Xixón al día

Etiqueta: Foru Asturies

  • Foru denuncia que l’avenida d’El Molinón «lleva un añu paralizada»

    Foru denuncia que l’avenida d’El Molinón «lleva un añu paralizada»

    Foru va solicitar l’espediente de la obra de l’avenida d’El Molinón a Parques y Xardinos. «Nun s’esplica a qué espera l’equipu de gobiernu p’abrir una avenida tan allegada y emblemática de Xixón que pudo tar abierta tres el confinamientu», aseguró’l voceru de la formación Jesús Martínez Salvador. «La obra lleva un añu paralizada y pudo abrir al públicu yá va meses y con una inversión amenorgada. Queremos pescudar por qué’l Gobiernu del PSOE afirma agora que nun hai plazos establecíos», dixo’l conceyal en referencia a una entrevista del conceyal socialista Olmo Ron en La Nueva España na que manifiesta que «cuando haya plazos establecíos, vamos dir informando».

    El voceru de Foru recuerda que dende’l so Grupu Municipal solicitóse’l pasáu mes de xunu que se abrir de forma completa la cera próxima al parque «y desoyeron esta demanda». «La inversión necesaria p’abrir l’avenida d’El Molinón ye de 103.000 euros que nun quixeron acometer; sicasí, nun los importó gastar 250.000 euros nuna actuación provisional que nun gusta a casi naide n’El Muro», llamentó Martínez Salvador. «El branu de 2020 va ser recordáu en Xixón como’l de los atascos. Daqué insólitu teniendo en cuenta que nun hai eventos multitudinarios», alvirtió.

  • Los partíos ceden 54.666 euros de les sos asignaciones a programes sociales

    Los partíos ceden 54.666 euros de les sos asignaciones a programes sociales

    Pocos son los asuntos que davezu algamen l’alcuerdu unánime de tolos grupos políticos con representación na Casa Conceyu. Sicasí, les siete formaciones presentes n’actual corporación pactaron ceder dos mensualidaes de les sos asignaciones a programas sociales.  Esto ye, 54.666 euros. Trátase d’una partida que los grupos reciben pa desendolcar la so actividá como representantes de los ciudadanos. L’alcuerdu algamóse por unanimidá de los voceros municipales na comisión permanente celebrada’l vienres pela mañana.

    Nel conceyu, tamién se punxo fecha al viniente Plenu ordinariu. Va tener llugar el miércoles 27 de mayu. N’él, presentaránse les primeres modificaciones presupuestaries destinaes a programes venceyaos a la xestión de la crisis de la COVID-19. Otramanera, alcordose convocar el Conseyu Social de la ciudá pal viniente día 25. Nesti conceyu, informaráse de les midíes previstes pa recuperar l’actividá económica y l’empléu. Los voceros municipales tamién pactaron la torna de les comisiones municipales, que van celebrase de manera presencial nel Salón de Plenos.

  • Foru esixe la convocatoria «urxente» del conseyu d’alministración de la EMA

    Foru esixe la convocatoria «urxente» del conseyu d’alministración de la EMA

    Foru va esixir la convocatoria «urxente» del conseyu d’alministración de la EMA pa que se dean toles esplicaciones necesaries sobro’l pozu de tormentes del parque de los Hermanos Castro. Jesús Martínez Salvador señaló que “esi ye’l primer órganu nel que se deben dar toles informaciones oportunes, amás d’aprobar el modificáu del proyectu”. El conceyal refugó les “fanfarroneríes» d’Olmo Ron y encamentó al presidente de la EMA a «informar al so conseyu d’alministración sobre les novedaes y proponer el plan d’actuación p’arreglales».

    L’edil refuga «perder el tiempu con provocaciones» y esixe esplicaciones. «Queremos conocer cómo se producieron estes novedaes, por qué se producieron y dende cuándo sabe l’equipu de gobiernu que yera necesariu esti cambéu nel proyectu de la obra”. Martínez Salvador acusa al conceyal de «despintar información de forma premeditada». Recordó que “va un mes y mediu dos conceyales de Foru consultamos l’espediente alministrativu de la obra nel despachu del conceyal, y nada dixo al respeutu».

