Xixón al día

Categoría: Sociedá

  • Primer alta hospitalaria por coronavirus n’Asturies

    Primer alta hospitalaria por coronavirus n’Asturies

    L’Hospital Universitariu Central d’Asturies (HUCA) dio esti martes a mediudía la primer alta hospitalaria a un afectáu pol nuevu coronavirus. El llaboratoriu de viroloxía confirmó’l segundu negativu por COVID-19 del mozu de 32 años que foi’l segundu casu detectáu na comunidá. Hasta agora, permanecen ingresaos nel HUCA nueve pacientes. La muyer de 85 años afectada por una neumonía foi treslladada al Hospital de Cabueñes al descartase que se tratare d’un casu de nuevu coronavirus.

    N’esti momentu, dos de los afectaos permanecen estables dientro de la gravedá ingresaos na UCI y otros siete caltiénense n’aislamientu con síntomes leves, sacante un varón de 48 años qu’empecipió una neumonía. El restu sigue n’aislamientu nes sos cases, con siguimientu telefónicu. El númberu de persones diagnosticaes de COVID-19 n’Asturies ye de 25, de les cualos 13 tán venceyaes a un centru educativu d’Uviéu. El 112 atendió hasta les 15:30 hores un total de 890 llamaes rellacionaes col nuevu coronavirus nel Principáu.

    Les autoridaes sanitaries recuerden que los encamientos siguen siendo los mesmos. Les persones que viaxaron a dalguna de les zones consideraes de riesgu (China, Corea del Sur, Xapón, Singapur, Irán y les rexones italianes de Lombardía, Veneto, Emilia-Romagna y Piamonte) y que presenten los síntomes de tos, fiebre o dificultá respiratoria tienen de ponese en contactu col 112 pa llograr información sobre les actuaciones qu’han de realizar. Tamién s’insiste en que la midida más eficaz para prevenir la tresmisión de los virus respiratorios, ente ellos el nuevu coronavirus, ye la llavadura frecuente de les manes con agua y xabón. Tamién s’aconseya utilizar la flexura del coldu o pañuelos desechables d’un solu usu pa tusir o espirriar.

  • Cinco profesores y dos escolinos d’un colexu uvieín, contaxaos con coronavirus

    Cinco profesores y dos escolinos d’un colexu uvieín, contaxaos con coronavirus

    Yá son 17 les persones contaxaes por coronavirus n’Asturies. La Conseyería de Salú confirmó esta mañana que se trata de cinco profesores y dos escolinos d’un colexu uvieín. Unu de los mayestros afectaos, de 68 años, alcuéntrase n’estáu grave nel Hospital Universitariu Central d’Asturies. Nesti momentu ta investigándose l’orixe del focu, que podría tar venceyáu a un viaxe reciente d’unu d’estos profesionales a Madrid. El colexu va permanecer peslláu hasta esclariar la cadena de tresmisión. Salú va informar del resultáu del estudiu a la dirección del centru educativu pa que lu comunique al alumnáu y les sos families.

    Les autoridaes sanitaries recuerden que’l 81 % de los casos son leves y les afectaciones más graves prodúcense en persones mayores con enfermedaes previes. Les autoridaes sanitaries recuerden que les persones que viaxaron a dalguna de la zones consideraes de riesgu (China, Corea del Sur, Xapón, Singapur, Irán y les rexones italianes de Lombardía, Veneto, Emilia-Romagna y Piamonte) y que presenten los síntomes de tos, fiebre o dificultá respiratoria tienen de ponese en contactu col 112.

    Les autoridaes sanitaries insisten en que la midida más eficaz pa prevenir la tresmisión de los virus respiratorios, ente ellos el coronavirus nuevu, ye llavase de cutiu les manes con agua y xabón. Tamién s’encamienta utilizar la zona del coldu o pañuelos desechables d’un solu usu pa tusir o espirriar.

