Les parroquies de Arroes, Pion y Candanal (Villaviciosa) fueron galardonaes col Premiu al Pueblu Exemplar d’Asturies 2023, según fixo públicu güei n’Uviéu’l xuráu encargáu de la so concesión.
Arroes, Pion y Candanal son trés parroquies vecines asitiaes nel conceyu de Villaviciosa. Tán formaes por pequenu grupos de población tremaos que caltienen elementos que conformaron la so hestoria y la so tradición, según una economía basada n’actividaes
agroganaderes y agroalimentaries tradicionales, que güei combinen con otros sectores emerxentes. El valle de Pion (Pion y Candanal) cuenta na actualidá con 584 vecinos y Arroes con 445, y destaca el fechu de que dempués de la pandemia de la COVID-19 amontóse’l so censu de población un 11 %. Tán asitiaes nel suroeste del conceyu y comparten actividaes como la escolar –neños d’Arroes alleguen a la escuela rural infantil y primaria en Pion– o la vecinal, con asociaciones de vecinos que promueven la recuperación del patrimoniu común.
Na actualidá, tán implicaes nel Centru d’Intelixencia Territorial y Tecnoloxíes pal Mediu Rural (CTIC Ruraltech). La economía de Arroes y el valle de Pion-Candanal básase n’esplotaciones agrícoles de calter familiar dedicaes a la ganadería bovina de carne y, en menor midida, lleche. Estes esplotaciones tienen un papel económicu y tamién medioambiental, pos contribúin al caltenimientu d’importantes árees de praos que funcionen como «cortafueos» frente a posibles quemes forestales. La ganadería compleméntase con plantíos de pumaraes (unes tradicionales y otres nueves), que dexen l’actividá de trés destacaos llagares de sidra, y colos ingresos forestales apurríos pelos montes d’ocalitu y pinu.
Les trés parroquies caltienen xuna estrecha relación gracies a les sos dos asociaciones
vecinales: Valle de Pion-Candanal y Arroes. La primer cuenta con quinientos cuarenta socios y centra el so llabor en trabayos que redunden en beneficiu de la comunidá. L’Asociación de Vecinos Javier de Arroes, creada en 2014, tien doscientos cuarenta y cinco socios y entama actividaes lúdiques y formatives para los sos vecinos y pa la recuperación del patrimoniu local. Dambes asociaciones xuniéronse nun proyectu común en collaboración col CTIC Ruraltech para la recuperación de la cultura local y los saberes llabradores», onde tán presentes tanto neños como mayores. Gracies a ellos créase material multimedia (semeyes, vídeos, testimonios, testos…) que dixitalicen los mesmos vecinos na web creada pa tal fin pol CTIC Ruraltech. El proyectu cunta col legáu de la Fundación Ramón Álvarez de riba, que donó la finca onde s’allugaba la Escuela Práctica d’Agricultura (Pion), coincidiendo cola estinción de la citada fundación. El legáu da prioridá a que seyan los vecinos quien lideren el proyectu, creáu en 2019, y nel que trabaya un equipu estable de catorce persones d’alta cualificación.
Amás de la recuperación del patrimoniu local, ente les distintes actividaes de calter tecnolóxicu que desenvuelve destaquen una planta fotovoltaica pa usu compartíu d’enerxía, una rede de comunicaciones LORA, un mapa de riesgos paisaxísticos, un sistema de trazabilidá de la sidra en blockchain, un proyectu esperimental de telemedicina y un centru de sofitu al emprendimiento rural agroalimentariu en Candanal.
