Xixón al día

Autor: xixonaldia

  • En directo: la participación baxa tres puntos en Xixón

    En directo: la participación baxa tres puntos en Xixón

    🕗 20.01 | Pisellen los colexos electorales, entama’l recuentu.

    🕗 18.22 | La participación a les 18 hores en  ye del 47,34%, tres puntos más baxa que va cuatro años (50,28%).

    🕗 14.03 | Primeros datos de participación n’Asturies. Hasta les 14 hores votó’l 32,86%, casi un puntu menos que va dos años (33,66%). Na circunscripción central pasóse del 33,82% de 2015 al 31,53%. Tamién baxa la participación nes elecciones municipales: del 33,71% al 32,79%. Nel casu de Xixón la baxada ye del 34,53% al 32,97%.

    🕗 13.40 | Na Escuela de Maxisteriu d’Uviéu votó’l candidatu de Ciudadanos a la presidencia del Principáu, Juan Vázquez.

    🕗 13.06 | Pablo Casado votó en Madrid agradeciendo’l trabayu d’apoderaos ya interventores del PP.

    🕗 12.50 | «Oxalá la participación sía bien alta. Siempres ye importante que la xente movilícese votando en conciencia», dixo Pablo Iglesias, secretariu xeneral de Podemos, depués de votar.

    🕗 12.30 | Yá votó tamién Aurelio Martín, candidatu  l’Alcaldía de Xixón por la Izquierda. Fízolo nel IES Emilio Alarcos.

    🕗 12.10 | Albert Rivera, de Ciudadanos, votó en Madrid «pola llibertá, la igualdá y la dignidá».

    🕗 11.50 | Depués de votar, Adrián Barbón animó a la ciudadanía a votar porque «del votu depende too». El candidatu de la FSA-PSOE aseguró nun tar nerviosu y dixo tener la esperanza d’un futuru pa «la meyor Asturies».

    🕗 11.34 | La candidata de Foru Asturies a la presidencia del Principáu votó nel Palaciu de Deportes de Xixón. «Hoy tienen que hablar los asturianos y asturianas», declaró Carmen Moriyón depués votar.

    🕗 11.07 | Pela so parte, Ana González, votó nel Antiguu Institutu. La candidata del PSOE a l’Alcaldía de la ciudá animó a los xixoneses a dir a votar: «Tenemos que pensar en qué modelu de ciudá queremos».

    🕗 11.05 | El candidatu de Foru Asturies a l’Alcaldía votó nel pabellón de deportes de L’Arena.

    🕗 10.44 | Tamién votó, nel Nicanor Piñole, el candidatu de Por Gijón, David Alonso.

    🕗 10.35 | El presidente del Gobiernu saliente, Javier Fernández, yá votó nel colexu Río Piles.

    Yolanda Huergo votó pasaes les diez de la mañana nun colexu de Laviada. / Podemos
    Yolanda Huergo votó pasaes les diez de la mañana nun colexu de Laviada. / Podemos

    🕗 10.15 | La candidata de la coalición Podemos-Equo a l’Alcaldía de Xixón, Yolanda Huergo, votó pasaes les diez de la mañana nel colexu públicu de Laviada.

    🕗 10.10 | José Carlos Fernández Sarasola, candidatu de Ciudadanos a l’Alcaldía, foi’l primeru en votar. Fízolo nel colexu de Begoña.

    Pedro Sánchez vota nes elecciones municipales y autonómiques d'esti domingu 26-M.
    Pedro Sánchez votó nun colexu de Pozuelo de Alarcón (Madrid). / PSOE

    🕗 10.00 | El presidente del Gobiernu central en funciones, Pedro Sánchez, foi’l primer llíder nacional n’exercer el so derechu al votu. Fízolo acompañáu de la so pareya, Begoña Gómez, en Pozuelo de Alarcón (Madrid).

    🕗 9.05 | Normalidá n’apertura de los colexos electorales n’Asturies.

    🕗 8.02 | Los colexos electorales van permanecer abiertos hasta les ocho de la tarde. A esa hora va empezar l’escrutiniu. Dada la coincidencia de trés procesos electorales, l’orde en que se va llevar a cabu’l recuentu va ser el siguiente: comicios al Parlamentu Européu, municipales y autonómicos. Los resultaos provisionales van poder consultase na web www.resultadoselecciones2019.asturias.es y a través de la app oficial d’estos comicios.

