Xixón al día

Categoría: Asturies

  • Un parapentista queda atrapáu nunos cables d’alta tensión

    Un parapentista queda atrapáu nunos cables d’alta tensión

    Efectivos de Bomberos del Serviciu d’Emerxencies del Principáu d’Asturies (SEPA) rescataron ilesu a un parapentista a motor que quedó atrapáu nunos cables d’una llínea d’alta tensión, a unos cuatro metros del suelu, en Tamón, Carreño. L’home atopábase en perfectu estáu y nun precisó treslláu sanitariu. Hasta’l llugar el Serviciu d’Atención Médica Urxente (SAMU) unvió l’equipu d’Atención Primaria de Lluanco y l’ambulancia de soporte vital básicu de la zona.

    Mientres los técnicos de la compañía eléctrica verificaben que se cortara’l suministru los bomberos asitiaron la autobomba urbana llixera debaxo del afectáu pa protexer una posible cayida enriba mientres-yos confirmaben que se cortara’l suministru. Enriba del vehículu asitiaron unes colchonetes para amortiguar l’impactu si se produxera. Una vegada que los técnicos de la empresa eléctrica confirmáron-yos que podíen proceder, cola autoescalera, rescataron al afectáu.

    El Centru de Coordinación d’Emerxencies del 112 Asturies recibió l’avisu a les 12.32 hores. La llamada realizola una persona que vio al parapentista y taba onde él. Indicó que s’atopaba bien pero taba engabitáu a unos cuatro metros. Al llugar solo había accesu para camiones pequenos.

    La Sala 112 del SEPA pasó l’avisu al SAMU y activó una dotación de bombera del parque avilesín. Amás comunicó lo asocedío a la Guardia Civil y a los responsables del suministru eléctricu qu’unvió a los sos técnicos a la zona. Rematada la intervención retiraron del llugar para tornar a la so base onde llegaron a les 14.42 hores.

  • Activáu’l plan llagos de Cuadonga hasta’l 16 d’ochobre

    Activáu’l plan llagos de Cuadonga hasta’l 16 d’ochobre

    El plan especial de tresporte públicu a los llagos de Cuadonga ya ta activu. Entamó esti sábadu y va tar en funcionamientu hasta’l 16 d’ochobre. Col fin de protexer el Parque Nacional Picos d’Europa (Reserva de la Biosfera), nos díes nos que’l sistema tea operativu la carretera ente Cuadonga y los llagos va permanecer cerrada al tráficu de vehículos particulares ente les 8.30 y les 21.00 hores. Los díes 8 de xunu (cola cicloturista), 25 de xunetu (Fiesta del Pastor) y 8 de setiembre (Día d’Asturies), va haber una regulación especial.

    Nesti periodu branizu la primer xubida n’autobús hasta los llagos va ser a les nueve de la mañana y la postrera a les siete y media de la tarde. La postrera de baxada de los llagos va ser a les ocho y media de la tarde. Esti tresporte públicu colectivu garantiza’l desplazamientu de tolos visitantes ente Cangues d’Onís, Cuadonga y los llagos, efectuando paraes nos principales puntos d’interés de la ruta. Cuenta, amás, como novedá con un sistema d’información a bordu.

    Les tarifes vixentes establecen un preciu de 9 euros p’adultos y de 3,50 pa neños menores de doce años. Los menores de trés años viaxen de baldre. Amás, va haber un autobús que xune Cangues d’Onís y Cuadonga, con un costu por billete de 1,55 euros. El preciu de los aparcamientos habilitaos na redolada de Cuadonga ye de 2 euros por vehículu y día.

    El plan especial yá funcionó esti añu del 13 d’abril al 5 de mayu y va volver facelo del 1 al 3 de payares y del 6 al 9 d’avientu.

