Los investigadores Marta Fernández y Lisandro Campos del CONICET y Muséu de La Plata (Arxentina), Judy Massare del Rochester Institute of Vertebrate Paleontology (Estaos Uníos) y Laura Piñuela, Ángel García-Pérez y José Carlos García-Ramos del Muséu del Xurásicu d’Asturies (MUJA) documenten n’Asturies, y per primer vegada fuera de Reinu Xuníu, la presencia del reptil marín Ichthyosaurus anningae, del Xurásicu Inferior. L’artículu foi publicáu online a principios de setiembre na revista internacional Acta Paleontologica Polonica.
Trátase de la cadarma incompleta d’un ictiosauriu, un reptil marín d’aspectu similar al d’un delfín, que los sos primeros restos óseos fueron descubiertos nel 2009 por José Antonio Sánchez Féliz, vecín de Madrid, nos cantiles de la redolada de la sablera de Vega (Ribeseya).
La roca qu’englobaba los güesos (una marga gris escura) forma parte d’un conxuntu conocíu como Formación Rodiles, perteneciente al Xurásicu Inferior (201-175 m.a.). Investigaciones recientes basaes en ammonites, cefalópodos parientes de los calamares y sepies actuales, dexen determinar con bastante precisión la edá del ictiosauriu asturianu alredor de los 192 millones d’años, dientro del pisu que se conoz como Pliensbachiense. El rexistru fósil d’ictiosaurios d’esta edá ye relativamente escasu a nivel mundial, lo que resalta la importancia del afayu.
El sedimentu orixinal onde quedó soterráu’l reptil constituyía’l fondu enfollagáu y probe n’osíxenu d’una plataforma marina mui estensa con una fondura inferior a 100 metros que cubría bona parte del actual territoriu asturianu mientres la primer metá del Xurásicu.
Los güesos de los ictiosaurios, principalmente los del craniu, son mui delicaos, lo qu’enzancó y ralentizó los llabores de preparación nel llaboratoriu. Una vegada l’exemplar foi preparáu pudiéronse reconocer diversos güesos del craniu (dalgunos d’ellos calteníos en 3D amuesen detalles que yeren desconocíos), dientes, parte de l’aleta izquierda, asina como numberoses costielles y vértebres (cervicales, dorsales y caudales).
La forma del húmeru, combinada con dellos calteres diagnósticos del craniu dexaron asignar l’espécime de Ribeseya a Ichthyosaurus anningae, conocida hasta agora namás en Reinu Xuníu; la especie rinde homenaxe a la famosa paleontóloga inglesa, Mary Anning. Un estudiu comparativu del llargor del húmeru recuperáu n’Asturies col d’otros exemplares d’I. anningae, procedentes del sur d’Inglaterra, dexó amás determinar que yera’l mayor exemplar conocíu d’esta especie, y tratábase d’un adultu con un llargor averáu alredor de los 2 metros.
Tocantes a la so dentición, ye mui distintu a la del ictiosauriu primeramente descritu n’Asturies, nesti casu alcontráu nos cantiles próximos a Rodiles (Villaviciosa) que foi asignáu al xeneru Leptonectes, infiriendo que les sos dietes yeren bien distintes. Mientres I. anningae tenía dientes más robustos, moderadamente cónicos y ápices arrondaos, indicando una dieta xeneralista, los de Leptonectes yeren delgaos, finamente estriaos y más delicaos, asociaos con una dieta piscívora.
Fái unos 192 millones d’años los mares asturianos fueron habitaos, a lo menos, por dos xéneros diferentes d’ictiosaurios, xunto con plesiosaurios, otra variedá de reptiles marinos coetáneos que los sos restos esqueléticos tamién apaecieron nes roques xurásiques de la nuestra rexón. Estos trés reptiles marinos representen les cadarmes más completes de la Península Ibérica.