    🕗 8.00 | 973.736 asturianos tan llamaos a votar nesta triple cita electoral (municipales, autonómiques y europees). Asturies cunta con 615 locales electorales distribuyíos nos 78 conceyos, onde tan instalaes 1.573 meses.

  • 26M: 973.736 asturianos tan llamaos güei a votar

    26M: 973.736 asturianos tan llamaos güei a votar

    Cerca d’un millón d’asturianos tan llamaos güei a votar. Un total de 973.736 personas van poder participar na triple cita electoral (municipales, autonómiques y europees). Asturies cunta con 615 locales electorales distribuyíos nos 78 conceyos, onde se van instalar 1.573 meses. L’Alministración va distribuyir pol territoriu de la comunidá a 894 representantes que van disponer de 701 tabletes pa la correcta tresmisión de los sufraxos.

    El Gobiernu d’Asturies pon en marcha un ampliu dispositivu de siguimientu para facilitar l’espardimientu de los resultaos de les elecciones a la Xunta Xeneral del Principáu y a los conceyos, qu’inclúi l’usu de tabletes pal treslláu eficaz de los datos, aplicaciones móviles y retrasmisiones en directu.

    La xornada va empezar a les ocho de la mañana cola apertura de los colexos electorales y la constitución, media hora depués, de les meses. A les nueve empecipiará la votación y ta previsto facilitar meyores de participación a les dos y a les seis de la tarde. A les ocho de la tarde van cerrase los colexos y va empezar l’escrutiniu. Dada la coincidencia de trés procesos electorales, l’orde en que se va llevar a cabu’l recuentu va ser el siguiente: comicios al Parlamentu Européu, municipales y autonómicos.

    El siguimientu de la xornada electoral va desenvolvese nel Palaciu del Conde de Toreno, n’Uviéu, onde s’instaló’l Centru d’Espardimientu de Datos (CDD). Los resultaos provisionales van poder consultase na web www.resultadoselecciones2019.asturias.es

  • Un home mancáu al volcar col so tractor en Casu

    Un home mancáu al volcar col so tractor en Casu

    Un varón de 52 años resultó mancáu, al volcar el tractor nel que circulaba per una pista na zona de Brañagallones, a unos 5 kilómetros de la localidá de Bezanes, en Casu. L’afectáu, que foi sacupáu al HUCA pol Grupu de Rescate de Bomberos del Serviciu d’Emerxencies del Principáu d’Asturies (SEPA), a bordu del helicópteru medicalizáu, presentaba una quebra severa del pie esquierdu y un traumatismu craneoencefálico y facial. Por cuenta de más pruebes y hasta nueva valoración médica’l so pronósticu ye reserváu.

    El Centru de Coordinación d’Emerxencies recibió l’avisu a les 17:42 hores. Na llamada indicóse que nuna pista produxérase la cayida d’un tractor y el conductor tenía un golpe na cabeza. Darréu’l Guarda Mayor del Parque de Redes confirmó que l’accidentáu taba atrapáu. De momentu movilizóse al Grupu de Rescate de Bomberos del SEPA, a bordu de l’aeronave medicalizada y a los efectivos de Bomberos del SEPA, con base nel parque de Samartín del Rei Aurelio.

    Una vegada na zona, l’arboláu del llugar obligó a executar operaciones de grúa, tantu para baxar los rescatadores hasta l’afectáu, como pa la so posterior evacuación. De primeres, la médica-rescatadora y un bomberu-rescatador aportaron hasta l’afectáu. N’atendiendo al mancáu y estabilizalu, executose de nuevu una operación de grúa para poder izar a la médica-rescatadora, al pie de la camiya col varón accidentáu, a l’aeronave. Una vegada tol equipu a bordu del helicópteru procedióse la evacuación al Hospital Universitariu Central d’Asturies.

    La sala del 112 del SEPA informó del sucesu a la Guardia Civil y al Serviciu d’Atención Médica Urxente (SAMU).