  • Evacuáu un montañeru que se mancó en Peña Ubiña

    Evacuáu un montañeru que se mancó en Peña Ubiña

    El Grupu de Rescate de Bomberos del Serviciu d’Emerxencies del Principáu d’Asturies (SEPA), a bordu del helicópteru medicalizáu, evacuó a un varón de 47 años que se mancó nuna pierna mientres s’atopaba faciendo una ruta na Vega de Retuerto, na zona de Peña Ubiña la Pequeña, en Ḷḷena. L’afectáu, que presentaba una posible quebra de tibia y peroné, foi treslladáu al Hospital Universitariu Central d’Asturies (HUCA).

    El Centru de Coordinación d’emerxencies recibió l’avisu a les 11:51 hores. Na llamada indicóse que yeren un grupu d’ocho persones y un mozu paecía tener un esguince. De momentu movilizóse al equipu de rescate de Bomberos del SEPA, a bordu de l’aeronave medicalizada. El grupu de rescate pudo aterrizar col helicópteru na vega na que s’atopaba’l senderista accidentáu. Al paecer ésti sufrió una cayida. La médica-rescatadora inmovilizó la estremidá mancada del varón, asitiándo-y una férula. En xubiendo a l’aeronave, treslladáronlu al HUCA.

    L’equipu de rescate dio per rematada la intervención a la so llegada a base, a les 12:51 hores. La sala del 112 del SEPA informó del sucesu a la Guardia Civil y al Serviciu d’Atención Médica Urxente (SAMU).

  • Muerre un mozu de 25 años nun accidente con un tractor

    Muerre un mozu de 25 años nun accidente con un tractor

    Un varón de 25 años morrió, por causes que se desconocen, en sufriendo un accidente col tractor nel que circulaba en Yernes y Tameza. Hasta la zona allegó’l Grupu de Rescate de Bomberos del Serviciu d’Emerxencies del Principáu d’Asturies (SEPA), a bordu del helicópteru medicalizáu. El médicu-rescatador, al pie de un bomberu-rescatador y personal sanitario movíu pol SAMU tuvieron realizando maniobres de reanimación cardiopulmonar a la víctima. L’accidentáu finó nel llugar del entorno del tractor.

    El Centru de Coordinación d’Emerxencies recibió l’avisu a les 14:24 hores. Na llamada indicóse qu’un tractor entornara na carretera, a un kilómetru de Yernes. L’accidentáu taba na carretera y nun taba atrapáu.

    Darréu movilizóse al equipu de rescate, a bordu del helicópteru medicalizéu, que nesos momentos taba rescatando a una muyer que sufriera una cayida baxando a la sablera d’Aguilera, en Gozón, Nesti casu, el médicu-rescatador y un bomberu-rescatador, yá taben cola afectada, que presentaba una luxación de costazu. N’amenorgándo-y la luxación ya inmoviliza-y la estremidá, con una férula, treslladáronla al Hospital San Agustín. Dende ehí partieron hacia Yernes y Tameza.

    Una vegada nel llugar del accidente del tractor, l’equipu de rescate empezó coles maniobres de RCP, qu’unos vecinos de la zona yá-y taben practicando al accidentáu, y nes que tamién tomaron parte l’equipu médicu activáu pol Serviciu d’Atención Médica Urxente (SAMU)..

    Finalmente nada pudo faese pa salvar la vida al varón. El grupu de rescate dio per rematada la intervención a la so llegada a base, a les 15:43 hores. La sala del 112 del SEPA informó del sucesu al SAMU, qu’activó al equipu médicu d’Atención Primaria de Grau y l’ambulancia de soporte vital básicu. La Guardia Civil fíxose cargu de los trámites para’l llevantamientu del cadabre.

  • Un repartidor, firíu nun accidente de tráficu en Villaviciosa

    Un repartidor, firíu nun accidente de tráficu en Villaviciosa

    Una persona resultó firida en saliéndose de la vía col vehículu que conducía, una furgoneta que tresporta naranxes, cuando circulaba pola A-8, al altor del puntu kilométricu 361,70, en sentíu Xixón, nel conceyu de Villaviciosa. Según los datos facilitaos pol Serviciu d’Atención Médica Urxente (SAMU) el mancáu, un varón de 60 años d’edá, presentaba, por cuenta de más pruebes y hasta nueva valoración médica, policontusiones de pronósticu reserváu. Foi atendíu pol equipu médicu de la UVI-móvil de Xixón y treslladáu al Hospital de Cabueñes.

