El Parque Isabel La Católica escuende dende l’añu 1955, y entemecíu cola so fauna y flora, un monumentu bien curiosu: el primer monumentu del mundu dedicáu al descubridor de la penicilina, el doctor Alexander Fleming. Una construcción que ye obra del arquitectu Luis Moya.
Pa remontase al so gran descubrimientu, ha volvese p’atras nel tiempu. El 28 de setiembre de 1928, taba realizando dellos esperimentos nel so llaboratoriu y el día 22, al inspeccionar los sos cultivos antes de destruyilos notó que la colonia d’un hongu creciera, como un contaminante, nuna de les plaques de Petri semaes con Staphylococcus aureus. Fleming reparó más tarde les plaques y comprobó que les colonies bacterianes que s’atopaben alredor del hongu (más tarde identificáu como Penicillium notatum) yeren tresparentes por cuenta de una lisis bacteriana. Pa ser más esactos, Penicillium ye un moho que produz una sustanza natural con efectos antibacterianos: la penicilina. La lisis significaba la muerte de les bacteries, y nel so casu, la de les bacteries patóxenes (Staphylococcus aureus) crecíes na placa. Anque él reconoció darréu la trescendencia d’esti afayu los sos colegues lo subestimaron. Fleming comunicó’l so descubrimientu sobre la penicilina nel British Journal of Esperimental Pathology en 1929.
Fleming trabayó col hongu mientres un tiempu pero’l llogru y purificación de la penicilina a partir de los cultivos de Penicillium notatum resultaron difíciles y más apropiaos pa los químicos. La comunidá científica creyó que la penicilina solo sería útil pa tratar infecciones banales y poro nun-y emprestó atención.
Sicasí, l’antibióticu espertó l’interés de los investigadores estadounidenses mientres la Segunda Guerra Mundial, quien intentaben emular a la medicina militar alemana. Fleming nun patentó’l so descubrimientu creyendo qu’asina sería más fácil l’espardimientu d’un antibióticu necesariu pal tratamientu de les numberoses infecciones qu’azotaben a la población.
Por esti afayu, l’ayuntamientu decidió dedicá-y un monumentu. El mesmu Fleming diba venir a Xixón pa conocer la so estatua, pero morrió en marzu de 1955 y foi la so esposa lady Amalia la que visitó’l monumentu na inauguración en setiembre d’esi mesmu añu. Paez que, naquella dómina, la tuberculosis facía estragos n’Asturies y la penicilina salvó munches vides. Poro, tolos años, los vecinos del barriu de Cimavilla avérense mientres la fiesta, en setiembre, hasta la so estatua pa realizar una ufrienda floral.
