El Conseyu de Ministros aprobó, a propuesta del ministru de Cultura y Deporte, Miquel Iceta, la declaración de la jota como Manifestación Representativa del Patrimoniu Cultural Inmaterial, contribuyendo asina decisivamente a la so salvaguarda como xéneru tradicional.
El Real Decretu aprobáu pol Gobiernu supon el pasu definitivu de protección, dempués de que’l Ministeriu de Cultura y Deporte, al traviés de la Dirección Xeneral de Patrimoniu Cultural y Belles Artes, empecipiara’l procedimientu’l pasáu 10 d’abril, lo que yá implicó una reconocencia y salvaguarda d’esta práctica.
Na declaración, coordinada pol Ministeriu de Cultura y Deporte, participaron toles comunidaes autónomes, siendo un exemplu de collaboración ente les distintes alministraciones.
La declaración de la xota como Manifestación Representativa del Patrimoniu Cultural Inmaterial ta xustificada por tratase del más estendíu, diversu, dinamizáu y reinterpretáu de tolos xéneros tradicionales que componen el variáu mapa sonoru y musical d’España. La xota fai referencia a un xéneru tradicional bien popular de música, cante y baille desenvueltu hasta’l momentu actual, con un patrón xeneral na so base y una serie de particularidaes y especificidaes que faen d’ella una manifestación diversa, recreada y reinterpretada de forma constante y dinámica poles comunidaes portadores.
Dientro de los valores culturales qu’apurre la xota como xéneru tradicional destaca la so interiorización per parte de los individuos y les comunidaes, formando parte de les espresiones populares na práctica totalidá del territoriu español y convirtiéndose nun potente elementu de cohesión social ya identificación de les sos señes d’identidá.