    L’afectáu tuvo que ser escarceláu del interior del turismu por efectivos de Bomberos del Serviciu d’Emerxencies del Principáu d’Asturies (SEPA) con base nel parque maliayo. El mancáu quedara atrapáu per una pierna pol salpicadero del furgón.

    El Centru de Coordinación d’Emerxencies del 112 Asturies recibió l’avisu a les 11.52 hores. Na llamada señalaba qu’unu de los sos emplegaos tuviera un accidente, saltando los aribags de la furgoneta, que tresportaba naranxes. Desconocía más detalles pero facilitó’l teléfonu del afectáu.

    Amás pasar l’avisu al SAMU activóse una dotación de bomberos y contactóse col centru de control de la vía de comunicación que minutos dempués comunicaben l’allugamientu de la furgoneta ya informaben que’l so conductor taba atrapáu. N’escarcelando al afectáu y realizar les oportunes xeres de seguridá los bomberos retiraron del llugar a les 13.38 hores para tornar al so parque. L’incidente poner en conocencia de la Guardia Civil de Tráficu.

  • El PP pierde un senador por Asturies: «Retroceder ye perder»

    El PP pierde un senador por Asturies: «Retroceder ye perder»

    El PP tien un senador menos por Asturies depués del 26-M. La candidatura de Teresa Mallada nes elecciones del pasáu domingu resistió enforma l’emburrión socialista, pero perdió un diputáu. El PSOE duplicó en votu a los populares, que pierden el representante por designación autonómica col que cuntaben na Cámara Alta. La asignación d’estos dos escaños nel Senáu fáise al aplicar el sistema D’Hont al númberu de miembros de los grupos parlamentarios.

    La presidenta del Partíu Popular d’Asturies, Mercedes Fernández, llamó a la «reflexón» nel so analís de los resultaos del 26-M n’Asturies, realizáu na so intervención inicial nel Comité Executivu Autonómicu del PP, celebráu n’Uviéu. N’él, felicitó a los candidatos que llograron la mayoría absoluta nos sos conceyos y a aquellos que, ganando les elecciones, van precisar de pactos pa gobernar.

    «Los electores reconócennos na austeridá del gastu públicu, l’amenorgamientu d’impuestos y les conductes exemplares»

    «Los electores reconócennos na austeridá del gastu públicu, l’amenorgamientu d’impuestos y les conductes exemplares», afirmó la líder del PP. La presidenta llamentó que, con esos resultaos, los dos senadores asturianos por designación autonómica seyan del PSOE, daqué que nunca asocediera hasta la fecha.

    Mercedes Fernández, énte la «escesiva diferencia» col PSOE, espunxo que la resultancia electoral «nun foi bonu». «Tolo que ye sumar ye ganar, pero tolo que ye recular ye perder», aseveró. El votu esterior confirmó esi enclín. «Hai espertos en comunicación política que dicen que la meyor campaña ye aquella que ye difusa; yo toi en desalcuerdu, hai qu’escoyer cuatro o cinco temes, de forma machacona, y marcar l’axenda», razonó, poniendo como exemplu «la eliminación del Impuestu de Socesiones«.

    A nivel nacional y sobre les resultancies del PP, la presidenta aseguró que les últimes resultancies supunxeron una meyora respecto a la «llombada» de les xenerales. «L’autocomplacencia inxustificada paraliza la meyora», añadió.

  • Cuatro firíos en Casu tres salise de la vía’l coche nel que vixaben

    Cuatro firíos en Casu tres salise de la vía’l coche nel que vixaben

    Cuatro persones resultaron firíes de diversa considerancia en saliéndose de la vía’l turismu nel que viaxaben. El vehículu cayó per un desnivel d’ente 10 y 20 metros, a un kilómetru de la salida de la localidá d’Orllé en dirección a El Campu, en Casu. L’afectada de mayor considerancia ye una muyer, de 41 años d’edá que foi treslladada al Hospital Universitariu Central d’Asturies (HUCA) con politrauma de pronósticu reserváu.

