El Comité Asesor de Vacunes aprobó esti miércoles el calendariu de vacunaciones de los naciellos prematuros. Pela primer vez incluye la profilaxis del rotavirus (un virus que provoca gastroenteritis) nos neños con una edá xestacional d’hasta 32 selmanes. Esta vacuna va alministrase vía oral, coincidiendo coles revisiones de los 2 a los 6 meses d’edá cronolóxica. Amás, van inmunizalos contra’l gripe, como se fixo pela primer vez nesti iviernu.
Otra manera, el Comité Asesor de Vacunes, que presidió’l conseyeru de Salú, Pablo Fernández Muñiz, alcordó l’actualización de la estratexa de vacunación antigripal pa la campaña 2020-2021. La novedá principal ye que s’amplía l’alministración de la vacuna tetravalente de cultivu celular a tola población diana ente 14 y 64 años. Esta profilaxis alministróse pela primer vez na campaña presente a les muyeres embaranzaes y a les persones con alerxes graves al güevu y a los antibióticos.
La tetravalente clásica, que protexe de dos tipos de virus A y de les dos variantes del B, va caltenese pa la población de riesgu n’edá pediátrica, quier dicise, ente los 6 meses y los 13 años. Y va siguir alministrándose la trivalente reforciada a los mayores de 65 años. P’acabar, presentóse la planificación de la campaña de vacunación de meninxitis pa la población adolescente, que’l so principiu ta previstu pal primer semestre del añu que vien.
Les unidaes d’atención integral a pacientes con enfermedá inflamatoria intestinal del Hospital Universitariu Central d’Asturies (HUCA) y del Hospital Universitariu de Cabueñes llograron la certificación de calidá que concede’l Grupu Español de Trabayu n’Enfermedá de Crohn y Colitis Ulcerosa (Geteccu). Esta distinción reconoz la excelencia na atención y los cuidos a cerca de 4.000 persones que sufren esta patoloxía dixestiva n’Asturies.
L’HUCA atiende a 1.950 pacientes y suma más de 150 nuevos usuarios cada añu. Envalórase qu’en seis años va asistir a 3.000 persones con enfermedá inflamatoria intestinal pola mor de la medra de la prevalencia. Pela so parte, l’Hospital Universitariu de Cabueñes trata a más de 1.700 pacientes con enfermedá de Crohn o colitis ulcerosa.
El presidente de Geteccu, Manuel Barreiro, va apurrir el llunes 4 de payares l’acreditación al Hospital Universitariu de Cabueñes. Geteccu ye una asociación nacional qu’homologa los criterios clínicu-terapéuticos nel diagnósticu y tratamientu de la enfermedá inflamatoria intestinal. Hasta agora, certificó a más de trenta unidaes del Sistema Nacional de Salú. La norma evalúa 53 indicadores rellacionaos colos recursos, les infraestructures y los profesionales de les unidaes, mesmo que la calidá y lois resultaos de l’actividá asistencial. La duración del certificáu, aauditáu por Bureau Veritas, ye de trés años para les unidaes escelentes, como la del HUCA, y de dos para les unidaes avanzaes.
La supervivencia de les muyeres de 45 a 64 años con cáncer de mama algama n’Asturies el 92% al llustru del diagnósticu. Son datos del Rexistru de Tumores del Principáu, dependiente de la Conseyería de Salú. Nos últimos exercicios amenorgóse la mortalidá por esta causa en toles franxes d’edá, especialmente ente les más moces.
Anguaño rexístrense cerca de 800 nuevos casos añales nel Principáu, lo que convierte al de mama nel tumor más frecuente ente les muyeres. Les campañes de detección temprana fixeron posible’l diagnósticu n’estadios más tempranos. Más del 75% de la población diana; esto ye, muyeres de 50 a 69 años, participa nel programa de detección precoz, que consiste na realización d’una mamografía. Con esta prueba detéctase la patoloxía en cuatro muyeres de cada mil que participen nel programa. El 70% d’elles nun tien afectación de ganglios y unu de cada trés tumores mide menos d’un centímetru, lo que trai un meyor pronósticu y tratamientos menos agresivos.
