Categoría: Asturies

Benigno Fernández Fano, nuevu conseyeru d’ Infraestructures

El Conseyu de Gobiernu celebró esti llunes una xunta estraordinaria na que s’alcordó’l cese de Benigno Fernández Fano como viceconseyeru de Mediu Ambiente. Paralelamente, el presidente del Principáu, Javier Fernández, robló’l decretu pol que se lu noma conseyeru d’Infraestructures, Ordenación del Territoriu y Mediu Ambiente en sustitución de Fernando Lastra, que dexa’l cargu pa tomar posesión del so escañu nel Senáu.

Benignu Fernández Fano (Muñás de Riba. Valdés, 1956) ye llicenciáu en Veterinaria pola Universidá de Llión. Dende 1987 forma parte del cuerpu técnicu superior de l’Alministración autonómica y desempeñó numberoses responsabilidaes.

En 1989 asumió’l cargu de subdirecor xeneral de Sanidá Animal de la Xunta de Galicia y un añu más tarde, el de subdirector axuntu de Sanidá Animal del Ministeriu d’Agricultura, Pesca y Alimentación. En 1991 tomó posesión como director rexonal d’Agricultura y Ganadería del Principáu y dos años depués asumió la dirección de la Fundación Oso d’Asturies. Ente 1999 y 2013 foi xerente de la comisión rexonal del Bancu de Tierres y dende entós hasta 2016 ocupó la xefatura de serviciu de Xestión d’Ayudes na Conseyería de Desenvolvimientu Rural y Recursos Naturales.

El 28 de xunetu de 2017 foi nomáu pol Conseyu de Gobiernu viceconseyeru de Mediu Ambiente, un departamentu del que dependíen hasta agora les direcciones xenerales de Calidá Ambiental, Prevención y Control Ambiental y Recursos Naturales.

21/05/2019
«Nengún asturianu s’averó al PP para pidir la oficialidá»

La presidenta del Partíu Popular d’Asturies, Mercedes Fernández, destacó esti sábadu en Noreña «nengún asturianu averóseme nunca para pidime la oficialidá del asturianu«. Mercedes Fernández participó na villa Condal na presentación del programa electoral del PP de Noreña, al pie de la candidata local, Sandra Nieto, y la presidenta de los populares noreñenses, Marian Velasco.

Mientres la so intervención, la presidenta afirmó que mientres los últimos años cantidá d’asturianos averáronse para pidir «suprimir l’impuestu de sucesiones, iguar carreteres, cuntar con un AVE como’l del restu de el españoles o acabar con llistes d’espera; agora, que fixéramos la cooficialidá del bable col castellán eso nun nos lo pidió naide». Mercedes Fernández señaló qu’esta evidencia «ye un bon termómetru de les necesidaes y de saber por onde van los tiros de lo que quier la mayoría de los asturianos, y non lo d’unos pocos que quieren imponer a los demás lo qu’ellos quieren».

A esti respectu, Cherines recordó que foi precisamente en Noreña onde hubo «non poques iniciatives que pretendíen imponer la cooficialidá», daqué que consideró un «engañu» porque dende un conceyu eso non puede faese. «Nós llevamos l’asuntu a los tribunales y tuvimos el prestu de ganar, anque tuvimos que gastar los cuartos, pero repunximos el sentíu común y la llegalidá que dalgunos intentaben quebrar», sorrayó Mercedes Fernández.

20/05/2019
Rescaten a una muyer que rompió un todiyu en Cabrales

El Grupu de Rescate de Bomberos del Serviciu d’Emerxencies del Principáu d’Asturies (SEPA), a bordu del helicópteru medicalizáu, evacuó a una muyer que sufrió una cayida mientres faía una ruta na zona de Ponte Justatorio, cerca de la collada La Pernal, en Cabrales. L’afectada, de 50 años, presentaba una quebra del todiyu derechu y foi treslladada al Hospital Comarcal de Les Arriondes.

El Centru de Coordinación d’Emerxencies recibió l’avisu a les 15:41 hores. Na llamada indicóse que yeren un grupu de monte y una muyer sufriera una cayida y paecía que se rompiera una pierna. Tamién s’apuntó que taben n’una zona montiega y taben na redolada de la mayada d’El Vierru. Darréu movilizóse al equipu de rescate de Bomberos del SEPA, a bordu de l’aeronave medicalizada.

