Xixón al día

Etiqueta: turismu

  • Infoxixón treslládase a la Casa Paquet

    Infoxixón treslládase a la Casa Paquet

    El serviciu d’información Infoxixón inauguró la so nueva oficina nel emblemáticu edificiu de la Casa Paquet. La nueva oficina, asitiada nuna de les zones más céntriques y cercanes a los recursos turísticos de la ciudá, va ufiertar tola información necesaria a los visitantes de Xixón. El serviciu cunta con un ampliu abanicu de productos turísticos diseñaos por Xixón Turismu, que tamién ta previstu que s’allugue nes instalaciones tres la so adecuación nos próximos meses.

    Mientres les caberes selmanes trabayóse nel acondicionamientu de la planta baxa, onde s’asitia Infogijón. L’espaciu cumple con tolos criterios d’accesibilidá dientro de la llínea de trabayu marcada per Xixón Turismu como exa estratéxica pa la ciudá y marcaos na llínea de trabayu de Destín Turísticu Intelixente. L’actu oficial de presentación d’esti nuevu allugamientu de Infogijón va tener llugar esta selmana.

  • Rodrigo Cuevas protagoniza la nueva campaña turística de Xixón

    Rodrigo Cuevas protagoniza la nueva campaña turística de Xixón

    “Ye playa y ye prau / Ye de chigre y de mantel / Ye l’horizonte cercanu / Ye historia y ye vanguardia… / ¡Ye mundial! / Xixón, en toles ocasiones”. Con estos gabitos, y de la mano de Rodrigo Cuevas, que tamién aporta la música, Xixón quier afitase a capital turística del Norte d’España. L’artista protagoniza una campaña que quier atrayer al turista que busca reencontrase cola ciudá asturiana.

    La campaña tien l’enfotu de recuperar l’interés de Xixón ente la xente que quiera faer una escapada o tomase unos díes n’acabando les restricciones de movilidá y pensando en caltenela nes foles vinientes, como na seronda. La campaña va tar empobinada al mercáu nacional más averáu: Madrid, Castiella y Llión, Cantabria, Galicia, Navarra y Euskadi. Toles creatividades fixéronse en castellán, asturianu, gallegu y euskera.

    Anguaño, y pola mor de la situación actual, na que la movilidá va tar llendada, la campaña tamién va empobinase al públicu llocal: Xixón y el restu d’Asturies. La campaña remanecerá güei y va tar activa tol branu, con especial incidencia a finales de xunu y entamu de xunetu, momento nel que se prevé que se faigan la mayor parte de les reserves. La campaña podría reactivase de cara a les pontes de la seronda.

    Rodrigo Cuevas y Xixón

    El compositor ya intérprete asturianu ye’l protagonista de la campaña. Rodrigo Cuevas ye un artista de sonadía tanto dientro como fuera d’Asturies. Tresmite, a la vez, esa autenticidá y singularidá que reflexa de Xixón como destín únicu, singular, estremáu, con una cultura fuerte y con calter. Arriendes d’ello, xune na so imaxe la visión d’esi Xixón qu’avanza, que s’abre a mundos nuevos, modernu, pero siempres respetando les sos tradiciones. Son valores colos que los y les xixoneses s’identifican. Rodrigo Cuevas vencéyase muncho no tocante a valores colo que ye Xixón: asturiana, moderna, abierta, acoyedora, creativa, tresgresora, cosmopolita, artística, gayolera…

    Asina, esti nuevu spot amuesa duples de conceutos que s’asocien a Xixón: playa/prau; horizonte/cercanu; historia/vanguardia; chigre/mantel. Los escenarios son la playa de San Llorienzo, el Puertu Deportivu, el Xardín Botánicu Atlánticu, la cai La Merced, Llaboral Ciudá de la Cultura, Llaboral Centru d’Arte, el Muséu del Pueblu d’Asturies, Llagar Trabanco, el restorán La Salgar y l’Eloxu del Horizonte, que nun podía faltar nel so 30 aniversariu.

  • «Volveremos», un mensaxe d’ánimu énte la crisis del coronavirus

    «Volveremos», un mensaxe d’ánimu énte la crisis del coronavirus

    La Viceconseyería de Turismu del Gobiernu asturianu llanzó nes redes sociales un vídeu basáu na so actual campaña de promoción turística, Vuelve al paraísu. N’él, llama a la fortaleza de la sociedá asturiana con un mensaxe de convencimientu na superación de la crisis provocada pol Covid-19 sol lema #Volveremos.

