Acércase’l branu y ye momentu d’esfrutar del bon tiempu. Salir a pasiar, tomar unes botelles… Cualquier rincón de Xixón ye un bon llugar, pero hai llugares qu’atraen más qu’otros. Y a ti, ¿cuál ye’l que más te presta?
Categoría: Tema del día
-
Marea Rosa en Xixón: 8.000 participantes na Carrera de la Muyer
El circuitu nacional de la Carrera de la Muyer Central Llechera Asturiana cumple quince años y torna a Xixón esti domingu. Más d’un millón de participantes sumáronse a la Marea Rosa en toles sos pruebes nesti tiempu y donóse más d’un millón d’euros a distintes causes benéfiques y sociales. Xixón va ser la cuarta cita tres les pruebes de Valencia, Madrid y Vitoria-Gasteiz
La Marea Rosa asturiana va tar compuesta por más de 8.000 muyeres que van llucir el 016 nel dosal. Les corredores que tomen la salida esti domingu a les 10.00 hores na avenida Albert Einstein van completar los casi 6 kilómetros de percorríu, que varia mínimamente el trazáu del pasáu añu. Tres la carrera, va celebrase un festival de fitness d’una hora, que va sirvir de colofón a una mañana bien deportiva, solidaria y reivindicativa.
Un total de 1.023.020 muyeres punxéronse’l dosal nestos 14 años, en 111 carreres. En Xixón toles inscrites van pasar la fin de selmana de la carrera pola feria Sport Woman nel Palaciu de Deportes. Ye onde se recueyen los dosales, les camisetes que tiñen cola Marea Rosa l’asfaltu de cada cita, y la bolsa de regalos. L’horariu de la feria va ser de 10 a 14 y de 16 a 20 horas, el vienres y sábadu 14 y 15 de xunu.
-
Siete conseyos de Cristina Mitre pa la Carrera de la Muyer
La periodista xixonesa Cristina Mitre va tar presente na Carrera de la Muyer de Xixón. La runner, escritora, fundadora del movimientu ‘Mujeres que corren’ preparó una serie de conseyos básicos que son les sos claves d’ésitu pa correr cualquier competición. Los sos trucos van ser bien útiles para toles muyeres que vaigan participar na carrera d’esti domingu en Xixón. Toma bona nota:
1. Si esta ye la to primer carrera, el to oxetivu principal ye esfrutar, asina qu’escaezte de tiempos y de ritmos. Recuerda que l’ésitu tamién se mide en preste personal.
2. Ye bien probable que’l día de la prueba, presa de la emoción, salgas más rápidu, pero tendríes d’afitate una meta de ritmu y, asina, nun pasate de frenada.
3. Fracciona l’oxetivu. Na carrera nun t’aforfugues pensando en tolo que te quedó. Focaliza meyor en tolo que lleves percorríu. Ye más beneficiosu dir de menos a más. La clave ta en saber dosificase.
La periodista y runner xixonesa ye fundadora del movimientu ‘Mujeres que corren’
4. El día de la carrera nun faigas un almuerzu bayurosu y nun comas alimentos ricos en fibra, porque puedes terminar con dolor estomacal. ¿El meyor recuperador tres la carrera? Una mazana y unes almendres naturales (ensin sal).
5. Anque entrenes acompañada de música o de dalgún podcast, ye meyor que’l día de la carrera cuerras ensin auriculares. Podríes despistate tando más pendiente d’ellos, y tener dalgún tipu de percance, como una cayida. Amás, perderíeste l’increíble ambiente de la prueba.
6. Asítiate bien na salida y onde te correspuenda, siendo consciente de cuál ye’l to ritmu de carrera. Si nun yes una corredora rápida o vas faer la prueba caminando, por casu, nun t’asities bien adelantre: vas a entorpecer al restu de compañeres y puedes provocar, ensin querer, dalguna cayida.
