- 40 años enriba de los escenarios de Luar na Lubre y 20 trabayos. ¿Qué balance facéis?
Si miramos p’atrás, el balance que facemos ye positivu, con munchu tiempo pasáu. Sobre too, con positivu refiérome a que, dientro de la música, aguantar 40 años ye bien difícil con una trayectoria na que nun hebo ningún descansu. Foi una trayectoria continua dende que se creó’l grupu nel añu 1976. Caltenese na música 40 años… el balance nun pue ser más que positivu, más aínda si tenemos en cuenta que falamos d’un tipu de música que nun tiene la cobertoria nin infraestructura empresarial que sí tienen otras.
- Trabayastis con numberosos y reconocíos artistes, como Pablo Milanés, Víctor Manuel, Miguel Rios o Mike Oldfield. ¿Qué coses estrayéis d’estes perguapes colaboraciones?
Les colaboraciones son mui humanes. Siempre procuramos que tuvieren un sentíu. Tola xente que trabayó con nós, que son munchos, son xente que tienen pa nós un significáu especial. Independientemente de la parte artística fecha pa una colaboración puntual, estrayemos la cuestión humana y sentimental, de poder tar faciendo algo xunto con xente a la qu’almires, aprecies y valores. Nesi sen, yo creo que llevamos la cuestión humana y la relación que caltenemos con caún d’ellos, que ye lo más importante.
- Con Encrucillada vuelven los temes más emblemáticos de la banda con un homenaxe a la trayectoria. ¿Qué sorpresas podemos alcontrar nesti trabayu?
La primera sorpresa d’Encrucillada ye que ye un llibru-discu, un formato nel qu’editamos per primer vez. Ye’l nuesu trabayu númberu 20. Lo que quiximos facer foi daqué conmemorativu, un númberu tan redondu como’l 20 tenía que tener una conmemoración y, al mesmu tiempu, el so nome nun ye casualidá, sinón que ta puestu d’una manera mui significativa y simbólica. El venti en númberos romanos son dos X, les encrucilladas, cuando dos o dellos caminos s’axunten.
Nesti casu, ye un alcuentru con muncha xente que pasó por Luar na Lubre, fundamentalmente vocalistas que pasaron pel grupu dende los entamos del grupu, que vuelven alcontrase nesti Encrucillada, colaborando, faciendo coses en común. Nesti sen, la encrucillada ye esti alcuentru nuevu con toes estes xentes que tienen un significáu especial pa nós, pero tamién más colaboradores, como Pablo Milanés.
Una de los últimes cantares que Pablo Milanés grabó en vida foi un encargu que nos fixo a nós, el quería que fixeremos un tema dende la nuesa perspectiva dedicáu al Camín de Santiago y a la so compañera de vida nestos postreros años, Nancy Pérez, que ye de la provincia de A Coruña. Él decía que yera un cantar que taba compuesta dende una clave celta, anque él llamaba esto a la inspiración de Dire Straits. Esto tiene sentíu tamién porque ellos tán mui venceyaos coles músiques d’Irlanda ya Escocia. Poro, dende la mentalidá d’un cubanu, sonaría-y muncho a música celta, aínda qu’a nós nos suene a pop o a rock.
Esi cantar ta ehí, pero como munches otres. Hai más de 150 músicos, pero tamién hai que tener en cuenta que ye un trabayu recopilatoriu, nun ye un trabayu fechu nuevu, anque munchos d’esos temes son temes emblemáticos, tan regrabaos, repensaos, remasterizaos, pero respetando la estructura orixinal, con un matiz nuevu. Ye una combinación d’eses músiques nuestres coles de les colaboraciones, esi puntu d’encrucillada.
D’otra banda, el llibru, onde facemos una especie de cronoloxía de los nuesos 37 años d’historia mui resumida, con más de 50 colaboradores nesti trabayu con testos pequeños mui entrañables referíos a la so relación con Luar na Lubre. Xente de la cultura, de la música, del periodismo… delles estayes nes que tamién hai asturianos. Podemos topanos con Lisardo Lombardía, Inaciu Llope, José Lompeña… Hai delles persones asturianes que participen nél.
Depués, ta l’otru puntu de la encrucillada, que ye’l de tomar decisiones. Ye un momentu de tomar decisiones y probablemente seya l’últimu trabayu en formato físicu que faigamos. Tamos entrando nuna dómina nueva na qu’esto desapaez, la dómina de lo dixital y les plataformes y tenemos qu’adaptanos a les circunstancies que requieren los tiempos nuevos.
- Dende va unos años, la cultura tradicional gallega ta espoxigando en diferentes versiones dientro de la música. ¿Cómo afronta esto una banda con tanto camín andao y tan llonxanos de los vuesos ritmos?
No diría tan alloñanos d’esta música. Too esto salió va munchu tiempu en Galiza, otra cosa ye que tuviera l’impactu que ta teniendo nestos intres. La combinación de la música tradicional cola lletrónica se lleva faciendo en Galiza dende los años 70. Hebo bandes que fixeron experimentos mui interesantes que nun remataron cuayando. Probablemente los primeros fueren Son Lalín, cola Muñeira de Chantada que sonaba en toles discoteques, pero hebo munchos proyectos.