    Foru va solicitar la comparecencia d’Olmo Ron nel viniente Plenu municipal. La formación solicíta-y qu’apurra tola información referente a estos informes, a la so fecha de firma y a les «consecuencies detallaes de los mesmos”.

  • Proponen recuperar les piscines de la Llaboral tres 30 años ensin usu

    Proponen recuperar les piscines de la Llaboral tres 30 años ensin usu

    L’oxetivu ye remocicar les piscines de la Llaboral pa que tornen a formar parte de la ufierta deportiva de Xixón. Foru Asturies quier que l’equipu de gobiernu estudie l’apertura de la piscina de la Universidá Llaboral. El voceru de la formación, Jesús Martínez Salvador, va llevar la propuesta al viniente Plenu municipal. «La puesta en funcionamientu de la piscina como’l primer vasu públicu pa la práctica de natación y usu lúdicu sería un impulsu pa la ufierta deportiva de la ciudá», esplica.

    El Conceyu ye responsable de les instalaciones deportives del edificiu tres la cesión por un periodu de 40 años fecha pol Gobiernu asturianu. Va un añu sacóse a llicitación la reforma de los campos de rugby, fútbol americano, h.oquei y fútbol. N’actualidá tán rematando les obres de reforma. La formación casquista concreta que’l conveniu inclúi la cesión de toles instalaciones deportives del edificiu, tamién de les pistes polideportives y la piscina descubierta.

    El que fuera conceyal de Deportes n’anterior llexislatura reclama siguir colos trabayos de reforma. La segunda fase, de mayor complexidá técnica, supondría la recuperación de la piscina de la Llaboral, ensin usu dende 1990. El ruegu va ser aldericáu’l próximu miércoles mientres el Plenu municipal.

  • El PSOE tamién s’impon ente los asturianos nel esterior

    El PSOE tamién s’impon ente los asturianos nel esterior

    El PSOE impúnxose tamién nel votu esterior n’Asturies al recibir 2.144 papeletes que sofitaron la so candidatura al Congresu, un 34,3% del total. La coalición de PP-Foru sumó 1.232 papeletes; Xuníes Podemos, 908; Vox, 798; Ciudadanos, 522; Más País, 215 y el Partíu Animalista, 124 votos. Según los datos validaos esta tarde pola xunta electoral, nos comicios del pasáu domingu participaron 6.252 asturianos rexistraos nel censu de residentes ausentes, conocíu como CERA. Nel casu del Senáu, los candidatos del PSOE tamién fueron los que rexistraron el mayor volume de sofitos: Francisco Blanco (2.226 votos), María Fernández (2.258 votos) y Fernando Lastra (1.845 votos).

  • El PSOE gana de nuevu les xenerales n’Asturies y llogra trés diputaos

    El PSOE gana de nuevu les xenerales n’Asturies y llogra trés diputaos

    El PSOE volvió ganar les elecciones xenerales n’Asturies al llograr trés de los siete diputaos y trés de los cuatro escaños al Senáu que se repartíen nel Principáu. Col 100% del votu escrutáu, más del 33% de los asturianos confiaron nel PSOE, un respaldu que supera al llográu nos comicios del pasáu 28 d’abril. La llista que consiguió’l sofitu mayoritariu de los electores d’Asturies ta encabezada pola vicesecretaria xeneral del PSOE Adriana Lastra. Van revalidar amás l’acta de diputada la ministra de Sanidá, Consumu y Bienestar Social en funciones, María Luisa Carcedo, y Roberto García Morréis. Fueron escoyíos senadores socialistes per Asturies Francisco Blanco, María Fernández y Fernando Lastra.

    Ciudadanos queda ensin representación por Asturies, en perdiendo cerque d’un terciu de los sos votantes

    La coalición de PP-Foro meyoró’l so resultáu en más de cinco puntos, lo que-yos permitió sumar un diputáu. Caltienen la representación Xuníes Podemos y Vox, con un diputáu caún. La candidatura lliderada por Sofía Castañón dexó pel camín 19.033 papeletes, pasando del 17,14% al 15,96%. Pela so parte, la formación d’ultraderecha medra unos cuatro puntos, pasando del 11,49% al 15,90%. Queda fuera del Congresu Ignacio Prendes. Ciudadanos perdió cerque d’un terciu de los sos votantes n’Asturies, pasando de 104.688 votos a 36.852.

