Xixón al día

Etiqueta: sucesos

  • Un mancáu nun accidente de tráficu en Carreño

    Un mancáu nun accidente de tráficu en Carreño

    Una persona resultó mancada en saliéndose de la vía col vehículu que conducía pela carretera AS-18 n’Albandi (Carreño). Pel momentu, desconócese les circunstancies del accidente. El mancáu, únicu ocupante del turismu, foi evacuáu y atendíu pol equipu d’atención primaria de Candás y treslladáu al Hospital de Xove con pronósticu reserváu, por cuenta de más pruebes y hasta nueva valoración médica.

    En comprobando la estabilización del vehículu, los bomberos colocaron-y al afectáu un collarín cervical y sacáronlu del vehículu pela puerta del turismu cola tabla cervical. Mientres llegaben los servicios sanitarios tamién-y inmovilizaron la cabeza. El Centru de Coordinación d’Emerxencies del 112 Asturies recibió l’avisu a les 06.37 hores. Na llamada señalaben qu’un vehículu saliérase de la vía escontra’l monte. Nun teníen más detalles.

  • 80 denuncies nun dia por incumplir el decretu d’alarma

    80 denuncies nun dia por incumplir el decretu d’alarma

    La Policía Local denunció esti miércoles en Xixón a 80 persones por tar de paséu pela cai ensin causa xustificada. Nuna nota de prensa, el Conceyu destaca la «esmolecedora cifra de persones d’avanzada edá que nun faen casu de la obligación xeneral de quedar en casa». Recuerda que saltase’l confinamiento «pon en grave peligru la so vida» y que «esti tipu de conductes son les que pueden llevar al colapsu de la sanidá». Ente los 80 denunciaos, 21 persones teníen más de sesenta años, y delles, más de la metá yeren mayores de setenta.

    Tamién se detuvo por resistencia y desobediencia a un individuu, S.M.P. de 40 años d’edá y vecín de Xixón, a les 01.15 hores de la madrugada. Foi sosprendíu dando un paséu en bici pela cai Anselmo Solar. Al ser riquíu empezó a tusir sobre los axentes empecipiando la fuxida cola bici peles cais de Viesques, circulando n’ocasiones per dirección prohibida. Finalmente foi interceptáu na cai Albuquerque, resistiéndose nel momentu de la detención.

  • Un incendiu xamusca un pisu de Ribeseya

    Un incendiu xamusca un pisu de Ribeseya

    Un incendiu xamuscó por completu’l salón d’una vivienda asitiada nun edificiu de cuatro altores asitiáu na cai Alfonso Covián, 4 de Ribeseya. El restu de la vivienda quedó afectada pol fumu. Unes trenta persones tuvieron que ser desallugaes del inmueble. Ente ellos había una persona con movilidá amenorgada.

    El Centru de Coordinación d’Emerxencies del 112 Asturies recibió l’avisu a les 09.28 hores. Na llamada señalaben que salía fumu negro d’una vivienda. Darréu movilizáronse efectivos de bomberos de los parques de Llanes, Cangues, Villaviciosa y Llamorgal. Paralelamente informa al SAMU y a la Policía Local que, a les 09.39 hores, dende l’incidente, comunica que se desallugara preventivamente l’edificiu.

    A les 10.04 hores los bomberos del parque de Llanes confirmen que la quema ta controlada. Cuando acabaron de ventilar, permitióse a los vecinos tornar a les sos viviendes. Los bomberos fueron revisando una a una les viviendes, cuatro per cada planta, y realizaron midíes de monóxidu en caúna d’elles. Amás acompañaron a los inquilinos unu a unu al so pisu priorizando a les persones mayores y a los neños pa evitar que permanecieren más tiempu del necesariu na cai. Rematada la intervención tornaron a la so base nel parque de Llanes onde llegaron a les 11.37 hores.

  • Deteníu en Xixón con trés grandes bolses de mariguana

    Deteníu en Xixón con trés grandes bolses de mariguana

    La Policía Local detuvo a un home por un presuntu delitu contra la salú pública. Asocedió alredor de les 20.30 hores del martes cuando los axentes dieron l’altu a un vehículu que tenía la ITV caducada y fuera denunciáu por robu. N’él viaxaba J.S.S., de 38 años d’edá y vecín de Villaviciosa, quien manifestó que nel so día lo denunció él mesmu pero pensaba que la denuncia por sustracción fuera retirada.

