Les cates o prebes a los aspirantes a llograr dalgunu de los premios “Alimentos d’España Meyores Quesos, añu 2025″, convocaos pol Ministeriu d’Agricultura, Pesca y Alimentación (MAPA), tán dexando “mui bon sabor de boca” ente los representantes del xuráu. La directora xerente de la Organización Interprofesional Láctea (InLac), Nuria M. Arribas, que participa como evaluadora nesta edición, sorrayó “la escelencia de los quesos presentaos a concursu, que representen maxistralmente a los distintos territorios de la España peninsular ya Islles onde fueron ellaboraos”.
Arribas viaxó hasta Santander la selmana pasada pa poder evaluar, xunta’l restu d’espertos catadores, les referencies presentaes a concursu, marcaes pola so gran calidá. Como apuntó, InLac sofita y collabora decididamente con esti tipu de concursos porque dexen “poner en valor un patrimoniu gastronómicu ensin comparanza, porque España ye un país de quesos; d’escelentes quesos. Tenemos más de 150 variedaes y más de 31 figures de calidá pa descubrir y esfrutar”.
En concretu, el MAPA impulsa un nuevu añu’l Premiu «Alimentos d’España Meyores Quesos» coles mires de contribuyir a revalorizar los quesos españoles de mayor calidá organoléptica, estimular a los productores a llograr y comercializar quesos de calidá, ameyorar la so imaxe y posición nel mercáu, promocionar la so conocencia ente los consumidores, dacuando llimitada a la zona de producción, y poner en valor les sos característiques sensoriales.
Asina, presentáronse al certame quesos maduraos d’ellaboración propia de cada concursante, que tuvo que xustificar primeramente qu’ellabora añalmente un númberu mínimu de 2.000 pieces o 3.000 quilos. Aspiren a facese con unu de los premios “Alimentos d’España al Meyor Quesu” en cinco distintos variedaes: “de vaca”; “d’oveya”, “de cabra”, “mecíu” y “con mofu o quesu azul”.
Sobro’l procesu de selección, como recueyen les normes del MAPA, la valoración tien dos fases, visual y olfata-gustativa. Pa la valoración sensorial formáronse paneles de cata, caún d’ellos integráu por cinco espertos catadores. Mentantu, la valoración sensorial desenvuélvese en dos etapes: una primer selección na que cada muestraye evaluada por un panel onde se van escoyer les 5 meyor puntuaes en cada modalidá. Éstes, si superen la calificación de 80 puntos, van pasar a la etapa final y volverán ser evaluaes pol conxuntu de tolos catadores.
Los quesos escoyíos tendrán que superar la valoración físicu-química y microbiolóxica nel Llaboratoriu Agroalimentariu de Santander, adscritu al MAPA, quien va emitir un informe colos resultaos de les pruebes. Rematada la valoración sensorial y les valoraciones físicu-química, microbiolóxica y de determinación d’especies -espliquen les normes del MAPA- el coordinador técnicu de cata va ellaborar un informe técnicu colos resultaos de les pruebes realizaes que va ser lleváu a la presidencia del xuráu. Darréu, el xuráu va identificar les muestres de quesu finalistes cola so codificación correspondiente y en base a tolo anterior, va emitir un informe concretando’l resultáu de la evaluación.
