Belén Suárez Prieto, cabeza de la candidatura municipalista, aprovechó l’empiezu de la selmana del 8M, Día Internacional de les Muyeres, pa poner en valor el trabayu invisibilizáu de les muyeres y señalar les innaciones y los comportamientos paternalistes que mientres el mandatu del bipartitu fuéron asocediéndose.
«Les muyeres nun somos eses persones, como quixo facer ver l’alcalde con delles declaraciones sos, que salimos colos nuesos homes a gastar o que sirvimos pa l’entretenimientu de los paisanos, nun somos eternamente neñes. Somos la metá de la población y reclamamos la mesma posición nel imaxinariu, la mesma posición profesional y social que los nuesos compañeros», aseveró la candidata.
Coles mesmes, Suárez Prieto criticó que’l Puntu Violeta mientres les fiestes de San Mateo camudara’l so nome a puntu Azul, puntu de «respetu», amás d’asitiase mientres el primer añu estremáu de la redolada festiva y con pocos recursos humanos. A ello, súmense acciones que, lloñe de ser empoderantes, asitien a la muyer en dinámiques patriarcales, como la vuelta de les reines de les fiestes.
Otres cuestiones nes qu’incidió son el borráu de les muyeres del caleyeru uvieín que s’estableció cola aplicación de la Llei de Memoria Histórica o l’enfrentamientu de la conceyala responsable de les polítiques d’igualdá colos colectivos del Conseyu d’Igualdá. Considera qu’una de les inacciones que supón mayor gravedá ye respectu al Plan d’Igualdá del Conceyu, que tuvo un altu nivel d’incumplimientu tocantes a les midíes establecíes nél, plan aprobáu por unanimidá nel anterior mandatu pola corporación.
Pa facilitar la conciliación de la vida personal, familiar y llaboral, cuyes dificultaes representen dalgunes de les mayores torgues p’algamar la igualdá real, y al respective de la que les polítiques llevaes a cabu pol gobiernu municipal tán financiaes en bona midida pol Ministeriu d’Igualdá, propunxo l’aumentu de les places d’Educación Infantil de 0 a 3 años, que les midíes reales de conciliación lleguen tamién a les criatures con diversidá funcional y que les polítiques públiques de cuidos y d’atención a les persones mayores y a les persones dependientes se lleven a cabu al traviés d’una empresa municipal creada con esi envís.
«Proponemos la vuelta d’un 8M reivindicativu; una conceyalía específica en materia d’igualdá, pa que les polítiques d’igualdá nun acaben diluíes; la creación de la Casa d’Alcuentru de les Muyeres; promocionar, dende la política municipal, la formación en xéneru y en prevención de comportamientos sexistes y violentos contra les muyeres, formación pa les asociaciones aniciaes nel conceyu, pal personal de los establecimientos hosteleros…; dende la Escuela Municipal de Salú, formación en salú pública con perspectiva de xéneru», numberó, p’acabar reclamando qu’en toles intervenciones públiques municipales mirar coles gafes feministes puestes y se lleve alantre un urbanismu con perspectiva de xéneru, tanto na ciudá como nes localidaes más pequenes como nel Uviéu rural, con redolaes bien dotaes de servicios públicos, allumáu sostenible y racional y diseños qu’apurran seguridá.