7. Ya importante: anque a primer hora de la mañana puede faer frescu, nun cuerras abrigada. Aína vas entrar en calor y si lleves demasiaes capes de ropa, vas sudar por demás y vas deshidratate. ¡Y nada de correr col cortavientos arreyáu a la cintura!
-
La ciudá de Gdansk, Premiu Princesa d’Asturies de la Concordia
La ciudá polaca de Gdansk foi galardonada col Premiu Princesa d’Asturies de la Concordia 2019, según fixo públicu güei n’Uviéu‘l xuráu encargáu de la so concesión. Esta candidatura foi propuesta por Donald Tusk, presidente del Conseyu Européu, y Adam Zagajewski (Premiu Princesa d’Asturies de les Lletres 2017). Foi sofitada, ente otros, pol Comité Européu de les Rexones, los alcaldes de les principales ciudaes polaques y los de Barcelona, Breda, Vilna, Leipzig, Odesa, Milán, Praga, Burdeos y Berlín.
La ciudá polaca de Gdansk, capital de Pomerania y principal puertu del país, ye anguaño la cabecera d’un área metropolitana. Xuntu coles localidaes de Gdynia y Sopot, supera’l millón d’habitantes. Con una hestoria marcada pol so allugamientu estratéxica na mariña báltica, Gdansk convirtióse nuna ciudá llibre tres la Primer Guerra Mundial. Con un ampliu porcentaxe de población alemana, Gdansk acoyó la que ta considerada como la primer batalla de la Segunda Guerra Mundial. L’exércitu nazi invadió Polonia’l 1 de setiembre de 1939 al traviés de la península de Westerplatte, frente a la ciudá, onde una escasa guarnición de soldaos polacos resistió una selmana n’inferioridá de condiciones.
Considerada una ciudá abierta y arrogante, Gdansk destacó, dende’l restablecimiento de la democracia en Polonia va trenta años
Gdansk, destruyida nun 90%, foi integrada en Polonia tres la victoria aliada, lo que supunxo la espulsión de los sos habitantes alemanes. Décades más tarde, na ciudá surdieron los primeros focos d’oposición al réxime comunista y nos sos estelleros ta l’orixe del sindicatu Solidaridá, que s’alzó en protagonista del derrocamientu del réxime en 1989. El so líder, el Premiu Nobel de la Paz Lech Walesa, foi en 1990 el primer presidente escoyíu democráticamente dende 1939.
Considerada una ciudá abierta y arrogante, Gdansk destacó, dende’l restablecimiento de la democracia en Polonia, pol so dinamismu económicu, apertura, cohesión ciudadana y calter tolerante. Cunta con programes dedicaos a la integración de la inmigración y la defensa del colectivu LGTB. Del so casi medio millón d’habitantes, más de 20 000 son estranxeros, la mayoría abelugaos procedentes de l’antigua URSS y zones de conflictu.
En 2016, el Conceyu de Gdansk publicó’l documentu modelo d’integración de los inmigrantes, que facilita la integración de refuxaos ya inmigrantes n’árees como la educación, la cultura, l’asistencia social, l’agospiamientu, l’empléu y la salú. Amás, constituyóse un conseyu consultivu, integráu por dolce representantes de los inmigrantes y dos refuxaos. L’impulsu de les polítiques sociales desenvueltes por Gdansk atribúyense al que foi’l so alcalde mientres les postreres dos décades. Paweł Adamowicz tuvo nel cargu dende 1998 hasta’l so apuñalamientu y posterior fallecimientu nun actu públicu en xiner
Los galardones van ser apurríos na seronda n’Uviéu nun solemne actu presidíu polos reis d’España
El Premiu Princesa de la Concordia vien a reconocer «el llabor de defensa y xeneralización de los derechos humanos y del progresu de la humanidá». Nesta edición allegaben un total d’un total de 34 candidatures procedentes de 21 países.
