Xixón al día

Categoría: Sporting

  • Babin: “Equí vamos toos a una”

    Babin: “Equí vamos toos a una”

    El futbolista francés Jean-Sylvain Babin va siguir nel Sporting hasta 2022. El xugador aseguró esti llunes en rueda de prensa que «vive con muncha ilusión» el trabayu del equipu. Considera bien positivu que los fichaxes sumárense llueu al equipu: «Son de gran nivel y creo que tamos faciendo un bon grupu». Foi más allá cuando señaló que «se tán cumpliendo les mires que me treslladaron cuando anové’l mio contratu».

    No personal, vese «finu, como la pasada temporada, cuando baxé de pesu», pa encarar un campeonatu nel qu’asume’l so veteranía nel vestuariu, «lo que nos obliga a dalgunos a llevar a lo más altu a los mozos; ye daqué no que tengo que dar un pasu alantre”.

    Del partíu del pasáu sábadu en Salamanca énte’l Xetafe y de les bones sensaciones que dexó l’equipu xixonés, Babin recuerda que «son partíos de pretemporada y hai que valoralos como tal». Sicasí, apuntó que «dimos la cara» y defendió que «equí vamos toos a una». Tradució que «esti Sporting ye distintu al d’otres temporaes».

  • Santi de la Cera, el sportinguista más mozu

    Santi de la Cera, el sportinguista más mozu

    La Mareona tien un nuevu integrante que de xuru va pasiar el roxiblancu del Sporting el restu de la so vida. Trátase de Santiago de la Cera Echevarría, que nació’l pasáu 29 de xunu y que foi inscritu como nuevu abonáu pol so padrín Diego Ménendez López pa que dende el primer minutu de vida sintiera los colores sportinguistes. Los sos felices pás, Cristina Echevarría y Josito de la Cera son fieles siguidores del equipu ya integrantes de la Peña Sportinguista Pablo Pérez polo que nun-yos costar inculcar a Santi los valores de Mareo.

    Nun ye l’únicu rapacín que ta acabante de sumase a la familia del Sporting. Lucas Rodríguez llegó al mundu’l pasáu 22 de xunu nel Hospital de Cabueñes. El so padrín, Carlos Moro, nun duldó d’inscribilo como abonáu y yá ye’l númberu 23435.

    Lucas Rodríguez, abonáu 23435 del Sporting.
    Lucas Rodríguez, abonáu 23435. / Real Sporting
  • Marc Valiente, nuevu xugador del Sporting

    Marc Valiente, nuevu xugador del Sporting

    El Sporting fíxose colos servicios del defensa Marc Valiente, que llega procedente del Partizán de Belgrado. Quedó comprometíu para les próximes dos temporaes ampliable a una tercera. El nuevu xugador va ser presentáu esta mañana en Mareo.

    Marc Valiente nació en Granollers (Barcelona) el 29 de marzu de 1987. Mide 1,84. Entamó na cantera del Barcelona, onde se formó nel equipu filial enantes de pasar al Sevilla Atlétic y xugar dempués nel Sevilla, Valladolid, Maccabi Aifa (Israel), KES Eupen (Bélxica) y Partizán de Belgado (Serbia).

  • El sportinguismo llora la muerte de José Antonio Nieto

    El sportinguismo llora la muerte de José Antonio Nieto

    La Escuela de Fútbol de Mareo amaneció esta mañana cola murnia noticia del fallecimientu de José Antonio Nieto. Collaboró col Sporting dende mediaos de los años setenta al traviés del so fútbol base, del que foi directivu. Anguaño caltenía una llarga y estrecha relación, que s’estendía a la so presencia institucional nos desplazamientos del Sporting B.

    Cola bandera ondeando a mediu estil nes instalaciones sportinguistes, José Alberto quixo empezar l’entrenamientu mañaneru con un minutu de silenciu. L’homenaxe cuntó cola presencia de toos el xugadores, técnicos y auxiliares abrazaos en corru. Esta tarde volverá ser recordáu con motivu del partíu de pretemporada nel que’l Sporting va recibir al UP de Llangréu nel campu 1 a les 18.30 hores. L’alcuentru va ser televisáu por TPA.

    Trátase del tercer partíu de pretemporada pa los roxiblancos. L’accesu para los abonaos de dambos clubes ye gratuitu cola presentación del nuevu carné, al igual que pa tolos menores de 16 años. Pal públicu polo xeneral la entrada cuesta 10 euros. Les localidaes van tar disponibles na mesma taquilla de Mareo dende hora y media antes del empiezu del alcuentru.

  • Damián Pérez firma col Sporting por dos temporaes

    Damián Pérez firma col Sporting por dos temporaes

    Damián Pérez (Lanús, Arxentina, 1988) ye la última incorporación del Sporting pa la nueva temporada. El llateral izquierdu, quien mide 1,68 y pesa 68 kilos, va ser presentáu en llunes en superando les pruebes médiques. El xugador ta acabante de firma contratu col conxuntu xixonés pa les dos próximes temporaes.

    Espérese que llegue a Xixón esti domingu pela tarde. Nun va ser hasta’l llunes pela mañana cuando Damián Pérez va sometese a les pruebes médiques nes instalaciones del Sporting pa, darréu, ser presentáu oficialmente pol club. El llateral izquierdu arxentinu xugó nel Arsenal de Sarandi, Vélez Sarsfield, Club Tijuana (México), Colo-Colo (Chile) y Club Atlético San Lorenzo de Almagro.

  • El Sporting presenta la so nueva camiseta

    El Sporting presenta la so nueva camiseta

    El Sporting presentó esti martes la nueva camiseta pa la temporada 2019-2020. El Muru de la sablera de San Llorienzo, al altor de la Escalerona, foi l’escenariu de la presentación. La xugadora María Yenes y los futbolistes del primer equipu Diego Mariño, Javi Fuego y Nacho Méndez oficiaron d’improvisaos modelos.