    La muyer foi atendida nel llugar del accidente pola médica-rescatadora del Grupu de Rescate movíu al llugar col helicópteru medicalizáu. En emprestándo-y asistencia foi evacuada, inmovilizada en camiya, acompañada pola médicu, por aciu una operación de grúa na que s’esplegaron unos 45 metros de cable, hasta l’aeronave.

    Según los datos facilitaos pol Serviciu d’Atención Médica Urxente (SAMU) otros dos firíos, dos varones de 40 y 51 años, fueron sacupaos nuna ambulancia de soporte vital básicu al Hospital Valle del Nalón con pronósticu leve. El cuartu afectáu, otru varón de 52 medios, podía movese polos sos medios. Nel turismu viaxaba una quinta persona que resultó ilesa.

    Nel turismu viaxaba una quinta persona que resultó ilesa

    Amás del Grupu de Rescate col helicópteru medicalizáu hasta l’incidente movióse, per tierra, una dotación de Bomberes del Serviciu d’Emerxencies del Principáu d’Asturies (SEPA) con base nel parque de Samartín del Rei Aurelio.

    Cuando llegaron al llugar tolos afectaos salieren pelos sos propios medios del interior del coche. Dos bomberos aportaron hasta’l coche y aseguraronlu col cable del furgón multisocorro. Amás, ayudaron a unu de los mancaos a xubir hasta la carretera onde esperaba l’ambulancia.

    El Centru de Coordinación d’Emerxencies del 112 Asturies recibió l’avisu a les 16.31 hores. Na llamada señalaben qu’un vehículu cayérase por un terremplén ente 20 o 30 metros. Tolos ocupantes taben fuera del turismu. La Sala 112 del SEPA movilizó a Bomberos del parque de Samartín del Rei Aurelio y al Grupu de Rescate col helicópteru medicalizado. Amás, pasó la llamada al SAMU qu’unvió l’ambulancia de soporte vital básicu de Llaviana y comunicó lo asocedío a la Guardia Civil. Rematada la intervención el Grupu de Rescate tornó a la so base en La Morgal a les 18.31 hores y los bomberos llegaron a parque a les 18.43 hores.

  • Prohibío fumar en cuatro playes d’Asturies

    Prohibío fumar en cuatro playes d’Asturies

    Acabóse fumar en cuatro playes d’Asturies. La Conseyería de Sanidá va prohibir esti branu’l consumu de tabacu nes sableres de Misiego, Miami y El Puntal, en Villaviciosa, y Los Quebrantos, en Sotu’l Barcu. El programa Sableres ensin fumu tien por oxetivu promover una vida llibre d’esti productu, prevenir el consumu y fomentar el respetu a les persones y al mediu ambiente. La iniciativa va desenvolvese anguaño como esperiencia piloto. La intención ye estendelo darréu a otros conceyos y constituyir una rede autonómica de sableres ensin fumu. Esta propuesta educativa y de concienciación social pa promocionar estilos de vida saludables va desenvolvese en collaboración colos dos conceyos.

    Nos cuatro arenales calificaos como Sableres ensin fumu va promovese que nun se fume en tola zona o n’árees señalizaes, sacante los espacios abiertos de los locales d’hostelería. Preténdese, amás, protexer del fumu del tabacu a neños y adolescentes. La esposición al fumu del tabacu ye nociva en toles etapes de la vida y especialmente nes edaes más tempranes.

    Nun se va poder fumar en tola zona o n’árees señalizaes, sacante los espacios abiertos de los locales d’hostelería

    El Gobiernu asturianu destaca que la prohibición de fumar n’estes cuatro playes fomenta tamién el respetu al mediu ambiente. Los filtros de los pitos nun son biodegradables y pueden tardar hasta 10 años en descomponese. Tán diseñaos p’atropar los componentes del tabacu, incluyíes les sustances químiques más peligroses, que son lliberaes en contactu cola agua y lleguen a ríos y mares. Una colilla contamina ocho llitros d’agua. Amás, al refundiales nes sableres, pueden ser inxeríes por especies marines o acabar en manos de neños.

