La Escuela Técnica Superior d’Arquitectura d’A Coruña (ETSAC) incorpórase al comité de pilotaxe de la nueva economía pa l’aldega, el grupu de trabayu que coordina’l comisionáu pal Retu Demográficu, Jaime Izquierdo, pa ensayar la transición económica y ecolóxica d’estes entidaes de población hacia un modelu de futuru basáu nel emprendimientu social comuñal, la reactivación de la cultura y los recursos locales y l’integración de les nueves tecnoloxíes.
El comisionáu celebró apocayá una xunta en Galicia col director de la ETSAC, Plácido Lizancos, na que dambos alcordaron collaborar nesti espaciu de reflexón pa promover un cambéu de padigma de l’aldega con iniciatives que fomenten una nueva teoría socieconómica que xenere actividá y evite l’abandonu de les tierres, el despoblamientu y los riesgos ecolóxicos.
“L’aldega ye una especie territorial en peligru d’estinción, distinta de la ciudá y de la villa, qu’a lo llargo de la historia foi la responsable principal de la conformanza de los variaos agroecosistemas y paisaxes del mediu rural n’Asturies y Galicia y, por ello, la principal garante del caltenimientu de la naturaleza. D’ende la importancia de cuntar cola conocencia y la perspectiva de la ETSAC nel diseñu de les aldegues del futuru”, destacó Jaime Izquierdo.
Esta collaboración va sirvir tamién, bien especialmente, pa la formación de los alumnos d’Arquitectura nel so papel de futuros profesionales venceyaos a la construcción y reconstrucción de les aldegues y les sos hábitats paisaxísticos, mesmo qu’a la ordenación integral del territoriu.
El Gobiernu d’Asturies punxo en marcha’l pasáu mayu’l grupu de trabayu que busca la recuperación y apoyu de les aldegues p’afitales nel sieglu XXI. La iniciativa parte del convencimientu de que l’aldega ye una estructura territorial afayadiza que puede desenvolver una función esencial na xeneración d’actividá económica y sofitar una estructura demográfica más equilibrada. Pa llograr esti fin, son necesarios servicios ya infraestructures que llogren convertila nuna anovada unidá de producción.
El grupu de trabayu pa la nueva economía de l’aldega constitúyenlu, amás del comisionáu pal Retu Demográficu y la Fundación Centru Tecnolóxicu de la Información y la Comunicación (CTIC), al traviés del so Centru Tecnolóxicu RuralTech de Villaviciosa, representantes de cinco conseyeríes: Mediu Rural y Cohesión Territorial; Industria, Empléu y Promoción Económica; Facienda; Educación y Ciencia, Innovación y Universidá; amás de miembros de les comunidaes vecinales de Mual, Porrúa y Asiegu y de diverses entidaes collaboradores (Reader, Universidá d’Uviéu, Cetemas, GDR Altu Narcea-Muniel.los, Faen y la Fundación pal Fomentu de la Economía Social).
El comité de pilotaxe concíbese como estructura horizontal y entamada en rede, de forma que caún de los sos miembros realiza aportaciones en función de les sos competencies y capacidaes.
L’oxetivu final ye definir la transición de l’aldega actual a otra más propia del sieglu XXI que recupere’l so protagonismu como estructura xestora de agroecosistemes, biodiversidá y paisaxe ya incorpore oportunidaes por aciu el teletrabayu, nómades dixitales, artistes, nuevos pobladores, etcétera.
