Xixón al día

Etiqueta: Conciertos

  • El ciclu Autores nel Camín va promover alcuentros con creadores asturianos en 27 conceyos

    El ciclu Autores nel Camín va promover alcuentros con creadores asturianos en 27 conceyos

    El ciclu Autores nel Camín ponse en ruta pa llevar el trabayu de losl ceadores y artistes asturianos a 27 conceyos del Principáu. Nos próximos meses los ganadores de premios lliterarios y escénicos convocaos o promovíos pola Conseyería de Cultura, Política Llingüística y Turismu van protagonizar 62 alcuentros col públicu.

    Dientro del proyectu Asturies, Cultura en Rede, pretende dar a conocer los trabayos de los ceadores y artistes asturianos abriendo espacios d’alcuentru col públicu. La dirección xeneral de Política Llingüística invierte 50.000 euros nel ciclu xestionáu pola Sociedá Pública de Xestión y Promoción Turística y Cultural del Principáu d’Asturies.

    La caravana d’Autores nel Camín va echar a andar mañana vienres, 11 de marzu, en Bual con un alcuentru lliterariu que va dirixir Miguel Rodríguez Monteavaro, premiu Ría del Eo de Poesía en eonaviegu cola obra Oi, que diz mama que volvas.

    Los alcuentros lliterarios per tol territoriu asturianu van tar protagonizaos por Pablo Texón (premiu Xuan María Acebal de Poesía), Xilberto Llano (premiu María Josefa Canellada de Lliteratura infantil y xuvenil), Ángel de la Calle (premiu Alfonso Iglesias de Cómic), Blanca Fernández Quintana (Premiu Enriqueta González Rubín de Narrativa moza), Alberto Castro Gión (premiu Quiastolita de Lliteratura infantil en eonaviegu), Miguel Rodríguez Monteavaro (yá citáu), José Ángel Gayol (premiu Xosefa Xovellanos de Novela) y Ramón d’Andrés, coordinador y revisor llingüísticu y lliterariu de la traducción de La Biblia al asturianu (premiu Florina Alías a la Meyor Traducción), amás de premiu Fuertes Acevedo d’Ensayu.

    Pela so parte, la compañía teatral Producciones Nun Tris, premiu Nel Amaro de Teatru Profesional en llingua asturiana y eonaviegu, va representar La reina de la guapura de Leenane en Sotu’l Barcu, Llangréu, Corvera, L.lena, Cangas del Narcea, Grau, Carreño, Nava y Colunga. Otramiente, Carla Armas y Rubén García, reconocíos col premiu Camaretá al meyor Cantar pol cantar El que conoz a tierra, van actuar en Samartín del Rei Aureliu, Villaviciosa, Candamou, Colunga, Castrillón y Tinéu.

    Asturies Cultura en Rede ye un proyectu de la Conseyería de Cultura, Política Llingüística y Turismu, realizáu en collaboración colos conceyos asturianos y, nel que tamién s’inclúin circuitos temáticos d’artes escéniques, música, artes visuales, Xacobéu, cultura tradicional y lliteratura. La información ampliada de tola programación puede consultase na web asturiesculturaenrede.es.

  • 48 conciertos hasta xunu de la mano del circuitu de música d’Asturies, Cultura en Rede

    48 conciertos hasta xunu de la mano del circuitu de música d’Asturies, Cultura en Rede

    48 conciertos de 42 artistes y promotores en 37 conceyos programáronse hasta xunu col circuitu de música d’Asturies, Cultura en Rede, pal que se dediquen camín de los 92.000 euros. Esti circuitu forma parte d’Asturies, Cultura en Rede, un proyectu de la Conseyería de Cultura, Política Llingüística y Turismu realizáu en collaboración colos conceyos asturianos y xestionáu pola Sociedá Pública de Xestión y Promoción Turística y Cultural del Principáu d’Asturies, onde tamién s’incluyen circuitos temáticos d’artes escéniques, artes visuales, Xacobéu, cultura tradicional, lliteratura y Autores nel Camín.

