L’Institutu Asturianu de la Mocedá, en collaboración col Conseyu de Mocedá de Xixón, convoca’l premiu Astragal contra la violencia sexista. Esti gallardón forma parte del programa Nuevos artistes contra la violencia de xéneru. La convocatoria ta abierta a tou tipu de proyectos artísticos mesmo qu’a otros procesos creativos. Cada artista o colectivu va poder presentar a concursu un únicu proyectu creativu, orixinal ya inéditu, y diseñáu específicamente pal Espaciu Astragal.
Nel certame pueden participar artistes d’Asturies o residentes na comunidá, mesmo que descendientes hasta segundu grau d’asturianos, que nun superen los 35 años d’edá a 31 d’avientu de 2019. El premiu Astragal inclúi dos galardones en metálico de 3.000 euros cada unu. Los trabayos pueden presentase hasta’l 18 d’ochobre nel rexistru xeneral de la Conseyería de Presidencia. Tamién quepe la posibilidá d’unvialos por corréu certificáu a la sede del Conseyu de Mocedá de Xixón.
La campaña de vacunación antigripal 2019-2020 adelantráse al 21 d’ochobre para mayores de 65 años y muyeres embarazaes. A partir del 4 de payares, inmunizaráse al restu de grupos de riesgu, ente los que per primer vegada inclúyense ñácaros prematuros mayores de 6 meses y menores de dos años. La Conseyería de Sanidá encamienta la vacunación a les muyeres embarazaes pa protexer a los ñácaros, cuidao que hasta pasaos los seis meses de vida nun pueden recibir la profilaxis. El contaxu d’esta enfermedá amonta’l riesgu de complicaciones nos naciellos.
El director xeneral de Salú Pública, Rafael Cofiño, presentó esta iniciativa nel centru de salú d’El Llano, en Xixón, onde destacó’l papel de la rede d’atención primaria na prevención y la promoción de la salú. Pela so parte, el xefe del Serviciu d’Epidemioloxía de la conseyería, Ismael Huerta, aportunó na importancia de que’l personal sanitariu y sociosanitariu se vacune pa prevenir contaxos a pacientes y grupos de riesgu. La vacuna ta encamentada pa mayores de 65 años, persones inmunodeprimíes o con enfermedaes cróniques, obesidá y muyeres embarazaes, que presenten más riesgu de complicaciones.
Novedaes p’anguaño
La campaña va rematar el 31 d’avientu. Ente les novedaes figura l’alministración de trés tipos de vacuna, ente les que s’inclúi per primer vegada la tetravalente de cultivu celular, indicada pa xestantes y persones con alerxes graves al güevu y a los antibióticos. A los mayores de 65 años inocularáse-yos la trivalente reforzada, que llogra una meyor respuesta inmune nesti sector de la población, y al restu de los grupos de riesgu, dende los seis meses hasta los 64 años, va alministráse-yos la tetravalente clásica, que protexe de los dos tipos de virus A y les dos variantes del B. Salú adquirió 244.000 dosis de vacuna, que supunxeron xuna inversión de 1.194.710 euros. Del total, 170.000 son de trivalente reforzada, 72.000 de la tetravalente clásica y 2.000 de tetravalente de cultivu celular.
Esta selmana distribuyirán les dosis nos distintos puntos de vacunación y va espublizase la campaña con cartelos y folletos. Amás, per primer vegada va ellaborase un documentu d’entrugues frecuentes sobro’l gripe p’ayudar a estremar los síntomes d’un gripe de los d’un resfriáu.
Balance de la campaña pasada
La cobertoria vacunal na pasada campaña ente los grupos de riesgu algamó les 211.742 dosis alministraes de les 228.295 distribuyíes. En total, el Serviciu d’Epidemioloxía rexistró 3.816 andaes de gripe per cien mil habitantes, frente a los 4.390 del exerciciu anterior. Por grupos de riesgu, el 57% de les persones de más de 65 años recibieron la vacuna, de manera que se superó’l 55,2% de la campaña previa. Nesti grupu, rexistráronse 1.061 casos de gripe per cien mil habitantes, menos de la metá que na temporada anterior, cuando se rexistraron 2.597. Sicasí, encamiéntase que se vacune siquier el 65% d’esti colectivu p’amenorgar la morbilidad y la mortalidá. Al respective de les xestantes, l’añu pasáu inmunizáronse’l 44%, frente al 32% de la temporada anterior. Tamién s’amontó la cobertoria ente’l personal sanitario: del 32% al 50%.
