Entamaba’l, conciertu d’Ángel Stanich col misteriu de la sintonía de Twin Peak y un fondu azuláu que teñía too d’una atmósfera especial como avisu de lo que se diba vivir na sala Tribeca esa nueche. Stanich y la so banda vinieron a Uviéu pa facer un repás al so últimu discu ‘Polvo de Batiatto’ onde, si cabe, s’aumenta entá más el complexu universu del songwriter pucelanu.
Nel conciertu vióse un públicu entregáu dende un respetu y la sensación xeneral de que nun diben a decepcionase colo que diben ver. Ye más, podría dicise que nun había muncha xente del respetable que fuese a conocelu por vez primera. Y ye que Stanich ufrió un show que tampoco ye propio de daquién que xirase por vez primera. Más bien tolo contrario, llamaba l’atención el procuru de los detalles: dende’l look de la banda, perfectamente combinao, la iluminación al soníu prácticamente perfectu y que sonaba a más influencies qu’al Stanich más blues y rock de los entamos.
Cantares como ‘Rey idiota’ amosaron esti elementu d’ampliamientu de los influxos musicales, ensin dexar de llau’l posu irónicu como dinámica xeneral que también se vio en cantares como ‘Nazario’, una de les más coreaes del últimu trabayu. Tamién apaecieron nel setlist composiciones como ‘Le tour’95’ o ‘Un día épico’, qu’encaxó mui bien cola atmosfera xenerada pa la ocasión.
La conexón col públicu foi una constante de Stanich, en tou momentu, faciendo referencies a Uviéu, inclusive dende’l puntu de vista históricu, falando n’asturianu dalgunes cuestiones puntuales y faciendo referencia a personaxes del mundo de la cultural de la ciudá y d’Asturies cola sorna y el sarcasmu que-y son característicos, nun speech que duró varios minutos y que sorprendió a munchos pol estilu de bardu o xuglar qu’amuesa también ensin guitarra Stanich.
Darréu d’ello, llegóse a la parte final del show, un show que nun dexó de desendolcase cuidadosamente y con esi puntu de contención y de soníu envolvente. El mentáu pieslle del conciertu, tuvo marcáu por hits como ‘Mátame camión’ o ‘Escupe fuego’ que veníen pa confirmar que Stanich también tien esos cantares coreables, pese a fuxir del estribillu fácil y tener un estilu singular e inimitable onde destaca un surrealismu llíricu y una multirreferencialidá casi extrema, que tiñe d’ironía y crítica social muncho del so universu. Eso sí, que nun espere naide ver apaecer poles estaciones finales a ‘Metralleta Joe’.
Igual qu s’abría cola BSO de Twin Peaks, y non casualmente (el cromatismu propiu de David Lynch acompañó la iluminación de mena constante), el pieslle adecuáu yera que marcharen saludando al públicu con ‘Centro Di Gravittá Permanente’, como homenax a Franco Battiato al que se fai alusión yá nel propiu discu y la xira ’Polvo de Battiato’. Y ye que n’Ángel Stanich ta la narrativa d’un Sabina o d’un Dylan, pero tamién el “quejío” flamencu, l’estilu de Beat Generation castizu, propiu y ensin complexos nin ensin dar puntada ensin filu. Stanich ye un bardu atemporal y del nuestru tiempu al empar. Un bardu, yá clásicu, un artista impecable, como’l conciertu del pasáu viernes.
