La Universidá d’Uviéu y l’Ayuntamientu de Llangréu van estrechar la so collaboración coles mires de refundar La Casa de la Buelga pa convertila nuna exa fundamental de dinamización del Valle del Nalón. La refundación de La Casa de la Buelga enmárcase dientro de la estratexa UOTerritorio, una iniciativa de la Universidá d’Uviéu que tien por oxetu vertebrar espacios, estructures y programes naquellos conceyos onde la institución académica asturiana nun tien campus universitariu, como en Llangréu.
La collaboración ente dambes instituciones pal palaciu barrocu de Ciañu busca los siguientes oxetivos:
- Establecer nel Valle del Nalón un espaciu universitariu que contribuya a activar la vida cultural, a responder a los retos d’Asturies y a ufiertar soluciones a los sos problemes.
- Materializar el compromisu de la Universidá d’Uviéu con Asturies, la so cultura y el so patrimoniu cultural, per aciu la instalación de les cátedres de la Sidra d’Asturies y de la Cultura Minera.
- Establecer en La Casa de la Buelga la sede del programa Universitariu de Mayores de la Universidá d’Uviéu (PUMUO), que va ufiertar un mínimu d’ocho asignatures y d’ocho talleres. Dada la orientación de la entidá, dos de les asignatures y dos de los talleres van tar centraos na cultura sidrera y na minera.
- Convertir La Casa de la Buelga nel centru d’una actividá qu’estableza sinerxes coles instituciones y la comunidá civil: cursos d’estensión, de branu, aules d’estensión, talleres, ciclos de conferencies…
- Establecer un espaciu d’alcuentru y cooperación colos axentes del territoriu: conceyos, fundaciones, asociaciones, empreses y ciudadanía.
- Recuperar la biblioteca y espaciu d’estudiu, tanto al serviciu del estudiantáu universitariu, como de la sociedá del Valle del Nalón y como centru especializáu n’estudios sobre la cultura asturiana, especialmente la rellacionada cola cultura de la sidra y la cultura minera.
Ignacio Villaverde recordó que la Estensión Universitaria ye una actividá fundamental pa la Universidá d’Uviéu que foi pionera nel so desenvolvimientu n’España. “El nuesu oxetivu ye promover y articular l’espardimientu de la conocencia, la cultura, l’arte y la ciencia na comunidá universitaria y na sociedá, con especial atención a les necesidaes de la so redolada”, destacó.
La Estensión Universitaria cumple asina una doble función. D’un llau, la interna, espublizando conocencies na comunidá universitaria y promoviendo la interdisciplinariedá, l’alderique académicu y la fluidez na tresmisión de les innovaciones científiques, técniques o culturales. Y, d’otru llau, la función esterna, qu’afigura la concepción de la universidá como una institución dinamizadora del territoriu, arguyosa de la so cultura y el so patrimoniu cultural y comprometíu con Asturies.
El rector sorrayó que, p’articular esi compromisu con Asturies, la Universidá d’Uviéu diseñó’l proyectu UOterritorio, qu’integra centros estables nos que se cunta con una actividá enriquecedora en materia d’estensión universitaria y proyección cultural, como ye’l casu del CSU (Centru de Servicios Universitarios d’Avilés) d’Avilés, al que se va sumar agora La Casa de la Buelga.
Pela so parte, Roberto García señaló que “pa nós ye un momentu d’allegría ya ilusión. Tamos asistiendo al reverdecer de La Casa de la Buelga, que recupera l’actividá de la estensión universitario y sumo, per primer vegada, dos cátedres que son auténticos emblemes d’Asturies: la de la sidra y la de la minería. Ye un pasu que, ensin dulda, honra la nuesa identidá”.
García añedió que’l Programa Universitariu pa Mayores de la Universidá d’Uviéu supón “una reconocencia al compromisu cultural del nuesu conceyu, que nel so día foi conocíu como’l kilómetru más cultu d’Europa. Axallá este seya solo’l primer pasu pa responder a les necesidaes formatives de los nuesos vecinos y pa que Ciañu vuelva ser un foru cultural vivu, abiertu, dinámicu y capaz d’impulsar la conocencia y la participación”.