    Dalgunes de les sustances nocives que se toparon nes colilles son pesticides, que provoquen un potencial efectu tóxicu sobro’l mediu y pueden atropase na cadena alimentaria. Tamién se detectaron otres como’l etilfenol, la nicotina, el mentol, metales o alquitrán y carcinóxenos, ente otres.

    Esta situación supon una seria amenaza pal mediu ambiente, yá que n’España fumen unos 89 millones de pitos al día, lo que supon 32.455 millones de filtros añalmente, según un informe del Comité Nacional pa la Prevención del Tabaquismu. Tán fechos d’acetato de celulosa, una sustanza non biodegradable que se disgrega en pequenes pieces, pero que’l so material fonte nunca desapaez. Nes sableres, el 14% de borrafes retiraes son filtros de pitos. La campaña quier sensibilizar a la población infantil y xuvenil énte’l tabaquismu ya informar sobro los efectos nocivos del fumu.

  • Daniel Ripa, sobre’l 26-M: «Tócanos cambiar coses»

    Daniel Ripa, sobre’l 26-M: «Tócanos cambiar coses»

    «Lo que toca cuando les resultancies nun son los esperaos ye escuchar a la xente p’ameyorar y camudar coses». Daniel Ripa analizó esti miércoles n’Uviéu los resultaos electorales del 26-M. Podemos perdió nestos comicios más de la metá de la representación na Xunta Xeneral, pasando de nueve a cinco diputaos. «Tócanos escuchar a la xente p’ameyorar y camudar coses, avanzando y trabayando muncho, reforzando la organización, abriendo un diálogu, trazando estratexes al mediu plazu, con mayor implicación social y más apertura». El secretariu xeneral de la formación morada compareció énte los medios de comunicación en compañía d’Andrés Fernández Vilanova, diputáu saliente y responsable d’Organización, y de Nuria Rodríguez, vocera autonómica del partíu y diputada electa.

    Daniel Ripa anunció la convocatoria pa esti sábadu d’una xunta del Conseyu Ciudadanu y del Conseyu Territorial de Podemos Asturies pa valorar unos resultaos que, «ensin ser los qu’esperábamos», asítiense como «los meyores de Podemos» en toles comunidaes autónomes. «Somos l’únicu llugar onde se superó la barrera del 10% nel Parlamentu, l’únicu onde la suma de Podemos y d’Izquierda Xunida supera la suma de les elecciones xenerales». Reconoció que «hubo una baxada xeneralizada en toles comunidaes y en toles ciudaes, que tien enforma que ver con una inercia de les elecciones xenerales onde la victoria de Pedro Sánchez asitióse tamién nel restu d’elecciones d’esti ciclu».

    «La victoria de Pedro Sánchez asitióse tamién nel restu d’elecciones d’esti ciclu»

    A pesar d’ello, aseguró, «les resultancies déxennos tener fuerza nel Parlamentu asturianu, porque’l PSOE sigue ensin cuntar cola mayoría pa gobernar. Y a nivel municipal nuesa presencia pasa de 22 a 23 conceyos, amenorgando daqué’l númberu de conceyales». Recordó que «nestos cuatro años consiguimos ésitos, tantu a nivel municipal como autonómicu. Nel Parlamentu asturianu consiguimos devolver a les families la delda del ERA, plantegar midíes contra les llistes d’espera sanitaries, amenorgar les matrícules de 0 a 3 y universitaries, impulsar procesos xudiciales en casos de corrupción… Y son llogros que se van a caltener». Refirióse tamién a les resultancies electorales d’Izquierda Xunida y afirmó que «pa nós nun ye una bona noticia la potencial perda del grupu parlamentariu d’IX». Por ello, manifestó, «apostamos por que nun se produza. Tamos por buscar soluciones pa que xuntos avancemos en busca d’una Asturies que vaiga meyor».