    Los axentes fixeron una inspección técnica del mesmu y atoparon trés bolses de plásticu con mariguana. Atopábense nel interior d’una mochila que s’atopaba nel asientu del copilotu y esprendía un fuerte golor a esta sustanza. Coles mesmes, al pie de la palanca de cambeos, fueron alcontraos dos teléfonos móviles y 200 euros na cartera del conductor.

    L’home foi deteníu por un presuntu delitu contra la salú pública. Amás, realizáronse-y pruebes d’alcohol y drogues en dependencies policiales, dando positivu por presencia de cocaína nel so organismu. El coche foi inmovilizáu y puestu a disposición xudicial como preséu del delitu y cursáronse les pertinentes denuncies por non disponer d’ITV n’orde nin realizar el cursu de reeducación tres retiráse-y el permisu de conducir.

  • Detenida una muyer en L’Algodonera por abandonu de menores

    Detenida una muyer en L’Algodonera por abandonu de menores

    La Policía Local de Xixón detuvo esti miércoles a una muyer por un delitu d’abandonu de menores. L’acusada dexó sola a la so fía de 7 años na so vivienda de L’Algodonera y mientres hores. Un vecín que taba pasiando a la so mascota sollertó d’esti fechu a les 03:39 hores. La neña taba pidiendo auxiliu con mediu cuerpu fora d’una ventana de la cai Maestru Amado Morán.

    Los axentes movíos hasta’l llugar de los fechos atoparon a la menor, n’evidente estáu de nerviosismu. Esplicó-yos que la so madre salió pela tarde ensin dexar la cena fecha. La puerta taba cerrada, por tanto, una vegada realizaron les investigaciones oportunes y ensin conocer el paradoriu de la culpable, solicitaron la presencia de Bomberos de Xixón p’aportar al interior de la casa pola mesma ventana pola que la neña apruciera.

    La Policía Local contactó con una hermana de la menor, de 23 años d’edá, quien se fixo cargu d’ella, avisando darréu de que la so madre diba en camín a la casa onde foi, finalmente, detenida. La neña manifestó que yera frecuente que, M.M.D.C. de 50 años d’edá, la dexara sola. Amás, les condiciones nes que s’atopaba la vivienda yeren de insalubridad y abandonu total con un fuerte golor y basura pola totalidá de la casa.

  • Sigue la busca del mariscador que cayó al mar el llunes en Muros

    Sigue la busca del mariscador que cayó al mar el llunes en Muros

    Efectivos d’emerxencies retomaron esta mañana los trabayos de busca per tierra, mar y aire del mariscador desapaeció’l llunes en cayendo al mar al oeste del dique de San Esteban en Muros. Per tierra efectivos de Bomberos del SEPA con base nel parque de Pravia volvieron rastrexar los pedreros onde se lu vio per últimu vegada, dende San Esteban a la sablera del Aguilar.

    Nel mar, el Centru Rexonal de Coordinación de Salvamentu comunicó unvió a la zona una embarcación que tuvo participando nel dispositivu hasta les 13.58 d’ayeri. A esa hora tuvo que retirase poles condiciones meteorolóxiques. La escasa visibilidá tamién provocó que tuviera que les sos escolgase nesi momentu los rastrexos aéreos que retomó’l Grupu de Rescate col helicópteru medicalizado de Bomberos d’Asturies a les 15.36 hores.

    Nel dispositivu trabayen de forma coordinada, amás del SEPA y el Centru Rexonal de Coordinación de Salvamentu Marítimu, Guardia Civil y Policía Local.

  • Un home de 73 años, mancáu al cayer col coche a les víes del tren n’Avilés

    Un home de 73 años, mancáu al cayer col coche a les víes del tren n’Avilés

    Un home de 73 años resultó mancáu en saliéndose de la vía col coche que conducía y cayer por un desnivel d’unos 6 metros a la salida d’Avilés. El sucesu tuvo llugar, por causes que se desconocen, na N-632, frente a l’antigua factoría d’una empresa siderometalúrxica. L’afectáu foi atendíu nel llugar del accidente pol equipu médicu de la UVI-móvil d’Avilés. Por cuenta de más pruebes y hasta nueva valoración médica foi sacupáu al HUCA n’Uviéu con pronósticu reserváu.