  • Restrinxen les visites a una persona por residente nos centros de mayores

    Restrinxen les visites a una persona por residente nos centros de mayores

    La Conseyería de Derechos Sociales y Bientar impulsó nueves midíes de control y prevención énte’l coronavirus nuevu nos Establecimientos Residenciales p’Ancianos d’Asturies (ERA). En concreto, decidióse acutar a una persona’l númberu de visites por residente. Amás, reforzáronse les midíes de control d’entrada y salida con un refechu rexistru na recepción de los centros, estremáronse les midíes d’hixene de manes antes y depués del contactu colos residentes y adoptáronse refuerzos d’hixene respiratoria.

    La xerente del ERA, Ana Suárez Guerra, esplicó que toes estes midíes que se van aplicase nos centros de la rede pública de forma inmediata. «Tamién se van tresmitir a los centros privaos», esplicó y apeló a la responsabilidá de la población p’amenorgar l’arribación a los centros de día y sociales: «Tenemos que facer un exerciciu pedagóxicu cola población pa qu’eviten llegar a espacios con gran arribación de persones, como los centros de día o sociales. Ye importante embrivir la presencia de persones. Apelamos a la collaboración de la ciudadanía».

    Guerra añedió que «nenguna visita puede llegar a un centru residencial en casu de que nos catorce díes previos tuviera nuna zona reinal o tenga síntomes de patoloxía respiratoria». Na xunta tamién se definieron midíes d’actuación énte’l supuestu de tener qu’enfrentase a un casu positivu nesti tipu d’instalaciones. «Son persones que precisen aislamientu nun centru hospitalariu, trátase de población de riesgu», esplicó la xerente del ERA. Asturies nun rexistra nengún casu d’infección por COVID-19 en centros y residencies de persones mayores.

  • El secretariu xeneral de Vox, Ortega Smith, da positiviu por coronavirus

    El secretariu xeneral de Vox, Ortega Smith, da positiviu por coronavirus

    Vox ta acabante d’informar, al traviés d’un comunicáu, de que’l so secretariu xeneral, Javier Ortega Smith, diera positivu por coronavirus. La formación d’ultraderecha ordenó esta mañana a tolos sos diputaos que trabayen dende casa. Amás, van solicitar la suspensión de les sesiones plenaries «hasta que les autoridaes sanitaries recuperen el control».

    El líder de la formación protagonizó’l domingu un mitin en Vistalegre (Madrid). N’él, tamién participaron dalgunos de los principales responsables del partíu, como Santiago Abascal, Iván Espinosa de los Monteros y Macarena Olona. El partíu yá ordenó ayeri llunes el pieslle de la sede madrilana. Va permanecer pesllada al públicu y los emplegaos van trabayar dende los sos domicilios.

  • El Centru Nacional de Microbioloxía escarta unu de los positivos por coronavirus n’Asturies

    El Centru Nacional de Microbioloxía escarta unu de los positivos por coronavirus n’Asturies

    El Centru Nacional de Microbioloxía (CNM) de Majadahonda (Madrid), onde se ratifiquen los casos positivos, escartó’l positivu por coronavirus na muyer de 85 años institucionalizada nuna residencia xeriátrica. En conociendo esta resultancia, les autoridaes sanitaries suspendieron les midíes preventives de restricción de vida social de los contactos con esta paciente. La muyer ta aquexada de neumonía y evoluciona favorablemente nel Hospital Universitariu Central d’Asturies (HUCA).

    El Llaboratoriu de Viroloxía del HUCA realiza pal despistaje del nuevu coronavirus una prueba rápida denominada PCR, qu’en poques hores fai posible un diagnósticu preliminar. Esti test, al igual qu’otres pruebes diagnóstiques, puede producir falsos positivos. Por esi motivu, toles comunidaes unvíen les amueses al CNM pa ratificar, con otra prueba, los diagnósticos pol COVID-19.

    Per otra parte, la Conseyería de Salú confirmó esta mañana dos nuevos casos positivos de COVID-19. Trátase de dos de los trés acompañantes en siguimientu del varón de 48 años con venceyos epidemiolóxicos en Madrid al que se-y diagnosticó la enfermedá ayeri. Son dos muyeres, de 48 y 46 años d’edá, que comunicaron al 112 que presentaben síntomes. Les autoridaes sanitaries decidieron treslladar al HUCA a esti grupu de cuatro persones que llegó’l martes a Asturies. Los trés positivos tienen una clínica leve, ente que’l cuartu acompañante ta a la espera de conocer la so situación virolóxica.

