El Conseyu de Gobiernu alcordó güei conceder trés Medayes d’Asturies: una na so categoría d’oru a la comisión encargada de redactar el primer borrador del Estatutu d’Autonomía, y dos de plata: a la médica María Neira, directora del Departamentu de Salú Pública y Mediu Ambiente de la Organización Mundial de la Salú (OMS), y al Club de Guisanderes d’Asturies.
La Medaya d’Asturies acútase, según la Llei Reguladora d’Honores y Distinciones del Principáu, pa premiar méritos singulares en verdá que concurran en persones o instituciones que la so importancia y trescendencia pa los intereses xenerales de la comunidá autónoma fáigan-yos acreedores d’esta reconocencia pública.
Les Medayes d’Asturies 2021
La Comisión de los 8
La Comisión de los 8 recibe anguaño la Medaya d’Oru d’Asturies pola so esencial contribución al desenvolvimientu del procesu autonómicu nel Principáu y a la constitución de la mesma comunidá.
El 25 de xunu de 1979, los partíos políticos con representación parllamentaria nomaron a los sos representantes na comisión redactora del anteproyectu del Estatutu d’Autonomía p’Asturies, la llamada Comisión de los 24, integrada por 6 miembros nomaos pol Partíu Socialista Obreru Español (PSOE), 6 pola Unión de Centru Democráticu (UCD), 6 pol Partíu Comunista d’Asturies (PCA) y 6 por Coalición Democrática (CD). Nel so senu constituyóse una subcomisión técnica, conocida como Comisión de los 8, encargada d’ellaborar el primer borrador de la llei. Esi grupu taba formáu por ocho homes: Francisco Sosa Wagner y Bernardo Fernández Pérez, designaos pol PSOE; Juan Bautista Fernández Fidalgo y Juan Casero Lambás, por UCD; Francisco José Bastida Freijedo y Ignacio de Otto y Pardo (yá fallecíu), por PCA, y Juan Luis de la Vallina Velarde y José Manuel Riesco Morán (dambos morrieron), por CD.
El trabayu que desempeñaron los sos miembros treslladó al Principáu l’espíritu de concordia que fixera posible l’aprobación de la Constitución de 1978 como espaciu de convivencia nel que caben diverses orientaciones polítiques. Esi consensu, frutu de la Transición democrática, púnxose de manifiestu n’Asturies nel Estatutu d’Autonomía, llei institucional básica qu’anguaño celebra’l 40 aniversariu. La so redacción foi frutu de negociaciones y cesiones recíproques ente toles fuercies polítiques y dexó la nacencia de la comunidá.
Les víes d’accesu a l’autonomía establecíes na Constitución yeren, en resume, dos: la del artículu 143, con un techu competencial inicial más restrinxíu, y la del 151, col máximu techu competencial. N’Asturies escoyóse la vía del 143, magar col alcuerdu de los grupos pa reformar l’Estatutu a los cinco años de la so aprobación, cola mira d’algamar competencies nueves non recoyíes nel testu inicial. Nesti procesu, 72 de los 78 conceyos asturianos amosáronse favorables al accesu a l’autonomía pela vía del artículu 143. L’Estatutu d’Asturies foi’l primeru que s’aprobó per esta vía y tamién el primeru que dio llugar a la constitución d’una comunidá autónoma uniprovincial.
María Neira
El Conseyu de Gobiernu concede la Medaya de Plata d’Asturies a la doctora María Purificación Neira González como reconocencia institucional a los sos induldables méritos directivos, asistenciales y sociales, la so destacada trayectoria profesional y la so clara vocación humanitaria.
María Neira (Llangréu, 1962) llicencióse en Medicina y Ciruxía na Universidá d’Uviéu y especializóse en París n’Endocrinoloxía, Enfermedaes Metabóliques y Nutrición. Tamién tien un diploma internacional en Respuesta a Emerxencies y Xestión de Crisis de la Universidá de Xinebra (Suiza).
Dende setiembre del 2005 dirixe’l departamentu de Salú Pública y Mediu Ambiente de la Organización Mundial de la Salú (OMS), onde enantes tuvo al frente del Programa d’Enfermedaes Tresmisibles y coordinó’l grupu mundial de llucha contra’l cólera. Tamién foi presidenta de l’Axencia Española de Seguridá Alimentaria del Ministeriu de Sanidá y Consumu.
Primeramente trabayó pa la organización Médicos ensin Fronteres n’El Salvador y Honduras, pal Ministeriu de Salú de Mozambique y con Naciones Xuníes en Ruanda.
Ente otres distinciones, recibió la Medaya de la Orde del Méritu Nacional que concede’l Gobiernu de Francia (2006) y nel 2009 recoyó’l Premiu Princesa d’Asturies de Cooperación Internacional, en nome de la OMS, xunto con Margaret Chan.
El llabor de la OMS, onde María Neira desempeña un cargu fundamental, resulta güei más importante que nunca, como organismu internacional dedicáu a lluchar contra les enfermedaes y a combatir pandemies como la del coronavirus.
Club de Guisanderes d’Asturies
El Club de Guisanderes d’Asturies recibe anguaño la Medaya de Plata pol so exemplar llabor pa salvaguardar recetes y platos escaecíos de la gastronomía rexonal y reivindicar tamién la función de les muyeres nel caltenimientu y tresmisión de la cultura gastronómica.
La producción d’alimentos d’alta calidá y el so aprovechamientu culinariu dio llugar n’Asturies a una escelente gastronomía basada na tradición y apegada al territoriu. La importancia de les muyeres en dicha llabor foi determinante, yá que fueron les encargaes de caltener la conocencia pa tresmitila de xeneración en xeneración. Pa reivindicar esa función, en 1997 creóse’l Club de Guisanderes d’Asturies. Esti grupu, formáu por grandes cocineres, evita que la tradición culinaria se pierdase y incorpora les ellaboraciones típiques tanto en cases particulares como en restoranes d’alta cocina. Asina mesmo, recupera y divulga la historia de cada platu típicamente asturianu n’actos de promoción tanto dientro como fuera de la comunidá, lo que convierte a estes muyeres en fieles embaxadores de la cultura rexonal.
Exemplu d’amor pa colo propio y d’arrogancia pa colo colectivo, comparten les sos conocencies en llibros como Guía Club de Guisanderas (2002), onde axunten 160 recetes; La cocina legendaria. Recetas de antaño su historia y preparación (2006), con otres 140, y Las recetas de las guisanderas de Asturias, nel qu’establecen un percorríu d’oriente a occidente de la comunidá al traviés de 160 platos.
Los establecimientos rexentaos por estes cocineres, asitiaos en munchos casos en zones rurales, convirtiéronse en grandes atractivos pal turismu interior y esterior, lo que constituye un motor económicu fundamental pa la pervivencia de los pueblos.
