Xixón al día

Categoría: Sociedá

  • El Gobiernu d’Asturies organiza un seminariu gastronómicu pa profesionales y estudiantes d’hostelería y restauración

    El Gobiernu d’Asturies organiza un seminariu gastronómicu pa profesionales y estudiantes d’hostelería y restauración

    El Principáu, al traviés de la marca de calidá Alimentos del Paraísu, organiza’l seminariu gastronómicu Asturies, benditu yantar, dirixío a profesionales y estudiantes d’últimu cursu de cualquier ciclu formativu de les especialidaes d’hostelería, restauración y sumiller. El cursu va desenvolvese na Escuela d’Hostelería del IES Valle d’Ayer, en Morea, y va cuntar cola participación telemática de 300 alumnos de tol país.

    La directora xeneral de Desenvolvimientu Rural y Agroalimentación, Begoña López, indica qu’esti seminariu pretende dar a conocer productos asturianos de calidá y les sos aplicaciones culinaries. «Los profesionales del sector y l’alumnáu de los últimos cursos de los ciclos formativos, a quienes se dirixe’l cursu, van ser los futuros compradores de productos de calidá», agrega.

    Les xornaes, que se desenvuelven mañana y pasao, organícense en collaboración colos conseyos reguladores de las denominaciones d’orixe protexíes (DOP) Vinu de Cangas y Afuega’l Pitu; de les indicaciones xeográfiques protexíes (IGP) Chosco de Tinéu y Faba d’Asturies y de la marca de garantía Verdina d’Asturies.

    El programa formativu, qu’inclúi una parte teórica y otra práctica, cunta cola collaboración de productores, representantes de los conseyos reguladores y reconocíos sumilleres y chefs, como Jaime Uz, del restaurante Arbidel de Ribeseya, y Miguel Sierra Blanco.

  • Cangas del Narcea entrega’l gallardón Muyer Rural 2021 a l’axente de Guardia Civil Elena Menéndez

    Cangas del Narcea entrega’l gallardón Muyer Rural 2021 a l’axente de Guardia Civil Elena Menéndez

    L’axente de la Guardia Civil Elena Menéndez Menéndez, recibió esta mañana el gallardón Muyer Rural 2021, qu’entregó l’alcalde de Cangas del Narcea, José Víctor Rodríguez y la conceya de Salú Pública, Muyer, Igualdá y Derechos Sociales, Carmen López. Ficiéronlo nun actu emotivu na biblioteca del Parador de Courias, nel que l’alcalde resaltó l’esfuerciu fecho pola axente, «gracies al so trabayu ayudó a salvar munches vides», dixo, mesmo que punxo en valor la vixilancia y control qu’Elena lleva a cabo coles víctimes de violencia de xéneru y les dificultaes que supón facelo nesta comarca rural.

    Pola so parte, la conceyala de Muyer resaltó’l llabor que vien realizando la gallardonada y nun quixo dexar pasar la ocasión pa felicitar elg ran trabayu fecho pola axente col programa VIOGEN, nel que lleva trabayando dende 2015. La conceyala emocionó al públicu al facer mención a una carta escrita por una muyer maltratada que gracias a la ayuda de l’axente pudo principiar una nueva vida: «Pa mi conocer a Elena foi un regalu. La primer persona cola que pensé n’atreveme a dar el primer pasu pa salir del infiernu nel que taba. Nun podía alcontrar a naide meyor p’ayudame a pasar por esi trance tan duru y difícil que tanto mieu me daba. Detras d’esa dulzura suya tresmite ánimu y fuercia cuando tanto se necesita. Nun puedo esplicar con pallabres la seguridá y cariñu que me fizo sentir nesi momentu tan duru de la mio vida. Acompañóme nel camín y siempres voi tar agradecida».

    L’axente de la benemerita gallardonada, quien tuvo acompañada polos sos familiares y compañeres y compañeros del cuerpu, tuvo pallabres d’agradecimientu pa toles persones que ficieron posible la entrega d’esta distinción, » pa mi ye un honor y arguyu recibir esti gallardón. Que reconozan el trabayu d’unu siempres ye d’agradecer» dixo, mesmo que manifestó que «voi siguir faciendo’l mi trabayu lo meyor posible p’ameyorar la vida de munches muyeres que de verdá lo necesiten».

