Autor: xixonaldia

Aurelio Martín, candidatu a l’Alcaldía de la coalición Xixón por la Izquierda, propunxo esti martes el desenvolvimientu de «un plan para modernizar en cuatro años tolos equipamientos deportivos municipales que non solo acusen el pasu del tiempu sinón, y, sobremanera, el d’un Gobiernu de dereches que nun quixo o nun supo caltenelos». Martín aconceyó esti martes pela tarde cola Asociación de Clubes de Fútbol Base de Xixón. Nesi alcuentru, recordó cómo «los mugores, cuando non les goteres, les ventanes rotes y toa triba de desperfectos fueron una constante en piscines, campos de fútbol y polideportivos a lo llargo d’estos postreros cuatro años ensin que’l Gobiernu de Foru diéra-yos solución». El candidatu considera necesaria una «intervención de choque que ponga frenu rápido al deterioru que sufren los equipamientos deportivos municipales».

Al pie de ello, Martín apostó por «executar les obres pendientes, como les del Xixón Industrial o’l campu de fútbol femenín» y por estudiar «nuevos equipamientos en barrios con necesidaes nesta materia». Introducir una xestión enerxética eficiente nes instalaciones, caltener el so calter públicu, apostar pola promoción del deporte escolar y del deporte base, establecer una llínea de sofitu y financiamientu específicu al deporte femenino, y facilitar l’accesu a la práctica deportiva a persones con diversidá funcional, son otros de los compromisos de la coalición IX-IAS pa los próximos cuatro años.

Pela so parte, Víctor Martínez comprometió’l sofitu de Xixón por la Izquierda pa «diseñar un nuevu sistema de repartida de les subvenciones ente los clubes del fútbol base». El candidatu propón «una mayor collaboración del Conceyu nel caltenimientu de los campos que dexe a los clubes que los xestionen abaratar los costos», asina como «asumir dende’l Patronado Deportivu Municipal el seguru principal de les instalaciones».