L’arboláu de la zona enzancó la localización de l’afectada. Finalmente, en llogrando dar cola mesma, l’equipu de rescate, un médicu-rescatador y un bomberu-rescatador, aportaron hasta la mesma. N’atendiendo a la ferida ya inmoviliza-y la pierna mancada, procedióse a la so evacuación. El grupu executó una operación de grúa, na que, col triángulu de rescate, se izó al médicu-rescatador y a la senderista al helicópteru. Una vegada toos na aeronave, dar en el so treslláu al Hospital Comarcal de Les Arriondes.

L’equipu de rescate dio per rematada la intervención a la so llegada a base, a les 18:12 hores. La sala del 112 del SEPA comunicó’l sucesu a la Guardia Civil, al Serviciu d’Atención Médica Urxente (SAMU) y a los 112 de Castiella y Llión y Cantabria.

20/05/2019
Gimena Llamedo: «Queremos avanzar hacia la gratuidá de los museos»

La cabeza de llista del PSOE nel Oriente d’Asturies, Gimena Llamedo, na so visita esta tarde, con motivu del Día de los Museos, el Muséu del Xurásicu d’Asturies (MUJA) en compañía de Josep Borrell, cabeza de llista del PSOE a les elecciones europees y l’alcaldesa de Colunga, Sandra Cuesta.

Tres la visita, Llamedo punxo en valor el muséu con mayor númberu de visitantes al pie de Tito Bustillo, anunció que «ún de los compromisos colos que’l PSOE se presenta a les próximes elecciones ye avanzar, en casu de gobernar, hacia la gratuidá nes visites a los museos que sían titularidá del Principáu«. «Trátase», esplicó, «d’una midida con un doble oxetivu: per una parte, faer accesible la cultura a tolos ciudadanos, y por otru, amontar el númberu de visitantes».

«Trátase d’una midida», siguió Llamedo, «yá enllantada con notable ésitu n’otros países d’Europa que contribuyó al aumentu de visites». Por tanto, considera que «va ser un elementu de dinamización de la zona y un impulsu económicu más para la Contorna del Oriente, y para Asturies polo xeneral»

19/05/2019
Un muertu y dos firíos nun accidente de tráficu en Nava

Un varón morrió y dos persones, un varón y una muyer, resultaron mancaes nun accidente de tráficu ente dos vehículos na N-634 n’El Remediu, en Nava. Según los datos facilitaos pol Serviciu d’Atención Médica Urxente (SAMU) les dos persones mancaes fueron treslladaes al Hospital Universitariu Central d’Asturies (HUCA).

El Centru de Coordinación d’Emerxencies recibió l’avisu a les 19:15 hores. Na llamada indicóse que se produxera un choque ente dos turismos y había xente dientro de los coches. Darréu movilizóse al Xefe de Bomberos del Serviciu d’Emerxencies del Principáu d’Asturies (SEPA) de la Zona Centro Esti y a seis efectivos de bomberos de los parques de Piloña y Samartín del Rei Aurelio, que se treslladaron con un vehículu primera salida y dos furgones multisocorro.

Cuando llegaron a la zona, los bomberos comprobaron que los ocupantes d’unu de los vehículos accidentaos taben fuera del mesmu y nel segundu, un turismu, el so ocupante taba muertu. Tres la pertinente autorización, los bomberos escarcelaron el cuerpu ensin vida del varón. Pa ello utilizaron dos equipos d’escarcelación colos que se retiró’l techu del turismu y les puertes llaterales. De siguío fíxose güecu nel salpicadero y dar en la estracción del cuerpu ensin vida del home.

Los bomberos dieron per rematada la intervención a la so llegada a base a les 20:51 hores, nel casu de Piloña, y a les 20:46 hores nel casu de los efectivos de Samartín del Rei Aurelio. La sala del 112 del SEPA informó del sucesu a la Guardia Civil y al Serviciu d’Atención Médica Urxente (SAMU) qu’activó xuna UVI Móvil y l’ambulancia de soporte vital básicu y el médicu de Nava.

18/05/2019
Juan Vázquez: «Celebro qu’otros partíos empiecen a falar de les oportunidaes d’Asturies»

El candidatu de Ciudadanos (Cs) a la presidencia d’Asturies, Juan Vázquez, celebró esti xueves que los mensaxes de la so formación tean empezando a calar y vaigan per delantre na campaña. «Yá veo qu’otros partíos empiecen a falar de les oportunidaes d’Asturies», dixo. Vázquez manifestó amás que la posición de centru de Ciudadanos, «ye agora acobiciada por munchos pero llamentó que sía una posición que revele «poco convencimientu porque son cambeos de fin de selmana».