    Pela so parte, Nuria Rodríguez esplicó que «tamos equí pa faer política pa la ciudadanía. Lo único qu’importa son les polítiques de cambéu, les que pueden faer que la xente ameyore la so situación. Porque Asturies ta nun momentu críticu, cada selmana hai nueves trabayadores que ven apeligrar los sos puestos de trabayu». Por tanto, alvirtió, «quien quiera xugar al intercambiu de cromos, a intereses de sillones y de sielles, que lo faigan so la so responsabilidá». Sobro les resultancies electorales collechaos pol partíu moráu, aseguró que «nun ye innecesariu focalizar la responsabilidá en nenguna persona en concretu. De lo que se trata ye d’analizar con criteriu p’avanzar y p’ameyorar la situación».

    Andrés Fernández Vilanova queda fuera de la Xunta al nun consiguir representación na circunscripción occidental

    Andrés Fernández Vilanova, diputáu saliente pola circunscripción occidental, señaló que «despídome como parlamentariu dempués de cuatro años bien intensos. Esta vegada nun pudo ser, yera difícil pero teníamos qu’intentar de toes toes sacar representación nel oriente y nel occidente. Sicasí, estos territorios van siguir teniendo la so voz enriada al traviés de Podemos nes instituciones». Amestó que «defendimos les necesidaes de la vida nesos territorios y, nel mio casu particular, engarré contra la corrupción nel sistema sanitariu y por una sanidá meyor. Hai munches coses que dexamos feches y esto danos una prestu enorme».

    Quixo estimar amás «l’honor de poder representar a la xente del Occidente y de poder engarrar pola sanidá pública mientres estos cuatro años. Agora vuelvo a la mio vida profesional, porque quien entramos en Podemos facer pa sirvir a Asturies, non pa sirvinos d’ella. Creemos que la política ye un mediu pa camudar y ameyorar la vida de la xente, non pa vivir d’ella». Y dexó claro que «a quien na nueche electoral frotaben les manos al ver el descensu de Podemos diría-yos que nun rieren tantu, porque agora, anque tengamos menos diputaos, sabemos muncho más, conocemos les sos trampes, los sos procedimientos d’engañu, y vamos siguir desatapándolos».

  • Moriyón renuncia a ser diputada pero va siguir lliderando Foru

    Moriyón renuncia a ser diputada pero va siguir lliderando Foru

    Carmen Moriyón renuncia a l’acta de diputada. La candidata de Foru Asturies a la presidencia del Gobiernu d’Asturies asumió esti miércoles como propios los malos resultaos del partíu nes elecciones autonómiques del pasáu domingu y anunció al so intención de nun ocupar l’escañu que-y correspuende na Xunta Xeneral. «Cuando se llogra una derrota en política, dimítese. Ye lo que procede facer, anque nun sía la práctica habitual», resaltó.

    La tovía alcaldesa de Xixón en funciones aseguró qu’entró en política «col deséu y l’ilusión de contribuyir a camudar fechos y usos de la política«. Aseguró sentir «una alcordanza imborrable con toles persones que trabayaron conmigo y tanta xente que me paró pola cai pa dame ánimos».

    [Llea’l comunicáu íntegru de Carmen Moriyón]

    Moriyón llamentó «los erros que pudiera cometer», pero aseguró que va siguir como presidenta de Foru. «Sigo creyendo nesti proyectu. Débo-ylo a los más de 34.000 asturianos que colos sos votos dexáronnos llograr 49 conceyales en 21 conceyos». Comprometióse a «favorecer los cambeos necesarios» nel partíu «p’afaenos al nuevu escenariu políticu y a lo que la sociedá asturiana demanda». Y defendió que la so formación ye «l’únicu partíu con un proyectu y una ideoloxía propia más allá de personalismos: Asturies nel centru y centraos n’Asturies».

    La renuncia de Carmen Moriyón a l’acta de diputada va suponer la so vuelta a la plaza de Ciruxía Xeneral nel Hospital de Cabueñes. Una marcha que coincide nel tiempu cola decisión del candidatu de Foru a l’Alcaldía de Xixón, Álvaro Muñiz, d’arrenunciar al acta de conceyal pa dar pasu a Rubén Hidalgo.