    Tres estes últimes resultancies, Asturies cuntaría con seis casos positivos. Al respective de la situación clínica de los afectaos, el primer casu positivu, el varón de 70 años, caltiense estable dientro de la so gravedá. La so muyer de 66 años evoluciona favorablemente d’una neumonía. El restu de los pacientes tán estables.

  • El 112 recibió nun día 249 llamaes sobro’l nuevu coronavirus

    El 112 recibió nun día 249 llamaes sobro’l nuevu coronavirus

    El teléfonu del serviciu d’emerxencies 112 Asturies atendió ayeri 249 llamaes sobre’l nuevu coronavirus. A lo llargo d’esta mañana produciéronse 42. La sala del serviciu reforzóse con personal sanitariu p’atender les consultes de la ciudadanía. Les autoridaes sanitaries recuerden qu’el 112 ye’l teléfonu de referencia pa les persones que viaxaron a zones afectaes pola enfermedá y que presenten los síntomes de fiebre, tos o falta d’aire.

    El Centru Nacional de Microbioloxía (CNM) de Majadahonda (Madrid) escartó esti vienres el positivu por coronavirus na muyer de 85 años institucionalizada nuna residencia xeriátrica. Tres estes últimes resultancies, Asturies cuntaría con seis casos positivos. Los caberos dos nuevos casos positivos de COVID-19 confirmáronse esta mañana. Trátase de dos de los trés acompañantes en siguimientu del varón de 48 años con venceyos epidemiolóxicos en Madrid al que se-y diagnosticó la enfermedá ayeri. Son dos muyeres, de 48 y 46 años d’edá, que comunicaron al 112 que presentaben síntomes. El primer casu positivu, el varón de 70 años, caltiense estable dientro de la so gravedá. La so muyer de 66 años evoluciona favorablemente d’una neumonía. El restu de los pacientes tán estables.

    Pa prevenir la tresmisión de la infección, les autoridaes sanitaries encamienten la llavadura frecuente de manos con agua y xabón, según utilizar la flexura del coldu o pañuelos desechables d’un solu usu pa tusir o espirriar. La Conseyería de Salú caltiense en contactu permanente col Ministeriu de Sanidá p’adoptar les midíes precises y coordinar toles actuaciones de control y prevención.

  • Dos nuevos positivos eleven a siete los casos por coronavirus n’Asturies

    Dos nuevos positivos eleven a siete los casos por coronavirus n’Asturies

    Yá son siete los pacientes con coronavirus n’Asturies. La Conseyería de Salú confirmó esta mañana dos nuevos positivos, que se sumen a los cinco qu’hasta esti xueves se teníen contabilizaos. Trátase de dos contactos contactos estrechos, que taben en siguimientu, rellacionaos col quintu positivu, rexistráu ayeri. El varón, de 48 años y residente en Madrid,  púnxose en contactu’l xueves col 112 al sentise mal. El paciente, con síntomes catarrales y fiebre, llegó’l llunes de Madrid, nel so coche particular y en compañía de trés familiares, pa pasar unos díes nel Principáu. Sigue n’aislamientu domiciliariu.

    El Serviciu de Vixilancia Epidemiolóxica empecipió la identificación de los denominaos contactos estrechos col fin d’activar les midíes de control y prevención. Estes actuaciones consisten en xixilar el so estáu de salú, lo qu’inclúi tomase la temperatura y llevar una vida social lo más llindada posible. Si presenten síntomes, tienen de ponese en contactu col 112.

    Evolución de los pacientes

    Per otra parte, el primer positivu por COVID-19 d’Asturies, un varón de 70 años, sigue estable dientro de la gravedá ingresáu n’aislamientu nel HUCA. La so esposa, de 66 años, dio negativu nes pruebes al COVID-19 del Centru Nacional de Microbioloxía de Majadahonda (Madrid). El mozu de 32 años, segundu positivu detectáu, sigue leve y evoluciona favoratiblemente. Amás, la muyer de 85 años institucionalizada nuna residencia privada permanez grave con bona evolución clínica. Dambos tán na área d’aislamientu del HUCA.