La Conseyería de Salú actualizó la información sobre esti peneráu, que per primer vegada reflexa los sos resultaos p’ayudar a les muyeres a decidir sobre la so participación nel programa. Esti añu yá se repartieron más de 13.000 folletos nes distintes zones sanitaries, a les que se va sumar nes próximes selmanes l’área III, que correspuende a Avilés y contorna. Per otra parte, Asturies va acoyer el 39º Congresu de la Sociedá Española de Senoloxía y Patoloxía Mamaria, que se va celebrar n’Uviéu n’ochobre de 2020, y nel que van participar unos 600 especialistes de too el país.
El conseyeru de Salú, Pablo Fernández Muñiz, axuntóse esti miércoles nel HUCA col xerente de la área IV, Luis Hevia, el director xeneral de Salú Pública, Antonio Molejón, y el xefe del Serviciu de Microbioloxía, Fernando Vázquez, para recibir información sobro’l casu.
El 10% de la población ye portadora de la bacteria ensin qu’haya riesgu pal so salú. Nesta ocasión, trátase d’un enfermu inmunodeprimíu, con tratamientos antibióticos previos pa tratar otros xermes. L’hospital echó voz del casu al serviciu de Vixilancia Epidemiolóxica, como marca’l protocolu n’enfermedaes de declaración obligatoria (EDO). Amás, como en tolos casos d’afección por esta bacteria, el HUCA va unviase una amuesa del cultivu tomáu al Institutu Carlos III pa que faiga un tipaxe del xenoma del xerme, que se va incluyir na so base de datos. Mientres anguaño, rexistráronse 13 casos aisllaos por listeriosis n’Asturies.
Pablo Ignacio Fernández Muñiz (Avilés, 1966) ye’l nuevu conseyeru de Sanidá del Gobiernu d’Asturies. Llicenciáu en Medicina y Ciruxía pola Universidá d’Uviéu, empecipió la so trayectoria profesional como médicu d’accidentes na mina de Tormaleo y darréu nel serviciu d’Urxencies d’Atención Primaria d’Avilés. En cursando’l MIR na especialidá de Ciruxía Xeneral y del Aparatu Dixestivu, incorporóseó al Hospital Xeneral d’Asturies, onde trabayó dende 1992 hasta 1996 y onde llogró xuna beca de l’Asociación Española de Ciruxanos pa formación específica en Ciruxía Hepato-Bilio-Pancreática. Tamién exerció como ciruxanu nel Hospital Valle del Nalón (1997-2010) y nel Hospital San Agustín hasta 2016. Anguaño ocupaba’l cargu de director de la área IV del Serviciu de Salú del Principáu (Sespa), qu’inclúi la xestión del Hospital Monte Naranco y l’Hospital Universitariu Central d’Asturies (HUCA).
Ye miembru del Comité de Bioética d’España y del Comité Científicu de la Sociedá Internacional de Bioética (SIBI). Como docente, dende 2016 exerció como director del Máster d’Especialización en Patoloxía Mamaria de la Universidá Autónoma de Madrid. Ye espertu en ciruxía oncoplástica y reconstructiva de la mama, especialista n’ecografía mamaria, máster en Bioética poles Universidaes del País Vascu, Zaragoza, La Llaguna, Les Palmes de Gran Canaria y Rovira i Virgili, máster en Dirección y Alministración d’Empreses pola Universidá Camilo José Cela, y máster en Dirección y Alministración d’Empreses (MBA) y especialidá en Xestión Sanitaria por IMF Business School.
El Gobiernu d’Asturies actualizó los conteníos y materiales del programa de salú bucodental ‘La conquista de la boca sana’ y amplió la so cobertura. Va beneficiase tol alumnáu d’Educación Infantil y Primaria; esto ye, de 3 a 12 años, cuando hasta agora empezaba a los 5. Esta actuación, implantada va diez años, ye un plan de sofitu a l’acción educativa que, nel marcu de la Estratexa d’atención a la salú oral, llogra meyores significatives na infancia y nos primeros años de l’adolescencia.
Los directores xenerales de Salú Pública, Antonio Molejón, y d’Ordenación Académica y Innovación Educativa, Francisco Laviana, presentaron esti miércoles el proyectu anováu. El programa busca ameyorar los vezos d’hixene oral del alumnáu y ufiertar les conocencies fundamentales pal cuidáu de la boca na población d’hasta 12 años.