«Veo tamién un desfile de ministros continuu del gobiernu de Pedro Sánchez per Asturies, aprovechen pa velos agora», aseguró Vázquez, «porque depués nun sé si van volver». Ye l’amuesa del preste y la sumisión” que’l PSOE de Pedro Sánchez n’Asturies tien respectu del Gobiernu Central, añedió’l candidatu de Cs. Y esi sentíu aprovechó pa #preguntar a la Ministra d’Economía, Nadia Calviño, “si la meyor Asturies ye l’Asturies que según los datos qu’apaecieron apocayá, tuvo’l peor rexistru de crecedera económica nos diez últimos años, a lo cabero con una crecedera negativa de 4 puntos y medio, mientres otres comunidaes crecieron el 12, el 10”.

Tamién se quixo referise Vázquez a la Ministra de Sanidá, María Luisa Carcedo, «querdría preguntar si la so dedicación a la campaña n’Asturies déxa-y resolver el problema seriu de desabastecimiento farmacéuticu que tien a munchos asturianos de farmacia en farmacia, buscando melecines fundamentales pa los sos tratamientos». Mentanto, concluyó la cabeza de llista autonómicu de Cs, nós tamos «conociendo l’Asturies real, l’Asturies de les oportunidaes, l’Asturies con capacidá pa xenerar actividá, dinamismu, empléu, que ye lo que precisa esta rexón».

17/05/2019
Adrián Barbón comprométese a duplicar les places de 0 a 3

Na visita a la escuela de 0 a 3 ‘El Carmín’, en La Pola Siero, Adrián Barbón recordó que “la rede d’escueles de 0 a 3 foi una creación del PSOE. Aprobóse nun Congresu socialista y una alministración socialista punxo en marcha dempués ta rede de centros educativos como esta escuela de Siero, que lleva 16 años funcionando”, destacó.

Nesti sentíu, el candidatu a la presidencia del Principáu, amosó’l so compromisu en “sofitar la necesidá de doblar el númberu de places de 0 a 3 en Siero pola demanda qu’esiste y que ye entendible”. Anunció que “les nueses propuestes, que se recueyen nel nuesu programa a nivel xeneral, son doblar, a lo menos, el númberu de places de 0 a 3 n’Asturies y, en tolos conceyos onde haya demanda d’una escuela de 0 a 3, lleguemos a toos nesta llexislatura”. Nestos momentos hai 39 escueles “y tenemos qu’ampliar pa llegar a tolos conceyos onde haya demanda”

Per otra parte, Adrián Barbón espresó públicamente, en declaraciones a los medios, el so “sofitu a la candidatura d’Ángel García, Cepi, la única que da estabilidá y futuru y tien esperiencia de gobiernu. L’alcalde de Siero y candidatu a la reeleción, Ángel García, informó que se va construyir una nueva escuela de 0 a 3 en Pola de Siero para doblar les plaza y que se van ampliar les places de la de Llugones “por que nenguna neña nin neñu de Siero quede ensin plaza”.

16/05/2019
Carmen Moriyón: «Asturies ta en tiempu de descuentu»

La candidata de Foru a la presidencia d’Asturies, Carmen Moriyón, presentó esti miércoles les midíes del programa electoral del so partíu en materia fiscal, concebíes para “impulsar l’actividá económica, frenar la despoblación y acabar cola discriminación d’Asturies con d’otres Comunidaes”. “Estes midíes fiscales son les primeres que presentamos porque busquen llograr un impactu socioeconómicu relevante y son la canal pela que más rápido pueden fluyir los cambeos que precisa Asturies”, indicó Moriyón. “Asturies ta nel tiempu de descuentu; hemos de ser prácticos y centranos nes soluciones a los graves problemes d’emponen a esti territoriu a la desertización industrial y demográfico”, alvirtió.

Ente les propuestes de Foru, Moriyón destacó l’amenorgamientu de la tarifa autonómica del IRPF en tolos sos tramos y de forma progresiva nun superando’l postreru d’ellos el tipu del 21%. Nel mediu rural, Foru propón midíes de discriminación diferenciada. “Nun pueden pagar lo mesmo quien carecen de servicios que sí disponen les ciudaes”. En materia d’IRPF plantégase una deducción de 30% de los gastos n’escueles infantiles, centros infantiles o personal contratáu pal cuidáu de fíos de 0 a 3 años pa contribuyentes qu’afiten la so residencia habitual y caltener la fecha de devengu del impuestu.

Foru tamién propón ameyorar la deducción por arriendu de vivienda habitual, con oxetu d’atender les necesidaes de colectivos que nun pueden aportar a la compra d’una vivienda (menores de 35 años ente otros), frenar la perda de población nel mundu rural y promover la reactivación d’esti sector.