    El cuartu positivu, un varón de 48 años, sigui presentando una clínica leve y, nestos momentos, permanez aislláu na so casa. El Sespa reforzó l’atención del 112 con personal sanitario p’atender les consultes de la ciudadanía. Este ye’l teléfonu de referencia pa les persones que viaxaron a zones afectaes pola enfermedá y que presenten los síntomes de fiebre, tos o falta d’aire.

    Pa prevenir la tresmisión de la infección, les autoridaes sanitaries encamienten la llavadura frecuente de manos con agua y xabón, según utilizar la flexura del coldu o pañuelos desechables d’un solu usu pa tusir o espirriar. La ciudadanía dispon d’información sobro esti nuevu virus na páxina webAstursalud , según nes redes sociales de les alministraciones sanitaries.

  • Yá son cinco los positivos por coronavirus n’Asturies

    Yá son cinco los positivos por coronavirus n’Asturies

    Quintu casu de coronavirus n’Asturies. Trátase d’un xixonés de 48 años que permanez nel so domiciliu con síntomes leves. Salú confirmó ayeri el tercer y cuartu casu venceyaos a esta epidemia. Una d’elles ye una muyer de 85 años, paciente d’una residencia xeriátrica privada. Ingresó’l llunes por una neumonía atípica nel Hospital Universitariu de Cabueñes, onde foi aislada. Desque se-y tomaron dos muestres, la segunda resultó positiva anueche. La paciente permanez estable, dientro de la gravedá, nel área d’aislamientu del HUCA. El cuartu positivu ye un varón de 48 años, que nestos momentos permanez aisláu na so casa.

    Estos tres últimos casos súmense al mozu de 32 años, qu’evoluciona favorablemente, y al varón de 70, que se caltién estable dientro de la gravedá. Dambos permanecen aislaos nel HUCA, xunto a la muyer de 66 años que ta pendiente del resultáu del Centru Nacional de Microbioloxía de Majadahonda (Madrid).

    El Sespa repite los conseyos empobinaos a los profesionales, que consisten n’estremar les midíes d’hixene de manes. El serviciu desaconseya a los profesionales l’asistencia a congresos, xornaes, seminarios y cursos de formación presenciales. Amás, retardóse tola actividá docente nos centros sanitarios con casos positivos. Tamién se restrinxó temporalmente la presencia de visitadores médicos y voluntarios a hospitales y centros de salú. Tamién se ta llimitando l’acompañamientu de pacientes hospitalizaos o n’Urxencies a un únicu familiar que nun presente fiebre nin síntomes respiratorios agudos.

  • Salú aplica midíes adicionales pa ralentizar la tresmisión del coronavirus

    Salú aplica midíes adicionales pa ralentizar la tresmisión del coronavirus

    La Conseyería de Salú va aplicar midíes adicionales pa ralentizar la tresmisión del coronavirus nuevu. Asina lo comunicó esti miércoles el conseyeru, Pablo Fernández Muñiz, al Comité de Coordinación d’Asturies frente al coronavirus nuevu. Muñiz esplicó qu’España «sigue en fase de contención» y precisó que «s’aumentó la sensibilidá del sistema de detección y midíes pa ralentizar la tresmisión de la enfermedá».

    El Sespa repite los conseyos empobinaos a los profesionales, que consisten n’estremar les midíes d’hixene de manes, y l’usu de mázcares quirúrxiques pa pacientes con clínica respiratoria y el personal sanitario que los atiende. Amás, han usar l’equipu de protección individual pa realizar la toma de muestres a persones con sospecha de sufrir esta patoloxía. El personal considerao contactu estrechu va controlase polos servicios de prevención de riesgos llaborales del área sanitaria y de Vixilancia Epidemiolóxica.

    Conseyos

    El Sespa desaconseya a los profesionales l’asistencia a congresos, xornaes, seminarios y cursos de formación presenciales, sacante les sesiones clíniques de los servicios. Amás, el Serviciu de Salú retardó tola actividá docente nos centros sanitarios con casos positivos. Tamién restrinxó temporalmente la presencia de visitadores médicos y voluntarios a hospitales y centros de salú. Aparte, decidió llimitar l’acompañamientu de pacientes hospitalizaos o n’Urxencies a un únicu familiar que nun presente fiebre nin síntomes respiratorios agudos.