  • José Alberto: «Lluchamos contra tolos elementos»

    José Alberto: «Lluchamos contra tolos elementos»

    El penalti, el chorréu de tarxetes, el segundu gol… Demasiaos imponderables nun partíu. José Alberto nun duldó en señalar que «lluchamos contra tolos elementos hasta’l final». Espunxo que «nun falo nunca de los árbitros, pero tantes marielles nun partíu asina…». L’entrenador del Sporting considera que l’equipu caltuvo’l control del xuegu y almitió que, como otres vegaes, «faltónos daqué». Espunxo que «el penalti rompió l’equilibriu del partíu».

    José Alberto considera que l’alcuentru sirvió para probar xugadores y sistema. Al respeutu preguntáron-y por Pedro Díaz, que debutó n’El Molinón en LaLiga y como titular: «Nun yera un partíu fácil para él, porque pue falta-y el ritmu propiu d’esta competición, pero demostró la so fortaleza».

  • Peybernes, baxa por doble tarxeta mariella

    Peybernes, baxa por doble tarxeta mariella

    Peybernes vio dos tarxetes marielles que-y supunxeron la espulsión nel enfrentamientu énte l’Albacete. La primera que-y foi amosada, que fuera la quinta, traxera tamién la so baxa pa recibir la última xornada al Cádiz, cuidao que’l partíu énte’l Reus nun cunta a estos efectos.

    Nel apartáu médicu, Geraldes tuvo que ser suplíu por una contusión ocular. El so diagnostico ye «hiphema post traumáticu nel güeyu derechu».

    L’equipu roxiblancu volverá entrenase’l llunes en Mareo a les 10.30 hores nun horariu y escenariu que se va repitir a lo llargo de los siguientes díes de la selmana. Nun va haber disputa de competición la próxima fin de selmana, cuidao que nel alcuentru de la xornada 41 el Sporting tien como rival al Reus.

  • Evacuáu un escursionista que rompió un todíu na Ruta’l Cares

    Evacuáu un escursionista que rompió un todíu na Ruta’l Cares

    Efectivos del Grupu de Rescate de Bomberos del Serviciu d’Emerxencies del Principáu d’Asturies (SEPA), a bordu del helicópteru medicalizáu, evacuaron a un varón que se mancó nun todíu mientres faía la Ruta’l Cares, en Cabrales. L’afectáu, un varón portugués de 57 años, presentaba una quebra de todíu y foi treslladáu al Hospital Comarcal de Les Arriondes.

    La sala del 112 recibió l’avisu a les 11:15 hores. Na llamada indicóse que yeren trés persones y una d’elles habíase fechu dañu n’una rodía y nun podía movese. Los senderistas indicaron que s’atopaben na Ruta’l Cares, de Poncebos a Caín, pasáes les Collaes, na baxada. A pidimientu del SAMU movilizar al equipu de rescate de Bomberos del SEPA, a bordu de l’aeronave medicalizada.

    Una vegada na zona, l’helicópteru pudo aterrizar nun espaciu cercanu al varón mancáu. La médica-rescatadora y un bomberu-rescatador aportaron hasta’l senderista y en atendiéndolu ya inmoviliza-y la estremidá mancada, evacuáronlu. Pa ello executóse una operación de grúa de ciclu llargu, nel que s’esplegaron unos 35 metros de cable. Col triángulu de rescate izóse a bordu a la médica-rescatadora y al varón mancáu.

    Con tol equipu na aeronave, evacuóse al varón afectáu al Hospital Comarcal de Les Arriondes. El Grupu de Rescate de Bomberos del SEPA dio por rematada la intervención a la so llegada a base, a les 13:34 hores. La sala del 112 del SEPA comunicó’l sucesu a la Guardia Civil, al Serviciu d’Atención Médica Urxente (SAMU) y a los 112 de Castiella y Llión y Cantabria.

  • El 112 Asturies atendió 50.651 llamaes n’abril

    El 112 Asturies atendió 50.651 llamaes n’abril

    La Sala del 112 del Serviciu d’Emerxencies del Principáu d’Asturies (SEPA) recibió un total de 50.651 llamaes el pasáu mes d’abril, lo que supon una media diaria de 1.688. La mayor parte d’estes llamaes, 29.899, fueron d’emerxencia. Amás, contabilizáronse 2.052 llamaes informatives y 2.076 de trabayu. El restu fueron tipificaes como non pertinentes (móviles equivocaos, ensin respuesta del interlocutor, chancies, etcétera).