Más de la metá de les families asturianes opta pola lactancia materna pa los sos neños al dexar l’hospital. Nos postreros trés años, el porcentaxe foi aumentando pasu ente pasu. Cada vez son más les mas qu’escueyen esta clas d’alimentación nos primeros meses de vida de los naciellos. La tasa de naciellos alimentaos n’esclusiva con lactancia materna nel momentu del alta hospitalaria algama’l 55,55 %. Esa mesma tasa nel cuartu mes de vida llega al 34,9 %. Nel 2018, estes cifres asitiábense nel 54,24 % y el 32,65 %, respectivamente y, nel 2017, nel 48 % y el 32,61 %.
Sanidá trabaya con indicadores qu’ayuden a promover la lactancia y que tán rellacionaos col vínculu afectivu ente la madre y el neñu nes primeres hores de vida. Nesti sentíu, impulsáronse iniciatives como’l programa d’iniciu precoz de la lactancia materna nel paritoriu y el contactu piel con piel. L’área VIII, con cabecera en Llangréu, dispón d’una guía de bones práctiques que la so implantación empezó nel 2015 y completóse l’añu pasáu. Anguaño, tán realizando’l mesmu procesu les árees V (Xixón), VI (Les Arriondes) y VII (Mieres).
Esti llunes entama la celebración de la Selmana Mundial de la Lactancia Materna, que tien por lema Tenemos que nos empoderar, tenemos que facer posible la lactancia materna. El Serviciu de Salú entama delles actividaes pa concenciar a la población de la importancia d’esta clas d’alimentación. La Organización Mundial de la Salú (OMS) aconseya la lactancia materna de forma esclusiva nos primeros seis meses de vida y complementada con otros alimentos, polo menos, hasta los dos años.
Una xunta d’investigadores del Centru d’Investigación del Cáncer d’Ontariu y l’Hospital for Sick Children (Toronto, Canadá), l’IDIBAPS de Barcelona y l’Institutu d’Oncoloxía de la Universidá d’Uviéu, consiguieron descifrar rexones previamente inexplorades del xenoma de célules tumorales. Esti analís permitió identificar dos mutaciones estremaes na mesma posición del xenoma, una d’elles presente en leucemia linfática crónica y otros cáncanos, y la otra presente en más del 50% de casos d’un tipu de meduloblastoma.
L’estudiu, qu’espubliza güei la revista Nature, amuesa per primer vegada la relevancia d’estes rexones inexplorades del xenoma na progresión tumoral, gracies al desendolcu de nueva metodoloxía bioinformático. A diferencia de les mutaciones que s’identificaren hasta agora, les dos mutaciones identificaes nestos trabayos afeuten a un xen perpequeñu y que nun codifica una proteína. Sicasí, esti xen, nomáu U1-snRNA, contribúi a la maduración de la mayor parte los xenes espresaos na célula, poro, estes mutaciones orixinen un efeutu cascada qu’afeuta a diversos mecanismos moleculares implicaos n’apaición y progresión del cáncer.
Nestos estudios participaren Lincoln Stein, direutor d’Oncoloxía Adaptativa nel Institutu d’Investigación del Cáncer d’Ontariu, Michael Taylor, del Serviciu Neurociruxía Pediátrica y Bioloxía del Desensolcu y Célules Madre del Hospital for Sick Children de Torontu, Elías Campo, direutor del IDIBAPS, direutor d’Investigación del Hospital Clínic y caderalgu d’Anatomía Patolóxica de la Universidá de Barcelona, y Xose S. Puente, investigador del IUOPA y Caderalgu de Bioquímica y Bioloxía Molecular de la Universidá d’Uviéu.
La llende del xenoma
El cáncer ta causáu pola apaición de mutaciones nunos pocos xenes qu’afeuten a cómo furrula una célula normal, provocando la tresformación tumoral. El tipu mutación determina la evolución del cáncanu y la rempuesta al tratamientu con fármacos específicos, poro la necesidá de conocer les mutaciones que causen esta tresformación.
