Topáu en Xixón un mensaxe grabáu n’una botella fai 1.600 años

Un pequenu vidriu, al qu’hasta agora apenes se-y diera importancia, resultó ser el fragmentu d’una botella que contenía un mensaxe hedonista, destinada a l’aristocracia de fai 1.600 años. La pieza foi alcontrada na villa romana de Veranes (Xixón), escavada dende 1997 por Carmen Fernández Ochoa, catedrática emérita d’Arqueoloxía de la Universidá Autónoma de Madrid (UAM), y Fernando Gil Sendino, de la Fundación UAM.

El vidriu, destináu al propietariu de la villa, acaba de ser datáu y puestu en valor gracies al pormenorizáu analís realizáu pol profesor d’Arqueoloxía de la UAM, Javier Salíu Domínguez, y pola arqueóloga Belén Madariaga, miembros del Equipu Arqueolóxicu Veranes. Los autores demuestren que quien grabó la botella pretendía unviar al señor de Veranes “un deséu hedonista de preste y esfrute de la vida”. Y esta conclusión ye frutu del mensaxe escritu nel so cuerpu: “Bebe y vive munchos años, bon home”.

Quien grabó la botella pretendía unviar al señor de Veranes “un deséu hedonista de preste y esfrute de la vida”

Según el trabayu, publicáu na revista Journal of Glass Studies, hasta la fecha nun se documentara una inscripción qu’axuntara n’una sola inscripción grabada les siguientes trés espresiones de bon deséu: dos en llatín (Mvltis Annis; Homo Bone) y una tercera en griegu (Pie Zeses), que tán perfectamente constataes de manera separada en recipientes vítreos similares. Eso permitió-yos pensar que dieron col mensaxe qu’un día llevó grabáu la botella.

Bona amuesa de la escepcionalidá de la pieza, aseguren los autores, ye “la escasez de pieces d’esti tipu topaes en territoriu de l’antigua Hispania. Amás, les llaborioses técniques de trabayu convertíen estos recipientes n’oxetos únicos y n’ocasiones personalizaos, lo que los estremen d’otres producciones seriaes como los contenedores soplaos en molde, lo que fai d’ellos oxetos raros y esclusivos solu accesibles a una élite económica y social”.

Ensin impureces

El vidriu vien de una unidá estratigráfica que contien materiales fechaos nel sieglu V d. C. (dellos exemplares de terra sigillata hispánica tardida y una moneda datada nel añu 383 d. C.). Según Javier Salíu Domínguez, trátase d’un fragmentu en vidriu incoloru, de 4 cm d’altu por 3 cm d’anchu y una grosez de paré de 0,33 a 0,125 cm, ensin impureces, pero con presencia de delles pequenes burbuyes. Esti analís púdose realizar gracies al SECYR (Serviciu de Caltenimientu, Restauración y Estudios Científicos del Patrimoniu Arqueolóxicu) de la UAM.

«Correspuende a una pieza soplada al aire llibre y la cualidá que la estrema ye precisamente la inscripción grabada que percuerre horizontalmente la so superficie. Tanto’l perfil del fragmentu, como la disposición de la inscripción y les llínees que la delimitan, inducen a pensar que correspondería a la parte cimera d’una botella de cuerpu globular«, amiesta’l profesor de la UAM.

La so escepcionalidá, la riqueza del so grabáu y l’altu valor de la so producción fai inclinar la balanza hacia’l convencimientu de que se trata d’un presente realizáu al propietariu de la villa o facienda romana.