    Pa prevenir la tresmisión de la infección, les autoridaes sanitaries aconseyen la llavadura frecuente de manes con agua y xabón, amás d’usar el flexu del coldu o pañuelos desechables d’un solu usu pa tusir o espirriar. La ciudadanía dispón d’información sobre esti virus respiratoriu nuevu na páxina web Astursalud. El Principáu va siguir informando de la evolución de la situación cuando haya novedaes.

  • La crisis climática va engullir la metá de les sableres a finales de sieglu

    La crisis climática va engullir la metá de les sableres a finales de sieglu

    Les sableres nun son namás llugares paradisiacos de destinos remotos. Amás del so importante valor socioeconómico y turísticu pa munchos países, estos ecosistemes, qu’ocupen el 30 % de la mariña de too el mundu y alluguen al 44 % de la población mundial, representen muncho más nes nueses redolaes. «Tienen un valor ecolóxicu yá que acueyen delles especies que nun pueden vivir n’otros ambientes. Al tar en primer llínea tamién suponen una protección frente a hinchentes, nubes marines y ciclones», cuenta a Michalis Vousdoukas, del Joint Research Centre de la Comisión Europea en Ispra (Italia).

    A pesar de la so importancia ecolóxica, munches sableres, que s’enfrenten a constantes cambeos meteorolóxicos y antropoxénicos, yá se tán erosionando. Esta situación va acelerase col cambéu climáticu y l’aumentu del nivel del mar. Pa predicir los enclinos futuros, Vousdoukas y el so equipu analizaron les imaxes satelitales qu’amuesen el cambéu de la mariña de 1984 a 2015.

    Les resultancies, publicaes na revista Nature Climate Change, revelen que la recesión costera pol aumentu del nivel del mar y los enclinos climáticos actuales podríen provocar la casi estinción de la metá de sableres del mundu pa 2100. La erosión paez, amás, intensificase al empar qu’aumenten les emisiones de gases d’efectu invernaderu. «Casi la metá de les sableres del mundu perderáse si nun amenorgamos les emisiones de gases d’efectu invernaderu. La mitigación dexaría prevenir el 22% de la retirada de la mariña para 2050 y el 40 % a finales de sieglu», añede l’espertu.

    Australia, el país que más sableres va perder

    Gracies a la escoyeta de 30 años d’imaxes de satélite, los científicos pudieron determinar el cambéu que va sufrir la mariña nes próximes décades en dos escenarios distintos d’emerxencia climática: por factores xeolóxicos y antropoxénicos y pol aumentu del nivel del mar. Los investigadores concluyeron qu’estos ecosistemes tán en riesgu d’erosión severa. Hasta finales de sieglu, «les sableres van siguir erosionándose y dalgunes van desapaecer», alvierte Vousdoukas. N’Asia occidental y oriental y nos pequenos países insulares del Caribe, espérase una retirada de la mariña d’hasta 300 metros al llargu plazu.

    Pero’l riesgu d’erosión va ser particularmente alto nos países onde se dan dambos escenarios climáticos. Ye’l casu de la República Democrática del Congo, Gambia, Jersey, Surinam, Comoras, Palau, Benin, Guinea-Bissau, Mayotte (Francia), Iraq, Pakistán, Guinea y El Salvador. Toos ellos podríen perder hasta’l 80 % de la so mariña de sable.

    Australia foi’l país más afectáu con 12.324 km de mariña en riesgu nel meyor de los escenarios, lo qu’equival al 40 % de tola mariña del país. Siguiríenlu Canadá (que va perder 9.577 km de sableres), Chile (5.471 km), México (4.119 km), China (4.084 km), EE XX (3.908 km), Arxentina (3.668 km) ya Irán (3.654 km). Como una importante proporción de sableres de sable amenaciaes atopar n’árees densamente poblaes, l’equipu d’investigación suxure diseñar ya implementar midíes d’adaptación efectives.