El futuru Plan Director de la Cultura Castreña d’Asturies, que recueye un paquete d’actuaciones pa estos xacimientos y prevé la ellaboración d’un atles con información detallada sobre caún, va presentase al Conseyu de Patrimoniu Cultural pa la so aprobación antes de fin d’añu. Asina lo anunció güei la conseyera de Cultura, Berta Piñán, na Xunta Xeneral, onde destacó la complexidá del procesu d’ellaboración d’esti documentu pola amplitú del fenómenu n’Asturies, onde s’identificaron yá camín de los 270 poblaos.
“La redacción d’un plan director pa xacimientos castreños preséntase como la solución la cuenta pa repasar l’estáu actual d’esta categoría singular del nuestru patrimoniu cultural, valorando la so evolución desque caún foi reconocíu y determinando les actuaciones más convenientes en cada casu”, esplicó Piñán.
Personal técnico del Muséu Arqueolóxicu d’Asturies foi l’encargáu d’ellaborar, a lo llargo d’anguaño, el primer plan director, que se concibe como un documentu de xestión y incluye un apartáu sobre la historia de la investigación nesti ámbitu, con una valoración de les iniciatives desenvueltes nes últimes décades. Ente estes actuaciones, la conseyera mentó les impulsaes pol Parque Arqueolóxicu-Natural de La Campa Torres de Xixón, los planes arqueolóxicos de la cuenca del Navia o del xacimientu d’Os Castros, en Taramundi, y les investigaciones sobre los proyectos de Castella, Beriso, La Campa Torres, La Punta Muyeres o Antrialgo.
Esti documentu, el primeru d’estes característiques ellaboráu n’Asturies, recueye tamién un análisis de les amenaces pal caltenimientu del patrimoniu castreñu, rellacionaes tanto col so réxime de propiedá como colos usos del suelu, los espolios de bienes arqueolóxicos vinculaos al usu de detectores de metal o la exhumación d’estructures que se caltienen espuestes dende’l so descubrimientu, ensin midíes concretes de salvaguarda.
“Un problema especial que ye oxetu d’un análisis particularizáu ye’l de los castros amenazaos pola dinámica marina o por argayos de resultes de desmontes masivos de lladera. Tamién la promoción turística inapropiada o la catalogación duldosa de dellos recintos supuestamente castreños se traten nesti plan director”, indicó la titular de Cultura.
Actualización del inventariu arqueolóxicu
El documentu parte de los estudios singulares realizaos en dellos xacimientos castreños y recueye una partida de propuestes xenériques d’actuación que se resumen na necesidá d’actualizar l’inventariu arqueolóxicu de los recintos castreños; la verificación de los xacimientos col usu de tecnoloxíes nueves como la teledetección, siguida d’intervenciones arqueolóxiques d’urxencia que confirmen o refuguen la identificación d’un sitiu como xacimientu castreñu; programes d’adquisición de terrén y afitamientu de murueques; midíes relatives a la recuperación de materiales y la ellaboración d’un inventariu de fondos con procedencia castreña nel Muséu Arqueolóxicu d’Asturies y d’un atles, desque se revise l’inventariu. Esti atles concíbese como repositoriu xeneral, d’accesu llibre, con información detallada de cada xacimientu y documentación rellacionao.
Nesti sentíu, la conseyera punxo en valor la adopción recién de técniques de teledetección que dexen reconocer recintos inéditos, como los castros de Llanera, Somiedu y Sotu’l Barcu, identificaos nel 2020 y 2021, y que’l Conseyu de Patrimoniu Cultural alcordó incluyir nel Inventariu de Patrimoniu Cultural la selmana pasada.
Piñán incidió tamién na importancia de cuntar con un documentu como’l plan director que, al empar, propón la ellaboración de proyectos específicos pa los conxuntos castreños más relevantes, nos que yá se trabaya anguaño.
“La cultura castreña asturiana ye un ámbitu de la nuestra cultura que ta n’estudiu permanente”, aseguró la conseyera, quien repasó les acciones llevaes a cabu nesti últimu añu, como l’autorización de llabores d’investigación en dellos xacimientos qu’ameyoren el conocimientu científicu. Esti ye’l casu de los castros de Castiel-Puntamuyeres, en Valdés, y del d’Antrialgo (Piloña). Piñán refirióse igualmente al vistu bonu al plan integral d’investigación y meyora física del castru de La Campa Torres, en Xixón.
