El Gobiernu asturianu impulsa’l proyectu educativu Llume, destináu a reconocer la excelencia de los centros docentes na enseñanza, promoción y espardimientu de la llingua asturiana y leonaviegu. La iniciativa va consistir nuna convocatoria añal pa conceder ayudes a los centros participantes sosteníos con fondos públicos.
El proyectu Llume tendrá que recoyer les actuaciones realizaes nel área o materia de Llingua Asturiana y Lliteratura, asina como’l grau d’integración del asturianu o l’eonaviegu na vida académica y cultural del centru. Van aceptase proyectos desenvueltos el cursu pasáu o previstos pal qu’acaba d’empezar.
Les propuestes orixinales van tener que tar redactaes íntegramente n’asturianu o eonaviegu. Tamién tendrán qu’incorporar de forma esplícita elementos vinculaos a la inclusión educativa, la sostenibilidá, l’enfoque competencial y la coeducación.
Los criterios de valoración van sorrayar la calidá del programa, asina como’l contestu y situación del centru escolar, en función de les sos necesidaes específiques culturales, educatives, económiques y sociales. A lo último, van tenese en cuenta los antecedentes n’iniciatives rellacionaes cola convocatoria.
La orde qu’establez el procedimientu pa reconocer estos proyectos Llume yá se publicó nel Boletín Oficial del Principáu (Bopa), xunto coles bases reguladores. Coles mesmes, la Conseyería d’Educación ta peracabando la primer convocatoria, na que se va dar una mayor concreción a eses bases.
La primer edición de Llume cunta con una partida de 12.000 euros pa repartir ente los centros públicos participantes y otros 4.000 pa los alcordaos. Educación prevé apurrir les ayudes enantes de finales d’añu. Los escoyíos van recibir tamién una placa acreitativa.