    Toes estes llamaes al 112 Asturies derivaron na apertura de 18.623 incidentes que riquieron la movilización de dalgún tipu de recursu. Na so mayor parte, 13.783 correspóndense cola categoría d’atención sanitaria. Tamién se rexistraron, ente otros, 2.603 incidentes rellacionaos cola seguridá ciudadana y seguridá vial y 585 accidentes de tráficu. La media diaria foi de 621 incidentes.

    Salíes de Bomberos del SEPA

    La rede de parques de Bomberos del SEPA realizó’l pasáu mes d’abril un total de 644 salíes a distintes intervenciones. La mayor parte fueron por quemes forestales con 162 salíes. Tamién se contabilizaron 107 salíes por quemes urbanes y, ente otres, 60 salíes por rescates, 87 pa retirada d’elementos peligrosos y 25 p’accidentes.

    Bomberos del SEPA cuenta con 19 parques de bomberos distribuyíos pel país que trabayen en rede so un criteriu de funcionalidad, esto ye, garantizar la mayor rapidez y eficacia posible en cualquier puntu d’Asturies. Por centros de trabayu los parques de Llamorgal con 81 salíes, Avilés con 80 y Mieres con 46, fueron los que realizaron, nesti periodu, mayor númberu de salíes. Sobro les salíes realizaes pa distintes intervenciones pelos medios aéreos contabilizáronse un total de 46 salíes.

  • Foru culpa a la riegla de gastu de los retrasos nes subvenciones a fachaes

    Foru culpa a la riegla de gastu de los retrasos nes subvenciones a fachaes

    El presidente de Foru Xixón y candidato a la Alcaldía del Conceyu, Álvaro Muñiz, presentó esti vienres les sos propuestes en materia de rexeneración urbana, movilidá, sostenibilidá, saneamientu y vivienda. «Entendemos la sostenibilidá nun necesariu equilibriu: social, económicu y medioambiental», esplicó Muñiz.

    Defendió’l Plan Xeneral d’Ordenación (PXO), que define «una ciudá compacta que quier crecer de manera sostenible». Pa desenvolvelu, propunxo la creación de la Oficina Te Crea. «Ye una unidá alministrativa capaz d’entainar la collaboración público-privada necesaria pal mayor aprovechamientu del plan», señaló. Esta oficina encargaríase de xestionar la inversión del Conceyu nos barrios «concretando les inversiones de manera ordenada y atendiendo a prioridaes técniques».

    El programa de Foru pa Xixón recueye tamién la creación d’una Oficina pa la Economía Circular nel equipamientu de Quinta la Vega. «Esta oficina va tener una doble función, per una llau empecipiar un diálogu cola Comisión Europea p’acceder a los fondos del nuevu periodu marco y otra meyorar la participación ciudadana». El candidatu amosó’l so compromisu cola zona rural y apostó por «una economía de valor que vertebre un nuevu futuru rural».

    Coles mesmes, fixo referencia a les subvenciones de fachaes: «La riegla de gastu que caltienen los Gobiernos de PP y PSOE tórganos pagar les subvenciones a fachaes como nos gustaría». «La xestión socialista de los planes d’inversión foi catastrófica pa Xixón. Executemos una media de 30 millones d’euros añales n’inversión y vamos faer d’esti mandatu’l mandatu del caltenimientu urbano y rural», recordó.

  • La Fundación BBVA financia un proyectu sobre’l control de plagues nes pumaraes

    La Fundación BBVA financia un proyectu sobre’l control de plagues nes pumaraes

    El proyectu ‘Especies clave para servicios ecosistémicos retroalimentaos en agroecosistemas (ClaveSER)‘, presentáu pola Universidá d’Uviéu en collaboración col SERIDA y SEO/BirdLife, llogró una de les 25 ayudes a equipos d’investigación científica de la Fundación BBVA. L’oxetivu d’esti trabayu ye identificar especies particularmente importantes por apurrir funciones ecolóxiques que tienen una repercusión directa en cuestiones fundamentales para’l ser humanu. En concretu, con esta ayuda’l personal investigador va siguise afondando nuna de les llínees na que trabaya dende va años, centrada nes pumaraes de sidra d’Asturies, les sos aves montés y plagu, y les plantes de les sos sebes. Esta vegada estudiaráse la dieta de les aves al traviés de los sos escrementos, identificando tantu los insectos -a partir de los restos del so ADN prindaos poles aves insectívores como los frutos de les plantes de les sebes, consumíes poles aves frugívoras. Van envalorase asina redes d’interacciones ecolóxiques p’asemeyar la perda de servicios ecosistémicos énte la estinción d’aves.

