Adrián Barbón va aprovechar la Conferencia de Presidentes que se va celebrar el domingu en La Palma pa reclamar que la Unión Europea (UE) actúe con celeridá y contundencia p’atayar la xubida de precios de la enerxía, disparada dende l’agresión rusa a Ucraína. El xefe del Gobiernu d’Asturies avisa de que l’encarecimientu, qu’afecta a toa Europa, amenaza l’actividá empresarial –sobre manera, de les compañíes que gasten muncha eletricidá- y pue retrasar la recuperación económica.
A lo llargo de la llexislatura, el Principáu repitió la so esmolición pola incidencia de los costos enerxéticos na industria, porque n’Asturies concéntrense compañíes que son grandes consumidores d’eletricidá, como Arcelor y Asturiana de Zinc. Ente otres propuestes, l’Executivu reclama qu’aumenten les compensaciones por emisiones de CO2 al máximu autorizáu pola UE, tal como dexa la Llei de Cambéu Climáticu. Los presupuestos estatales destinen 179 millones a esti oxetivu, una cantidá bien percima de la reservada a lo llargo de los mandatos del Partíu Popular –6 millones nel 2018- pero entá insuficiente, según el criteriu del Gobiernu d’Asturies.
Les midíes defendíes pol Principáu incluyen la ellaboración d’un Estatutu propiu pa la industria altamente intensiva nel consumu d’eletricidá, tal como propunxo la Xunta Xeneral, una iniciativa que se tomó en consideranza pol Congresu. Amás, promueve la puesta en marcha d’un mecanismu que sustituya a la puya d’interrumpibilidá. Otres de les propuestes consisten nel fomentu de contratos billaterales a un plazu llargu coles eléctriques y en siguir aplicando midíes fiscales estraordinaries sobre la enerxía y la eletricidá.
Unión pa sofitar el Gobiernu estatal
Toos estos pidimientos siguen ehí. Agora, la invasión d’Ucraína desencadenó una xubida vertixinosa de precios que nun afecta namás a l’actividá de les grandes consumidores d’enerxía, como Arcelor o Azsa, sinón que ta amenazando tamién a munches otres empreses y sectores d’actividá. Esta situación multiplicó tanto los riesgos económicos como la esmolición del Principáu. Tal como espresó Barbón el miércoles nel plenu de la Xunta Xeneral, el Gobiernu ye partidariu de que la Unión Europea adopte con rapidez toles midíes que seyan menester –hai delles opciones- pa que nun seya’l gas, agora la fonte enerxética más cara, la qu’afite los precios.
Con esti planteamientu, el Principáu sofita les propuestes que ta defendiendo l’Executivu central énte los órganos comunitarios pa frenar l’alza de la enerxía y evitar asina que se produzan daños mayores a la industria y el conxuntu de la economía. Pal Gobiernu d’Asturies, la situación escepcional que se ta viviendo fai imprescindible una reacción fuerte, decidida y rápida de la UE.
El Gobiernu d’Asturies entiende que nesti momentu de crisis y inseguranza les Alministraciones tán obligaes a ufiertar respuestes sólides a la ciudadanía. Por eso, ye partidariu de que toles comunidaes autónomes sofiten a una los esfuercios que ta faciendo’l Gobiernu d’España p’apremiar a la UE pa qu’intervenga cuanto primero nel mercáu enerxéticu. Agora, caltién l’Executivu autonómicu, ye menester que toles Alministraciones remen na mesma dirección pa protexer l’actividá económica.
Acelerar la puesta en marcha de la regasificadora
El Principáu tamién considera qu’esta coxuntura tien qu’acelerar la puesta en marcha de la regasificadora d’El Musel, una instalación que pue ayudar a l’autonomía enerxética de la Unión, dada la so capacidá d’almacenamientu de combustible o la posibilidá de realizar otres funciones nel sistema gasísticu.
El Gobiernu d’Asturies manifiesta amás la so esmolición pola medría de los productos derivaos del petróleu y de los suministros, que yá tán afectando a sectores básicos d’actividá como’l tresporte de mercancíes, l’agricultura y la flota pesquera. Pal Executivu, la xuba tan rápida de los combustibles nun paez xustificada: el so costu tendría que responder a los precios de compra del petroleu de va dos meses, non a los niveles actuales de cotización del crudu nos mercaos por cuenta de la invasión d’Ucraína.