Este foi’l postreru de los ocho Premios Princesa d’Asturies que se conceden anguaño. Enantes fueron otorgaos el Premiu Princesa d’Asturies de les Artes al dramaturgu Peter Brook, el de Comunicación y Humanidaes al Muséu Nacional del Prado, el de Cooperación Internacional al matemáticu ya inxenieru Salman Khan y la Khan Academy, el de los Deportes a la esquiadora Lindsey Vonn, el de les Lletres a la escritora Siri Hustvedt, el de Ciencies Sociales al sociólogu Alejandro Portes y el d’Investigación Científica y Técnica a les biólogues especialistes en plantes Joanne Chory y Sandra Myrna Díaz.
Caún de los Premios Princesa d’Asturies ta dotáu con una escultura de Joan Miró, un diploma, una insinia y 50.000 euros en metálico. Los galardones van ser apurríos na seronda n’Uviéu nun solemne actu presidíu polos reis d’España.
-
La Feria del Llibru de Xixón toma Begoña
La lliteratura garra protagonismu en Xixón. Esti xueves entama la tercer edición de la Feria del Llibru de Xixón, FeLiX19, que va tener llugar hasta’l domingu nel Paséu de Begoña y va cuntar cola participación d’un total de 24 llibreríes y 24 editoriales. La programación de la feria inclúi alcuentros poéticos, cuentacuentos, talleres y actividaes d’animación a la llectura, un ciclu de cine. Va proyectase’l documental ‘Exlibris: The New York Public Library’, un concursu de rap y hip-hop y la yincana ‘Los primeros tributos del Panem’, en redol a la saga ‘Los juegos del hambre’. Va entregase tamién el premiu de Fomentu de la llectura a Nieves Concostrina, y va homenaxase al escritor José Antonio Mases.
En total van ser alredor de 70 actividaes les que se van celebrar en Begoña. La Escuela de Comerciu va acoyer delles, como’l ciclu de cine realizáu en collaboración col Festival Internacional de Cine de Xixón. La Rede de Biblioteques Municipales de Xixón va cuntar con estand propiu onde se va facilitar información a los visitantes sobro les distintes actividaes de la feria y la so actividá.
Les biblioteques municipales entamen talleres infantiles Flipbooks, de creación de llibros animaos
La programación d’esti eventu abrirá’l día 13 de xunu a les 12:30 hores cola presentación oficial de Palabras Mayores. Trátase d’un nuevu serviciu que busca promover l’avieyamientu activu y atender a les demandes d’información y ociu de les persones mayores. Esti programa va poner en marcha’l serviciu ‘La biblioteca en casa‘, de préstamu a casa pa usuarios de teleasistencia. Tamién ‘Salimos al to alcuentru‘, con actividaes culturales y d’animación a la llectura pa usuarios de los centros municipales de persones mayores.
Les biblioteques municipales entamen talleres infantiles Flipbooks, de creación de llibros animaos. Los neños que participen van crear les sos propies hestories animaes sobro papel, xenerando la ilusión de movimientu por aciu la combinación d’imaxes fixes. Ye necesaria inscripción previa hasta’l miércoles 12 en caxeros ciudadanos, oficines d’atención a la ciudadanía, la páxina web xixon.es, app igijon o presencialmente una hora antes del entamu de l’actividá. Sesiones gratuites de 12 places en caúna d’elles. Amás, l’estand de la rede de biblioteques va acoyer una esposición coles meyores fotografíes de les últimes ediciones del concursu xuvenil Xixón Lleendo.
Consulta equí’l programa completu d’actividaes de la Feria del Llibru de Xixón [PDF]
-
Vox vese arrodiáu de «etarres, golpistes y más golpistes» nel Congresu
Los diputaos de Vox ocuparán los escaños asitiaos na última fila del Congresu de los Diputaos. Los venticuatro representantes de la formación d’ultraderecha van quedar d’esta manera arrequexaos ente los grupos parllamentarios de Xuníes Podemos, Esquerra y el grupu mistu. La decisión de la mesa de la Cámara Baxa nun convence a los de Santiago Abascal, que nes redes sociales llamentaron «el vecindariu que nos imponen».