  • El Principáu, la Delegación del Gobiernu y la Guardia Civil refuercen la vixilancia contra la pesca illegal

    El Principáu, la Delegación del Gobiernu y la Guardia Civil refuercen la vixilancia contra la pesca illegal

    El Principáu, la Delegación del Gobiernu n’Asturies y la Guardia Civil alcordaron güei reforzar les acciones de vixilancia contra la pesca illegal para protexer el sistema pesqueru tanto nes descargues como nel tresporte y la comercialización. Pa ello, van amontase los controles habituales y va ponese especial atención a l’actividá marisquera.

    El director xeneral de Pesca Marítima, Francisco González, y el director del lÁrea d’Agricultura y Pesca de la Delegación del Gobiernu n’Asturies, Enrique Rodríguez Nuño, axuntáronse esta mañana con representantes del Serviciu de Protección de la Naturaleza (Seprona) de la Guardia Civil para coordinar estes acciones hasta final d’añu.

    L’oxetivu ye protexer el sector que cumple col sistema de cupos na pesca de la perceba, otros mariscos y pexe,  de manera énte la llegada de les fiestes navidiegues. Asina, les partes implicaes alcordaron amontar los controles que davezu se realicen na mariña, nes rules y en carretera, pa comprobar documentación y condiciones de los productos.

    Nel ámbitu de les sos competencies, los inspectores del Gobiernu d’Asturies y los de l’Alministración Xeneral del Estáu van trabayar de manera conxunta y van coordinase de forma selmanal nos llabores de vixilancia colos axentes del Seprona. ​​​​​

  • El Gobiernu d’Asturies illuminó d’azul dellos edificios públicos pa conmemorar el Día universal polos derechos de la infancia

    El Gobiernu d’Asturies illuminó d’azul dellos edificios públicos pa conmemorar el Día universal polos derechos de la infancia

    El Gobiernu d’Asturies illuminó ayeri d’azul dellos edificios institucionales, incluyíu’l de la Presidencia del Principáu, pa conmemorar el Día universal polos derechos de la infancia, que va celebrase’l sábadu, 20 de payares. La illuminación coincide cola celebración de la Xornada internacional de los derechos de la infancia, entamada pola Conseyería de Derechos Sociales y Bienestar cola collaboración del Institutu Asturianu d’Alministración Pública Adolfo Posada.

    A esta iniciativa súmense los conceyos d’Avilés, Bimenes, Cabranes, Candamu, Cangas, Castropol, Colunga, Xixón, Llaviana, L.lena, Llanes, Miranda, Nava, Noreña, Uviéu, Ribeseya, Sariegu, Tinéu y Villaviciosa. Prevése que tolos edificios enciendan les sos lluces a les siete de la tarde.

    La Xornada internacional de los derechos de la infancia empecipió cola intervención de la directora del Institutu Asturianu pa l’Atención Integral a la Infancia y a les Families, Marta del Arco. Tamién participaron el fiscal coordinador de menores, Jorge Fernández Caldevilla, y la lletrada del menor, Antonia Fuentes Moreno.

    Mientres la xornada analizóse con detalle la Llei orgánica de protección integral a la infancia y l’adolescencia frente a la violencia. Marta del Arco fizo una valoración positiva: «Falamos d’una llei que marca plazos pa terminar cola violencia escontra la infancia en cualesquier de les sos formes y impón plazos concretos a les alministraciones pa que se coordinen, ellaboren estratexes y nel ámbitu d’esta planificación y coordinación desenvuélvanse acciones concretes empobinaes en favor del bienestar de los menores».​​​​​​​

  • El Principáu refuerza l’análisis del so sistema educativu con un estudiu internacional sobre la competencia dixital del alumnáu

    El Principáu refuerza l’análisis del so sistema educativu con un estudiu internacional sobre la competencia dixital del alumnáu

    El Principáu va reforzar l’análisis de la calidá del so sistema educativu al incorporase la primer vez al International Computer and Information Literacy Study (ICILS), un estudiu que mide la competencia dixital del alumnáu en más de 30 países. La prueba va celebrase nel 2023, en segundu de Secundaria.