Durante los caberos 10 años, el Consorciu Internacional de Xenomas del Cáncer (ICGC) vien secuenciando’l xenoma de más de 17.000 cáncanos de los principales tipos de cáncer, col envís d’identificar los xenes mutaos nestos cáncanos. “Llamentablemente, delles rexones del xenoma son tan repetitives y complexes, que quedaben acullá de lo esplorable con les teunoloxíes de les que disponíemos” comenta’l Dr. Xose Puente. “Ye como tratar de completar un rompecabeces d’una semeya d’un cielu azul. La mayor parte les pieces azules podrían encaxar en cualesquier parte del rompecabeces, polo que ye perdifícil de finar”, añade.
Agora, nun sólo fue posible investigar estes rexones, sinon que l’analís de más de 2.500 xenomas tumorales asoleyó la esistencia de dos mutaciones en distintos tipos de cáncanos. Estos resultados abren la posibilidá de que mutaciones n’otres rexones asemeyaes participen n’otros cánceres o n’otres malures xenétiques.
Impauto clínico y funcional
La mutación U1-snRNA identificóse en muestras de leucemia linfática crónica, la leucemia más frecuente nos adultos, asina como’n carcinoma de fégadu. Otra mutación nel mesmu sitiu del xenoma ta presente na casi totalidá de los cáncanos de pacientes adultos con meduloblastoma tipu SHH, asina como n’otros subtipos d’esti grupu de cáncanos cerebrales. La validación funcional y clínica, llevada a cabo polos investigadores del Hospital Clínic-IDIBAPS y la Universidá d’Uviéu, confirmó qu’esta mutación provocaba una cadena d’alteraciones en múltiples xenes, y asociábase a les formes más agresives de la leucemia linfática crónica. “Conseguimos esplicar por qué en un subgrupu de pacientes la enfermedá evoluciona rápidamente y requier de tratamientu, mientres que n’otros pacientes la leucemia ye indolente y nun requier de tratamientu durante bastantes años”, señala el Dr. Elías Campo.
El conocimiento d’estes dos mutaciones representa una nueva oportunidá de tratamientu
Dende’l puntu de vista de l’aplicación clínica, amás de servir como marcador pronóstico en meduloblastoma y leucemia linfática crónica, el conocimiento d’estes dos mutaciones representa una nueva oportunidá de tratamientu.
Sicasí, fármacos qu’afeuten a la maduración del RNA y que tan probándose pa otros cáncanos, podríen ser útiles nel tratamientu d’estos pacientes. Además, esta mutación provoca qu’otros xenes maduren de manera incorreuta, lo que podría facilitar que’l sistema inmune reconociera les célules tumorales mediante los nuevos tratamientos d’inmunoterapia. “Esti estudiu nun sólo ye’l primeru n’identificar mutaciones funcionales nes zones repetitives del xenoma, sinon que pon de manifiestu la relevancia de facer públicos y accesibles tolos estudios xenómicos pa que la comunidá científica pueda re-analizalos a midida que se desendolquen nueves ferramientes d’analís”, conclúi Elías Campo.
Esta investigación ye posible gracies a la financiación de la Fundación bancaria “la Caixa”, CIBERONC y l’Instituto de Salud Carlos III.
En total, presentáronse 68 trabayos científicos en formatu póster que tán espuestos na redoma del salón d’actos del HUCA. D’ellos, 22 compiten na categoría d’atención hospitalaria, 7 na d’atención primaria, 14 en coordinación, 19 en xestión y 6 en servicios básicos.
L’actu empezó con un debate sobre’l futuru de la xestión clínica n’Asturies. De siguío, van constituyise cinco meses de trabayu nes que van compartise les esperiencies de les unidaes de xestión clínica de los centros de Trevías, El Llano y El Natahoyo-Tremañes y les árees de xestión clínica de Corazón y d’Urxencies del HUCA. Amás, va analizase la integración del modelu de xestión clínica na rede de salú mental y l’atención centrada nos pacientes. Otra de les meses va tratar sobre’l Plan Nacional frente a la Resistencia a Antibióticos.
A les cinco y media de la tarde, el presidente de la Fundación Hospital Optimista, Florent Amion, va pronunciar la conferencia Soñar un hospital optimista: cómo transformar la cultura de la queja en la cultura del agradecimiento, que va preceder a la clausura, al cargu de la directora xerente del Sespa, Concepción Saavedra.
