La conseyera d’Educación, Lydia Espina, dimitió esta mañana tres les reivindicaciones de la comunidá docente que se vienen dando mientres la postrer selmana. Fíxolo con esta carta:
Estimáu presidente:
Al traviés d’estes llinies treslládote la mio decisión irrevocable de dimitir como conseyera d’Educación del Gobiernu d’Asturies.
Cuando asumí la responsabilidá de tar al mandu de la Conseyería d’Educación, fícelo convencida de la necesidá de trabayar ensin fuelgu comprometida coles mires de llograr un sistema educativu asturianu meyor, más inclusivu, con más calidá, equitativu y pa tol alumnáu. Como docente siempre fui mui consciente de les enormes mires y del enfotu que la sociedá asturiana tien depositada na educación pública. Güei vuelvo tenelo presente al tomar esta decisión.
Honestamente tengo que dicir que los acontecimientos que se vinieron desenvolviendo nes últimes selmanes supunxeron pa mi una enorme gastadura emocional y personal que llegó a la so llende. Siento que’l ruiu y los ataques trespasaron les llendes de lo racional y lo político, llegando a lo personal. Y impunxéronse a cualquier posibilidá de diálogu dende’l respetu que toos y toes merecemos. Esto ye daqué que resulta imprescindible p’avanzar en pro d’esi oxetivu común que ye ameyorar la educación pública.
Asina toi vivendo esta situación y nestes circunstancies creo que nun puedo ser parte d’una solución que, toi convencida, terminará por algamase.
Col corazón na mano tengo que dicite que siempre creyí y considero qu’en toles facetes de la vida hai qu’actuar dende la empatía y el respetu a toles persones. Dende la humanidá, en definitiva.
Escribo esta carta con una enorme murnia, pero tamién dende la esperanza. A lo llargo de tola mio carrera profesional como maestra vi cómo se fortalecía’l nuestru sistema educativu y sentíme parte d’esi procesu. La nuestra escuela pública ye’l patrimoniu más valiosu que tenemos los asturianos y les asturianes. Toi convencida d’ello. Y toi arguyosa porque lu construyimos ente toos y toes, percima de cualquier interés particular por bien lexítimu que fuera, pensando siempre nos sos destinatarios finales: los nuestros neños y neñes, los nuestros mozos.
Por eso esmolezme qu’esti conflictu acabe deteriorando l’enfotu y la percepción de la sociedá asturiana sobre la educación pública. Ye importante que recordemos que ye un sistema que ta na actualidá a la cabeza de toles evaluaciones nacionales y internacionales, non yá n’ésitu académicu sinón tamién pola so equidá.
Ensin dulda cometí erros, como los comete cualquier ser humanu. Pero tamién sé que nunca tomé una decisión p’agraviar nin despreciar a naide. Toes y caúna tuvieron como oxetivu reforzar un sistema educativu que potenciara les capacidaes de tol alumnáu, atendiendo tamién al so bienestar emocional, acompañando a les families y a los docentes y respondiendo a les necesidaes de la sociedá asturiana. Espero que cuando cese’l ruiu, pueda reconocese too’l trabayu que desenvolvimos.
Tamién me gustaría tener unes palabres pal mio equipu, pa les persones que nestos años acompañáronme nesta emocionante esperiencia, coles que trabayé coldu a coldu y compartí ideales. El so sofitu foi inestimable. Ensin elles nun podría asumir esta xestión. De la mesma, que nun lu pudo facer ensin la complicidá, la paciencia y el respaldu de la mio familia.
Termino yá, presidente, estimándote l’enfotu depositáu en mi toos estos años. Toi segura, conociéndote como llegué a facelo nestos años, que vas entender estes razones que te toi intentáu treslladar falándote dende’l corazón y el convencimientu.
