El voceru municipal d’Izquierda Xunida nel Conceyu de Xixón, Javier Suárez Llana, propunxo que “si’l Gobiernu caltien la so intención de facese cola titularidá de los terrenes de la Ería del Piles, los y les xixoneses participen en tomar de decisiones sobre’l so futuru. Tamos falando d’unos de los espacios más emblemáticos de la ciudá, que forma parte del paséu del Muru y de la sablera de San Llorienzo, y creemos que si apostamos por una intervención pública pal so desenvolvimientu urbanísticu tien que venir acompañada d’un procesu de participación ciudadana”.
Asina, Suárez Llana propón la convocatoria d’un concursu d’idees, “como l’anunciáu pol Gobiernu pa la sablera verde d’El Rinconín”, y por un procesu participativu “qu’arreye al conxuntu de la ciudá y concluya con una votación ciudadana que decida’l futuru de la Ería del Piles. Siempres defendimos que nos desenvolvimientos urbanísticos que definen el modelu de ciudá la participación de les vecines y los vecinos nun puede ser solo una participación alministrativa. Les decisiones urbanístiques condicionen el modelu de ciudá y tienen qu’abrise a una participación ciudadana real y efectiva”, esplica, recordando’l concursu d’idees convocáu por IX el pasáu mandatu pa la remodelación de la fachada marítima de Fomento-Poniente.
El voceru d’IX esplica que “dende’l primer momentu manifestamos el nuesu sofitu al Gobiernu pa frenar l’intentu d’especulación urbanística plantegada pol promotor, pero tamién diximos que si los y les xixoneses díbamos a desembolsar dineru, la ciudá tenía que ganar daqué. Nun se trata de poner orde con recursos públicos pa que depués un terceru faiga negociu. La Ería del Piles tien que ser un espaciu pa los y les xixoneses, y queremos que los mesmos xixoneses participen nel so diseñu”. Pa Suárez Llana, la Ería del Piles ye “una zona idónea pa una sablera verde pal esparcimientu, l’ociu ya inclusive’l deporte al campu”.
Nesti sentíu, el voceru d’IX va plantegar una batería d’entrugues na Comisión d’Urbanismu, Obres Públiques y Mediu Ambiente con oxetu de conocer los planes del Gobiernu: “queremos saber si hai una voluntá real de que los terrenes sían públicos, y sobremanera qué plantega facer el Gobiernu con ellos una vegada adquiera la so titularidá”.