La Conseyería de Cultura, Política Llingüística y Turismu destacó esti martes la relevancia que’l Gobiernu asturianu quier dar a la Política Llingüística esta llexislatura. Asina lo aseguró la titular del departamentu, Berta Piñán, quien compareció na Xunta Xeneral pa esponer les principales llínees polítiques de la so conseyería pa esta llexislatura.
La conseyera anunció que’l so departamentu va ser especialmente activu «pa trabayar nuna propuesta de modelu d’oficialidá realista, acorde cola situación sociollingüística asturiana, y construyíu sobro’l consensu». Nesti sentíu, Piñán anunció la puesta en marcha nos próximos meses del Conseyu Asesor de Política Llingüística. Coles mesmes, aseguró que se van crear comisiones permanentes conxuntes cola conseyería d’Educación y la de Ciencia, Universidá ya Innovación
La Dirección Xeneral de Política Llingüística va trabayar cola Xunta Asesora de Toponimia pa completar esta llexislatura la revisión de la toponimia tradicional. Tamién se quier avanzar nel so usu alministrativu y nel so espardimientu cartográficu. De la mesma, la conseyería quier completar los procesos de normalización dixital y l’implantación de traductores, buscadores y ferramientes qu’asitien l’asturianu na rede. Nel mesmu capítulu, Piñán afirmó que se va trabayar pa llograr la especialidá docente pal asturianu.
Polémica comparecencia de la conseyera de Cultura, Política Llingüística y Turismu na Xunta Xeneral. Berta Piñán entamó la so intervención pa esponer les principales llínees polítiques de la so conseyería pa esta llexislatura. Fízolo n’asturianu. Darréu, la diputada del PPGloria García pidió la pallabra. Aseguró nun entender a la conseyera y pidió traducción simultánea. Tamién intervino’l diputáu de VoxIgnacio Blanco, quien refugó la presencia de traductores porque «en castellano entendémonos toos».
La presidenta de la comisión, la socialista Lidia Fernández, fizo un recesu pa consultar cola letrada presente na sesión. Encamentó a la conseyera a siguir en castellán apelando a la so «bona fe». «Reinicio la mio intervención en castellán acatando’l Reglamentu d’esta Cámara», retomó Piñán. Mientres la so intervención la conseyera refirióse a esta situación asegurando que «ye una situación que me resulta humillante como ciudadana».
L’Asociación d’Ayuda a Persones con Paralís Cerebral (Aspace) foi la entidá reconocida col premiu Ana Casanueva 2019, que consiste nun premiu únicu de 50.000 euros. La decisión del xuráu foi comunicada a los medios de comunicación na tarde del vienres nel Hotel de la Reconquista d’Uviéu por Santiago González-Alverú Nieto, quien actuaba como secretariu.
Aspace nació n’Asturies fai más de medio sieglu. Nesti tiempu, convirtióse nun referente nacional na atención ya integración social y educativa de les persones con paralís cerebral. Distinguida cola Medaya de Plata del Principáu en 2016, l’asociación cunta na actualidá con más de 200 asociaos y beneficia directamente a unes 180 persones y a les sos families. Empresta sofitu y acompañamientu a lo llargo de toles etapes de la vida con independencia del nivel d’autonomía de les persones.
L’asociación cunta na actualidá con más de 200 asociaos y beneficia directamente a unes 180 persones
El premiu Ana Casanueva, convocáu pol empresariu y filántropu ástur-mexicanu Carlos
Casanueva Vares y l’Asociación Iberoamericana de la Comunicación (ASICOM) en collaboración cola Universidá d’Uviéu, tien como oxetivu reconocer el trabayu d’organizaciones non gubernamentales, instituciones d’asistencia privada, fundaciones, asociaciones civiles y organismos ensin fines d’arriquecimientu que cunten con una trayectoria de siquier 5 años a partir de la constitución llegal de la organización,
y qu’operen n’Asturies, con un premiu únicu de 50 mil euros p’aquelles que los sos proyectos fueren los más destacaos mientres l’añu 2017 en temes d’impactu social. De manera xeneral, les exes temátiques para otorgar el premiu son: atención y sofitu a población en condiciones de desventaxa, esclusión social o probeza; xeneración d’oportunidaes y accesu a educación y formación; accesu a servicios sociales y de salú; sofitu a migrantes, y trabayu con grupos vulnerables o en riesgu.
