Autor: xixonaldia

El Grupu Municipal Socialista presenta una moción d’urxencia al Plenu coles mires de llograr un alcuerdu qu’obligue a l’alcaldesa a regularizar la so declaración de causes de posible incompatibilidá y actividaes. Con esta propuesta formal el PSOE espera que Carmen Moriyón indique cuánto cobra del partíu dempués de qu’ella mesma confesara que tien un sobresueldu nel xuiciu por apropiación indebida contra quien fuera’l so mentor, dicen los socialistes, Francisco Álvarez-Cascos. Amás, piden la so comparecencia na próxima Comisión de Facienda pa qu’esclarie dende qué fecha vien percibiendo les asignaciones ocultaes, en qué conceptu, cuála ye la vía de pagu y dea información detallada de les actividaes privaes que realiza (si tien contratu o conveniu con entidaes mercantiles, aseguradores, sanitaries…).

El voceru, Luis Manuel Flórez ‘Floro’, criticó esti mediudía en rueda de prensa que l’alcaldesa nun diera un pasu al frente pa cumplir cola llei: “si nun tien nada qu’esconder, lo meyor ye que dea la cara y tenga voluntá, pero la única voluntá que tien ye la de desobedecer les sos obligaciones llegales y despintar información a la ciudadanía de Xixón. Cumplir cola llei nun ye opcional y los y les xixoneses tienen derechu a saber qué otres actividaes remuneradas realiza amás de la de ser alcaldesa”

Tal qu’esplicó Floro, la Ordenanza Municipal de Tresparencia, Accesu y Reutilización de la Información y Bon Gobiernu establez unes obligaciones ente les que s’atopa la d’ufiertar información detallada y actualizada sobre cualquier actividá qu’apurra o pueda apurrir ingresos. “Moriyón nun puede dicir que nun conoz esta obligación porque ella yera alcaldesa en 2016 cuando s’aprobó esta norma. Esta selmana, cola so declaración nel xuiciu de Cascos, supimos que nun acostuma a lleer lo que robla, pero yá sería’l cuelmu que nun lleera les normes qu’impulsa y aprueba nel desempeñu del so cargu. L’alcaldesa tendría de ser la primera en cumplir la llei y, lamentablemente, tamos comprobando que la llei que-y gusta cumplir ye la llei del embudu”, lo ancho pa ella y lo estrecho pal restu”, añede.

Pela so parte, Carmen Eva Pérez Ordieres esplicó que, amás de la normativa local, la obligación de facilitar la información señalada figura na normativa estatal y autonómico. La vocera axunta esplicó que la normativa autonómica, en concretu, considera como infracción grave nun declarar les fontes d’ingresos tres l’apercibimientu, y alvierte d’un posible choque ente’l llabor como alcaldesa de Carmen Moriyón y la so actividá privada. “La normativa sobre incompatibilidaes y tresparencia establez obligaciones, non solo pa controlar les actividaes privaes mientres el tiempu nel que los representantes tán exerciendo’l so cargu sinón tamién una vegada cesóse nel mesmu. Nun escaezamos que s’aprueba, ente otres coses, pa evitar les puertes xiratories”, sentencia.

Pérez Ordieres considera que “el xuiciu ta poniendo de manifiestu la esistencia d’unes práctiques poco controlaes dientro de Foro, lo que xenera alarma social, por tanto, ye necesario que l’alcaldesa regularice la so declaración d’actividaes.

Podemos Xixón reclama al gobiernu municipal “programes, incentivos y midíes específiques” pa que dende esti mesmu añu les iniciatives privaes culturales y d’ociu que cuenten con sofitu económicu del Ayuntamientu tengan que promover l’usu del asturianu.

Esti ye l’envís d’un ruegu que va defender la vocera de Podemos nel Ayuntamientu de Xixón, Olaya Suárez, nel Plenu del miércoles 15 de xineru. El testu de la iniciativa plantea qu’estos eventos incorporen l’asturianu como llingua vehicular de delles de les sos actividaes, la presencia d’artistes qu’empleguen l’idioma y la espublización de materiales promocionales y de comunicación n’asturianu, con especial atención al ámbitu del ociu infantil y familiar.

Según desplica Suárez, “trátase namás que de cumplir colo que diz el Plan de Normalización Llingüística, non solo na so última edición, sinón tamién nes anteriores”. Esti documentu, aprobáu pol propiu Plenu municipal, establez los oxetivos de “implicar al texíu asociativu y sociocultural xixonés na promoción social del asturianu” y “proporcionar recursos que faciliten l’usu del asturianu per parte d’asociaciones, coleutivos socioculturales y entidaes deportives”.

D’esta manera, Podemos reclama que “ye tiempu de que la normalización llingüística seya un criteriu de verdá a la hora de prestar el sofitu del Ayuntamientu, y d’igual manera, hemos de poner de la nuestra parte ufriendo los recursos de los que disponemos, como’l llabor de la Oficina de Normalización Llingüística”.