    El Gobiernu central tomó’l determín de qu’España participe pela primer vez n’ICILS, que s’entama cada cinco años y cumple la tercer edición. Cola mira de llograr datos autonómicos estadísticamente fiables y que dexen facer una comparanza internacional, la Conseyería d’Educación solicitó una muestra ampliada. Esto va suponer la selección d’unos 50 centros de Secundaria pa sumase a la investigación.

    A diferencia d’otros estudios internacionales, ICILS nun se centra en materies concretes, sinón que ye competencial y pon el focu na habilidá dixital. El Gobiernu d’Asturies considera interesante esta prueba por dos razones. De primeres, pol interés intrínsecu de la sociedá por esti tipu d’habilidaes. Per otru llau, pa midir l’impactu de la enseñanza telemática a lo llargo de la pandemia. L’alumnáu que se va someter a la prueba nel 2023 taba matriculao en quintu de Primaria cuando se declaró’l confinamientu, en marzu del 2020.

    ICILS va dexar disponer d’un diagnósticu fiable y independiente del grau d’adquisición de la competencia dixital y valorar un momentu nel que la crisis sanitaria xeneró una situación nueva nos procesos d’enseñanza y aprendimientu.

    Esti estudiu ta promovíu pola Asociación Internacional pa la Evaluación del Rindimientu Educativu (IEA), una cooperativa formada por instituciones académiques, d’investigación y axencies gubernamentales de más de 60 países.

    Cola incorporación a ICILS 2023, Educación amplía la so llinia d’investigación nel contestu internacional. Asturies participa yá con muestres ampliaes en PISA, que mide comprensión llectora, matemátiques y ciencies n’Educación Secundaria Obligatoria (ESO) y TIMSS y PIRLS, que miden les mesmes competencies en Primaria.

  • Iniciativa pol Asturianu denuncia que Ciudadanos miente sobre los talleres infantiles en Xixón

    Iniciativa pol Asturianu denuncia que Ciudadanos miente sobre los talleres infantiles en Xixón

    Dempués de la falsa polémica xenerada al rodiu de la organización d’una serie de cuentacuentos pa la reciella nel Xardín Botánicu de Xixón, Iniciativa pol Asturianu quier denunciar qu’esta polémica orixínase al traviés d’una denuncia basada nuna falsedá pol grupu municipal de Ciudadanos nel Conceyu de Xixón.

    La información de la propia páxina web municipal y del Xardín Botánicu dexen claro que de les cuatro propuestes rellacionaes col tema d’esta ponte namás nuna taba presente la llingua asturiana.

    Iniciativa pol Asturianu denuncia que resulta llamentable falar d’inmoralidá cuando solo un cuartu de les propuestes d’actividaes tan n’asturianu. «Resulta mui difícil de comprender la defensa de la Llei d’Usu con esa crítica a la única actividá n’asturianu nel Xardín Botánicu y pidimos a Ciudadanos que se posicionen de forma clara, ¿tán pola aplicación de la Llei d’Usu del asturianu o realmente quieren facer desapaecer l’asturianu de tolos espacios nos que tien una mínima presencia?», dicen dende la plataforma.

  • XEGA convoca una concentración en La Pola Siero pa condergar l’agresión homófoba ocurrida esti domingu

    XEGA convoca una concentración en La Pola Siero pa condergar l’agresión homófoba ocurrida esti domingu

    XEGA convoca una concentración en La Pola Siero pa condergar l’agresión homófoba que se produxo esti pasáu fin de selmana nel centru de la llocalidá y que denunció un mozu de 27 años. J.C.M.P. foi agredíu nes inmediaciones de la Plaza d’Abastos con un puñetazu nun güeyu que lu dexó sangrando tres ser increpáu verbalmente pola so condición sexual.

    Son estos unos fechos que’l propiu presidente del Principáu, Adrián Barbón, ya condergó vía Twitter y que supón otru casu más nel aumentu de la violencia escontra la comunidá LGTB.