Ye’l casu del diputáu de Vox por Badajoz, Víctor Sánchez del Real, que na so cuenta de Twitter llamentó l’allugamientu del so grupu parllamentariu nel hemiciclu. «Piensen que nos tienen arrodiaos, pero non, tiénennos enriba», aseguró nuna publicación qu’acompaña d’una imaxe cola distribución del salón de Plenos. N’ella, señala al PNV como «recueye nueces», a Esquerra y JxCat como «golpistes», y a Bildu como «etarres». Tampoco nun s’escaez de los diputaos de Xuníes Podemos, a los que señala como «amigos» de toos ellos.
Este es el vecindario que nos imponen en @Congreso_Es
Piensan que nos tienen rodeados. Pero no, nos tienen encima. pic.twitter.com/RUCVEUzXGX— VíctorSánchezdelReal (@sanchezdelreal) 11 de junio de 2019
La mesa del Congresu alcordó esti martes la distribución de los grupos parlamentarios nel hemiciclu. Los representantes del PP van siguir sentaos a la derecha del hemeciclu y, xunto a ellos, el grupu parllamentariu de Ciudadanos. El PSOE va ocupar los escaños a la izquierda de la cámara, como yá facía hasta agora. Nel centru, van situase los representantes d’Esquerra, PNV y el grupu mistu. Van compartir esti espaciu con Xuníes Podemos, cola escepción de Pablo Echenique. El diputáu por Zaragoza va ocupar un asientu nel gallineru, la única parte del salón accesible pa la so siella de ruedes.
-
Los diputaos de Vox, al gallineru del Congresu
Los 24 diputados de Vox van quedar asitiaos nel gallineru, como se conoz la última fila del Congresu de los Diputaos. Ye una de les decisiones de la mesa de la Cámara Baxa, qu’esti martes alcordó la distribución de los grupos parlamentarios nel hemiciclu. L’alcuerdu salió alantre colos votos de los cinco representantes del PSOE ya Xuníes Podemos, l’astención de los dos del PP y el votu en contra de los dos Ciudadanos.
D’esta manera, los diputaos de Vox van quedar asitiaos nes dos últime files del salón de plenos. La formacion d’ultraderecha nun tien representación nel muérganu de dirección de la Cámara Baxa. Los representantes del PP van siguir sentaos a la derecha del hemeciclu y, xunto a ellos, el grupu parllamentariu de Ciudadanos.
El PSOE va ocupar los escaños a la izquierda de la cámara, como yá facía hasta agora. Nel centru, van situase los representantes d’Esquerra, PNV y el grupu mistu. Van compartir esti espaciu con Xuníes Podemos, cola escepción de Pablo Echenique. El diputáu por Zaragoza va ocupar un asientu nel gallineru, la única parte del salón accesible pa la so siella de ruedes.
-
San Llorienzo, venti postales pa la hestoria
Xixón mira al mar. El Muséu Nicanor Piñole acueye hasta’l 29 de setiembre la esposición ‘Mirar la playa’, que presenta cerca d’un centenar de tarxetes postales de la colección del Muséu del Pueblu d’Asturies que reflexen el tresformamientu de la fachada marítima y de la sablera de San Llorienzo ente los años cuarenta y setenta.
-
Muerre Chicho Ibáñez Serrador
Muerre Chicho Ibáñez Serrador. El mundu de televisión perdió esti vienres, a los 83 años, a un pioneru de la pequeña pantalla española. Nacíu en Montevideo en 1935 y fíu d’actores, Chicho creció ente bambalines. Tres un brillosu entamu nel teatru, pel camín atopóse con un mediu naciellu: la televisión nos años 50.
