El cine d’esti matrimoniu de cineastes dublineses afincáu en Londres dende finales de los años 80, gravita en toles sos formes (yá seya a manera de ficción o d’ensayu fílmicu), al rodiu de los conceptos d’identidá. La pareya de cineastes desendolquenlo con maestría na heteroxeneidá del xéneru y de la estructura ensin perder nunca de vista eses exes centrales sobre los que constrúi la so obra. Agora, nel FICX, presenten Baltimore, la hestoria de la inglesa Rose Dugdale, de la que se pue falar muncho.
- ¿D’ónde vien la idea de Baltimore?
La idea vieno de otra película que tábemos faciendo. De xemes en cuando atopes idees de la to próxima película n’obres anteriores. Asina qu’esta película vien de The future tense, un documental sobre una muyer de Devon, n’Inglaterra, qu’aportó a Irlanda y formó parte de la llucha nes casi. Tabemos plasmaos col documental que tábemos faciendo y pensamos: “esto podría ser una película de ficción interesante”. Empecipiemos a escribir el guion al mesmu tiempo que facíemos el documental y nos sentíemos fuertes con ello, asina que, después, fiximos la película, de manera que’l documental y la futura película fueren feches, mas o menos, al mesmu tiempu.
Supongo que ye bono reciclar, porque reciclar idees ye mirar p’atrás pa facer películes, porque, a vegaes nun resuelves idees complicaes. Dices: “creo que podría dicir más sobre esti suxetu”. El documental y la película son mui diferentes, por supuestu, pero la idea surdió del documental.
- ¿Cómo ta siendo recibida Baltimore?
Tuviemos la suerte de tener la premiere de Baltimore nel festival americanu Telluride Film Festival, un festival pequeñu nel que namás proyecten 50 o 60 películes, pero ye una gran plataforma, un bon llanzamientu pa una película y un festival con historia al que va munche xente qu’ama’l cine.Fuimos mui afortunaos de tener esa premiere mundial.
D’otra manera, tamién proyectamos nel London Film Festival na so competición principal. La reacción del públicu foi perbona y tamos mui agradecíos. Cuando imaxines como conectará’l públicu cola obra y después que ye como pensaras, ye un mui bon sentimiento y pienso na protagonista y que la so historia ye fascinante.
Amás, fuimos mui afortunaos de tener una actriz brillante nel so papel, Imogen Poots. Creo que-y da fuerza al papel. Veremos como responde la xente equí, en Xixón y como conecta cola película.
- ¿Por qué cuntar la hestoria de Rose Dugdale?
Nunca fixéramos una película basada nun personaxe real. Toles nueses hestories tán feches con personaxes que nós creamos. Rose Dugdale ye una persona real y hai delles razones poles que nos interesamos nella. Rose Dugdale venía d’un ambiente mui privilexáu n’Inglaterra, de familia adinerada y de clase alta. Sicasí, dende moza yera como un pez fuera del agua, dalguién que taba fuera de llugar y quería buscar daqué a lo que pertenecer.
Nun yera infeliz, simplemente nun sentía que no taba viviendo lo que debería vivir y que nun pertenecía a eso. Y lo que fixo foi buscar esi llugar al que pertenecía, que fue lo que nos interesó, porque fixéramos películes que falen de xente que tán buscando un llugar al que pertenecer. Rose Dugdale taba nesi viaxe llocu y aportó al IRA n’Irlanda.
De xuru que la xente recuerda la llucha nes casi n’Irlanda del Norte, particularmente nos 70s y 80s, cuando les coses yeren más violentes y caótiques. Creo que lo más interesante yera la psicoloxía de la protagonista: ¿por qué? ¿cómo acabó ehí? ¿Cómo una muyer de clase alta inglesa llega a formar parte del IRA, robar obres d’arte y ser perseguida pola policía? Ye una historia lloca, pero creo que diz muncho de nós, d’esi periodu de la historia d’Irlanda nel que tamos mui interesaos.
La razón de facer esta película ye la de mirar a la idea de rabia que deberíes sentir nesta situación social, política y económica y como afectó a la xente espiritual y emocionalmente y la so radicalización.
Vémoslo n’Arxentina coles elecciones, onde muncha xente frustrao votó a dalguién mui inestable, estremu. Tamién lo vemos nel Reinu Xuníu y en dellos países d’Europa. Nel activismu tamién. Creo qu’esta rabia pue medrar y llegar a un puntu de violencia y neso tábemos interesaos. Cuando la to rabia podría ser positiva y constructiva y después llega el momentu nel que la mente cambia ye una de les coses nes que tábemos conectando la so hestoria col mundo actual.