Moriyón recordó tamién que Foro vien reclamando un nuevu sistema de financiamientu autonómicu. Con esi oxetivu va promover la reforma del modelu actual que garantice la suficiencia y l’igualdá nos servicios públicos fundamentales, redefiniendo les necesidaes de gastu y teniendo bien en cuenta, les singularidaes que presenta Asturies, como la dispersión y l’avieyamientu de la nuesa población.

16/05/2019
TPA va emitir el llunes l’únicu debate ente candidatos autonómicos

La Televisión del Principáu d’Asturies (TPA) va emitir el prósimu llunes 20 de mayu a les 22 hores l’únicu debate de candidatos a la presidencia del Gobiernu d’Asturies. N’él participarán los llíderes de los principales partíos: Adrián Barbón, del PSOE; Teresa Mallada, del PP; Lorena Gil, de Podemos; Ángela Vallina, de IX; Carmen Moriyón, de Foru; Juan Vázquez, de Ciudadanos; ya Ignacio Blanco, de Vox.

L’espaciu va tar presentáu y moderáu pol editor d’informativos Nacho Monserrat. Los siete candidatos a la Presidencia confrontarán idees y programes pa que los ciudadanos puedan conocer los detalles de los mesmos. El debate va plantegase en bloques temáticos sobre política industrial, movilidá, infraestructures y Area Metropolitana, mundu rural y crisis demográfica, cultura, cooficialidá, reforma estatutaria y servicios públicos. Ye l’únicu alderique de candidatos a presidente que se celebra n’Asturies.

El gran esplegue final va ser el domingu 26, la xornada electoral. TPA va informar durante tol día del desenvolvimientu de les elecciones con conexones en directu con colexos electorales y el centru de datos. Amás de la cita habitual de ‘TPA Noticies’ a les 14 y les 20.30 hores va haber avances informativos a les 13, les 18 y les 19 hores. A les 20 hores va entamar l’especial ‘Elecciones 26-M‘. Presentáu poles periodistes María Herrero, Beatriz Fernández y Diana Sánchez, l’espaciu va cuntar con mesa d’analistes políticos, periodistes y alcaldes hestóricos y un esplegue de quince puntos de directu nes sedes de los partíos y de los principales conceyos. Un ampliu equipu técnicu y humanu que va trabayar hasta que se conoza’l desenllaz final de les trés cites electorales: municipales, autonómiques y europees.

16/05/2019
El Principáu meyora la financiación de la Universidá d’Uviéu hasta’l 2021

El Gobiernu d’Asturies autorizó esti miércoles la modificación del conveniu soscritu’l 19 d’ochobre del 2017 ente l’Alministración del Principáu y la Universidá d’Uviéu cola mira de determinar un marcu de financiamientu estable pa la institución académica hasta’l 2021. Esti cambéu dexa impulsar un sistema d’anticipos pa compensar la pérdiga d’ingresos que podría derivase de la rebaxa de les matrícules, según informaron güei’l conseyeru d’Educación y Cultura, Genaro Alonso, y el rector de la Universidá d’Uviéu, Santiago García, en rueda de prensa.

Asina, d’acuerdu cola modificación aprobada, la Universidá d’Uviéu va poder recibir de forma antemanada’l 55 % del importe de la compensación pola rebaxa de los precios nel mesmu añu en que se toma’l determín y el 45 % restante nel siguiente, siempre qu’exista abonda consignación presupuestaria.

Según los términos del conveniu inicial, la institución académica nun podía recibir los fondos hasta que se dispunxera de los datos definitivos de matriculación, desque publicaos nel Sistema Integráu d’Información Universitaria (SIIU), lo que podía asoceder un añu depués de que se tomare’l determín de rebaxar los precios.

Esti cambéu ye relevante sobre manera anguaño, porque pal cursu que vien (2019-2020) ta prevista una mengua significativa de les tases universitaries. Los cambeos nel conveniu dexen, amás, concretar y clarificar aspectos técnicos rellacionaos col financiamientu de personal o del plan d’inversiones de la Universidá d’Uviéu.

L’alcuerdu soscritu ente’l Principáu y l’Universidá d’Uviéu, modificáu agora, considérase bien positivu por dambes partes. Per un llau, el financiamientu pa gastos corrientes garantiza estabilidá; per otru, el plan d’inversiones ayuda a cubrir necesidaes de caltenimientu, renovación y modernización d’infraestructures. Amás, la vinculación de parte de los recursos al cumplimientu d’oxetivos, lo que comúnmente se llama contratu programa, ayuda a potenciar la escelencia de la institución académica na formación, la investigación, la innovación, la xestión y la eficiencia.

15/05/2019