‘La conquista de la boca sana’ busca ameyorar los vezos d’hixene oral del alumnáu
La conquista de la boca sana consta d’una parte teórica que profesoráu y alumnáu trabayen nel aula. Incluye información sobre l’anatomía y fisioloxía de la boca, la patoloxía oral y la prevención d’enfermedaes. La parte práctica contempla talleres de cepilláu nes aules impartíos por profesionales. Realízase con cepiyos de dientes pa cada neñu y boques xigantes y cepiyos xigantes suministraos a los centros pola Conseyería de Sanidá.
Alredor del 60 % del alumnáu de los centros públicos d’Asturies participa nesti programa, una cifra qu’en delles árees sanitaries supera’l 80 % y n’otres raspia’l cien por cien. La conseyería quier ampliar estes cobertures nos años vinientes, sobre manera nes zones onde se caltienen más baxes: III (Avilés), IV (Uviéu) y V (Xixón).
La salú bucodental n’Asturies
Les 38 unidaes de salú bucodental del Serviciu de Salú del Principáu (Sespa) atienden cada añu 145.000 consultes. La implantación de la estratexa d’atención a la salú oral fai más de dos décades supunxo una meyora real. Asina, anguaño, el 42% de los escolinos presenta dalguna caries a los 12 años, una cifra sensiblemente menor al 74% d’entós.
Ún de los indicadores que tamién evolucionó ye’l CAO, qu’evalúa la media de dientes cariaos, ausentes por caries y obturaos na población esplorao. En 1992, amosaba nel Principáu una tasa de 3,33 n’escolinos de 12 años, mentes que na última evaluación baxa hasta’l 1,17.Nes unidaes de salú bucodental, desplegaes en 58 consultes, desenvuelven l’actividá 38 dentistes, 26 hixenistes y 12 técnicos en cuidaos auxiliares d’enfermería, que revisen anualmente a alredor de 4.000 muyeres embaranzaes y 24.000 escolinos.
El programa de salú bucodental ye una iniciativa de calter preventivu, que propón la revisión de los menores en dellos momentos de la edá escolar pa evitar daños nes pieces o amenorgar el so impactu cuando se producieron. Estes unidaes tamién atienden a persones adultes pa procedimientos agudos y ciruxía menor y impulsen programes de meyora de la salú oral de muyeres embaranzaes y de la población con discapacidá intelectual.
Les interesaes tendrán d’allegase a la consulta del bancu de lleche materno d’Asturies pa realizar una entrevista na que la futura donante va rellenar y va roblar una encuesta de salú y estilu de vida, mesmo que un consentimientu informáu. Amás, va realizáse-y un analís de sangre pa refugar infecciones como VIH, hepatitis o sífilis. Pa inscribise como donante ye mester allegar col DNI y la tarxeta sanitaria. Tolos datos personales van ser trataos confidencialmente.
Tres la entrevista inicial, toles donantes van recibir información sobro la estracción, caltenimientu y tresporte de la lleche. La estracción puede realizase en casa o nel hospital si’l fíu ta ingresáu. La lleche estrayida va conxelase darréu y puede almacenase na casa hasta un máximu de 15 díes.
El bancu de lleche nun tien serviciu de recoyida. Les donantes tienen de llevar l’alimentu al HUCA o a los centros satélites allugaos nos hospitales de Cabueñes y San Agustín (Avilés). Puede apurrise n’Uviéu, nel bancu, los díes llaborables, de 8:30 a 14:30 hores y n’horariu de tardes y festivos na Unidá de Lactodietética. En Xixón, na Unidá de Neonatoloxía del Hospital Universitariu de Cabueñes de 13:30 a 15:00 hores en díes llaborables (pa otros horarios ye mester contactar primeramente per corréu electrónicu o teléfonu). N’Avilés va recoyer la Unidá de Neonatoloxía del Hospital San Agustín, de 10:00 a 14:30 hores los díes llaborables.
El nuevu calendariu de vacunación infantil d’Asturies entró a valir esti mes. Inclúi como principal novedá l’adelantu de los 13 a los 10 años de la primer dosis del virus del papiloma humanu (VPH). Amás, contempla la meyora na inmunización énte la meninxitis al amplíase la protección a cuatro serogrupos (A, C, W, Y) d’esta enfermedá.
P’ameyorar la protección frente a la meninxitis, camúdase l’actual dosis, que previén la infección pol meningococu C y alminístrase a los 13 años, por una vacuna tetravalente que protexe frente a cuatroserogrupos: los meningococos A, C, W y Y. Esta inmunización va estendese a tolos adolescentes que cumplan 13 años en 2019 y se va revacunase a los que yá recibieron la dosis de meningococu C prevista nel calendariu anterior.