L’actu d’entrega del premiu va tener llugar esti xueves. La ceremonia va celebrase de magar les 19:00 hores na Capiya del Edificiu Históricu de la Universidá d’Uviéu.
Asturies va acoyer en payares de 2020 la próxima edición de los World Cheese Awards, el certame de quesos más prestixosu del mundu. La cita va suponer un importante impulsu a la proyección internacional de la comunidá y de los sos productos agroalimentarios. El director del concursu y xerente de The guild of fine food, John Farrand, anunció esti martes qu’Uviéu va ser la sede d’esti eventu.
«Ye l’impulsu fuerte a la marca nuestra Alimentos del paraísu y a la so vinculación cola marca Asturias»
El conseyeru de Desenvolvimientu Rural, Agroganadería y Pesca, Alejandro Calvo, valoró la oportunidá y el reconocimientu al trabayu de llabradores, ganaderos y queseros que supón la celebración del certame n’Asturies. «Puede sirvir como un acelerador pa toa la nuestra industria agroalimentaria. Amás, ta en llinia con ún de los nuestros oxetivos, que ye l’impulsu fuerte a la marca nuestra Alimentos del paraíso, a la so campaña de promoción y a la so vinculación cola gran marca que ye Asturias paraíso natural», destacó Calvo.
Mientres l’actu tamién se robló un protocolu de collaboración ente’l Gobiernu d’Asturies, el Conceyu d’Uviéu, los World Cheese Awards y l’Institutu del Quesu, col fin de consiguir el mayor algame y espardimientu del eventu. Pa entamar el certame constituyiráse un comité formáu por representantes de les instituciones públiques y del sector priváu, que’l so presidente d’honor va ser Santiago Menéndez de Luarca, exconseyeru de Mediu Rural del Principáu; exsubsecretariu del Ministeriu d’Agricultura y exrepresentante permanente d’España énte la ONU pa l’Agricultura y Alimentación (FAO).
World Cheese Awards
Los World Cheese Awards van cumplir 33 ediciones n’Uviéu. Nesti concursu participen más de 3.000 quesos de los cinco continentes. 250 xueces internacionales van encargase de dictaminar cuálos son los meyores productos del mundu. Espérase que más de 10.000 persones asistan al eventu.
El certame inclúi tamién una exhibición de productos. Va atraer a Asturies a críticos y prensa gastronómica, compradores y distribuidores que van tener la oportunidá de rellacionase de manera directa colos productores y conocer les últimes tendencies de gastronomía y quesu.
La esbarda recoyida a finales de mayu nos alredores de la corralada de Proaza foi treslladada ayeri a un recintu en semillibertá nel monte de Valsemana, en Llión. Dende’l pasáu mes de xunu atopábase nel Centru de Recuperación de la Fauna Montesa de Villaescusa, en Cantabria. Los equipos técnicos y veterinarios del Principáu, el Gobiernu de Cantabria y la Xunta de Castiella y Llión, col sofitu del Ministeriu pa la Transición Ecolóxica, consensuaron el treslláu de la osa al recintu lleonés, una vegada superáu’l cuadru neurolóxicu que carecía y en sometiéndola a un chequéu refechu. Les instalaciones de Valsemana van facilitar l’aclimatación del animal al mediu natural de forma previa a la so reintroducción. Ye un espaciu aislláu, ampliu y que cunta con una afayadiza bayura ambiental. El treslláu a esti recintu realizóse ensin incidencies.
La Guardería de Mediu Natural del Principáu, en collaboración con técnicos especializaos, recoyó a la cría nos alredores de la corralada osera de Proaza. Carecía desnutrición, deshidratación y alteraciones neurolóxiques, polo que foi unviada a un centru veterinariu pa estabilizala. N’esperimentando un leve ameyoramientu, alcordóse’l so treslláu al Centru de Recuperación de la Fauna Montesa, en Cantabria, unes instalaciones específiques pal tratamientu d’osos pardos. Nos trés meses que permaneció ellí tuvo permanentemente baxo control especializáu, anque ensin contactu visual colos sos cuidadores, y algamó un desenvolvimientu óptimu, hasta llegar a los 23 kilogramos de pesu.