    El secretariu xeneral de la FSA y presidente del Gobiernu d’Asturies, Adrián Barbón, destacó que la resultancia d’esti 10 de payares suma la tercer victoria del PSOE d’Asturies no que va d’añu: “Los asturianos dixeron alto y claro que la fuerza político na que confíen ye’l PSOE. Somos la federación que meyor resultancia tuvo”, sorrayó, un sofitu que Adrian Barbón venceyó a “que’l PSOE ye’l partíu que meyor conecta cola sociedá asturiana”.

    El llíder de los socialistes asturianos pidió amás a tolos partíos constitucionales que tengan altor de mires: “Quiero llanzar un mensaxe evidente al conxuntu de partíos: tienen una enorme responsabilidá para desbloquiar la situación”, encamentó Adrián Barbón énte la configuración del arcu parlamentariu que dexen les resultancies de los comicios del 10 de payares.

  • Dimite la conceyala de Foru Ana Braña

    Dimite la conceyala de Foru Ana Braña

    La conceyala de Foru nel Conceyu de Xixón Ana Braña presentó esti vienres la so renuncia al acta. Nun comunicáu, la formación esplica que se trata d’una decisión por razones «puramente personales». Braña ostentaba esti cargu dende les elecciones del pasáu 26 de mayu. L’arrenunciu va ser incluyíu nel orde del día del plenu de la Corporación previstu pal próximu miércoles, de forma que va ser efectiva n’esi mesmu actu una vegada el plenu tome conocencia de la mesma.

    Pelayo Barcia Castañón, director xeneral d’Empléu nel mandatu anterior, va ser previsiblemente quien ocupe l’asientu de Braña. El so nomamientu podría ser efectivu nel plenu estraordinariu de presupuestos previstu pal 4 d’avientu.

  • Ana Braña: “L’IBI diferenciau va tener repercusión nel empléu”

    Ana Braña: “L’IBI diferenciau va tener repercusión nel empléu”

    La conceyala de Foru Ana Braña presentó esti xueves les enmiendes al proyectu d’Ordenances Fiscales de 2020. «El proyectu del PSOE ye prácticamente idénticu al que presentamos para l’exerciciu 2018, a diferencia del IBI estremáu, al que Foru siempres s’opunxo». La concejala afirmó que «nun entendemos como’l PSOE votó entós en contra del nuesu proyectu, dempués de retirar –como lo fixo– la so propia enmienda pa gravar con un 0,59% los bienes inmuebles d’usu comercial, ociu, oficines y almacén». Y añadió que «l’IBI diferenciáu saliera alantre si la izquierda se punxere d’alcuerdu».

    «Los impuestos y tases locales tienen d’ayudar a les families y facilitar a les empreses la xeneración d’empléu”

    Sobro esti nuevu tipu impositivu, Braña aportunó en que «tamos falando d’una xubida del 46% a propiedaes dedicaes a diversos usos empresariales con numberosos emplegaos». A esi respectu, incidió, «basta ver l’exemplu de los hoteles. Ensin dulda, desincentívase l’establecimientu d’empreses en Xixón, diendo en contra de les polítiques que llevemos a cabu dende’l Parque Científico y Tecnolóxico y el Centru Municipal d’Empreses. Va tener repercusión nel empléu». En materia de tases municipales, Ana Braña detalló que soliciten la conxelación del preciu públicu pola recoyida de borrafes y l’agua. «Los impuestos y tases locales tienen d’ayudar a les families y facilitar a les empreses la xeneración d’actividá económica y empléu”.

    La conceyala de Foru mostróse contraria a los cambeos na bonificación a vehículos históricos porque «apenes circulen». No que cinca al IBI, proponen un cambéu na bonificación a families numberoses y una bonificación del 75% a los inmuebles nos que se desenvuelva l’actividá de mercáu, declaraos d’especial interés o utilidá municipal.

