Autor: xixonaldia

La comparecencia del director xeneral d’Alcaldía, Coordinación y Proyectos de Ciudá, Jaime Fernández – Paíno, celebrada esta mañana na Comisión de Facienda, revela una alarmante falta d’iniciativa per parte del gobiernu de Moriyón a la de solicitar fondos europeos. Magar nel pasáu mandatu’l PSOE consiguió 37 millones d’euros de financiamientu PRTR pa 24 proyectos, el gobiernu actual llindóse a presentar solo dos proyectos mientres el postreru mediu añu, el más relevante rellacionáu col turismu. La nueva política na materia anunciada pola derecha ye dafechu contraria a la que defenden los socialistes: trabayar insistentemente na busca de financiamientu que dexe desenvolver proyectos pa construyir un conceyu de progresu y ameyorar les condiciones de vida de vecines y vecinos.

Énte estos fechos, la conceyala y vocera axunta del Grupu Municipal Socialista, Carmen Eva Pérez Ordieres, afirma que “l’únicu proyectu qu’esti gobiernu ye capaz d’identificar como una posibilidá de desenvolvimientu pa esta ciudá guarda relación col turismu. Pon de manifiestu les sos errátiques acciones y polítiques nesta materia dende que s’empecipió’l mandatu y que quedaron perfectamente reflexaes esti nesti últimu branu”.

Ha señalase que la comparecencia d’una de les persones de confianza de l’alcaldesa produzse semestralmente dempués de que’l PSOE lo pidiera n’ares de conocer tolo rellacionao cola xestión de los proyectos del Plan de Recuperación, Tresformamientu y Resiliencia. “Yá abarruntábamos que la voluntá per parte del gobiernu local yera nula y agora comprobámoslo. Xixón ta alloñándose de les dinámiques que siguen otros conceyos de la nuesa contorna, onde los fondos europeos vense como una oportunidá pa implementar polítiques necesaries que guarden relación cola convivencia, el mediu ambiente o la movilidá. Rescampla que nengún d’esos asuntos interésa-y al equipu de la señora Moriyón”, apunta Pérez Ordieres.

Pa la concejala socialista, la trayectoria de la derecha convierte a esti gobiernu nel gobiernu de los arrenuncios» col abandonu del Mundial, de la capitalidad cultural europea y, agora, a los fondos europeos, “dexando a Xixón ensin un proyectu claru de ciudá, daqué propiu d’un partíu endogámicu que solo persiste nesti conceyu y que, hasta’l momentu, ye probablemente lo peor que-y asocedió a esta ciudá”, conclúi.

Per otru llau, tamién alvirtió tres la comisión que’l gobiernu va presentar de nuevu los presupuestos ensin que les y los conceyales recibieren formación sobro la Ordenanza d’Igualdá, por tanto, van siguir ensin implementala nos respectivos ámbitos que lideren. El PSOE punxera de manifiestu la necesidá de tomar midíes yá que, nes anteriores comparecencies sobro’l borrador de les cuentes, había conceyales que desconocíen la esistencia de la norma. “Nun fixeron nada, lo qu’acota una vegada más el nulu compromisu d’esti gobiernu cola igualdá”.

Los peatones son los más débiles nun accidente de tráficu. Y asina se demuestra nos últimos datos que Formaster, Asociación Profesional d’Empreses Formadores en Tresporte, Loxística y Seguridá Vial, pudo estudiar y nos que se reflexa que’l 21% de les víctimes d’accidente de tráficu en zones urbanes del conceyu de Xixón ye un peatón. Nos postreros 5 años los atropellos en Xixón baxaron un 7% pero siguen siendo mui altos.

Más de 120 xixoneses fueron pillaos en 2022 en zones urbanes, lo que supón que por cada 20 accidentes de tráficu en Xixón hai 5 peatones involucraos. Anque la gravedá d’esti tipu d’accidente nun ye alta, el 92% de los peatones atropellaos en Xixón resulta mancáu leve.

Formaster quier poner en valor estos datos y incluir a tola sociedá: ciudadanos, alministraciones locales, provinciales y autonómiques, centros de formación vial, escueles y families del problema que trai un atropellu. L’asociación de formación vial quier recordar a los viandantes qu’ellos tamién deben de cumplir les normes de circulación y a la sociedá qu’estes normes tienen d’aprendese dende pequeños, amás, d’informa-yos de forma correcta, esacta y minuciosa de les novedaes normatives que puedan dase.

El 27% de los viandantes atropellaos n’España son mayores de 65 años y el 11,85% menores de 14 años. Nel casu de los menores, el focu céntrase nos que tengan menos de cuatro d’años yá que suponen un 3%, más de 350 atropellos namás en 2022; y ha destacase que na mayoría de les ocasiones diben acompañaos d’un adultu. La imprudencia per parte del peatón ye una de les causes más habituales algamando’l 17,13% del total d’estos accidentes. Un porcentaxe que xube hasta’l 26% en casu de fallecimientu del viandante. Les infracciones más comunes d’estos son, cruciar fuera del pasu de peatones con un 58,3%, facelo con semáforu en colloráu pal viandante, el 17.5%, o andar de forma imprudente pela calzada con un 15,7%.