La llingua asturiana volvió a nun tar presente esti añu nel discursu del xefe del Estáu, el Rei Felipe VI. Iniciativa pol Asturianu reclama la presencia del asturianu dientro d’esti mensaxe nel que sí apaecen el restu de llingües oficiales d’España. Nesi sen, la organización apunta que ‘ye conveniente recordar qu’anque la llingua asturiana entá nun seya oficial ta reconocida nel Estatutu d’Autonomía del Principáu d’Asturies; la propia Constitución Española, nel so artículu 3, reconoz que la riqueza de les distintes modalidaes llingüístiques d’España ye un patrimoniu cultural que será oxetu d’especial respetu y protección’.
El papel visibilizador y normalizador que tendría pal idioma la presencia nesti mensaxe afita esta reclamación de la inclusión d’esi saludu n’asturianu, en condiciones d’igualdá col restu de llingües del Estáu.
Iniciativa pol Asturianu solicita al xefe del Estáu qu’amuese respetu por toles llingües d’España, independientemente del so estatus llegal, «yá que los y les asturianes tenemos el mesmu drechu a que la nuesa llingua apaeza xunto a les demás nes pallabres del cabezaleru del Estáu al que pertenecemos».