    La formación tamién refugó la medría d’un 60% nel preciu públicu de les Escueles Deportives al condideralo «una medría abusiva». Tamién la política d’accesu a los Museos a de la ciudá foi oxetu d’enmienda, esplicó Ana Braña. «Nun tien sentíu estender la gratuidá del accesu a los museos a les persones que nun tienen tarxeta ciudadana, porque les persones que nos visiten nun sufragen el so costu y caltenimientu», detalló la concejala de Foru.

  • Foru defende l’Arcu: «Nun nació contra nengún otru eventu»

    Foru defende l’Arcu: «Nun nació contra nengún otru eventu»

    Montserrat López llamentó la decisión del equipu de gobiernu de suprimir l’actu institucional del Festival Arcu Atlánticu. «Nun va haber un actu institucional p’amosar el sofitu institucional qu’esti eventu merez, como demuestren los 175.000 visitantes de la última edición nes actividaes puramente culturales». La conceyala de Foru refugó d’esta manera les pallabres de l’Alcaldesa sobre la falta de «refrendo del públicu».

    «El PSOE tendría d’esplicar por qué fai de menos al Festival Arcu Atlánticu, dedicáu por cierto anguaño a les muyeres», añadió López. Amás consideró que «el Festival ye l’amuesa más visible de sofitu municipal al patrimoniu cultural asturianu y nun podemos dexar que s’abandone». «Nun nació en contraposición a nengún otru eventu», dixo en referencia a la Selmana Negra. El Festival púnxose en marcha mientres el primer mandatu de Carmen Moriyón y anguaño va celebrar la so octava edición.

    «El Festival surde coles mires de recuperar, caltener y emponderar el nuesu patrimoniu cultural, y fomentar la unión ente los pueblos que configuren l’Arcu atlánticu européu con Xixón y Asturies”, recordó. «Esi foi’l patrón de toles ediciones hasta agora», que cuntaron, recordó, «con participación de ciudaes de trés países, Portugal, Francia y España; y de una decena de conceyos de fora d’Asturies».

    López manifestó «el más absolutu refugu a la desapaición d’esti Festival, daqué que yá se plantegó per parte del PSOE». La conceyala llamentó’l «sectarismu» del Gobiernu d’Ana González. «Nun sería deseable que tola so política pa los cuatro años sía reaccionar contra lo que se fixo hasta agora», remató.

  • L’alcaldesa de Xixón xúbese’l sueldu

    L’alcaldesa de Xixón xúbese’l sueldu

    El sueldu de l’alcaldesa de Xixón va xubir hasta los 67.529 euros. L’incrementu de les retribuciones previstu pol nuevu equipu de gobiernu tamién va beneficiar a los conceyales lliberaos, que van pasar a ingresar 6.600 euros más que na pasada llexislatura. Ye la propuesta de la nueva responsable de Facienda, Marina Pineda. De salir alantre, el sueldu de la primer edil va medrar hasta los 67.529 euros, 2.584 euros más de los 64.945 qu’ingresaba Carmen Moriyón.

    El sueldu de l’alcaldesa de Xixón nun va ser l’únicu que xuba. Los ediles lliberaos tamién van ver incrementada la so asignación. De 52.073 euros brutos al añu a cerca de 58.000. Nel casu de les lliberaciones parciales, los asignaciones van pasar de los 39.000 a los 43.000 euros. Esta decisión llega depués de dos mandatos colos sueldos conxelaos. La intención agora ye que los conceyales lliberaos de cada grupu políticu vean ameyoraes les sos condiciones pa equiparase coles d’un director xeneral.

    «Supón un mui mal entamu del mandatu», llamenta Yolanda Huergo

    La propuesta de xubida de los sueldos de los conceyales va salir previsiblemente alantre al cuntar cola única oposición de Podemos-Equo. Les tres representantes de la coalición soscribieron un compromisu éticu qu’inclúi la llimitación salarial. «Supón un mui mal entamu del mandatu», aseguró Yolanda Huergo, vocera de la coalición.

    No que sí parez que va haber alcuerdu ye nel repartu de les lliberaciones. El Conceyu tien llimitaes a 18 el total de lliberaciones a repartir ente los conceyales del Plenu. El PSOE va quedase con diez d’elles, dos van corresponder a Ciudadanos como primer fuercia de la oposición, el restu de grupos van quedar con una caún.