Categoría: Educación

La collaboración internacional que trabaya nel esperimentu Compact Muon Solenoid (CMS), y na que participa dende va años el Grupu Esperimental de Física d’Altes Enerxíes de la Universidá d’Uviéu, acaba de publicar la so primer busca de nueva física, a partir de los datos del tercer periodu de funcionamientu del Gran Colisionador de Hadrones (LHC) de la Organización Europea pa la Investigación Nuclear (CERN). Participaron nel estudiu, amás del Grupu d’Altes Enerxíes del Institutu de Ciencies y Tecnoloxíes Espaciales d’Asturies (ICTEA) de la universidá asturiana, l’Institutu de Física de Cantabria (IFCA), l’Institutu d’Altes Enerxíes de l’Academia Austriaca de les Ciencies (HEPHY), la Universidá de California Los Ángeles (UCLA), Rice University y el Centru d’Investigaciones Enerxétiques, Medioambientales y Tecnolóxiques (CIEMAT).

L’equipu científicu llogró esaminar la posibilidá de producir fotones escuros (dark photon) por aciu la desintegración de bosones de Higgs nel mayor acelerador de partícules del mundu, el LHC. Estos fotones escuros tienen dos particularidaes: son partícules con un altu tiempu de vida, yá que tienen una vida media de más d’una décima d’una milmillonésima de segundu; y son exótiques porque nun formen parte del modelo estándar de la física de partícules, esto ye, la principal teoría sobre los componentes fundamentales del Universu. Esti resultáu nuevu ufierta más información a la comunidá investigadora sobre’l procesu de cómo los bosones de Higgs se desintegren en fotones escuros, estrechando entá más l’área na que los científicos pueden buscalos.

Según les predicciones realizaes pola comunidá científica, los fotones escuros viaxaríen una distancia nel detector CMS enantes de desintegrarse en muones desplazaos. Si rastrexen les buelgues d’estos muones, afayaríase que nun lleguen hasta’l puntu de choque, porque les buelgues vienen de una partícula que yá s’alloñó cierta distancia, ensin dexar rastru. Estos muones desplazaos son el principal oxetu d’analís nesta busca.

La contribución de la Universidá d’Uviéu

L’equipu de la Universidá d’Uviéu encargóse, nesti casu, de la busca y analís d’estes partícules exótiques de tiempu de vida alto, bien distintes al conocíu Bosón de Higgs. L’equipu asturianu rediseñó y perfeccionó el sistema de peneráu que dexa escoyer una pequena fracción de los millones de choques que se producen nun segundu. El principal artífiz d’esti rediseño ye l’investigador Alejandro Soto, que ta realizando la so tesis doctoral nel Grupu Esperimental d’Altes Enerxíes del ICTEA.

D’esta forma, llogróse sacar el máximu partíu al LHC, lo que dexa llograr un resultáu sólidu utilizando solo un terciu de la cantidá de datos de busques anteriores. Esto dexa esplorar nueves rexones nes que pueden escondese estes partícules de llarga vida d’una forma precisa y optimizando l’almacenamientu.

Nos próximos meses, l’equipu del Grupu Esperimental d’Altes Enerxíes de la Universidá d’Uviéu va siguir trabayando en técniques más potentes p’analizar tolos datos tomaos nel tercer periodu de funcionamientu, coles mires de siguir esplorando nueva física más allá del modelu estándar, de la que trabaya nel rediseñu del sistema de filtráu pa cuando entre en funcionamientu’l LHC d’alta lluminosidá en 2029, gracies al trabayu, ente otros, de les investigadores Pelayo Leguina, Javier Prado, Clara Ramón y Carlos Vico. Pa esti trabayu, el grupu cunta col proyectu INTREPID, dirixíu pol profesor Folgueras, dende’l que van desenvolver técniques avanzaes d’intelixencia artificial y tarxetes programables d’última xeneración pa construyir un sistema de filtráu que dexe detectar estes partícules d’alta vida media nuna fracción de segundu (microsegundos) y facilitar asina un descubrimientu científicu ensin precedentes nos próximos años.

La Universidá d’Uviéu celebra esti xueves 25 d’abril elecciones al Rectoráu, un procesu nel que van poder participar un total de 23.266 persones. La institución académica va habilitar 23 meses electorales en tolos campus pa qu’aquellos incluyíos nel censu puedan exercer el so derechu a votu ente les 10:00 y les 19:00 hores. Los resultaos va poder siguise en directu al traviés de la web institucional tres el zarru de les urnes, nel portal d’Eleiciones al Rectoráu 2024, y na Aula Magna del Edificiu Históricu, conforme vaigan conociéndose los datos de les meses.

Datos de participación y escrutiniu en tiempu real

El censu ta integráu por: 1.316 profesores doctores con vinculación permanente (Colectivu A); 1.309 persones pertenecientes al Colectivu B, ye dicir restu de personal docente ya investigador; 19.577 estudiantes (Colectivu C); y 1064 miembros del Personal Técnicu, de Xestión y d’Alministración y Servicios (Colectivu D). A lo llargo del día, va poder consultase na web corporativa la participación por sectores y meses electorales, y a partir de les 19:00 hores va empezar l’escrutiniu.