En 1963 llegó a Televisión Española, con namás siete años d’emisiones. Él tenía 28 y cuntaba con esperiencia y ésitu na televisión arxentina. Anovó’l llinguaxe audiovisual n’España y llogró pa TVE dalgunos de los premios más importantes del momentu (Ninfa d’Oru en Montecarlo, Rosa d’Oru en Praga…). La serie ‘Historias para no dormir’ convirtióse nun gran ésitu qu’apavoraba cada vienres a millones d’españoles.
Anovó’l llinguaxe audiovisual n’España y llogró pa TVE dalgunos de los premios más importantes del momentu
‘Un, dos, tres… responda otra vez’ foi’l programa que más marcó a xeneraciones d’españoles. Un concursu ventureru ya innovador, que goció del favor del públicu mientres décades y que creció n’espectáculu y n’humor hasta convertise nun gran show. Nel ámbitu del entretenimientu tamién destacaron ‘El Semáforo’ o ‘Waku-waku’, y en divulgación, ‘Hablemos de sexo’, el primeru en falar abiertamente d’esti tema n’España.
Pero, amás, Chicho foi un xeniu polifacéticu. Nos sos empiezos foi un home de teatru, y con solu dos películes (‘La Residencia’ de 1969 y ‘¿Quién puede matar a un niño?’ de 1976) convertióse nun referente del xéneru fantásticu y de terror. El cine español rindió-y anguaño’l so máximu homenaxe al concede-y el Goya d’Honor 2019.
Programación especial en TVE
Chico Ibáñez Serrador ye ún de los nomes más importantes de la hestoria de la televisión n’España. Los sos programes formen parte de la memoria sentimental del país, anque nun ye menos reseñable’l so llabor como autor teatral y como director de cine. RTVE rinde tributu al xeniu que llegó a Televisión Española en 1963, onde creó formatos que revolucionaron el llinguaxe audiovisual y dieron a conocer a TVE en toa Europa.
La 1 y TVE Internacional van emitir esti vienres (22:30 hores) el documental que-y dedicó ‘Imprescindibles’ va dos años, cuando se cumplía’l 45º aniversariu del so míticu ‘Un, dos, tres… responda otra vez’. Una producción propia de RTVE, dirixida por Marisa Paniagua y Carlos Muriana y sofitada nos testimonios d’espertos, pero sobremanera nos de los sos amigos y de la xente que trabayó estrechamente con él. Directores de cine, como Álex de la Iglesia o Juan Antonio Bayona falen de la enorme influencia que, con namás dos películes, exerció Ibáñez Serrador en toa una xeneración de cineastes españoles. El documental ‘Hestories para recordar’ va emitise otra vuelta esti domingu a les 21:30 en La 2.
Creó formatos que revolucionaron el llinguaxe audiovisual y dieron a conocer a TVE en toa Europa
Depués del documental de ‘Imprescindibles’ La 1 y TVE Internacional van emitir esta nueche dos especiales de ‘Viaje al centro de la tele’ colos ‘momentazos’ del ‘Un, dos, trés…’. Un percorríu azogoso y señardoso per ún de los programes más emblemáticos y queríos de la televisión: los sos presentadores, azafates, humoristes, mítiques mascotes… Un espaciu creáu y empobinao por Chicho Ibáñez Serrador, con diez temporaes y 34 años de percorríu.
Un entrañable alcordanza que va tener continuidá’l domingu en La 2: a les 20:30 hores va emitir un capítulu de ‘Cómo nos reimos’ colos grandes risibles que fixeron dalgunes de les sos primeres apaiciones nel ‘Un, dos, trés…’: el Dúo Sacapuntas, Martes y Trece, los Morancos, Bigote Arrocet, Ángel Garó, Arévalo…
-
Joanne Chory y Sandra Myrna Díaz, Premiu Princesa d’Investigación Científica y Técnica
Les biólogues especialistes en plantes Joanne Chory (Estaos Xuníos) y Sandra Myrna Díaz (Arxentina) fueron galardonaes col Premiu Princesa d’Asturies d’Investigación Científica y Técnica 2019. Esta candidatura foi propuesta por Juan Carlos del Olmo, miembru del xuráu del Premio Princesa d’Asturies de Cooperación Internacional 2019. El so trabayu de les biólogues, por separáu, asítiase na vanguardia na llucha contra’l cambéu climáticu y los sos efectos y na defensa de la biodiversidá.
