Etiqueta: Fútbol

Mayra Olvera, nueva incorporación del Sporting Femenín

La xugadora internacional por Ecuador Mayra Olvera convirtióse na última incorporación del Sporting femenín. Mayra ye una mediocampista de 27 años que la pasada temporada militó nel CD Lugo – PM Friol, col que llogró l’ascensu a la nueva 2ª división. Con anterioridá, Mayra xugó tamién nel Espe, nel Rocafuerte, nel Club 7 de febreru y nel Independiente del Valle, d’Ecuador; na Deportiva Campera y nel CD Patriotes Boyaca de Colombia para acabar recalando n’España nel equipu lucense la pasada temporada 2018-2019.

La nueva xugadora foi internacional con Ecuador en categoríes inferiores dende 2008. Llegó a xugar cola sub 17 y sub 20, hasta llegar a la selección absoluta. Con ella ya xugó la Copa del Mundu de Canadá 2015, y la Copa América hasta en 2010, 2014 y 2018.

03/10/2019
El Sporting, pendiente de Javi Fuego

Dellos xugadores del Sporting tornaron con golpes y sobrecargues de Málaga. El que nesti momentu caltien más pendientes a los servicios médicos del club ye l’estáu del todíu derechu de Javi Fuego, aquexáu d’un esguince. El sierense fai trabayu rexenerativu, al igual que los que más minutos xugaron en La Rosaleda, magar se somete a un extra de tratamientu y fisioterapia.

El próximu partíu va ser el xueves n’El Molinón, a los siete de la tarde, cola visita del Almería. Pa esti alcuentru, José Alberto volverá tener a disposición a Unai Medina, que dexa atras los problemes musculares que-y fixeron ser baxa la pasada xornada. En xugando’l xueves, l’equipu roxiblancu apenes va tener tiempu más que pa pensar nel siguiente alcuentru, que va ser el domingu, a les dolce del mediudía en Fuenlabrada.

30/09/2019
José Alberto: «Somos un equipu fiable»

José Alberto defendió na sala de prensa de Mareo que’l Sporting ye «un equipu fiable, que sigue en construcción, pero con pasu firme, avanza». Añedió qu’énte’l Dépor gustó-y la so escuadra: «Fixo un gran partíu, qu’empañó’l gol; hubo más imprecisión na primer parte, porque fuimos atrevíos y ye un riesgu que tienes qu’asumir si quies actuar con esi estilu, pero la segunda foi una gran parte, y l’equipu esfrutó». Espunxo tamién que, como parte del fútbol, «cuando nun cierres un partíu, cuerres riesgos hasta’l final».

Entiende que la visita a Les Palmes ye complicada, porque «tien una plantiya escelente» y sobro si puede ser un bon momentu p’allegar ellí, señaló que nunca lo ye cuando vas visitar a un gran equipu y máxime cola fuerza qu’esibe na so casa». Considera que tamién ta en construcción, en plena evolución: «El so xuegu ye intensu, ta bien definíu». «Agora mesmu prohibimos mirar la clasificación», señaló, en defensa del día ente día, del entrenamientu diariu, del partíu a partíu y de la selmana a selmana».

José Alberto defendió a los xugadores que nun entraron na convocatoria: «Los que se queden tán trabayando perbién y pueden entrar en cualquier momentu; hai muncha competitividá nestos momentos».

17/09/2019
El Sporting Femenín nun pudo puntuar en Tajonar

La segunda xornada de la Lliga Reto Iberdrola terminó con derrota pal Sporting Femenín na so visita a Tajonar pa midise al CA Osasuna. L’once inicial escoyíu por Ricardo Alonso y Rafael Bernal cuntó con Paula Madrazo, Paz Sánchez, Marta Nieto, Pipa, Noelia, Pañu, Nuria Cueto, Neymer, Irene, Yaiza y Alba Fernández.

Les roxiblanques tuvieron les sos oportunidaes con empate a cero con delles ocasiones d’Irene tres una llegada per banda y un saque d’esquina que nenguna moza foi capaz de rematar. Nel minutu 15, Mai Garde fixo’l primeru para les navarres. Darréu, Nuria Cueto tuvo a puntu d’empatar el partíu pero’l so remate estrellóse nel palu de la portería de M. Sampalo. ‘Las rojillas’ buscaben centros llaterales para faer dañu mientres tol partíu y el Sporting trataba de combinar pa llegar enriba pero’l segundu tantu foi un xarru d’agua frío yá que Yaiza acabó marcando en mesma portería. Pese al 2-0 nel marcador, les roxiblanques tuvieron otros dos ocasiones enantes del descansu. La segunda parte siguió la tónica. Nun foi hasta’l final del alcuentru cuando les navarres pudieron cerrar el partíu con dos goles de Sara Carrillo y Lara, de penalti, nos minutu 81 y 84, respectivamente.

Pal entrenador, «al equipu pesó-y la inesperiencia na categoría». «Aguantamos bien la primera parte pero’l marcador final ye’l reflexu de la simplería d’un equipu y l’esperiencia del otru». Al respective de la prósima xornada, Ricardo Alonso sorrayó que «el Pozuelo ye un rival de la nuesa lliga. Tenemos que puntuar pa tomar aire y dar ánimu a la plantiya». La tercer xornada de la Lliga Reto Iberdrola pal Sporting Femenín va ser ante’l CF Pozuelo de Alarcón (domingu, 12 hores) en Mareo. Les madrilanes vienen de perder ante’l Athletic Club B por 0-1.