    El videu ye una acción más na llinia de xeneración de conteníos nes redes sociales que ta llevando a cabu Turismu d’Asturies. Esta ferramienta de comunicación incrementó la so vocación de cercanía sofitándose nos valores y atributos d’Asturies como destín y sociedá. La viceconseyera de Turismu, Graciela Blanco, señaló qu’el videu tien como finalidá recordanos que «volveremos recuperar la normalidá nes nuestres vides». «Una bona manera faccelo ye con delles de les imáxenes del nuestru paraísu natural».

    Dende’l pasáu 14 de marzu, Turismu Asturies anima dende les sos cuentes en redes sociales a que los usuarios compartan fotografíes de les sos vacaciones n’Asturies. La respuesta de los siguidores traduzse yá en 500 fotografíes recibíes. Les canales asturianes asítiense nel primer puestu de tolos perfiles de destinos españoles en nivel d’interacción. Desque empezó’l confinamientu, solo les publicaciones d’Asturies en Facebook superaron los 4,3 millones d’usuarios únicos.

  • Asturies rexistró en xineru el so meyor arranque d’añu turísticu

    Asturies rexistró en xineru el so meyor arranque d’añu turísticu

    Asturies continúa na bona racha turística. La comunidá recibió en xineru 78.563 visitantes que xeneraron 153.617 pernoctaciones, según los datos del Institutu Nacional d’Estadística (INE). Estes cifres suponen unos importantes medres al respective de xineru del añu pasáu. Concretamente, el 21,3% tocantes a los visitantes, y el 25,3% al respective de les pernoctaciones.

    Los resultaos son los más altos pa un empiezu d’añu de la serie histórica facilitada pol INE, al superar los rexistraos en xineru de 2017 con unes medres del 10,4% en turistes y del 16,4% n’estancies. Les xubíes de dambes variables son comunes a hoteles, campings, apartamentos turísticos y turismu rural. Los mayores índices de crecimientu danse n’hoteles, con 11.314 turistes y 23.696 estancies, cifres claramente superiores a les de xineru del añu pasáu.

    El volume d’empleos de los agospiamientos asturianos asitióse en 3.549, lo que supón un descensu del 3,4% con respectu al mesmu mes de 2019.

  • Asturies, a polos 2,5 millones de turistes

    Asturies, a polos 2,5 millones de turistes

    L’Institutu Nacional d’Estadística (INE) publicó esta selmana los datos d’agospiamientos extrahoteleros del mes d’avientu, lo que permite cerrar el cómputu global del añu. Asturies batió tolos récords hasta la fecha nos indicadores turísticos más relevantes, daqué que yá apuntaben los datos disponibles la pasada selmana nel marcu de la celebración de la Feria Internacional de Turismu (Fitur).

    El conxuntu de datos relativos a 2019 conclúin que’l Principáu recibió un 1,6% más de visitantes y un 3,7% más de pernoctaciones qu’en 2018. Estes medres llevaron el cómputu global de 2019 hasta un nuevu récord añal al superar mesmo los datos de 2018, como los de 2017. Asina, rexistráronse un total de 2.348.616 turistes y 5.747.219 estancies, cifres que son les más elevaes en dambos indicadores hasta la fecha. El crecimientu más destacáu algamóse nel segmentu del turismu rural, con un 5,6% más de turistes y un 4,4% en pernoctaciones, porcentaxes qu’alcen los sos rexistros hasta los 302.765 y 973.077, respectivamente.

    La contribución del mercáu internacional representó’l 17,6% del total de turistes y superóse per primer vegada los 400.000 viaxeros procedentes d’otros países, lo que supón una medra del 3,5%. Les pernoctaciones de turistes estranxeros tamién aumentaron un 3,9% hasta algamar les 863.806 estancies.

    La positiva evolución de los principales indicadores turísticos tien el so reflexu nes estimaciones d’empléu y contribución a la economía asturiana. Les primeres proyecciones del Sistema d’Información Turística d’Asturies de la Universidá d’Uviéu asitien al Principáu cola cifra d’empléu turísticu más alta rexistrada con un total de 48.643 empleos (el 12,8% del empléu rexonal) y una participación nel Valor Añedíu Brutu (VAB) de la economía asturiana del 10,7%, con una aportación de 2.325.109 euros.

  • Asturies continúa con cifres récord de turistes

    Asturies continúa con cifres récord de turistes

    Asturies sigue rexistrando cifres récord de visitantes y estancies a falta d’un mes pal zarru del exerciciu turísticu de 2019. Según los datos del Institutu Nacional d’Estadística (INE), la comunidá recibió 2.233.479 turistes y sumó 5.507.917 pernoctaciones nos once primeros meses. Estos datos representen medres del 1,4% y del 3,5%, respectivamente, en relación a esti mesmu períodu de 2018. En comparanza con 2017, añu nel que se rexistraron los datos más altos de la serie histórica, los aumentos asítiense nel 0,6% y el 1,4%.