    Alredor de les pumaraes crecen sebes, sebes vives monteses, y tamién colindan montes autóctonos, onde hai munches especies d’árboles y parrotales con frutos carnosos. Estes finques de pumar tienen xuna comunidá d’aves bien diversa, la gran mayoría insectívora que s’alimenta de plagues de pumar (por casu, pulgones y guxanos de la mazana). «Sabemos qu’hai munches especies d’aves insectívores monteses qu’exercen un papel real como protectores del cultivu contra les plagues», señala Daniel García, l’investigador principal.

    Estes aves tamién s’alimenten de los frutos de les sebes, espulsen les sos granes darréu y faen que funcione’l ciclu de rexeneración de les plantes, amás de fomentar el caltenimientu natural d’eses sebes, que, pa cerrar el círculu, son un hábitat protector pa les aves. «Son controladores de plagues y esvalixen granes», añade. «Nós queremos montar una rede d’interacciones pa saber qué aves se comen a qué insectos y a qué frutos de les sebes pa, darréu, identificar qué especies son más importantes pa los dos funciones que se retroalimenten», esplica Daniel García.

    Col fin de crear dicha rede tienen d’identificar qué come cada ave, tanto frutos como insectos. Pa esto últimu, lo más complicao, van analizar los restos del ADN de los insectos qu’atopen nos escrementos de los páxaros. «Una vegada que se monte la rede, vamos poder identificar les especies más importantes pal sistema, pero tamién vamos poder faer esperimentos in silico», indica l’investigador. Estos esperimentos consisten en simulaciones por ordenador pa les que van recrear la rede y van dir, de forma virtual, escastando especies pa comparar cómo se caltienen les funciones de la rede. «Simulamos qué pasa cuando determinaes especies se pierden».

  • Podemos-Equo márcase como prioridá acabar cola contaminación de les agües

    Podemos-Equo márcase como prioridá acabar cola contaminación de les agües

    La sablera de San Llorienzo foi’l llugar escoyíu por Podemos-Equo Xixón pal so últimu actu de campaña pa llamar l’atención sobro la necesidá d’actuar p’acabar colos episodios de contaminación de les agües: «Escoyimos esti llugar simbólicamente porque ye una sablera y un mar que ye fonte de vida y una de les ventanes principales de la nuesa ciudá escontra’l mundu. Merez toa nuesa atención», afirmó Yolanda Huergo, candidata a l’alcaldía pola coalición.

    La contaminación na sablera y a lo llargo de tola mariña ye ún de los retos fundamentales nel mandatu qu’empieza: «Equí arrama la ría d’Aboño, El Piles, l‘emisariu de Peñarrubia, calces que precisen llimpieza… Son munchos aspeutos a los que faer frente, una y bones los problemes de contaminación nun deriven d’una sola causa, sinón de munches, y ye precisu actuar énte toes elles», caltuvo la númberu ún de Podemos-Equo Xixón.

    Cuestiones como tener en Xixón xuna rede separativa d’agües pluviales y fecales, dar respuesta a la depuración na zona este de la ciudá o terminar de construyir los pozos de tormentes son puntos que Podemos-Equo Xixón lleva nel so programa electoral. «Nel próximu mandatu tenemos que sentanos dende’l primer minutu a tratar esti problema. Nun podemos dexanos episodios como los que se vivieron el branu pasáu», señaló Huergo.

    Huergo responsabilizó directamente al equipu de Gobiernu de Foru y «a los heriedos de los gobiernos socialistes d’años anteriores que nun s’asumieron responsabilidá política». «Esta cuestión nun puede esperar más. Confío en cuntar col consensu de tolos miembros de la Corporación pa priorizar tolo que tien que ver col resolvimientu d’estos problemes y l’ayuda evidente del Principáu de Asturies y el Ministeriu de Mediu Ambiente», indicó.