya ilustrador xixonés, Juan Hernaz.

    Aparte de les visites abiertes al públicu en xeneral n’horariu d’apertura del Vieyu Institutu, ufiértase la posibilidá de realizar visites guiaes. Los grupos van poder ser d’un máximu de 15 persones y les visites van tener una duración d’una hora. Les feches propuestes pa les visites son estes: 14, 21, 23 y 28 d’agostu. Les visites son gratuites. Sicasí, pa poder participar nelles, les persones interesaes han unviar unas solicitú al corréu electrónicu llinguaasturiana@xixon.es, indicando’l so nome y apellíos, cuántes persones quieren asistir y en qué fecha.

  • El camín de Santiago protagoniza l’estand del Principáu na Feria

    El camín de Santiago protagoniza l’estand del Principáu na Feria

    El pabellón del Gobiernu d’Asturies na Feria Internacional de Muestres d’Asturies (Fidma) va reivindicar anguaño’l protagonismu asturianu nel orixe del Camín de Santiago. L’espaciu acueye una espectacular esposición que percuerre con rigor y vocación divulgativa los itinerarios xacobeos na comunidá. L’amuesa ‘El camín que nació n’Asturies’ destaca’l papel que la conformanza de la ruta xacobea desempeñó na hestoria, la cultura, la relixón y la sociedá europea de fai 1.200 años. Tamién incide especialmente nel relevante papel que tuvo la comunidá na so creación neses primeres décades del sieglu IX.

    El trabayu espositivu céntrase en dar a conocer los principales trazaos xacobeos al so pasu pol Principáu y enmarcalos nel contestu européu, amás d’ufiertar testimonios significativos de pelegrinos del pasáu y de les buelgues que dexaron en llugares emblemáticos del Camín. La esposición distribúyese en cuatro zones que, al traviés d’un trazáu circular, percuerren les trés rutes asturianes del Camín de Santiago (primitivu, costeru y del Salvador) de manera didáctica.

    L’amuesa tamién fai referencia al próximu Añu Santu, que se va celebrar en 2021

    Asina, de la planta baxa del espaciu espositivu parte un divertíu llaberintu nel que s’afayen numberosos intereses. Nuna de les zones más espectaculares del estand, marcada por una gran imaxe del rei Alfonso II empecipiando’l Camín, los visitantes van poder conocer los detalles del orixe de la ruta n’Asturies y les característiques de los trés trazaos, según la so hestoria n’Europa.
    L’amuesa tamién fai referencia al próximu Añu Santu, que se va celebrar en 2021, y esboza los proyectos nos que trabayen yá diverses entidaes ya instituciones para encarar la celebración y promocionar, sopelexar y crear nuevos productos venceyaos a la ruta, que sigue en constante innovación.

    La exhibición complétase cola amuesa fotográfica ‘Los valores del Camín’, cedía por Correos, y dellos audiovisuales y pantalles interactives. L’estand incorpora un gran photocall nel que los visitantes van poder fotografiase col equipu del pelegrín ante una gran fotografía de la ruta xacobea al so pasu per Caravia. Amás, el pabellón va tener como soníu ambiente un repertoriu d’efectos recoyíos pol artista Juanjo Palacios nes reserves de la biosfera d’Asturies.

  • Autobuses especiales pa dir al Circu del Sol

    Autobuses especiales pa dir al Circu del Sol

    La Empresa Municipal de Tresportes Urbanos (Emtusa) va poner en marcha un serviciu especial d’autobuses al Circu del Sol. L’espectáculu Kooza va tar hasta’l 31 d’agostu en Xixón polo que se va habilitar un serviciu especial d’ida que va salir de la plaza L’Humedal una hora enantes de cada función. Coles mesmes, a la salida de cada función realizaráse un serviciu especial de regresu.

    Percorríu ida: plaza L’Humedal (C/ Palaciu Valdés), Álvarez Garaya, Felipe Menéndez, Rodríguez San Pedro, Avda. Juan Carlos I, Cortes de Cádiz, avda. Galicia, Cuatro Caminos, avda. Príncipe d’Asturies, Muelle de la Osa, Circu del Sol.

    Percorríu vuelta: Muelle de la Osa (Circu del Sol), avda. Príncipe d’Asturies, Cuatro Caminos, avda. Galicia, C/ 2 de mayu, avda. Juan Carlos I, Marqués de San Esteban, Pedro Duro, rematando en La Gota Lleche.

  • Marea actúa esti sábadu na Plaza de la Llaboral

    Marea actúa esti sábadu na Plaza de la Llaboral

    El grupu Marea actúa esti sábadu 27 de xunetu, a las 22:45 hores, na Plaza de la Laboral. La banda de rock navarra presenta’l so nuevu trabayu, ‘El azogue’, el so séptimu discu d’estudiu, con temes como ‘En las encías’, ‘El temblor’ o ‘Un hierro sin domar’. Publicáu esta primavera tres más de seis años ensin actividá, el grupu vuelve a la carretera con una xira que va llevar a la ‘Marea’ por escenarios de toa España y por Milán, Berlín, Bruxeles, Londres y París.

    Fundáu’l 24 d’avientu de 1997, el grupu cunta con Kutxi Romero, lletrista y cantante; Kolibrí Díaz y César Ramallo, a les guitarres; Eduardo Beaumont ‘Piñes’, al baxu y segunda voz; y Alén Ayerdi, a la batería. La banda de rock and roll Bocanada va tocar primeramente, a les 21:15 hores, como artista invitáu. Formada en 2006, el grupu, reconvertíu en cuartetu, ta integráu con Martín (voz), Juanito (guitarres), Rupi (baxu) y Pepo (batería) y cuenta con cuatro álbumes na so discografía.

    Les entraes pueden adquirise a 25 euros na Recepción de Llaboral Ciudá de la Cultura, na Oficina d’Información Turística d’Asturies n’Uviéu (CITPA), nel Centru Niemeyer n’Avilés, entraes.liberbank.es, nel 902 106 601 y na rede de caxeros Liberbank.

  • El Circu del Sol desplega la so carpa en Xixón

    El Circu del Sol desplega la so carpa en Xixón

    L’espectáculu Kooza del Circu del Sol yá llegó a Xixón. La compañía yá s’instaló nel terrén allugáu nel Muelle de la Osa, n’El Musel, y empezó los preparativos pa poder llevantar la so icónica carpa azul y mariella, buque insignia de la compañía que se llevanta na ciudá per primer vegada. Foi fai diez años cuando’l Circu del Sol llevantó la so carpa per última vegada en Xixón anque nesi casu foi la so carpa blanca.

    Kooza ye un homeaje al circu tradicional. L’espectáculu combina arte y acrobacies de payasos de la qu’esplora’l miéu, la identidá, la reconocencia y el poder. El viaxe del inocente llevar a atopase con personaxes risibles d’un mundu electrizante llenu de sorpreses, aventures, audacia y total participación.