    Hasta’l llugar del accidente moviéronse efectivos de Bomberos del Serviciu d’Emerxencies del Principáu d’Asturies (SEPA). Cuando llegaron al incidente l’home yá atopaba fora del vehículu y taba siendo atendíu pola policía local. En siendo estabilizáu pol equipu médicu de la UVI-móvil avilesina foi sacupáu, en camiya, con ayuda de la autoescalera de bomberos. Col vehículu d’altor treslladar dende les víes a la carretera. L’accidente obligó a cortar el tráficu ferroviariu.

  • Cinco mancaos nun accidente de tráficu en Mieres

    Cinco mancaos nun accidente de tráficu en Mieres

    Cinco persones resultaron mancaes de diversa considerancia, cuatro con pronósticu leve y una con pronósticu reserváu, nun accidente de tráficu en Santa Cruz, Mieres. Los fechos tuvieron llugar nel encruz del AS-112. Los cinco mancaos fueron treslladaos al Hospital Álvarez Buylla. La de mayor considerancia ye una muyer, de 36 años d’edá, presenta politrauma de pronósticu reserváu. Foi atendida y sacupada pol equipu médicu de la UVI-móvil mierense.

    L’afectada que viaxaba como acompañante l’asientu delanteru del vehículu, foi sacupada del so interior pol efectivos de bomberos. La muyer foi escarcelada, inmovilizada con collarín, con ayuda de la tabla de rescate. Nel mesmu vehículu viaxaba un varón de 35 años d’edá y una menor de 2. Dambos fueron sacupaos por precuru, con pronósticu leve, al mesmu centru hospitalariu. Fueron atendíos nel llugar pol equipu d’Atención Primaria de Figareo y treslladaos na ambulancia de soporte vital básicu de Mieres. Los otros dos mancaos de calter leve, dos varones de 54 y 34 años d’edá que viaxaben nel otru coche implicáu nel accidente, fueron treslladaos tamién al hospital mierense n’ambulancia de soporte vital básicu de Ḷḷena.

  • Convocada pa esta tarde una concentración de refugu pol asesinatu de Lorena Dacuña

    Convocada pa esta tarde una concentración de refugu pol asesinatu de Lorena Dacuña

    El Conceyu de Xixón declaró trés díes de llutu oficial na ciudá pol asesinatu por violencia de xéneru de Lorena Dacuña Fernández. Les banderes de la Casa Conceyu ondearán a mediu estil. El consistoriu xixonés, el Gobiernu del Principáu y la Delegación del Gobiernu n’Asturies manifestaron la so «enérxica condena» y la so «fonda consternación» por esti crimen que supunxo la primer víctima mortal de la violencia de xéneru n’Asturies anguaño. Les trés alministraciones convocaron una concentración a les 20 hores d’esta tarde na plaza Mayor de Xixón p’amosar les sos condolencias a familiares y amigos, y manifestar tamién el so refugu a esti asesinatu.

    L’alcaldesa, Ana González, amosó’l máximu dolor énte una muerte «inxusta» porque «a Lorena quitáron-y so vida de manera infame contra tolos derechos». La primer edil llamentó que «ésta ye la dura realidá de les muyeres que tolos díes tenemos qu’enfrentanos a la violencia de xéneru pol simple fechu de qu’haya homes que crean que somos xuna propiedá a la que pueden hasta asesinar».

    González visitó ayeri a familiares y amigos de Lorena Dacuña nel tanatoriu de Cabueñes. Treslladó-yos el so condolencias y les de tola ciudá, y pidió una participación masiva nel actu de denuncia, refugu y condena d’esti asesinatu.

  • Un incendiu xamusca una casa en Piloña

    Un incendiu xamusca una casa en Piloña

    Un incendiu xamuscó prácticamente na so totalidá una vivienda unifamiliar de dos plantes allugada na localidá piloñesa de Caparea. El garaxe y el trasteru nun resultaron dañaos poles llapada pero si pel agua residual utilizada pa la estinción del fueu. La quema controlóse a les 00.37 hores y los llabores d’enfriamientu y desescombru enllargáronse mientres tola nueche.

    L»avisu dióse a les 22.20 hores d’ayeri llunes. Na llamada, realizada polos afectaos, indicaba qu’había una quema na so casa. Estendiérase dende la chimenea. Había una vivienda adosada. Darréu desplazóse una autobomba forestal una y bones l’accesu pa otru tipu de vehículu resultaba complicáu.