    La concentración va ser esti martes a les 19:30 delantre del Ayuntamientu de La Pola Siero.

  • Un colexu con cuasi’l 100% de matriculación na asignatura sigue a estes altures de cursu ensin profesor d’asturianu

    Un colexu con cuasi’l 100% de matriculación na asignatura sigue a estes altures de cursu ensin profesor d’asturianu

    Les consecuencies de la falta d’oficialidá vense cada día- Nel colexu públicu Santiago Apóstol de Mieres, cuasi’l 100% del alumnáu de 4 grupos d’Educación Infantil (EI) demandaron recibir enseñances de Llingua Asturiana. La escuela lleva impartiendo estes enseñances na Educación Infantil dende hai una montonera años. Lo mesmo asocede col alumnáu d’Educación Primaria qu’escoyó mayoritariamente esta asignatura.

    La dirección del centru demandó a la Conseyería Educación, yá al acabar el cursu pasáu, la necesidá
    de contratar a tiempu completu a un profesor/a de Llingua Asturiana p’atender a tol alumnáu qu’escoyó recibir clases d’esta área. Sicasí, solo contrató a una persona a media xornada. Como consecuencia d’ello lleva ensin recibir clases d’Asturianu tol alumnáu d’EI dende primeros de cursu y va siguir ensin recibiles tou esti cursu si la Conseyería d’Educación nun camuda la so decisión.

    Esta forma d’actuar ye pa SUATEA, que denuncia’l casu «contraria a derechu y atiende esclusivamente a criterios economicistes de recortes nel gastu a costa de los derechos de los padres y madres». Amás, espliquen «Vulnera la llei d’Usu de 1998 que nel so artículu 10.1 diz: “Nel exerciciu de les sos competencies, el Principáu d’Asturies ha garantizar l’enseñu del bable/asturianu en tolos niveles y
    graos, respetando sicasí la voluntariedá del so aprendimientu”.

    Pa SUATEA «Nun ye comprensible qu’un Gobiernu que va promover la reforma del nuestru Estatutu Autonomía pa que recueya la oficialidá de les nuestres llingües siga actuando activamente contra los derechos llingüísticos de la ciudadanía yá recoyíos na normativa asturiana».

    Dende SUATEA denuncien a la opinión pública «esta forma d’actuar de la Conseyería d’Educación contrariamente al derechu, apoyamos la demanda de l’Asociación de Padres y Madres del Colexu» y, esixen «l’ampliación de la xornada llaboral de la persona contratada pa impartir enseñances de Llingua Asturiana de media a completa pa poder atender a tol alumnáu d’EI».

  • Agropec va cuntar con un mercáu d’Alimentos del Paraísu

    Agropec va cuntar con un mercáu d’Alimentos del Paraísu

    Mediu Rural pretende qu’esta iniciativa tenga continuidá n’ediciones próximes de la feria

    La 35.ª edición de la Feria del Campu y de les Industries Agrícoles, Ganaderes, Forestales y Pesqueres (Agropec) va cuntar pela primer vez con un mercáu de productos de la marca de calidá Alimentos del Paraísu, según anunció güei la directora xeneral de Desenvolvimientu Rural y Agroalimentación, Begoña López, na presentación d’esti eventu.

    Con esta iniciativa, la Conseyería de Mediu Rural y Cohesión Territorial pretende impulsar la promoción de los productos amparaos col sellu de calidá Alimentos del Paraísu, al favorecer la so presencia n’espacios como esta feria del campu, de gran tradición y que ye un referente a nivel rexonal. En xunto, van participar 25 productores, que van allugase nel pabellón 1 del recintu ferial y van poner a la venta quesos, miel, xata, choscu, vinu de Cangas, productos ecolóxicos, marañueles, chorizos y morcielles, güevos camperos, platos preparaos y xelaos ellaboraos con lleche propio de la esplotación.

    Otra de les novedaes d’anguaño van ser les cates y maridaxes con Alimentos del Paraísu. Amás, el programa tamién incluye la presentación del proyectu Leader La Panera de Asturias y una aplicación móvil pa los trámites rellacionaos cola Política Agraria Común (PAC).

