“Retratos con animales (1865-1977) Racionales ya ¿irracionales?” ye’l títulu d’una esposición entamada nel CCAI de Xixón pol Muséu del Pueblu d’Asturies y el Muséu Nacional d’Antropoloxía de Madrid. L’amuesa ta fecha con 125 semeyes, dellos oxetos como cepos, xugos, carranques o fisgues y un videu de 10 minutos. Distribúise en cinco estayes: Xente menudo y animales, unu más na familia, l’animal enemigu, compañeros de trabayu y animales pal sustentu humanu. La esposición, con fondos del Muséu del Pueblu d’Asturies fala de la xunión de persones y animales recoyida dende parte’l sieglu XIX a parte’l XX. Compañeros a lo llargo de la Hestoria dende les pintures rupestres a les metáfores nel llinguaxe, dependíase d’ellos p’alimentase o vistise, pal trabayu o’l tresporte. Dellos usos finaron pero otros garren puxu, como los animales de compaña.
El guía desplica que nun predominaben les vaques, que teníen nome como los perros, de trabayu, de caza o de compaña, sinón que yeren les oveyes. L’osu nuna semeya apaez como un familiar más. El gochu p’alimentase, matábase per Samartín, una vegada al añu. Yera una cosa de la muyer, l’home solo intervenía na matanza, y llueu la muyer facía’l restu. La caza deportiva solo yera pa les clases pudientes, hasta’l sieglu XX. Perros trataos como’l restu familiares hebo siempres. Les vaques yeren los tótems asturianos. Pero nun se bebía lleche hasta entráu’l sieglu XX, nel qu’hebo un cambéu porque les vaques yeren el 40% del ganáu namás. Yeren pa trabayar, fundamentalmente. Los caballos pa les clases altes. Burros y mules pal pueblu, que cabalgaba ensin estribos.
Convivíase ente toos, como acreiten les imáxenes. Les semeyes úsense como sistema etnográficu pa ver la forma de vida de dómines pasaes. Nesi sen, el Muséu del Pueblu d’Asturies caltién un archivu d’al rodiu los 2,5 millones de semeyes.
Intervieno na esbilla de la exposición el Muséu Nacional d’Antropoloxía que la espunxo primero en Madrid, enantes de completase na de Xixón. En Xixón, entamó’l 24 d’ochobre de 2023 y finará’l 28 xineru del 2024. Amás dellos díes hai visites guiaes pol guía del Muséu del Pueblu d’Asturies, que describe con fondura la interpretación de les imáxenes más relavantes nel tiempu d’anguaño. Los rótulos bilingües castellanu /asturianu afiten la normalización llingüística que da fuercia a la coleición.
La xunión d’animales y humanos yera un venceyu potente, aportando a ser seres de la familia en dellos casos y una convivencia na natura en dellos otros. Amestando sentimientos y actitúes de los humanos col posar del tiempu. Asina yera l’Asturies que precedió al mundiu d’anguaño.
D’ello podemos recuperar l’averamientu de la sociedá colos animales, los xabaces n’especial. Torgando d’esta miente l’alloñamientu ente lo urbano y lo rural. Como asocedió dende na tradición nos cuentos y lleendes nos que podíen falase ente ellos.