- ¿Qué créeis que cambió na Irlanda actual respecto a la de Rose Dugdale?
Cambiaron munches coses y foi un momentu de la hestoria recién d’Irlanda bastante turbulenta. La xente usó la violencia y pa dalgunes persones foi más qu’eso. La violencia nun ye una vía de negociación o debate, ye violencia hasta que consigan lo que quieren.
Creo que camudó’l paisaxe n’Irlanda del Norte, anque muncha xente siente que nun ta del too resuelto y sigue habiendo muncho dolor y feríes nel país. Creo que llevará xeneracione y si mires a la xente de dambos países necesites que la paz se caltenga porque foi duru. De xemes en cuando pienso no que ta pasando agora en Gaza y siento un llargu camín a la paz y creo que tamos yendo a peor. Hai un sentimientu nel que nun vahaber solución y toos habríemos dir na dirección contraria.
N’Irlanda creo qu’hebo tiempos nos que se sentía d’esta manera, con atentaos, disparos, bombes onde morría xente inocente. Sicasí, llegó un puntu nos años 90 nel que la paz s’aceptó. Precisamos ser conscientes d’ello y mirar p’alantre.
- La hestoria de munchos de los militantes del IRA ye digna de película. ¿Habrá más hestories como esta en futures producciones?
Fixéronse delles películes sobre l’IRA a lo llargo de los años, asina qu’hai películes clásiques sobre esos tiempos turbulentos inclusive enantes del entamu del problema y después. Ye una domina mui sensible onde a vegaes se cuenten hestories falses que son polítiques y provocatives y ye parte de la nuesa experiencia que precisen ser esploraes. Ye divertío. Les coses son como les foles, los intereses vienen y van y creo qu’hai más hestories n’Irlanda del Norte que precisen cuntase.La nuesa historia sobre Rose Dugdale ye más una historia sobre ella y lo que-y pasó pa ser miembru del IRA ye parte de la so historia y yera no que tábemos interesaos.
La obra ye consecuencia d’onde nacimos, n’Irlanda, mui pronto d’Irlanda del Norte y Belfast, asina que crecimos colos problemes na frontera. Si naciera en Belfast, les nueses vides sedríen diferentes. Hai una serie d’accidentes que lo provoquen, si naciéremos en Gaza nos años 90 sedría tamién mui diferente y agora mesmo taríemos arrodiaos de violencia, ye un fechu. Pero Rose Dugdale fixo una decisión consciente, xuniéndose al IRA por convicciones personales, faciendo que la so historia sea chocante ya inusual, que foi lo que nos interesó.
Tamos trabayando nun proyectu que tiene conexón, pero nun ye lo mesmo. Ye sobre la resistencia, dos muyeres que son amantes mientres la Segunda Guerra Mundial. Nun ye lo mesmo que con Rose Dugdale, pero hai conexón ente les hestories. Vinimos trabayando nesti proyectu los postreros años y seguiremos nello. A vegaes funciona asina, tamos con idees por años, pero estos dos proyectos tienen una conexón fuerte.
- Amás d’esta película, proyéctense otres cinco de la vuesa trayectoria. ¿Qué supón esto pa vós?
Ye un honor tar equí y tener toles nueses películes en proyección nel festival. Personalmente, prestaría sentame y ver toes nel orde nel que les fiximos, porque ye una cosa que nunca fixi como directora. Faes les obres, refugues d’elles por años y pases a la siguiente película, asina que ye mui bono ver toles películes nel FICX.
Aguardo que, si la xente ve más d’una película, entienda como se estienden de maneras diferentes nes obres. Tamos mui agradecíos de tener esti sofitu.
- ¿Pa ónde s’encaminen los proyectos de Christine Molloy y Joe Lawlor?
Hai otru proyectu que tuvimos escribiendo, volviendo a les idees de la película “Helen”, pero de manera mui diferente, asina que va ser una película mui diferente. Ye como cuando namás cocines siempre colos mesmos ingredientes, nes nueses películes imaxinamos les mesmes idees pero de manera distinta y ye lo que tamos faciendo.
Tamos faciendo otra versión de la nuesa primer película, “Helen”, reimaxinando, non volviendo a facela. Vimos equí “Last Summer”, un remake d’una película danesa que se llama “Queen of hearts” y pienses: “que llocura garrar una película y facer un remake”, pero son películes completamente diferentes.
Queremos volver a la nuesa primer película y facer un remake, porque creo que tenemos muncho más pa esplorar. Yera una película fecha con producción pequeña, de namás 87 minutos en 14 díes y ensin actores y sentimos que pue espandise, asina que tamos trabayando nello.