    Esta selmana’l pianista César Latorre ufierta un cine-conciertu en Gozón el 25 de febreru, onde va poner banda sonora a la película Tiempos modernos de Chaplin con una producción orixinal realizada pa los Premios Princesa d’Asturies del añu pasáu; y Felpeyu, una de les grandes referencies musicales de la rexón, va realizar un percorríu pelos sos cantares más conocíos el día 26 en Navia.

    En marzu, Pipo Prendes va repasar les sos temes nuevos y los cantares emblemáticos de la so carrera en Tapia y Llaviana; Tere Rojo y Charly Blanco van llevar los sos Cantares de siempre a Riosa; el grupu de folk Fontoria va actuar en Piloña; y Algaire, proyectu de voz y percusión tradicional asturiana, va tar en Bimenes. L’Arca de Mozart va presentar en Ribadeva Ellas suenan, un conciertu de música clásica y barroca diseñáu en reconocimientu a l’aportación de la muyer na Historia del Arte; y en Pravia, Aquellos músicos viajeros, un homenaxe a la emigración al traviés de la música de grandes compositores clásicos y barrocos. Tamién en marzu van actuar Fesoria a Les  Ortigues, agrorock con grana de gipsy jazz y música asturiana, en Valdés; el Dúo Concerto, formáu pol violinista Martín Martínez y el pianista Jose Manuel San Emeterio, en Ribadeva; y Billy Boy & Los Ácrates van rindir homenaxe a Tino Casal en Noreña.

    N’abril Trashtornados va presentar n’El Franco Acartoonados, un espectáculu visual-musical onde se combinen soníos del swing, el jazz y el rock and roll con dibuxos animaos de la primer metá del sieglu XX; Silvia Quesada, Prefiero ver llover en Salas; y José María Aladro Montañés, Cantan los poetas en Colunga, Nava y Gozón. Va haber conciertos de Buen Suceso en Tinéu; de Pablo Moro & Los chicos listos en Balmonte; de Delagua en Valdés; de Forma Antiqva col so Concierto Zapico Vol. 2 en Castrillón; del cuartetu de cuerda Concerto en Tinéu; y músicos de bandes como Tejedor, Alexandra in Grey, Felpeyu, Real Straits o Winchester van rindir homenaxe a Tubular de Mike Oldfield en Castropol.

    Nel mes de mayu ta prevista l’actuación de Slum Suit en Tinéu; de la Orquesta Céltica Asturiana, n’Ayer; de Jorge Colsa y Gema Bravo y de Fran Avilés, en Cabranes; de Tina Gutiérrez con Cantarinos pa que suañes, en Cangues d’Onís; de Lafu y Robeca Velasco, en Colunga; del grupu Pájaros en la cabeza, en Gozón; y de Producciones Nun Tris cola ópera bufa La sierva patrona, en Nava.

    La programación musical de xunu incluye los conciertos d’Anabel Santiago en Candamu; de Real Straits con The spirit of Dire Straits en Cangas del Narcea; d’Eva Tejedor & Les Pandereteres en Cuaña; de Celso Díaz Band en Candás; de Vaudí en Corvera, onde tamién va actuar Pauline en la playa; del grupu Pájaros en la cabeza en Les Regueres; de Crudo en Ḷḷena; de Mapi Quintana y César Latorre en Llanes; d’Akin & The Afrobeat Brothers n’A Veiga; y de Marco Martínez y Mónica Matabuena con João en Villaviciosa.

    A estes actuaciones súmense los conciertos yá celebraos de Petip Pop en Colunga, d’Alicia Álvarez con Kikirikí cantares pa neñes y neños en Ribeseya, de Susana Gudín con No solo zarzuela en Siero, de Pablo und destruktion en Grau, de Tina Gutiérrez en Sotu’l Barcu y de Javier Bergia y Begoña Olavide con Poemas y canciones de un tiempo a esta parte en Mieres.