Joanne Chory (Methuen, EE. UU., 19 de marzu de 1955) graduóse en Bioloxía nel Oberlin College (Ohio) y doctoróse en Microbioloxía na Universidá de Illinois n’Urbana-Champaign en 1984. Realizó estudios postdoctorales en Harvard y en 1988 incorporar al Institutu Salk, onde ocupó diversos puestos, ente ellos el de directora d’Investigaciones y del Llaboratoriu de Bioloxía Celular y Molecular de Plantes. Dende 1997 ye investigadora del Howard Hughes Medical Institute y, dende 1999, ye tamién profesora acomuñada de la Universidá de California en San Diego. El so campu d’investigación céntrase nel estudiu de los mecanismos que regulen el funcionamientu de les plantes según les reacciones d’estes a condiciones ambientales de estrés.
El so trabayu asítiase na vanguardia na llucha contra’l cambéu climáticu y los sos efectos na biodiversidá
Ye miembru electu de The Royal Society (Premio Príncipe d’Asturies de Comunicación y Humanidaes 2011), de la American Association for the Advancement of Science (AAAS) y de l’Academia de Ciencies de Francia, ente otres.
Sandra Myrna Díaz (Bell Ville, Arxentina, 27 d’ochobre de 1961) graduóse en Bioloxía en 1984 na Universidá Nacional de Córdoba, onde se doctoró en 1989. Ente 1985 y 1991 foi becaria nel Centru d’Ecoloxía y Recursos Naturales Anovables de dicha universidá y realizó una estancia posdoctoral na Universidá de Sheffield. En 1993 tornó como profesora a la Universidá de Córdoba, onde anguaño ye investigadora del Institutu Multidisciplinario de Bioloxía Vexetal, ente otros cargos. Tamién participó n’actividaes ya informes del Panel Intergubernamental de Cambéu Climáticu y de la Convención Internacional de Diversidá Biolóxica.
Ye miembru electu, ente otres, de l’Academia Nacional de Ciencies d’Estaos Xuníos, l’Academia de Ciencies de Francia y de The Royal Society. Ente los sos numberosos galardones destaquen los premios Konex de Platino en Bioloxía y Ecoloxía, el Zayed al Lideralgu en Mediu Ambiente y el Bernardo Houssay. Acordies con Google Scholar, los sos artículos recibieron más de 40 000 cites y el so índiz h ye de 81.
Nesta edición allegaben un total d’un total de 46 candidatures procedentes de 23 países
Los Premios Princesa d’Asturies reconocen «el llabor científicu, técnica, cultural, social y humanitaria realizada por persones, instituciones, grupu de persones o d’instituciones nel ámbitu internacional». Nesta edición allegaben un total d’un total de 46 candidatures procedentes de 23 países.
Este foi’l séptimu de los ocho Premios Princesa d’Asturies que se conceden anguaño, en que cumplen el so trixésimu novena edición. Enantes fueron otorgaos el Premiu Princesa d’Asturies de les Artes al dramaturgu Peter Brook, el de Comunicación y Humanidaes al Muséu Nacional del Prau, el de Cooperación Internacional al matemáticu ya inxenieru Salman Khan y la Khan Academy, el de los Deportes a la esquiadora Lindsey Vonn, el de les Lletres a la escritora Siri Hustvedt y el de Ciencies Sociales al sociólogu Alejandro Portes. La próxima selmana va fallase’l Premiu Princesa d’Asturies de la Concordia. Caún de los Premios Princesa d’Asturies ta dotáu con una escultura de Joan Miró –símbolu representativu del galardón− un diploma, una insinia y 50.000 euros. Los galardones van ser apurríos na seronda n’Uviéu nun solemne actu presidíu por los reis d’España.