Anguaño, sí hai más porque la tendencia ye esta y ta perbién, creo que tiene qu’haber música en toles estayes pa que la xente pueda escoyer y decidir lo que-yos gusta. Yo nun diría que teamos tán alloñaos, porque los nuesos trabayos, concretamente en Encrucillada, hai una Cantiga de Santa María que yá grabaremos nel so momentu cola Orquesta Sinfónica de Bratislava y que retocamos pa O Gran Camiño en 2023 y que volvimos a retocar en clave progresiva y qu’encaxa perfectamente nesta estética de música lletrónica en combinación cola música, nesti casu medieval pero que podría ser perfectamente tradicional.
Nós valorámoslo mui positivamente, nós nun facemos tampoco música tradicional, facemos música que s’inspira no tradicional, pero les nueses músiques son mui vanguardistes nel sentíu de que’l folk ye un estilu relativamente recién, nun tamos falando de la tradición pura, aparecen elementos que se combinen cola modernidá. Tenemos eses músiques de raigañu que son fundamentales y vitales, pero hai munches pincelaes a otros estilos.
- Asturies comparte muncho con Galiza, ¿con que momento nestes tierres vos quedáis?
Hai tantos momentos bonos… Ye mui difícil quedase con ún. Nós tuvimos momentos de gloria n’Asturies, por casu, nes nueches celtes en Porcía, Uviéu, San Llorienzo en Xixón, nel Xovellanos, na Llaboral… Percorrimos Asturies d’un llau al otru y siempre mui bien. Considero que somos dos pueblos hermanos, con más coses que nos xunen de les que nos separen y siempre que tornamos a Asturies ye como si tuviéremos na nuesa propia casa.
Siempre hai un gran recuerdu y particularmente yo, que soi’l más veteranu y tengo mui bona relación con xente de la música d’Asturies y de fuera de la música, poro, dir ye sentise perfectamente cómodu y arrodiáu d’una cultura y una forma de ser que, a la fin, nun dexa de ser la de mio.
- Escontra munches opiniones, llográis l’ésitu na vuestra propia llingua. ¿Qué-y diríeis a los que día tres día llancen mensaxes d’odiu por usar la so llingua materna?
Nun hai muncho que dicir. Lo que tienen que facer ye estudiar, lleer, entender que nun ye namás una vía, qu’hai munches víes, vivimos nun país plurillingüísticu con munches personalidaes y característiques qu’hai qu’aprender a entendeles y convivir con elles. Eso conforma un llugar que se llama España y hai qu’entendela dende la óptica de la pluralidá y el que nun seya quién a entender esto… lo único dici-y qu’estudie y lea, porque ye la única manera de que les mentes puedan abrise y entender eses diferencies que nos faen más bayurosos, ye onde ta la gran bayura d’un pueblu.
Son coses bastante inconcebibles n’otros llugares del mundo onde esiste está diversidá aceptada y valoraday, aquí, choca. Vivimos nesti puntu de confrontación dende siempre y hai que intentar convivir con ello y, na midida de les posibilidaes, esplicar les coses nes zones d’influencia de caún y empezar a cambiar les mentalidaes. Quien nun tea dispuestu a cambiala, nun la va cambiar nunca.
Aquí en Galiza hai un retrocesu grande del idioma, pero nun hai esa belixerancia cola nuesa llingua como puede haber n’Asturies col asturianu. Más o menos el gallegu ye una llingua normalizada, magar de que habría muncho que falar d’ello.
- Hai camín pa siguir trabayando en Luar na Lubre después de 40 años?
Sí, estes coses son inagotables. Dices ¿y agora que facemos? Y hai que siguir. Nós tenemos la ventaya de que tenemos munches pistes por recoyer. Tamos nuna encrucillada, pero de munchos caminos, hai muncho per onde dir y tenemos una llírica medieval de les más bayuroses d’Europa y que ye importante na parte de les lletres y de la música.
La música tradicional, afortunadamente, como tamién n’Asturies, sigue viva entá. Puedes dir a cualesquier aldea y recoyer música non recoyida. Ye una bayura porque la tradición oral llegó a los nuesos díes y tienes otru pozu del que sacar y, depués, los conocimientos qu’hai na banda, a lo meyor componiendo dende l’actualidá pero xirando al rodiu de toes eses músiques y faciendo arreglos pensaos dende los estilos más modernos, non fusionar, pero sí dar pincelaes que son enriquecedores y hai muncho per onde caminar.
Lo cierto ye que yá tamos pensando nel siguiente trabayu, esti nun dexa de ser un recopilatoriu, pero ya tamos dando-y vueltes a lo que va ser el proyectu nuevu, que si nun hai novedaes, saldrá a finales del siguiente año 2024. Ye la nuesa dinámica, 20 trabayos en 37 años con dalgún recopilatoriu, pero que tampoco son estáticos, y con una media d’un discu cada dos años. Corresponde sacar agora un trabayu nuevu, sobremanera porque esti últimu nun dexa de ser un trabayu conmemorativu, pero’l nuevu yá ta en xestación y nunca falten idees. Habiendo enerxíes bones dientro del grupu y gana de facer y sobre too, qu’hai un públicu detrás que tae hí y que t’avala y caltién un proyectu d’esti tipu, tiraremos.