  • Silvia Quesada y Cerezal abren la primer edición d’Amosando 2020

    Silvia Quesada y Cerezal abren la primer edición d’Amosando 2020

    El pop d’autora de Silvia Quesada y el folk-pop de Cerezal van ser los encargaos d’abrir la primer edición d’Amosando 2020. La llibrería-café Toma3 de Xixón va acoyer esta grabación a les 17 hores del domingu 28 de xunu. La entrada ye de baldre pero’l so aforu ta llendáu a les persones que ganen una invitación participando nun sortéu al traviés de les redes sociales de la tienda online y distribuidora dixital musicasturiana.com. La distribuidora dixital ye organizadora del eventu xunto col realizador audiovisual Javier Lueje y Goxe Producciones. Amosando tien el patrociniu de la estaya de Turismu del Ayuntamientu de Xixón y de la Fundación Caja Rural de Asturias.

    Silvia Quesada, cantante de Tejedor y Los Gatos del Fornu, va presentar ‘Prefiero Ver Llover’. Esta ye la so segunda referencia discográfica en solitariu na que’l so soníu evoluciona hacia una propuesta pop mui cuidada y completa. Pela so parte, Cerezal van tocar los temes de ‘La Cereza’l Cielu’, un discu qu’entemez folk, pop, rock y incluso electrónica, llevando a la música de raíz tradicional a nueves sonoridaes. Los dos trabayos son una renovación dientro de la música fecha n’asturianu y tuvieron premiaos nos AMAS 2020.

    Amosando nació en marzu de 2019 como un ciclu de presentaciones de discos con un formatu ente conciertu acústicu con aforu reducíu, programa de televisión y alderique. La iniciativa, pionera n’Asturies, nació col oxetivu de visibilizar a la música asturiana dientro y fuera de les nuestres fronteres. El ciclu cuntó l’añu pasáu cola participación de L-R, Xaime Martínez, Ún de Grao, D’Urria, Anabel Santiago y Eva Tejedor & Les Pandereteres. En 2019 perpasáronse les 100.000 reproducciones nos videos publicados en YouTube y Facebook.

  • Los Secretos xuben esti vienres al escenariu del Teatru de la Llaboral

    Los Secretos xuben esti vienres al escenariu del Teatru de la Llaboral

    El Teatru de la Llaboral acueye’l conciertu de Los Secretos esti vienres de febreru a les 21:00 hores. El grupu llideráu por Álvaro Urquijo presenta’l so últimu trabayu, Mi Paraíso, con nuevos cantares que caltienen el so estilu y soníu únicu como Lejos, Si pudiera parar el tiempo o Escrito en el corazón.

    Con más de cuatro décades de trayectoria, la banda madrilana forma parte de la hestoria del pop nacional y de la memoria musical de delles xeneraciones. Cunten con un ampliu repertoriu nel que figuren temes cómo Déjame, Quiero beber hasta perder el control y Pero a tu lado. Protagonistes del míticu conciertu de Caminos, principiu de la Movida, el grupu superó’l tiempu, les altes y baxes de la industria ya inclusive la murnia desapaición de trés de los sos miembros, ente ellos l’inolvidable Enrique Urquijo.

    Les entraes pal conciertu tán disponibles a un preciu de 50 euros para foso, 40 euros pa patiu de butaques (files 1 a 10), 35 euros pa patiu de butaques (files 11 a 20) y palcos y 30 euros p’anfiteatru. Les localidaes pueden adquirise na Recepción de la Llaboral, el Centru Niemeyer n’Avilés, la Oficina d’Información Turística d’Asturies n’Uviéu y Entradas Liberbank.

  • Marea actúa esti sábadu na Plaza de la Llaboral

    Marea actúa esti sábadu na Plaza de la Llaboral

    El grupu Marea actúa esti sábadu 27 de xunetu, a las 22:45 hores, na Plaza de la Laboral. La banda de rock navarra presenta’l so nuevu trabayu, ‘El azogue’, el so séptimu discu d’estudiu, con temes como ‘En las encías’, ‘El temblor’ o ‘Un hierro sin domar’. Publicáu esta primavera tres más de seis años ensin actividá, el grupu vuelve a la carretera con una xira que va llevar a la ‘Marea’ por escenarios de toa España y por Milán, Berlín, Bruxeles, Londres y París.