    D’esta miente, los resultaos de payares confirmen l’enclín a l’alza que tamién se caltien nos viaxeros procedentes d’otros países. El turismu internacional esperimentó una medra nel númberu de visitantes del 3,5% nos primeros once meses del añu, frente al 1,1% del turismu nacional. Estos porcentaxes iguálense nes pernoctaciones, con un aumentu del 3,7% nes internacionales y un 3,5% nel casu de viaxeros españoles.

    En términos d’empléu, los agospiamientos turísticos asturianos rexistraron unu amenorgamientu del 0,4% en relación a payares de 2018. El total de puestos de trabayu directos foi de 4.287.

  • Asturies sigue batiendo los sos récords turísticos

    Asturies sigue batiendo los sos récords turísticos

    Los agospedamientos turísticos asturianos rexistraron n’ochobre 170.271 visitantes y 352.950 pernoctaciones. Son datos del Institutu Nacional d’Estadística (INE) de xineru a ochobre. Con estes cifres, el cómputu anual asítiase de momentu en 2.123.613 de turistes y 5.285.945 d’estancies, los valores más altos algamaos nos diez primeros meses del añu na serie histórica.

    Los datos acumulaos del exerciciu suponen medríes del 1,8 % en turistes y del 3,7 % en pernoctaciones. En comparanza col 2018, estos porcentaxes xuben al 3,1 % y 2,5 % nel casu del turismu internacional.

    Al respective del mes d’ochobre, vese una contención previsible nel enclín de medría de los meses precedentes, al cayer el Día de la Hispanidá de sábadu. Asina, nesti periodu hubo una mengua global de turistes del 4,6 % y del 3,4 % n’estancies de turismu nacional, que nun se repitió nel mercáu internacional, onde sí hubo una medría del 1,2 % en turistes y del 13,4 % en pernoctaciones. L’empléu nos agospedamientos turísticos asturianos caltúvose nos niveles d’ochobre del 2018, con una medría del 0,1 % y un total de 5.057 trabayadores.

  • Asturies busca turistes n’Australia y Nueva Zelanda

    Asturies busca turistes n’Australia y Nueva Zelanda

    Cuatro turoperadores procedentes d’Australia y Nueva Zelanda visiten esta selmana los conceyos d’Ayer, Ḷḷena, Mieres, Riosa, Morcín, La Ribera, Llanera y Xixón nun circuitu entamáu por Turismu d’Asturies y la Rede de Cooperación de Ciudaes en Ruta de La Plata. El programa incluye tamién la participación d’estos axentes nuna xornada que va tener llugar mañana, miércoles, a partir de les 09:30 hores, nel hotel Abba Playa de Xixón. Nesti alcuentru van tomar contactu con delles empreses asturianes que se sumaron a esta convocatoria p’avanzar escontra alcuerdos comerciales.

    La Rede de Cooperación de Ciudaes na Ruta de la Plata ye una asociación voluntaria y ensin ánimu d’arriquecimientu constituyida por localidaes allugaes nesti itinerariu y la so área d’influyencia. El so oxetivu ye dar a conocer los recursos turísticos y revalorizar los atractivos de la vía.

    Na rede participa Turespaña xunto con Asturies, Andalucía, Castiella y Llión y Estremadura. En concreto, tán integraos na asociación la Diputación de Cáceres y 28 conceyos: Xixón, Llanera, La Ribera, Morcín, Riosa, Mieres, Ayer, L.lena, La Pola de Gordón, Llión, La Bañeza, Benavente, Zamora, Béjar, Guijuelo, Baños de Montemayor, Hervás, Plasencia, Casar de Cáceres, Aldea del Cano, Mérida, Los Santos de Maimona, Zafra, Calzadilla de los Barros, Fuente de Cantos, Montemolín, Carmona y Sevilla.

  • Un branu hestóricu pal turismu en Xixón

    Un branu hestóricu pal turismu en Xixón

    La cifra de viaxeros rexistrada’l pasáu branu en Xixón (xunetu y agostu) ye de 102.139 turistes. Esto ye un medru del +5,9% respeuto al mesmu periodu del añu caberu. La cifra de nueches d’agospiu xube a 244.158, un crecimientu del +9,4%. La estancia media asítiase en 2,4 nueches y medra un +3,3% respeuto al añu caberu. Poro, ye’l meyor datu hestóricu en númberu de nueches d’agospiu y el segundu en númberu de viaxeros agospiaos n’hoteles.

    Estos datos remanen tres realizar l’axuste de los datos espublizaos güei pol Institutu Nacional d’Estadística en función del númberu d’establecimientos y places hoteleres esistentes daveres na ciudá.