Los Estatutos de la Universidá d’Uviéu recueyen nel artículu 58.2 que’l votu pa la eleición del Rector va ser ponderáu, por sectores de la comunidá universitaria, acordies con los porcentaxes siguientes: Profesores doctores con vinculación permanente a la Universidá, 55%; restu del personal docente ya investigador, 10%; estudiantes de los trés ciclos, 25%; y personal d’alministración y servicios, 10%.

La Xunta Electoral Central proclamó’l pasáu 9 d’abril a los catedráticos Juan Manuel Cueva Lovelle ya Ignacio Villaverde Menéndez como candidatos nes elecciones al Rectoráu. El 26 d’abril dar en la proclamación provisional del candidatu que llograra’l sofitu proporcional de más de la metá de los votos a candidatures válidamente emitíos. va entendese algamada esa mayoría cuando se llogre’l 50,0001% de los votos ponderaos. El resolvimientu y proclamación definitiva del rector va ser el día 3 de mayu.

La conseyera d’Educación, Lydia Espina, espunxo a la ministra Pilar Allegría dalguna de les principales llinies de xestión del so departamentu, como son la creación de la rede pública, autonómica y gratuita de 0 a 3 años Les Escuelines o la estratexa de detección d’altes capacidaes, que yá s’atopa nel so segundu añu de desenvolvimientu. A la xunta, celebrada en Madrid, asistieron tamién el secretariu d’Estáu d’Educación, José Manuel Bar, y la directora xeneral d’Evaluación y Cooperación, Mónica Domínguez.

Al respective de Les Escuelines, Lydia Espina repitió’l pidimientu del Gobiernu d’Asturies por que’l Ministeriu d’Educación, Formación Profesional y Deportes tresfiera a Asturies fondos sobrantes del Mecanismu de Recuperación y Resiliencia (MRR) que dexen crear nueves places para alumnáu de 0 a 3 años. En concretu, solicitáronse casi cuatro millones adicionales pa financiar l’apertura de Les Escuelines en 2025, completar la so estensión sobre’l territoriu y amenorgar les llistes d’espera.

Per otra parte, la conseyera detalló’l proyectu dende’l puntu de vista lexislativu, educativu y d’infraestructures. Nesti sentíu, esplicó a la ministra que la llei ta n’información pública y que, paralelamente, tán desenvolviéndose tantu la norma d’almisiones como’l decretu de funcionamientu, el plan d’obres pa los primeros centros autonómicos, la contratación del moblame o del serviciu de comedores. “Ye un proyectu pioneru n’España que tamos montando de cero y pal que precisamos el máximu respaldu. La xunta celebróse nun clima cordial y de collaboración. La ministra amosó gran interés pol nuesu trabayu”, aportunó Espina.

Otru de les temes incluyíes nel orde del día foi la estratexa d’altes capacidaes enllantada’l cursu pasáu en primeru de Primaria y que multiplicó por nueve la tasa d’identificación. Lydia Espina esplicó’l métodu aplicáu pola Conseyería d’Educación asturiana qu’otres comunidaes, como Castiella-La Mancha, tán esplegando agora. Nesti segundu añu de desenvolvimientu, l’alministración caltien la parte destinada a la detección y compaxinar amás cola ellaboración de programes específicos venceyaos al emprendimientu pa la intervención na aula, de la mano de la empresa pública Valnalón.

Amás, Espina tamién aprovechó pa comenta-y a la ministra los sos planes sobre la enseñanza del asturianu. Recordólu lo importante que sería poder crear la especialidá docente pa llograr la estabilización d’alredor de 300 profesionales. Sicasí, la ministra repitió-y en que ye necesariu aprobar la cooficialidá pa poder dar esti pasu.

Un total de 130 centros d’enseñanza asturianos y casi 400 docentes empecipiaron ayeri en Xixón el cursu presencial Ferramientes pa potenciar el podcast y la radio escolar como recursu dixital, col qu’empieza’l novedosu proyectu Educastur Radio. L’actividá entamada pola Conseyería d’Educación, al traviés del Centru del Profesoráu y Recursos (CPR) de Xixón-Oriente- se engloba nel programa pa la meyora de la competencia dixital (CompDigEdu), financiáu con fondos europeos del Mecanismu de Recuperación y Resiliencia (MRR).

El director xeneral d’Inclusión Educativa y Ordenación, David Artime, inauguró’l cursu y amosó’l so prestu por “la gran acoyida” que llogró ente’l profesoráu. Sorrayó que, amás d’ameyorar esa formación dixital de los docentes, el cursu pretende tamién “el tresformamientu de los centros n’instituciones digitalmente competentes”, amás de convertise nel xerme “del nuevu ya ilusionante proyectu Educastur Radiu”, que’l so oxetivu ye apigurar y potenciar la rede actual d’emisores escolares.

Artime recordó que tolos centros participantes van recibir un kit de radiu, “que van poder caltener si finalmente deciden formar parte de la rede”. El presupuestu autonómicu de 2024 inclúi una partida de 221.000 euros p’adquirir estos materiales.

El cursu va constar de seis sesiones presenciales, ente los meses de xineru y mayu, cola participación de destacaos profesionales de la radio y el podcast. La xornada inaugural tuvo protagonizada pola periodista Ana Ormaechea, directora dixital Prisa Radio, quien realizó una introducción al xéneru del podcast. Y, de siguío, participó nuna mesa redonda al pie de les periodistes Marta García Ayer, presentadora del podcast La posa y collaboradora d’Onda Cero, y Ana Alonso, directora de SER Podcast.