    Fundáu’l 24 d’avientu de 1997, el grupu cunta con Kutxi Romero, lletrista y cantante; Kolibrí Díaz y César Ramallo, a les guitarres; Eduardo Beaumont ‘Piñes’, al baxu y segunda voz; y Alén Ayerdi, a la batería. La banda de rock and roll Bocanada va tocar primeramente, a les 21:15 hores, como artista invitáu. Formada en 2006, el grupu, reconvertíu en cuartetu, ta integráu con Martín (voz), Juanito (guitarres), Rupi (baxu) y Pepo (batería) y cuenta con cuatro álbumes na so discografía.

    Les entraes pueden adquirise a 25 euros na Recepción de Llaboral Ciudá de la Cultura, na Oficina d’Información Turística d’Asturies n’Uviéu (CITPA), nel Centru Niemeyer n’Avilés, entraes.liberbank.es, nel 902 106 601 y na rede de caxeros Liberbank.

  • Nacho Vegas va actuar nel Xardín Botánicu en setiembre

    Nacho Vegas va actuar nel Xardín Botánicu en setiembre

    Nacho Vegas va ufiertar un conciertu’l próximu 7 de setiembre a les 22.30 hores nel Xardín Botánicu de Xixón. L’asturianu ye anguaño ún de los artistes más consolidaos y respetaos del país. Nos escenarios dende los años noventa con grupos como Eliminator Jr o Cobertor Ray, empezó la so carrera en solitariu en 2001 col sellu independiente Llimbu Starr. Paralelamente formó’l grupu Lucas 15 con otros músicos asturianos. Con esti sellu publicó’l so primer discu en solitariu Actos inesplicables (2001). Desque empezó la so trayectoria en solitariu, Nacho Vegas publicó dellos discos y EPs. Tamién fixo destacaes collaboraciones como El tiempo de las cerezas con Enrique Bunbury (2006) o Verano Fatal (2007) con Christina Rosenvinge.

    En xunu editó ‘Violética’, un álbum con 18 temes y les collaboraciones Coru Al Altu Llevar, Cristina Martínez, Christina Rosenvinge y Maria Rodés

    En 2010 llanzóse a l’aventura de la autoedición dando vida a Marxophone, una plataforma de autoedición discográfica col qu’editó’l restu de los sos trabayos hasta’l momentu. Baxo esta etiqueta vio la lluz en 2011 La Zona Sucia. Esti trabayu foi reconocíu como’l ‘Meyor Álbum del Añu’ nos Premios de la Música Independiente. A esti trabayu siguiólu, en payares del mesmu añu, el mini-álbum Cómo hacer crac (2011). Foi entós cuando la música de Nacho Vegas foi coyendo otru aldu, sobremanera nes lletres. A partir d’equí van abrazase a una temática más política y social, daqué que se consolidó nel discu Resituación (2014) y nel EP que lu siguía, Canciones Populistas (2015).

    El pasáu mes de xunu, Nacho Vegas editó ‘Violética’ (Marxophone, 2018) un discu doble con Edu Baos, Abraham Boba, Manu Molina, Joseba Irazoki, Luis Rodríguez y César Verdú. Foi grabáu por Paco Loco nel so estudiu d’El Puertu de Santa María, con grabaciones adicionales nel Estudiu Fase 4 de Xixón por Carlos Stro y en El Cariño de Mozota por Edu Baos. L’amiestu realizólu César Verdú y el master Víctor García n’Ultramarinos Mastering (Barcelona). L’álbum coniene 18 temes y cuenta con diverses collaboraciones. Destaquen les del Coru Antifascista Al Altu Llevar, Cristina Martínez (El Columpio Asesino), Christina Rosenvinge y Maria Rodés.