17/09/2019
Djuka renueva col Sporting hasta 2023

Djuka robló l’ampliación del contratu que tenía como xugador del Sporting por otra campaña más. L’alcuerdu que tenía suscritu l’atacante serbiu hasta’l 30 xunu de 2022 estiéndese agora hasta’l 2023.

13/09/2019
Babin: «Nel vestuariu somos una familia y eso treslládase al campu»

Nun cree Babin qu’hasta’l domingu l’equipu sintiérase presionáu por nun ganar hasta entós, anque cree que «la victoria apúrrenos confianza, especialmente agora que vamos a un campu tan difícil como’l del Uesca, que tien xugadores d’enforma nivel». Considera que «esta temporada la Segunda dio un pasu importante alantre, qu’hai equipos que se reforzaron perbién». Sicasí, alvierte de que «siempres hai dalguna sorpresa, porque’l presupuestu nun lo ye too».

Respectu al pasáu domingu, considera que «l’equipu tuvo bien ensin y con pelota, xugó un partíu completu». Foi más allá cuando señaló que «facía tiempu que nun me divertía tanto xugando como na segunda metá, con un ambiente que ponía’l pelo de punta». Destaca que «nel vestuariu somos una familia, lo que se tresllada al campu». Sobre’l motivu, piensa qu’ayuda que «hai munchos asturianos, lo que xenera enraigono», de la mesma manera que tamién merez la so considerancia l’amiestu de veteranos y nuevos».

Tien bones sensaciones nuna temporada na que se ve ilusionáu. Prevé coses bones, qu’asume «dende la responsabilidá de sabeme ún de los más veteranos del equipu».

06/09/2019
El Sporting viaxa a tierres aragoneses

Tres l’entrenamientu d’esta mañana en Mareo, a puerta zarrada, José Alberto dio a conocer la llista de convocaos con vistes al partíu del próximu domingu (12 hores) n’Uesca. Primeramente, el Sporting va faer escala esta nueche en Zaragoza, onde tien previstu entrenase nuevamente mañana a les 10.30 hores na Ciudá Deportiva del equipu capitalín.

La relación d’espedicionarios quedó integrada por Damián Pérez, Marc Valiente, Borja López, Babin, Aitor García, Álvaro Vázquez, Carmona, Diego Mariño, Nacho Méndez, Molinero, Manu García, Unai Medina, Javi Fuego, Cristian Salvador, Pablo Pérez, Djuka, Pedro Díaz y Christian Joel.

06/09/2019
Isma Cerro: «Toi preparáu pa lluchar por un puestu»

Cuarenta selmanes, diez meses dempués, Isma Cerro alcontróse de nuevu col fútbol. Foi nos minutos finales del pasáu domingu, cuando volvió xugar tres la grave mancadura de rodía que sufrió. «Foi una allegría inmenso y amás, n’El Molinón«, señaló l’atacante.

Esplicó que foi un procesu «bien duru, con muncho tiempu solu, nel que lo más importante ye l’aspeutu sicológico, porque si falles nesto, nun avances na recuperación». Dempués llegó la vuelta a los entrenamientos. Yera’l momentu de quitar los mieos: «Quité y recuperé l’enfotu; yá toi llistu para lluchar por un puestu».

05/09/2019
Cuenta trás pal entamu del Sporting Femenín

El Sporting Femenín empieza la cuenta trás pal entamu ligueru na Lliga Reto Iberdrola énte’l CD Parquesol na Escuela de Fútbol de Mareo (domingu 8 de setiembre, 17:00 hores). Les futbolistes van estrenar categoría empobinaes por Ricardo Alonso y Rafa Bernal como entrenadores, Rubén Biempica como preparador físicu y Chus Viña como entrenador de porteres.

Pa esti entamu de campaña, la plantiya roxiblanca, qu’entá va incorporar a dalguna xugadora más, cuenta con Sheila y Paula M. como porteres; Paz, Marta Nieto, Pipa, Eider, Ayuso, Yaiza y Alba F. como defenses; Sara M. Noelia, Sheila Fernández, Ichi, Keymer, Sara Rodríguez y Alba A. nel centru del campu y María Yenes, Natalia, Pañu, Nuria, Irene y Érika como delanteres.

Ricardo Alonso, técnicu del Sporting Femenín, comentó que pa esti primer partíu de lliga, «ye importante sacar los trés puntos y que les moces sigan cola implicación que tienen». Per otru llau, l’entrenador destacó que «el debú na Lliga Reto Iberdrola ye un cambéu grande y tamos bien ilusionaos y con munches ganes d’asumir esti retu».

Mientres la pasada fin de selmana, les moces xugaron el tornéu Ciudá de Salamanca nes instalaciones de Vicente del Monte. El primer partíu foi contra l’Atléticu de Madrid C que terminó con empate (1-1) nel que marcó Irene. A la fin del partíu, y tres la riola de penaltis, les madrilanes ficiéronse cola victoria. El tercer y cuartu puestu terminó de manera positiva pa les roxiblanques cola victoria énte la Universidá de Burgos NSB por 8-1 gracies a los goles de Érika (2), Sara M. (2), Nuria (2), Pañu y Noelia.

05/09/2019
Ternera Asturiana prorroga’l so compromisu col Sporting

El Conseyu Regulador de la I.X.P. Ternera Asturiana y el Sporting, dos de los más relevantes embaxadores d’Asturies, caltienen un estrechu llazu de collaboración, que se volvió a roblar esti xueves en Mareo cola estensión por una temporada más del so compromisu de patrociniu. Protagonizaron la firma del alcuerdu’l vicepresidente del club xixonés, Javier Martínez, y el vicepresidente del Conseyu Regulador, Rubén Fernández García.

05/09/2019