    Agropec va desenvolvese del 24 al 26 de setiembre nel Recintu Ferial d’Asturies Luis Adaro. Mientres eses xornaes va haber esposiciones, debates y certámenes, ente los que destaca’l Concursu Nacional de la Raza Frisona, entamáu pola Confederación d’Asociaciones de Frisona Española (Conafe), que celebra la so 42.ª edición.

  • Turismu Xixón valora como mui positivu l’impactu de les sos campañes de branu

    Turismu Xixón valora como mui positivu l’impactu de les sos campañes de branu

    ‘Con ganes de ti’, ‘Todo el Cantábrico a tus pies’ y ‘Gijón/Xixón en toles ocasiones’… Estos fueron los tres eslóganes qu’acompangaron a la promoción turística de Xixón de magar se llevantó l’estáu d’alarma y los agospios pudieron reabrir les sos puertes al turismu. Estes campañes, que supunxieron una inversión de 85.000€, xeneraron más de 23 millones d’impautos de la marca Xixón, más de 73.000 clics pa siguir informándose y más de 4 millones de visualizaciones completes de los spots de la campaña.

    “Son resultados muy superiores a los esperados. Se ha conseguido un 77% más de impactos de los esperados y un 81% más de visualizaciones completas a los spots de la campaña. A pesar de que otros destinos turísticos también se pusieron las pilas, pudimos optimizar pujas para conseguir más impactos. El número de clics y los visionados también tuvieron porcentajes más altos que la media, lo que refleja que acertamos con las creatividades”, comenta Daniel Martínez Junquera, director de Xixón Turismu.

    El 9 de mayu d’anguaño, púnxose fin al estáu d’alarma impuestu pola mor de la COVID19 y permitióse l’apertura de los agospios hoteleros n’Asturies. Solo un día dempués, el 10 de mayu, Xixón Turismu asoleyó la so campaña “Xixón con ganes de ti”, na que s’afalaba a la xente a viaxar de nueves a la ciudá asturiana con una creatividá 100% emocional.

    En xunu, el mensaxe camudó a unu más empobináu a reforciar la imaxe de Xixón como destín turísticu. Nesti casu, emplegóse la creatividá de “Xixón en toles ocasiones”, protagonizada por Rodrigo Cuevas, ya incluyóse un spot nuevu orientáu a los y les amantes del surf, los deportes acuáticos y, en definitiva, la mar. Col eslogan “Todo el Cantábrico a tus pies”, el spot amosaba una hestoria basada nun fechu real y s’afitaba a la ciudá asturiana como puntu central de la costa norte.

    Les campañes incluyeron publicidá n’Internet al traviés de banners y videos en sites de medios de comunicación online y webs de viaxes, espardimientu y gastronomía, televisiones online xeneralistes y autonómiques, redes sociales (Instagram, Youtube y Tiktok), revistes de viaxes online (Traveler y Viajes National Geographic) y publicidá esterior en Madrid y Barcelona. Les aiciones taben empobinaes a los viaxeros y viaxeres nacionales, con especial atención a millenials, pareyes ensin fíos/es y families.

    Campaña internacional

    Pese a centrar la mayor parte de la campaña nel turismu nacional, Xixón Turismu tamién asoleyó una campaña pequeña en Tripadvisor dirixida a les rexones más averaes de Francia y Portugal. La campaña reforcióse con publicidá en medios de comunicación online y webs de viaxes nesos países. Esta campaña internacional algamó más de 1,6 millones d’impautos, 3.200 clics y más de 920.000 reproducciones completes de los spots.

    Otres aiciones

    De forma paralela, Xixón Turismu entamó otres aiciones de publicidá p’atrayer turistes de cara al branu: publicidá nos pases en cines de la película “A todo tren: destino Asturias” y d’otres películes empobinaes a públicu familiar, emisión del programa Miradas Viajeras dende Xixón, publirreportaxes na revista DeViajes y en otres especializaes en turismu y la collaboración con dellos blogs ya influencers de viaxes.