  • La Selmana Negra vuelve a Xixón

    La Selmana Negra vuelve a Xixón

    Vuelve la Selmana Negra. Del 5 al 14 de xunetu los terrenos del antiguu astilleru Naval Xixón van ser de nuevu la sede del festival lliterariu, cultural, reivindicativu y popular más llonxevu d’España. El cartelu d’esta edición ye obra del dibuxante español Víctor Blanco, conocíu internacionalmente poles sos obres nel cómic con títulos tan significativos como Polar o Filthy Rich.

    [Consulta’l programa completu d’actividaes de la XXXII Selmana Negra]

    Más de cientu venti escritores confirmaron la so participación nes distintes actividaes programaes. Nesta edición destaca la interesante presencia d’autores en llingua inglesa. Tres venti años d’espera vien l’irlandés John Connolly, unos de los maestros mundiales del xéneru negru. Otros recién llegaos al públicu español como Steve Cavanagh, especialista en thrillers llegales, Joseph Knox que col so opera prima Serenes convertir n’una revelación para la crítica lliteraria y Anthony Horowitz, unu de los grandes de la lliteratura xuvenil inglesa amás de ser guionista de series de televisión.

    L’humor y la risa vienen de la mano de Edu Galán y Darío Adanti, los componentes más destacaos de la revista Mongolia. Van presentar La Biblia negra de Mongolia y de Marta Flich, que lo fadrá con Necroeconomía. La poesía tamién tien el so llugar nel festival al traviés de les velaes nocherniegues del sábadu 6 protagonizada por Carlos Salem y de un llargu plantel de poetes: Escandar Algeet, María Nieto, Pablo Cortina y Carolina Sarmiento y la del día 13 conducida por Luis García Montero con Luisa Castro, Martín López Vega, Angels Gregori, Xuan Bello y Kirmen Uribe.

  • Cuenta atrás pa ver a Marea en conciertu en Xixón

    Cuenta atrás pa ver a Marea en conciertu en Xixón

    La banda navarra Marea presenta nun conciertu na plaza de la Llaboral de Xixón el so nuevu discu, ‘El azogue’, que vio la lluz el pasáu 12 d’abril. Marea que cunta con Kutxi Romero (compositor y vocalista), Eduardo Beaumont Piñas (baxu y segunda voz), César Ramallo (guitarra), David Díaz (guitarra) y Alén Ayerdi (batería y coros) ente les sos files, cunta yá con siete álbumes d’estudiu, trés escoyetes y un álbum en directu.

    Rock urbanu y hard rock que vuelven a la vida n’echando’l frenu en 2012, cuando se baxaron del escenariu per últimu vegada. Va dos años Marea cumplió’l so 20 aniversariu, anque lo fixeron ensin celebrar conciertos y ensin ufiertar información sobro la so disolución. Empezaron los rumores. ¿Volveríen, nun volveríen? La banda nun confirmaba que quería baxar el telón pa siempres. Y, finalmente, con ‘El azogue’ remató la dómina de barbechu. Sí, vuelven. Volvieron.

    ç

    Bocanada va ser l’artista invitáu nel conciertu de Marea en Xixón. Nacen en 2006 cuando cinco rodaos músicos de Berriozar deciden formar una banda de rock and roll. Más de diez años dempués, el grupu ta reconvertíu en cuartetu ya integráu por Martín (voz), Juanito (guitarres), Rupi (baxu) y Pepo (batería).

    Tres trés años de rodaxe de conciertu en conciertu, en xunetu de 2009 graben el so primer CD, ‘Caballos de rienda larga’, discu que presenten con una primer xira que-yos sirve pa dase a conocer y que dexa bones sensaciones. En dándo-y carpetazo, Bocanada zárrase nel local pa preparar el so segundu discu, trabayu que ve la lluz en primavera de 2011 sol títulu de ‘Agua y Barro’, que sería siguíu por ‘El sinón de la ferida’ en 2013. Finalmente, en marzu de 2017, Bocanada publica’l so cuartu discu ‘Libres’.