Nuevu calendariu de vacunación d’Asturies.
Estos cambeos respuenden al aumentu de casos d’enfermedá meningocócica invasora producíos polos serogrupos W y Y nes últimes temporaes, lo que llevó al alcuerdu del Sistema Nacional de Salú d’incluyir la vacuna frente a estos grupos nos calendarios de toles comunidaes. Amás, nel primer semestre de 2020 va llevase a cabu una inmunización de rescate con esta vacuna tetravalente n’adolescentes hasta los 18 años p’amenorgar la tresmisión de la enfermedá y consiguir una protección más global. Esto va suponer la vacunación de cerca de 31.000 adolescentes que cumplen ente 15 y 18 años el próximu exerciciu. El costu extra d’esti cambéu, tanto nes dosis como na campaña, ronda’l millón d’euros.
La vacuna frente al virus del papiloma humanu adelántase a los 10 años
Vacuna frente al virus del papiloma humanu
L’adelantu a los 10 años de la vacunación frente al virus del papiloma humanu pa toles neñes deber a que, nesta edá, la respuesta a la dosis ye más intensa. Tamién se preve ameyorar el so algame al realizase más llueñe del final de la edá pediátrica, cuando les cobertories aparren un pocu.
Coles mesmes, espérase ameyorar la protección, una y bones estes vacunes consiguen mayor potencial preventivu antes del entamu de les relaciones sexuales, cuidao que la probabilidá d’infección ye más alta nos primeros contactos con una nueva pareya. Los últimos estudios nacionales amuesen qu’una proporción pequena pero significativa d’adolescentes yá s’empecipió nes relaciones sexuales a los 13 años.
Una vacuna segura
Tamién se prevé que l’adelantu de la edá de vacunación amenorgue la posibilidá d’un síncope, que ye’l principal efectu adversu descritu pola lliteratura científica. Sobre esto, el Global Advisory Committee on Vaccine Safety (GACVS), comité asesor de la Organización Mundial de la Salú (OMS) asegura, tres l’exame de gran cantidá d’estudios ya informes d’alta calidá metodolóxica, que la vacunación frente al virus del papiloma humanu ye estraordinariamente segura.
Los costos d’alquisición de les vacunes van pasar d’unos 100.000 euros de 2019 a 2022, y de 200.000 de 2020 a 2021
El GACVS almite que los únicos efectos adversos relevantes son la anafilaxia y el síncope. La primera, con una incidencia de que s’envalora en 1,7 casos por millón de dosis. Si se tien el precuru d’evitar una posible cayida al suelu, l’esmorecimientu supérase rápido y ensin nenguna remortina.
Va caltenese la vacunación a los 13 años hasta qu’aquelles qu’empiecen a ser inmunizaes a los 10 lleguen a esa edá. Esti cambéu va suponer un aumentu de los costos d’alquisición de les vacunes d’unos 100.000 euros de 2019 a 2022, y de 200.000 de 2020 a 2021. Mientres esos periodos va caltenese una vacunación doble: a los 10 y los 13 años.
Xunto con estos cambeos, el calendariu infantil actualizó delles indicaciones pa la vacunación frente al virus del papiloma humanu en persones de mayor riesgu, como homes que tienen sexu con homes, persones qu’exercen la prostitución, infectaes con VIH, tresplantaes o inmunosuprimidas, fundamentalmente.
L’Hospital de Cabueñes incorpórase al bancu de lleche materno d’Asturies, allugáu nel Serviciu de Neonatoloxía del Hospital Universitariu Central d’Asturies (HUCA). Failo como centru satélite pa la recepción. Cualquier muyer que tea dando de mamar al so fíu y quiera donar parte de la so lleche va poder facelo nos hospitales universitarios de Cabueñes y San Agustín, amás de nel HUCA.
El bancu de lleche materno empezó a funcionar en xineru de 2017. Nesti tiempu permitió alimentar a más de 180 ñácaros hospitalizaos. El director xeneral de Salú Pública, Antonio Molejón, presentó esti miércoles l’ampliación d’esta iniciativa, qu’apurre lleche humano a los lactantes ingresaos qu’escarecen del alimentu de la so madre, especialmente neonatos prematuros y enfermos. Coles mesmes, dexa sofitar a les madres que quieran dar de mamar a los sos fíos, promocionar la lactancia y menguar los riesgos inherentes a l’alimentación artificial en ñácaros hospitalizaos.
