Yera’l momentu que tol mundu taba esperando dende diba selmanes. Faltaben pocos minutos pa les seis de la tarde cuando l’ídolu local Pablo Carreño saltaba a la pista colorada del Xixón Open – ATP 250, el nuevu tornéu de la ciudá que-y vio nacer.
El Palaciu de Deportes La Guía raspió’l llenu con 4.300 espectadores pa ver n’acción al flamante campeón d’anguaño del ATP Masters 1000 de Canadá –el so séptimu títulu nel circuitu– amás de medallista olímpicu’l pasáu 2021 en Tokio.
“Xugar en casa tien les sos coses bones, pero tamién tien les sos coses complicaes” reconoció la cabeza de serie Nº 2 del tornéu. “Mires a la grada y ves cares conocíes per toos llaos. Ye un poco más difícil concentrase, pero lo pasé bien.” El xixonés destacó que: “La sintonía col públicu foi bien guapa. Hubo momentos nos qu’había bien de ruiu na pista. A la xente vía esfrutar y sufriendo tamién un mizcu.”
Carreño volverá desamarrar pasiones en Xixón el próximu vienres nel so alcuentru de cuartos de final frente a Arthur Rinderknech. El francés llevóse’l duelu galu de la xornada énte Constant Lestienne 6-4 6-2 nel únicu partíu d’individuales xugáu na Pista 1.