  • Estopa va dar un conciertu en Xixón n’avientu

    Estopa va dar un conciertu en Xixón n’avientu

    Estopa va ufiertar un conciertu en Xixón el 21 d’avientu. Va Ser a les 21:30 nel Palaciu de Deportes de la Guía ‘Presidente Adolfo Suárez’. Los hermanos David y José Muñoz celebren 20 años de trayectoria musical cola so banda Estopa cola publicación d’un nuevu trabayu discográficu, ‘Fuego’. Desque en 1999 publicaren el so primer trabayu nun pararon de collechar ésitos, como’l récord de vientes pa un grupu debutante gracies a los 1.200.000 exemplares vendíos del so primer discu, ‘Estopa’.

    ‘Fuego’ ye’l primer cantar del décimu álbum d’Estopa. Un nuevu trabayu con cantares tamién totalmente nueves, que va ser el meyor homenaxe posible pa celebrar dos décades de música d’Estopa. ‘Fuego’ ye Estopa n’estáu puru: rock, palmes y desenfadu, la infalible receta cola que va dos décades rescataron la rumba de la mormeyera dende una perspectiva roquera.

    Nel so Tour Fuego nun van tocar namás los sos nuevos cantares, sinón que van faer esfrutar al públicu con tolos sos grandes ésitos. Una celebración en toa riegla d’unu de los grupos españoles más importantes de les últimes décades. Les entraes pal conciertu d’Estopa nel Palaciu de Deportes de Xixón yá tán a la vienta. Pueden adquirise al traviés d’internet na páxina web: http://2monkeys.es/conciertos/

  • Vintage Trouble va actuar en Xixón

    Vintage Trouble va actuar en Xixón

    Formaos nel añu 2010, Vintage Trouble convirtiéronse nel secretu meyor guardáu del rock and roll. La pasión y fuerza que destilen, el so soul blues, los ritmos R&B y un toque de pop crean un cóctel difícil de refugar. Dieron más de 3.000 conciertos en 30 paises, xirando con grupos de talla mundial como The Who, The Rolling Stones, AC/DC, Lenny Kravitz o Bon Jovi. El sábadu 15 de xunu tarán na sala Teatru Albéniz.

    Actuaron en programes de televisión de gran ésitu como ‘Later… with Jools Holland’, ‘Limmy Kimmel LIVE!’, ‘Conan’, ‘The View’, ‘The Tonight Show’ y ‘Late Motiv’, amás de recibir los aplausos de la prensa y revistes especializaes como’l ‘New York Times’, ‘NPR’, ‘The Wall Street Journal’, ‘Billboard’ y ‘Rolling Stones’, ente otros.

    Con trés álbumes sol brazu (The Bomb Shelter Sessions, The Swing House Acoustic Sessions y 1 Hopeful Rd) decidieron dar un pasu más y ponese un nuevu desafíu col so últimu trabayu: Chapter II, formáu por dos episodios. El Chapter I llanzáu en 2018 y Chapter II, en 2019. Inspiraos pola so escelente reputación como banda de directu, el grupu californianu púnxose como oxetivu llevar esi terrible espíritu que tienen enriba l’escenariu al estudiu de grabación.

    “Tuvimos la oportunidá de tocar en dalgunos de los shows más grandes del mundu”, comenta Taylor. “Sicasí nun captábamos esi sentimientu que tenemos en vivu. Eso unviónos de nuevu a los talleres de montaxe. Empezamos a escuchar música más mainstream, dende Amy Winehouse y Adele hasta Bruno Mars y Lauryn Hill. Queríamos coyer daqué del pasáu y ponelo nun marcu contemporaneu. Asina surdió la idea del nuevu discu. Decidimos tocar cantares pop pero con un toque más de R&B y rock and roll”. “Llanzámonos ensin mieu al abilsu”, añede Nalle. “Queríamos amosar el nuesu otru llau. Ensin batura a duldes, este ye’l Capítulu II de la hestoria de Vintage Trouble”.