    La nueva camiseta del Sporting, de Nike, lleva l’escudu bordáu termoadhesivu tradicional roxiblancu. Na parte inferior derecha lleva un distintivu oficial identificativo de la temporada. Na manga derecha lluz el logo oficial de LaLiga 1|2|3. El pescuezu tien un transfer n’azul cola frase ‘Siempres Quini’ al pie de dos pieces que formen una corona. La camiseta ta realizada con tecnoloxía Dry-Fit, que caltien la transpirabilidad y la comodidá. El texíu ye cientu per cientu poliester.

    El so preciu ye de 75 euros, serigrafía aparte, col 15 per cientu de descuentu para abonaos (63,75 euros). La nueva camiseta del Sporting ta ya a la vienta nes tiendes oficiales del Sporting y online.

  • Fran Albert: “Asturies ye un llugar privilexáu pa una temporada”

    Fran Albert: “Asturies ye un llugar privilexáu pa una temporada”

    Fran Albert, acabante llegar a Mareo p’asumir la preparación física del primer equipu del Sporting, tien una primer idea na so cabeza: «Conocer lo meyor y antes posible a cada xugador pa poder sacar depués lo meyor d’él», anque yá dende selmanes cunta con datos de la gran mayoría de futbolistes. Defende que se trata d’algamar el primer partíu de Lliga «na meyor condición posible pa poder competir», y non yá once xugadores, sinón «tolos integrantes de la plantiya; toos tienen que tar enchufados».

    Ta entusiasmáu coles instalaciones de Mareo, «onde voi tratar d’apurrir lo meyor de mi y onde tou son bones sensaciones». Paez-y «fantástica» la cercanía que se vive ente’l primer equipu y los xugadores más nuevos. Tamién ta feliz con «Asturies, un llugar privilexáu pa la temporada, pola so meteoroloxía, onde inclusive puedes trabayar físicamente a media mañana».

    Tuvo a puntu de venise al Sporting «con Paco Herrera, pero nun pudi por motivos personales, anque siempres tuvi la mio mente aquí: somos una familia de llocos pol fútbol y yá con catorce años visitamos El Molinón». Tocante a José Alberto, diz que la sintonía nun puede ser meyor con él. «Conocemos desque’l so hermanu xugaba nel Salamanca, tamién tuvi nun congresu qu’entamó n’Avilés, al que me convidó». Fran Albert tien «ganes de verde», d’empezar yá los entrenamientos.

  • Carmona: «Yá tenía ganes de tornar a Mareo»

    Carmona: «Yá tenía ganes de tornar a Mareo»

    Carlos Carmona protagonizó la primer rueda de prensa de la pretemporada del Sporting. Fízolo como capitán del equipu, na so octava campaña como sportinguista. «Yá tenía ganes de tornar a Mareo», espunxo l’atacante mallorquín, tres unes vacaciones «nes que carguemos piles». «Agora lo que toca son cargar les bateríes con vistes a la que presume que va ser una esixente temporada», añadió.

    Asume que «l’oxetivu pasa por devolver al equipu a la máxima categoría», pero argumenta la necesidá de nun cayer n’obsesiones, polo qu’entiende que «hai que marcase oxetivos curtios». Entrugáu por Javi Fuego, col que coincidió nel Recreativu, aseguró que «va ayudanos enforma», señaló. Diz que llega avaláu por una gran trayectoria».

  • Javi Benitez anueva’l so compromisu col Sporting

    Javi Benitez anueva’l so compromisu col Sporting

    Javier Benitez Velasco anueva’l so compromisu col Sporting roblando por una temporada nel filial ampliable a trés temporaes col primer equipu. El porteru xixonés nació’l 16 d’avientu de 1996 y va cumplir la so décima temporada nel equipu. Javi Benitez debutó col Sporting B na temporada 2015/2016 xugando cinco partíos. Mientres la temporada pasada, apostó un total de 16 partíos nel Grupu II de Segunda División B. El xugador va incorporase a los entrenamientos del primer equipu’l día 8 de xunetu. Va ocupar el güecu de Dani Martín, qu’entá tien díes de vacaciones n’apostando l’Européu cola selección española sub-21.

    Per otru llau, César García, que tuvo cedíu nel Club Marín de Lluanco y Pablo Ferreiro, que tuvo nel UD Llanera, van incorporase a la pretemporada del filial. Amás, David Ruíz, que tuvo cedíu nel CD Llealtá, Miguel Prado, nel UD Llanera, y Rubén Expósito, nel CD Cuadonga, terminen la so vinculación col Sporting. «Deseyámos-yos muncha suerte a los trés futbolistes nes sos próximes etapes», esplicó’l club nun comunicáu oficial.

  • Javi Fuego torna al Sporting

    Javi Fuego torna al Sporting

    Javi Fuego yá ye oficialmente xugador del Sporting. El mediocampista de La Pola Siero va vestir la camiseta roxiblanca mientres les próximes dos temporaes. D’esta manera, l’asturianu torna a xugar nel que foi l’equipu de la so infancia. Firma por dos temporaes y llega trespasáu procedente del Villarreal.

    Tres formase nes categoríes inferiores del Sporting, Javi Fuego xugó nel filial ente los años 2002 y 2004. Dempués, xugó nel primer equipu ente’l 2004 y el 2007. Internacional con España cola sub-19, sub-20 y sub-21, pasó los últimos años militando en primer división, Levante O.D., el Recreativo de Huelva, el Rayo Vallecano, el Valencia y l’Español. Agora llega trespasáu procedente del Villarreal, onde pasó la última temporada.