Cumplir veinti años na música ye un llogru al alcance de mui pocos y MyStereo tán consiguiéndolo. Ensin más pretensión que facer lo que-yos gusta (y mui bien) la banda asturiana aconceyó esti vienres 5 pa dar un conciertu na Sala Tizón de la Cai Capua de Xixón.
Yera una tarde-nueche de lluvia, frío y la solombra d’una cabalgata de Reis que nun pudo ser como querríen les families. Los padres, ataviaos con bufandes y gorros invernales diben tres los neños con cara de “Nun te lo voi perdonar enxamás, lluvia”, mientres los guah.es corríen ensin mayor preocupación que la corona o los disfraces performativos qu’entamen a ser tendencia. La halloweenación de los rapacinos pa cualesquier celebración entama a ser un nuevo folklore que paez espeyar cada especativa familiar de felicidá.
Llegar al númberu 8 de Capua, ye llegar a un cruce de cais capitanéau pola Ciudadela Celestino Solar y el pasáu de les viviendes obreres de Xixón que miren de frente a los bares de la zona, caún col so paisanax y paisax peculiar y onde nunca se sabe qué puede deparar tres cruciar les sos puertes. Nesos requexos tal vez quede un Rambal baillando hasta l’alborada, quiciabes soñadores o los bonos amigos, como lo que se xuntaron esti pasáu vienres (el primeru del añu) pa ver a MyStereo.
La lluz de tenue de la sala entamó a garrar un color como de fueu cuando entamaron a sonar los primeros acordes de la banda, con un directu enerxizante, crudo, que cuando pisa
l’acelerador ye difícil de parar. Alejandro Fernández marcaba’l pasu d’una apisonadora al so ritmu dende’l minutu unu. “The Sentence is Death” o “Panic Attack” arrincaron la galbana que podía quedar a esa cabalgata pesada y pasada por agua, a la que nun se obligó a dir, por suerte a los dromedarios, pa desgracia del Xixón de terraza y Gin Tonic. Los temes de Panic entren como un disparu y fluyen con traces de metal, hard rock, grunge y resonancies a Alice In Chains o a los primeros Pearl Jam o Temple Of The Dog.
Según foi avanzando’l conciertu, les melodíes y los asistentes diben soltándose hasta facer a Adrián Muñiz, vocalista del grupu, desprendese de la camisa grunge pa quedar nuna camiseta que daba pie a les propuestes más coreables: “¿sabéis qué canción ye?” preguntaba irónicamente y “It Was Only a Kiss” fizo baillar a la inmensa minoría del Tizón que diba faciéndose más amplia col pasu del show. Si les resonancies anteriores diben más por esi aire noventeru, también hebo tiempu pa soníos más llimpios y cercanos a lo que pueden ser bandes como Wolfmother que Muñiz defendía como’l gran frontman que ye.
Nun dexaron tampoco de sonar cantares yá atemporales como “Yesterday is Not Today” más pop y cercanos a soníos también más del rock de los 2000. Les guitarres y baxos sonaben al empar y too encaxaba amestándose perfectamente nun ambiente familiar, tranquilu, de camaradería pa rematar nos bis con “Helicopter Blues” y caltener viviu l’espíritu del Xixón anterior a los muffins, arguyosu de ser underground y periferia. Por si acabamos por convertinos nun parque temáticu o nuna suerte de perfomance continúa, qu’al menos queden reductos como los que xenera MyStereo pa facenos despertar. A por otros veinte años irremediablemente auténticos y talentosos.
