El Principáu y la Fundación Centru Tecnolóxicu de la Información y la Comunicación (CTIC) collaboren pa impulsar una economía nueva nesta estructura territorial
El Gobiernu d’Asturies pon en marcha un grupu de trabayu pa ensayar la transición económica y ecolóxica de les aldees escontra un modelu nuevu que supere les actuales faltes y aproveche les oportunidaes nueves por aciu l’emprendimientu social comunitariu, la reactivación de la cultura y los recursos locales y la integración de les tecnoloxíes nueves.
Asina lo anunciaron güei’l comisionáu pal Retu Demográficu, Jaime Izquierdo, y el director xeneral de CTIC, Pablo Priesca, mientres la presentación del comité de pilotaxe encargáu d’esta iniciativa, que va favorecer la recuperación y afitamientu d’esta estructura territorial p’afitala nel sieglu XXI.
Esti comité de pilotaxe pretende convertise nun espaciu de reflexón, propuesta y acción pa promover el cambéu de paradigma de l’aldea con iniciatives que fomenten una teoría económica nueve que xenere actividá y contribuya a evitar l’abandonu de la tierra y los riesgos ecolóxicos.
La iniciativa parte del convencimientu de que l’aldea ye una estructura territorial afayadiza que, de cara al futuru, puede desenvolver una función esencial na xeneración d’actividá económica y consolidar una estructura demográfica más equilibrada. Pa llograr esti fin, son necesarios servicios y infraestructures que llogren convertila nuna unidá de producción anovada.
Nesti contestu, el comité de pilotaxe concíbese como una estructura horizontal y organizada en rede, de forma que caúnu de los sos miembros realice aportaciones en función de les sos competencies y capacidaes. L’oxetivu final ye definir la transición de l’aldea actual a otra más propia del sieglu xxi que recupere’l so protagonismu como estructura xestora d’agroecosistemes, biodiversidá y paisaxe y incorpore oportunidaes por aciu’l teletrabayu, nómades dixitales, artistes, xóvenes pobladores, etcétera.
Les formes nueves d’organización y desenvolvimientu van ensayase in situ a manera de prototipu o llaboratoriu en vivu.
Como pasu previu a la puesta en marcha d’esti comité de pilotaxe, el Comisionáu pal Retu Demográficu ellaboró, xunto cola Sociedá d’Estudios Vascos, un documentu p’analizar les oportunidaes de l’aldea posindustrial.
Amás, l’añu pasáu, y a propuesta de la comunidá vecinal de Mual (Cangas), empecipiáronse los trabayos d’ordenación y recuperación d’un sistema agroecolóxicu local pa reactivar l’aldea al traviés del cultivu de les tierres, el manexu sostenible de los montes, l’aprovechamientu integral de los sos recursos —incluyíos los enerxéticos— y la comercialización de producciones.
De forma paralela, el comisionáu, en collaboración cola Sociedá Asturiana d’Estudios Económicos y Industriales (Sadei) y la Conseyería de Mediu Rural y Cohesión Territorial, trabaya nestos momentos na aplicación n’Asturies de la Llei 45/2007, pal desenvolvimientu sostenible del mediu rural, cola mira de llograr una mayor integración de les zones rurales y facilitar la so rellación coles urbes.
El grupu de trabayu del comité de pilotaxe pa la economía nueva de l’aldea constitúyese, amás del Comisionáu pal Retu Demográficu y CTIC al traviés del so Centru Tecnolóxicu RuralTech de Pion (Villaviciosa), representantes de cinco conseyeríes (Mediu Rural y Cohesión Territorial; Industria, Empléu y Promoción Económica; Facienda; Educación y Ciencia, Innovación y Universidá), representantes de les comunidaes vecinales de Mual, Porrúa y Asiegu y delles entidaes collaboradores (Reader, Universidá d’Uviéu, Cetemas, GDR Alto Narcea-Muniellos, Faen y la Fundación pal Fomentu de la Economía Social).
