Asturies dio güei un pasu decisivu na modernización de la so rede de cercaníes cola puesta en serviciu del nuevu trazáu ferroviariu soterrañu en Llangréu y la renovación de la llinia C-5 que conecta Xixón con La Pola Llaviana. Estes actuaciones, executaes por Adif, supunxeron una inversión de más de los 100 millones, cofinanciaos con fondos europeos del programa Next Generation UE.
Dambos proyectos formen parte del Plan de cercaníes d’Asturies que contempla una inversión global de 1.451 millones pa tresformar el sistema ferroviariu asturianu y avanzar a un modelu de movilidá sostenible afechu al sieglu XXI.
D’estos dos obres, el nuevu túnel de Llangréu, de 3,3 kilómetros, desanicia la hestórica barrera ferroviaria ente los distritos de La Felguera y Sama, incorporando dos estaciones afeches —La Felguera Nuevu Llangréu y Sama Los Llerones— y suprimiendo pasos a nivel. La inversión xubió a 43 millones.
Pela so parte, la llínea C-5 foi dafechu anovada con una inversión cercana a los 60 millones. Les obres ameyoraron la infraestructura ferroviaria, modernizaron los sistemes de señalización, electrificación y telecomunicaciones, ya incorporaron nueves tecnoloxíes qu’aumenten la fiabilidá y eficiencia del serviciu.
La entrada en funcionamientu d’estes meyores vieno acompañada d’una reorganización de los servicios de Renfe. D’equí p’arriba, los trenes diarios ente selmana van pasar de 28 a 34, de los cualos 12 van ser servicios semidirectos. Esta reorganización va dexar amenorgar los tiempos de viaxe n’hasta 27 minutos y va beneficiar directamente al 98,1 % de los usuarios habituales.