Nestos bancos, la lleche humano donada por madres escoyíes procésase, almacénase y distribúyese. Una vegada pasteurizao pa menguar al máximu’l riesgu de tresmisión d’infecciones y so prescripción médica, l’alimentu alministráse a los neños hospitalizaos que lo necesiten. La lleche materno promueve’l desenvolvimientu sensorial y cognitivo, protexe de patoloxíes infeccioses y cróniques y amenorga la mortalidá infantil por enfermedaes. Por ello, la Organización Mundial de la Salú (OMS) encamienta la lactancia materna esclusiva nos primeros seis meses de vida y complementada con otros alimentos, siquier, hasta los dos años. La lactancia favorez la salú y el bienestar de la madre, ayuda a espaciar los embaranzos, amenorga’l riesgu de cáncer ováricu y mamariu, aumenta los recursos de la familia y resulta inocua para’l mediu ambiente.
¿Cómo puede donase?
Les interesaes tendrán d’allegar a la consulta del bancu de lleche materno d’Asturies pa realizar una entrevista na que la futura donante va rellenar y va roblar una encuesta de salú y estilu de vida, mesmo que un consentimientu informáu. Amás, va realizáse-y un analís de sangre pa refugar infecciones como VIH, hepatitis o sífilis. Pa inscribise como donante ye mester allegar col DNI y la tarxeta sanitaria. Tolos datos personales van ser trataos confidencialmente.
Tres la entrevista inicial, toles donantes van recibir información sobro la estracción, caltenimientu y tresporte de la lleche. La estracción puede realizase en casa o nel hospital si’l fíu ta ingresáu. La lleche estrayida va conxelase darréu y puede almacenase na casa hasta un máximu de 15 díes.
El bancu de lleche nun tien serviciu de recoyida, polo que les donantes tienen de llevar l’alimentu al HUCA o a los centros satélites n’Avilés y Xixón. Puede apurrise n’Uviéu, nel bancu, los díes llaborables, de 8:30 a 14:30 hores y n’horariu de tardes y festivos na Unidá de Lactodietética. En Xixón, na Unidá de Neonatoloxía del Hospital Universitariu de Cabueñes de 13:30 a 15:00 hores en díes llaborables (pa otros horarios ye mester contactar primeramente per corréu electrónicu o teléfonu). N’Avilés va recoyer la Unidá de Neonatoloxía del Hospital San Agustín, de 10:00 a 14:30 hores los díes llaborables.
El Serviciu de Salú del Principáu (Sespa) va celebrar el 10 de payares la postrera de les pruebes de la ufierta pública d’empléu (OPE) 2018. Trátase d’un exame conxuntu para les categoríes profesionales d’ayudante de serviciu y técnicu d’Anatomía Patolóxica, Llaboratoriu, Radioloxía y Radioterapia. Los exámenes, pa los que s’inscribieron un total de 6.235 opositores, van sirvir para cubrir 179 places y van celebrase nel recintu ferial Luis Adaro, en Xixón.
El Sespa va volver utilizar el mesmu sistema que punxo en marcha pa los exaámenes más multitudinarios de la OPE que se desenvolvieron esti añu. Asina, pal accesu al recintu onde se van realizar les pruebes, y col fin d’entainar el procesu, los opositores van usar una acreditación similar a les tarxetes d’embarque de los aviones na que figuren un códigu d’entrada, les instrucciones xenerales y dalgunes de los encamientos. Al igual que n’ocasiones anteriores, estes acreditaciones podrán descargase nun portal web.
Dende avientu de 2016, fecha del primeru de los exames de la ufierta d’empléu públicu, hasta esti mes, el Sespa convocó a más de 60.000 persones para cubrir un total de 2.746 puestos. Amás, n’este mesmu periodu, tamién se desenvolvió un concursu de tresllaos con 1.743 solicitúes almitíes, de les que 1.020 saldáronse con un cambéu de destín.
La ufierta pública d’empléu contribúi a consolidar l’empléu de calidá nel sistema públicu y a amenorgar la interinidá. En 2015, la tasa de temporalidá nel Sespa yera del 34%. Na actualidá esta cifra ta en redol al 20% y ta previsto que s’amenorgue hasta’l 8 % en 2020.
