El Gobiernu d’Asturies va emplegar los fondos europeos pa reforzar el so apueste pol turismu sostenible y les industries culturales, según anunció güei Berta Piñán na Xunta Xeneral. La conseyera de Cultura, Política Llingüística y Turismu compareció a pidimientu propiu pa informar sobre los proyectos del so departamentu venceyaos al Plan de Recuperación, Tresformamientu y Resiliencia, financiáu pol programa Next Generation de la Unión Europea (UE).
Piñán repitió que les competencies de la so conseyería van ser elementos claves pa la recuperación d’Asturies y pa un aprovechamientu efectivu de los fondos europeos, dende’l planteamientu de proyectos ambiciosos público-privaos que xeneren empléu y tengan la capacidá de ser tresformadores del texíu productivu. La conseyera apeló a “la implicación de toos y toes porque esti ye un retu fundamental pal futuru de la nuesa comunidá”.
El programa Next Generation articúlase en cuatro exes que, de la mesma, desenvuélvense en diez polítiques palanca, 30 componentes y 212 midíes, de les que 110 son inversiones y 102, reformes.
Turismu
El turismu ye l’únicu sector con un componente propiu nel capítulu d’inversiones. Dientro de la estratexa de sostenibilidá turística en destinos, el Gobiernu d’Asturies trabaya actualmente en dos programes:
- Per una parte, el Programa Ordinariu de Sostenibilidá Turística en Destinos que se convoca cada añu y que se financia con presupuestos de les tres alministraciones (nacional, autonómica y local). Na convocatoria de 2020 recibiéronse 12 propuestes de planes de les entidades locales del Principáu d’Asturies, de les que s’escoyeron les de Somiedu y Onís. Agora mesmo, tan revisándose y analizándose los 15 proyectos presentaos na convocatoria d’anguaño, de los que saldrán el plan o los planes a firmar en 2021 y executar nos trés próximos años.
- Per otra parte, el Programa Estraordinariu de Sostenibilidá Turística en Destinos 2021-2024.
- Igualmente, d’alcuerdu coles polítiques públiques recoyíes nel Plan de Recuperación, Tresformación y Resiliencia, ellaboróse la Estratexa de Turismu d’Asturies 2020-2030, que va establecer el marcu pa la meyora de la competitividá turística a lo llargo de la década que vien. El plan ta alliniáu colos Oxetivos de Desenvolvimientu Sostenible de l’Axenda 2030 de Naciones Uníes y las Directrices de la Estratexa de Turismu Sostenible d’España 2030.
Cultura
De les 10 polítiques palanca del Plan de Recuperación, la novena ta dedicada a la cultura y el deporte. Inclúi trés grandes bloques dedicaos al refuerzu de la competitividá de les industries culturales, a la dinamización de la cultura y a la dixitalización y impulsu de los grandes servicios culturales. El Principáu tien previsto desenvolver estos programes:
- Un programa d’ayuda a los aceleradores culturales, cola idea d’impulsar la tresformación dixital y la incorporación de les nueves tecnoloxíes a les industries culturales. Estes ayudes ta previsto que s’executen ente 2022 y 2023.
- Otru d’ayudes p’ampliar y diversificar la oferta cultural n’árees non urbanes.
- Una tercer iniciativa, a xestionar poles comunidaes autónomes, céntrase na modernización y la xestión sostenible de les infraestructures de les artes escéniques y musicales, seyan públiques o privaes.
- El programa con dotación económica mayor de los que van xestionar les comunidaes ta dirixíu a la restauración y puesta en valor del patrimoniu cultural declaráu BIC, de cualquier titularidá, pal que ta prevista una partida de 51 millones a executar dende 2022.
- Les comunidaes tamién van tener un programa de dotación de biblioteques públiques, qu’aspira a correxir la insuficiencia de fondos, la meyoría nos catálogos y la presencia de títulos en llingües propies.
Deporte
No qu’afecta al ámbitu deportivu, los oxetivos principales son la dinamización, reestructuración y modernización del sector, pa la so adaptación a la nueva realidá socioeconómica colos procesos de tresformación dixital y transición ecolóxica. Igualmente, fai falta acometer una serie de reformes de calter normativu que van xirar en tornu a tres exes:
– La Llei de l’Actividá Física y el Deporte, na que trabaya’l Gobiernu d’Asturies dende hai tiempu.
– La Llei de profesiones del deporte, una reclamación histórica de los profesionales del sector deportivu.
– La estratexa nacional del fomentu del deporte contra’l sedentarismu y la inactividá física.
La inversión del Plan de Recuperación calculada pa la reactivación del deporte ye de 300 millones que van executase nel periodu 2021-2023 en tres planes: el plan de dixitalización, el plan de transición ecolóxica d’instalaciones deportivas y el plan social del deporte.
