A naide se-y escapa que’l prerrománicu asturianu ye una de les ayalgues del patrimoniu históricu y la cultura d’Asturies. Santa María del Naranco, Santianes o Samiguel de Liño son dalgunes de les construcciones que bien exemplifiquen esto. Sicasí, la so visita nun yera mui afayadiza, o asina lo vieron dende la so esperiencia personal en Nimby, la empresa que ta acabante d’anunciar una nueva app qu’avere los monumentos asturianos al visitante n’asturianu y n’inglés al traviés de la gamificación.
La idea de Prerrománicapp surde de la necesidad de tener elementos del patrimoniu cultural vinculaos cola tecnoloxía. Desenvolver una aplicación que tenga información sobre estos lugares pa dar visibilidá lo que tenemos n’Asturies foi la solución qu’Hector Lasheras pensó y nun duldó en ponela en marcha con la inclusión nesti proyectu de los primeros 10 monumentos prerrománicos. Sicasí, la intención ye que se desenvuelva a mayor escala con tolos elementos del perrománicu, aplicando inclusive realidá aumentada y que, dende’l propiu teléfonu móvil, pueda vese una reproducción del monumentu en 3D fecha con fotogrametría. El so oxetivu ye que tenga un caracter divulgativu y lúdicu, y que’l públicu tenga una guía pa consultar nel momentu de la visita, dándo-y una versión gamificada nel que la persona sea partícipe de lo que ta visitando. Pa ello, la aplicación fai un pequeñu percorríu a mou de trivial pelos diferentes monumentos.
L’equipu de trabayu que s’encargó de desendolcar esti proyectu ye multidisciplinar y ye ehí onde reside la bayura de too ello. Amás del trabayu informáticu y de diseñu, collaboraron historiadores del arte espertos na materia que-y dan rigor al interesante trabayu. D’una banda, la escritura y traducción de los testos corrió al cargu de Begoña Torre Miguel, doctora n’Hestoria del arte pola Universidá d’Uviéu. Per otra parte, Lorenzo Arias Páramo, profesor de la Universidá d’Uviéu y mayor especialista del prerrománicu asturianu, cedió les semeyes.
El proyectu de Prerrománicapp ye una iniciativa de Nimby que naz a entamos de 2022 y que cunta col sofitu de la Viceconseyería de Cultura, Política Llingüística y Deporte na so primer fase. Esperen, tamién, la collaboración de los conceyos que cunten con patrimoniu prerrománicu. D’esta manera, los sos creadores confíen na bona utilidá de la aplicación na difusión de la bayura patrimonial qu’esiste n’Asturies.
