El Muro entama la so tresformación

El Conceyu empecipia esti miércoles les obres de peatonalización de la redolada a la sablera de San Llorienzo

0
244
Pieslla un carril d'El Muro
La Policía Local zarró esta mañana el carril más próximu al paséu.

El Muro entama’l so tresformamientu definitivu. El Conceyu empecipia esti miércoles les obres de peatonalización de la redolada a la sablera de San Llorienzo. Los trabayos van traer la supresión definitiva de dos carriles de circulación, que van pasar agora a ser ocupaos polos peatones. Tamién va haber cambeos nel carril bici, que se va treslladar al otru llau de la mediana. Esta actuación pretende garantizar el distanciamientu social esixíu pa prevenir el riesgu d’andada pola Covid-19.

El carril de circulación del paséu dende l’avenida de Castiella hasta los Xardinos del Naútico, tramu que yá permanez zarráu al tráficu, va siguir siendo peatonal. Eso sí, va modificase’l trazáu del carril bici esistente y va proyectase del otru llau de la mediana. Pa cumplir colos criterios d’accesibilidá, va baltase parte de la cera esistente nos puntos onde nun esiste barrera vexetal. D’esta manera, garantizase la continuidá ya integridá ente los dos nuevos espacios peatonales. El proyectu contempla l’aplicación de pintures acríliques que va venceyar dambes intervenciones y que ye reversible en casu de que fuera necesariu. Les obres, que fueron axudicaes a la empresa Bienes y Obres del Principado S.A. por 229.797,15euros, van realizar nun mes y una selmana.

Corredor peatonal

L’actuación inclúi la execución del anunciáu corredor peatonal dende’l Paséu de Begoña hasta la mesma sablera. Trescurre peles cais Cuadonga, peatonalizada dende esti martes, Ruiz Gómez y Caridá, creando siempres un itinerariu accesible en tolos sos puntos y con pasos de peatones de gran tamañu.

La tresformación d’El Muro de San Llorienzo entamó cola desescalada. El Conceyu de Xixón peslló a finales d’abril unu de los carriles de circulación pa facilitar el so usu per parte de los peatones. Mes y mediu más tarde, zarróse un segundu carril, que significaría l’entamu «d’un nuevo modelu de ciudá», tal y como lo definió’l conceyal de Movilidá, Aurelio Martín. Foi nesti momentu cuando s’entamó a planificar la reforma qu’agora entama. El Conceyu esplica que se trata d’una intervención mínima d’emerxencia pa garantizar la distancia ente peatones. D’esta manera quier amenorgase’l riesgu d’andaes en llugares públicos con gran concentración de persones.