El Gobiernu d’Asturies refuga de manera rotunda la inclusión del llobu nel Llistáu d’Especies en Réxime de Protección Especial (Lespre). La Comisión Estatal de Patrimoniu Natural y de la Biodiversidá aprobó güei esta midida, que va suponer un pergrave problema de xestión pa les cuatro comunidaes qu’alluguen más del 95% d’estos cánidos n’España (el Principáu, Cantabria, Castiella y Llión y Galicia), que s’amosaron de forma unánime en contra d’esta decisión.
Primeramente, tamién s’opunxeron a la propuesta plantegada pol Ministeriu pa la Transición Ecolóxica y el Retu Demográficu Andalucía, Madrid, Murcia y País Vascu, ente que Nafarroa solicitó que la decisión retardárase pa buscar el consensu necesariu y optó por arrenunciar a participar na votación, la mesma postura adoptada pol País Valencianu. Ceuta, pela so parte, nun pudo votar por problemes de comunicación na videoconferencia.
Na segunda y definitiva votación, ocho comunidaes amosáronse en contra de la propuesta y ocho a favor, ente elles dalgunes que nunca van tener llobos nel so territoriu nin tendrán d’enfrentase a la so xestión por razones puramente xeográfiques. Finalmente, el votu a favor del representante del ministeriu sirvió p’aprobar la midida.
Sicasí, na primer votación, que se saldó con un empate a 7 votos, 3 astenciones y dos comunidaes que nun quixeron participar, el ministeriu pretendió usar el votu de calidá que-y correspuende al presidente de la comisión pa inclinar la balanza a favor de les sos pretensiones, daqué que los mesmos servicios xurídicos refugaron. Tampoco consideraron acertáu’l planteamientu del secretariu d’Estáu de Mediu Ambiente, Hugo Morán, presente na xunta, pa que la decisión final énte l’empate l’adoptase la mesma ministra, Teresa Ribera.
Los directores xenerales d’Asturies, Cantabria, Castiella y Llión y Galicia punxeron de manifiestu que, per primera vez na hestoria d’esta comisión, un ministeriu lleva la propuesta d’inclusión d’una especie nel llistáu de protección especial ensin algamar un consensu, especialmente con aquelles comunidaes más afectaes.
Les cuatro autonomíes opunxéronse a la pretensión del Gobiernu d’España dende’l primer momentu en que s’emitió l’informe del comité científicu y ficiéronlo de forma repitida nos órganos técnicos correspondientes: el grupu de trabayu y el Comité de Flora y Fauna Montesa. En tolos casos basáronse n’informes fundamentaos nos datos actualizaos y col respaldu de reputaos científicos.
En contraposición, na xunta celebrada güei, nin el ministeriu nin nenguna de les comunidaes que sofitaron la so propuesta presentaron documentos que xustifiquen la so postura o contradigan los documentos técnicos qu’Asturies, Cantabria, Castiella y Llión y Galicia-yos fixeron llegar.
Acordies col Gobiernu d’Asturies «L’únicu aval científicu que nel so día presentó’l ministeriu foi’l d’un comité que, d’entrada, refugaba la pretensión de la organización ecoloxista qu’empecipió esti procesu pa catalogar el llobu como especie amenazada, precisamente porque nun s’acreditaben nenguna de les condiciones que determinen esa consideración, anaque les poblaciones d’esti cánidu aumentaron n’área de distribución y en númberu d’exemplares de forma bien vultable nos postreros 20 años».
Ese mesmu comité sí encamienta que’l llobu seya incluyíu nel Llistáu d’Especial Protección “pola so importancia como patrimoniu natural, científicu, mesmo que polos servicios ambientales que produz nos ecosistemes”, argumentos que son perfectamente compatibles cola xestión que vienen realizando les cuatro comunidaes del norte.
El mesmu Ministeriu d’Agricultura, Pesca y Alimentación opúnxose a les pretensiones del Ministeriu pa la Transición Ecolóxica con argumentos bien asemeyaos a los espuestos por Asturies, Galicia, Cantabria y Castiella y Llión; en concreto: “por nun corresponder cola situación real y la evolución de les poblaciones y por xenerar un grave problema na xestión de la ganadería estensiva bien amenazada pola fuerte medra del llobu”.
Los servicios xurídicos d’estes cuatro autonomíes van analizar tanto l’alcuerdu adoptáu güei como les circunstancies nes que se produció, amás de promover tolos recursos que tean al so algame pa torgar que se consolide una decisión que, al so xuiciu, escarez de fundamentos técnicos y científicos.
Si la inclusión del llobu nel Lespre se lleva a términu, podría frayar les competencies autonómiques esclusives en materia de xestión d’especies y, más concretamente, de xestión cinexética, cuando la normativa comunitaria permite que les poblaciones alcontraes al norte del Douru puedan xestionase directamente con normes cinexétiques, o contemplando esa posibilidá nel correspondiente plan de xestión. Amás, esta midida implicaría un pergrave problema pa la xestión de la mesma especie y la so imprescindible compatibilidá cola ganadería estensiva, una actividá económica clave pa los territorios rurales, pa xenerar alimentos de calidá y pa lluchar contra’l despoblamientu.
Los conseyeros de les cuatro comunidaes espresaron el so fondu malestar cola actitú de la ministra Ribera y del secretariu d’Estáu, que nun respondieron a la so solicitú pa celebrar xuntes al más altu nivel y tratar esti asuntu. Nesti sentíu, sorrayen la debilidá d’esta decisión, algamada por una mayoría bien axustada y nada representativa tocantes a la presencia del llobu nes distintes comunidaes.
Asturies, Galicia, Castiella y Llión y Cantabria fueron nes últimes décades les auténtiques garantes del caltenimientu del llobu y les responsables de la xestión d’un conflictu nel que los principales afectaos son los ganaderos y les zones rurales.
La postura que güei defendió’l ministeriu va en contra de la mesma Estratexa de Xestión y Caltenimientu del Llobu Ibéricu aprobada col consensu de toles comunidaes, nun tiempu en que la especie yera menos abondosa qu’agora y, aun así, el so caltenimientu considerábase compatible cola so consideración como cinexética. Énte esti fechu, los representantes de les cuatro comunidaes reclamen al ministeriu qu’abandone la política d’imposición d’una iniciativa que va estropiar gravemente los intereses xenerales del mediu rural y de los sos habitantes.
