L’artista llangreana Marisa Valle Roso va actuar el próximu 19 de xunetu en Xixón, como últimu conciertu nel Ciclu Terraza del Botánicu. Esti va ser el primer conciertu na ciudá con banda tres la presentación del so últimu discu, Lo Fugaz, nel Teatru de la Llaboral, en xineru de 2022. Les entraes yá pueden consiguise equí, a un preciu de 20€ más gastos de xestión.
L’artista, apasionada polos sos raigaños asturianos, destacó dende moza na tonada asturiana, llogrando delles reconocencies. El so primer discu en solitariu, De lo fondero l’alma (2011), vendió más de 4.000 copies y ganó el Premiu de la Crítica RTPA al Meyor discu de Cantar Asturianu del añu. Dende entós, acompañó a Víctor Manuel na so xira 50 años es nada, compartiendo escenariu con artistes como Joaquín Sabina y Estopa. Eantes d’un conciertu tan especial, falamos con ella posao pa conocer como afronta’l presente y futuru.
Vamos poder vete actuar esti 19 de xunetu en conciertu nel Ciclu Terraza del Botánico de Xixón. ¿Qué emociones sientes al tocar esti conciertu nun llugar tan emblemáticu?
Ye emocionante siempre tocar n’Asturies en xeneral, pero cuando tienes la suerte amás de poder facelo nun llugar máxicu como ye’l Botánicu, la emoción multiplícase. Llevo tiempu sin canta-y al públicu d’Asturies, que ye’l que lleva caminando conmigo desque entamé, por eso cuento les hores pa que llegue’l vienres.
El to primer discu en solitariu, «De lo fondero l’alma», tuvo un gran ésito y ganó’l «Premiu de la Crítica RTPA». ¿Cómo recuerdes esa etapa de la to carrera y qué impactu tuvo esa reconocencia na to evolución como artista?
Diome la primera xira de la mio vida asina qu’esi discu foi importante na mio carrera. “De lo fondero l’alma” vendióse munchísimo y a día de güei lo siguen reclamando. Foi un discu que tenía que facer pola etapa de la que venía de ganar tantos concursos. Muestra quién yera nesi momentu y agora encántame enseñalu a la xente nuevo que conozo pa que entiendan lo que faigo y d’onde vengo.
Dende moza destacasti na tonada asturiana y recibisti delles reconocencies. ¿Qué significa pa ti caltener viva esta tradición musical y cómo influyó na to carrera?
La Tonada ye l’alma de la mio voz. Nació y formose ellí y creo que ye imposible escuchala y que nun te lleve d’algún momentu a ella. Siento la Tonada parte de mí como asturiana que ama los sos raigaños y caltenela viva ye un compromisu que siento cola tierra na que vivo. Na mio carrera influye más de lo que paez.
Va poco, punxisti música al documental «Dans les Asturies, les mines ont uni les hommes». ¿Cómo foi esta esperiencia y qué desafíos enfrentasti al componer pa un documental?
Nun foi una composición propia, nesti casu participé cola interpretación de “En el Pozu María Luisa” y la verdá quedó un documental preciosu, tanto como la hestoria y los llugares que se mostraben. Siempre voi tar dispuesta a pone-y voz al carbón y a la hestoria d’onde vengo.
El to álbum «Consciente» inclúi collaboraciones con artistes como Víctor Manuel y Rozalén. ¿Cómo influyeron estes collaboraciones nel to desenvolvimientu artísticu y qué deprendisti d’elles?
Estos dos maestros de la canción son un exemplu pa mi y aprendo d’ellos tolos díes, pero amás, diéronme grandes conseyos dende la amistá que nos xune. Tienen parte de culpa de qu’agora escriba canciones propies.
Yes una apasionada polos tos raigaños asturianos y siempre llevasti’l folclor asturianu a otru nivel. ¿Qué importancia tien pa ti caltener y evolucionar la música tradicional asturiana?
Pa mi esperimentar cola música tradicional ye dalgo que m’encanta. Xugar con ella y llevala conmigo como seña d’identidá. “Lo fugaz” alloñóse más del folclor y acércase al pop, pero esta carrera ye mui llarga y entá ún me queda muncho que xugar colo mío.
Anguaño tas trabayando nel to próximu álbum ¿Podríes desvelanos lo que podremos ver nesti álbum viniente?
Si te lo cuento nun hai excusa pa volver a encontranos. Jajaja.
Toi trabayando muncho nél y mui arguyosa de lo que toi consiguiendo.
