La Conseyería de Mediu Rural y Política Agraria presentó a Comiḷḷón, la nueva mascota d’Alimentos del Paraísu Natural, nun actu celebráu na Feria Internacional de Muestres d’Asturies (Fidma). El nuevu personaxe ta inspiráu nun gallu montés, una de les especies más representatives de la fauna asturiana, viste un mandil cola imaxe d’esta marca de calidá y lleva una cesta con diferentes productos acordes con cada actividá concreta.
El conteníu d’esta cesta va poder modificase y adaptase a la temática de cada feria, presentación, certame o actividá promocional, lo que va dexar representar la variedá y riqueza del sector agroalimentariu asturianu.
El nome escoyíu, Comiḷḷón, incorpora la ḷḷ o che vaqueira, una de les traces más característiques de les variedaes llingüístiques del occidente asturianu, y significa comilón o famión. La denominación refuerza’l calter gastronómicu y cercanu de la mascota y la so vinculación colos productos de calidá d’Asturies.
La creación de Comiḷḷón va dexar disponer d’una figura reconocible p’acompañar les campañes y actividaes d’Alimentos del Paraísu Natural y averar la marca al conxuntu de la ciudadanía, especialmente al públicu infantil y familiar.
La mascota va participar en feries, mercaos, certames gastronómicos, presentaciones de productos y otres acciones de promoción desenvueltes dientro y fora de la comunidá. El so diseñu va dexar, amás, adaptar los productos y elementos que la acompañen a los diferentes sectores o temátiques presentes en cada eventu.