    No tocante a la procedencia, rexistráronse 84.074 viaxeros nacionales y 18.065 estranxeros. El númberu de estranxeros medró un 6% y yá ye’l 17,68% del total.

    La tasa d’ocupación en branu afitóse nel 78,0%. Ye la más alta de tola serie hestórica y crez un +5,6% respeuto al añu caberu. La fauturación del sector hoteleru algamó 11,3 millones d’euros, un incrementu del +4,0% respeuto a 2018 y la segunda cifra más alta de la serie hestórica.

    Agostu: medru del turismu estranxeru

    La cifra de viaxeros rexistrada n’agostu ye de 52.448 persones, un medru del +3,9% respeuto al mesmu mes del añu caberu. La cifra de nueches d’agospiu algama les 132.903, un crecimientu del +6,8%. La estancia media afítase en 2,5 nueches y crez un 0,1% respeuto al añu caberu. Ye de sorrayar el medru bultable del turismo estranxeru. Rexistráronse 8.551 viaxeros estranxeros. Esto supón un 26,8% más que n’agostu de 2018.

    La tasa d’ocupación rexistrada n’agostu asitióse nel 84,3%. Crez un +2,8% respeuto al añu caberu y ye la más alta rexistrada na ciudá pa un mes d’agostu magar hai datos oficiales.

    Acumulao xineru-agostu: los valores máximos de la serie hestórica

    La cifra total de viaxeros nos ocho meses primeros del añu asciende a 302.800 persones. Ye un incrementu del +2,7% respeuto al mesmu periodo del añu pasáu. La cifra de nueches d’agospiu algama les 624.579, con un medru del +5,7%. Tanto una como otra son los valores máximos de la serie hestórica pa l’acumulao de los ocho meses primeros del añu.

    No que cinca a la procedencia de los viaxeros agospiaos nos hoteles de la ciudá, los madrilanos ocupen el llugar primeru (52.066 turistes), los castellanos y llioneses el segundu (43.073 viaxeros) y los gallegos el terceru (30.234 viaxeros), siguíos de los vascos (23.407 persones).

    La tasa d’ocupación rexistrada nos ocho primeros meses del añu algama’l 52,5% (la meyor de la serie hestórica pa esti periodu). Supón un incrementu respeuto al añu caberu del +1,3%.

  • Vídeu: asina se viende Xixón esta seronda

    Vídeu: asina se viende Xixón esta seronda

    Xixón quier conquistar a los turistes esta seronda vendiéndose como la ciudá más animada del norte d’España. Xixón Turismu ta acabante d’asoleyar el nuevu vídeu de promoción turística enfocada a la temporada de seronda/iviernu. El mayor impautu de la campaña va realizase nos principales mercaos nacionales emisores de turistes a la ciudá asturiana (Madrid, Castiella y Llión, Euskadi, Galicia, Barcelona, Andalucía y Cantabria) y nes árees xeográfiques de Francia d’especial interés (Isla de Francia, Bretaña, Países del Loira, Centru-Valle del Loira, Nueva Aquitania, Occitania). Esta campaña de seronda, que tien como principal oxetivu atrayer turistes acullá de los meses de temporada alta. Ta empobinada a llegar a usuarios más allegaos y cualificaos per aciu de l’emplegu de soportes nuevos como la Smart TV o formatos nuevos como’l rich media.

    La campaña empobínase a pareyes que puean faer una escapada aprovechando los puentes de seronda

    La campaña publicitaria, que sigue emplegando l’eslogan Xixón Tu lugar, céntrase nun spot qu’amuesa los atractivos de Xixón. Nesti casu, la campaña empobínase a pareyes que puean faer una escapada aprovechando los puentes de seronda y reforciando la imaxe de Xixón como destín cultural y gastronómicu. Pa esparder la imaxe de Xixón van emplegase soportes online, d’esterior y revistes de viaxes, tanto na so versión impresa como online. Ente los soportes online, esbilláronse los qu’almiten el formatu vídeu: TV online, redes sociales (Facebook, Instagram y Youtube), revistes online y rich media. En Francia tamién s’incluyó’l portal meteorolóxicu La Chaine Météo y la rede social Snapchat, pola so fuerte penetración.

    Amás de tener presencia en móvil, tableta y PC, añadióse’l dispositivu Smart TV a la planificación por mor del incrementu del emplegu ente los españoles (el medru mediu ye del 35% respeuto al añu 2018). Dientro d’esti dispositivu nuevu vamos faer campaña nes televisiones líderes, Mitele y Atresplayer, y en Youtube, plataforma de vídeu online líder. Con ello, ta previstu algamar un total de 8,4 millones d’impautos y cerca de 1,4 millones de spots vistos.